مساعد واتس
03-26-2015 05:04 PM


كعادة السواد الأعظم من السودانيين (مما تمغرب الواطا) يقوم العبد لله بالذهاب إلى (بقالة بيت المال) وهو يحمل (الجك) لشراء الفول والطعمية كوجبة عشاء روتينية لا يغيرها إلا الشديد القوي (اللي هم) الضيوف فإن كان هنالك ضيوف قمنا بعمل بعض (الحربشات) هنا وهنالك بما تسمح به الميزانية .
بالأمس وبعد أن وضع (البائع) الفول داخل الجك بحث عن تلك الأكياس الورقية السميكة ليضع داخلها (الطعمية) فلم يجدها دلف إلى داخل البقالة وأحضر وريقات من صحيفة وضع عليها الطعمية فأخذت أغراضي وعدت إلى البيت ، بينما الاسرة مجتمعة على صينية العشاء ، أمسك إبني (ناجي) الذي لم يبلغ الحلم بعد بالصحيفة التي تبللت بزيت الطعمية وأخذ يطالع فيها ثم سالني :
- إنتا يا بوي مساعد رئيس الجمهورية مش مفروض يكون سوداني
- طبعن يعني ح يكون ألماني؟
- طيب يا بوي أقرأ الخبر ده (وناولني الصحيفة ) التي كانت بتاريخ 22 أغسطس 2013، وكان الخبر يقول :
وصل مساء امس السيد جعفر الصادق الميرغني مساعد الرئيس عمر البشير الى الخرطوم قادما من العاصمة المصرية القاهرة والتي قضى فيها جزء من العيد وصام " الستوت " ، وكان السيد جعفر وصل الى القاهرة ثاني ايام عيد الفطر قادماً من مقر إقامته الدائم بلندن بعد صيام رمضان وحضور اول ايام العيد بالعاصمة البريطانية ، وكان في استقباله بمطار الخرطوم الفريق اول ركن بكري حسن صالح وزير رئاسة الجمهورية والاستاذ احمد سعد عمر وزير مجلس الوزراء وعدد من الوزراء والمسئولين.

ما إن إنتهيت من قراءة الخبر حتي إلتفت إلى (ناجي) زاجراً :
- يا ود إنتا حاسد وللا بغران؟
- كيفن يا بوي مساعد رئيس جمهورية ويكون المقر الدايم بتاعو لندن يعني يجي يقعد ليهو يومين تلاته ويرجع !!
- فيها شنو يعني .. ما ممكن يكون ممشي الوظيفة بتاعتو (وتسبة ساااكت)
- ما فاهم كيف يعني ..
- يكون قاعد السنة كووولها في لندن وعامل ليهو قروب هو وناس مكتبو في (الواتس)
- يعني يا بوي الزول الشغال هنا في الحكومة ما ضروري يمشي المكتب وممكن يوتسب !
- يوتسب شنوو يا إبني هنا الزول بشيلوهو (بدون وتسبه ذااااتو)
- وهسه المساعد ده بيصرف مرتب عااادي
- مرتب وكمان بدلات ومخصصات ... مش طوااالي بيكون مساهر و أون لاين on-line وشريحتو – الإنجليزية- (فيها رصيد) ؟
- والله يا بوي وظيفة حلوة خلاس .. لكن هو بيعرف الحاصل في البلد كيف مثلاً وهو بعيد
- ما تخلينا يا إبني ياااخ .. أفرض هو قاعد ... يعني كان ح يعرف ؟
- هو يابوي قبل ما يبقى مساعد بالواتس كان وظيفتو (القبلها) برضو بشتغلا بالواتس ؟
- والله يا ولدي الشئ البعرفو دي اول وظيفه ليهو كان بالواتس كان (بي الما واتس)
- وهسه يا بوي عااادي يقعد هناك (سنة) ويجينا كم يوم ويرجع !
- طبعن لازم يجي عشان يتفقد أحوال الرعية ويشوف الحاصل على (الشعب الفضل) شنووو .. الزيت بقي بى كم .. والرغيف بقي بى كم .. والمواصلات بقت بي كم .. ولحمة (الفتة) بقت بى كم
- والله يابوي دي قمة المسؤولية ... والله البلد دي كان لقت ليها خمسين مسؤول يديروها (بالريموت) زيو كده وهم قاعدين بره كانت ..
- كانت شنو .. يا ناجي
- كانت يا بوي لحقت أمات طه !!
- وإنتا قايلا بالشايفنو ده ما لحقت أمات طه !!
كسرة :
عشان (سعادتو) ما يتعب حقو نشيل البلد ونوديها ليهو هنااااك في مقر (إقامتو) !!

كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و
[email protected]


تعليقات 9 | إهداء 0 | زيارات 5641

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1236806 [تكس راجع]
0.00/5 (0 صوت)

03-29-2015 11:56 AM
مساعدحلة

[تكس راجع]

#1236685 [محمد شطة]
0.00/5 (0 صوت)

03-29-2015 09:53 AM
جاى يجدد الاقامة ويرجع

[محمد شطة]

#1236646 [جنو منو]
0.00/5 (0 صوت)

03-29-2015 09:19 AM
غايتو ياسيد جبرة الظاهر العداد بتاعك رامى كويس .. بدليل الجك كل يوم ملىء بالفول وكمان طعمية
وقولت لى معاه حربشات ثانية .. والله انت فى نعمة كبيرة خلاص .. احمد ربك ساكت ..مسالة العشاء دى اندثرت منذ أن اتوا هؤلاء الخوارج .. الشغلانة بقت وجبتين بالكاد الساعة واحدة والساعة ستة .. وهذا
بما تيسر.. وفى رواية أخرى وجبة واحدة..!!

[جنو منو]

#1236391 [مش احسن من وزيرالتربية والوالي القاعدين ساكت!!!!]
0.00/5 (0 صوت)

03-28-2015 10:11 PM
الراجل محترم نفسو وقاعدبره!!!احسن من القاعدين ومؤذين!!!يعني اشراف ساكت!!عشان مافي زول سوا ولا عمل!!!لوزم المشاركة بس!!!عشان كان اتكفت يقولو كنا زعلانيين وبره قاعدين وللوظيفة رافضين وقابضين!!!مادي الساسة والكياسة في سودان العواسة!!!!

بعدين مسعول من الخير!!جنازة البحردي كفاية عليها الواتسب!!!!محتاجة للهيلمانه دي كلها!!عشان يديروا شنو!!!!!!!!!!!!

[مش احسن من وزيرالتربية والوالي القاعدين ساكت!!!!]

#1235482 [الدرب الطويل]
5.00/5 (1 صوت)

03-26-2015 11:42 PM
ههههههههه.. من شر البلية ما يضحك..
الصنم الاكبر شغال هزاز لا اسمع لا ارى لا اتكلم..
جعفورى الدغلوبى عامل كسوف وخسوف كلي.. حتى فى الواتس قروب ما ظاهر إمكن شريحتو ما فيها رصيد..
حسونة نافش ريشو زى الديك بتاع المصارعة التايلاندية.. قال عندو مفاجأة يوم الجمعة وانو حيحل مشاكل البلد فى ١٨٠ يوم..

مدد.. مدد .. مدد يا DVD الحسن ابو جلابية..

[الدرب الطويل]

#1235476 [kaka]
0.00/5 (0 صوت)

03-26-2015 11:21 PM
الليلة نحنا ما فاضين ليك ... نحنا مع السعودية والحوثيين ديل !

[kaka]

#1235374 [hassan]
0.00/5 (0 صوت)

03-26-2015 06:39 PM
اخبار تنفيذ توجيهات سيادتو بخصوص سن المعاش وصلت وين

دايرين حقنا قبل الانتخابات

لانو بعدها حقنا يكون راح

وتبقي مملطشة من لجنة الي لجنة للانتخابات الجاية

لو في العمر لسة نفس

[hassan]

#1235372 [البعير]
0.00/5 (0 صوت)

03-26-2015 06:38 PM
يا استاذ الفاتح جبرة والله ماشاءالله عليكم انتو لحدي الان بتعشوا ياخي العشاء ده الناس خلوا من زمن ثورة الدمار الشامل دي مسكة الحكم بانقلابهم الشؤم ، بس انت ما تكون بقيت من جماعة مساعد الواتس

[البعير]

#1235356 [f]
0.00/5 (0 صوت)

03-26-2015 06:12 PM
شر البلية ما يضحك يا أخ جبرة وحسه أخوه عايز يبقى نائب الرئيس عشان يشيل الرئيس وبعد داك نبدأ مسلسل السلطان وأبناءه خبوب لاوطني النسخة الجديدة

[f]

الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة