وجه الشبه
03-29-2015 04:15 PM


الماهية _ نترات البوتاسيوم : كلتاهما سريعة الذوبان
الحكومة – الأمومة : الحنية وكده!
مطار الخرطوم – إستاد الخرطوم : (دولية كلام ساي)
البنقو – التصريحات : مذهبات للعقل
الحلو مر – مساعد الرئيس : نراهما مرة في السنة
الصبغة – النقة : يؤديان إلى موت الزوج (بس الصبغة سريعه شوية !)
النفرة – الوثبة : نسمع بهما ولا نراهما
الملاريا – الجبايات : يجعلان (الزول) يهضرب
درج النائب العام – التلاجة : التبريد في كل
الزير – الوزير : (النقاطة)
الانتخابات – الامتحانات : التزوير
رخصة القيادة – رخصة العيادة : الإتنين كان قبضوك ما شايلهم عادي تواصل سيرك
التمباك – المنصب : السف طبعا
الرشوة – العمولة : قروش حرام (بس العمولة أنيقة شوية وكدة)
الرغيف – الأميبا : لا يمكن رؤيتهما بالعين المجردة
الذبحة _ الخريف : يأتيان فجأة
السفارة _ الحراسة : يمارس داخلهم التعذيب
المستشفيات – المطاعم : أنسب مكان لتربية الكدايس
شرطي المرور – الحفرة : لمن يشوفهم المواطن (بيزوغ) منهم
العلاج بالأعشاب – نرد الطاولة (إنتا وحظك)
الموظف – المسجون : الإتنين ما راضين بالحتة الهم فيها
نزلة البرد – أبوالشهيق : كلاهما من من الأمراض التي تعجل بسفر المسؤولين للعلاج بالخارج
دار الفنانين – الادبخانة : الإتنين الزول بيمشي ليهم مزنوق (الأولي لي حفلة طبعن)
صالة الأفراح – صالة المغادرة : الناس الجواهم بيكونو مبسوطين
شارع الخرطوم مدني – الديناميت : كلاهما من اسلحة الدمار الشامل
الموية – الكهرباء : يتم الدفع قبل الإستهلاك و(دايما) قاطعات
الترزي – المشرعين : (التفصيل حسب الطلب والمقاس)
المعلق الرياضي – المحلل السياسي : كانت رغبتهم يكونو كده لمن يكبرو
الوداعية – الإرصاد : يا (لفقت) يا (خابت)
التوجيهات الرئاسية – التلج : ننتظرها حتى تذوووب
الطبيب – القاضي : يأتيان بعد ان يأتي المرضي والمتقاضين (بي مساااافه)
الطيارة – السيارة : الإتنين ممكن يجو طافين نور
التحلل – الإستيكة : يستخدمان لمحو الأخطاء
هي لله – لا للسلطة ولا لللجاه : كلتاهما اختفتا في ظروف غامضة
الزوجة – الحكومة : عايزين طواااالي
حرف لن – علامة الصلاة : كلتاهما من ادوات النصب
النفايات – الإعلانات : أكتر ما تمتلئ به شوارع الخرطوم
البنقز – المسؤول : كلاهما عندما يتم تسخينهما يصدران أصواتاً عالية
الأدوية – الأسبيرات : كوووولها ضاربة (بس الاولى بتلحق أمات طه )
كسرة :
الحكومة – المواطن : (الإتنين عايشين رزق اليوم باليوم)


تعليقات 16 | إهداء 0 | زيارات 6177

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1237679 [quickly]
0.00/5 (0 صوت)

03-30-2015 04:47 PM
الهوت دوق والبيتزا ياجبراااا؟
وين الوووات بتاعتك الليلة ؟

[quickly]

#1237461 [خالد فارس]
0.00/5 (0 صوت)

03-30-2015 11:06 AM
1-غسيل الاموال وغسيل الملابس صابون الوزير
2-النفره والغفله شمعات الحكومة
3-وزارة العمل وديوان جدي المعني واحد(لزوم الونسة بالواتساب)

[خالد فارس]

#1237430 [عادل احمد]
0.00/5 (0 صوت)

03-30-2015 10:29 AM
وين باقي الكسرات . باين عليك يا استاذ جبرا يئست ولا شنو ؟

[عادل احمد]

#1237373 [أسامة عبد المنعم]
0.00/5 (0 صوت)

03-30-2015 09:20 AM
التحية لك أستاذ الفاتح
دائماً تجعلنا نضحك من الهم والغم الذى نعيشه فى وطننا الحبيب .

شكراً لك ومتعك الله بالصحة والعافية

[أسامة عبد المنعم]

#1237346 [جنو منو]
5.00/5 (1 صوت)

03-30-2015 08:59 AM
الظاهر أمس تقلت فى الفول والطعمية ..

[جنو منو]

#1237120 [المحاسب]
0.00/5 (0 صوت)

03-29-2015 09:15 PM
حرب اليمن _ انتخابات الأصم : ملايين رايحة و مليارات داخلة .

[المحاسب]

#1237079 [ربوع السودان]
4.50/5 (2 صوت)

03-29-2015 07:42 PM
الكسرات والآذان في مالطة مافي فايدة

[ربوع السودان]

#1237073 [ودالبله]
5.00/5 (2 صوت)

03-29-2015 07:38 PM
سجل واواتك .. ماانت العسل ذاتك .. اوعه يكون الجماعه شالو العدة ...

[ودالبله]

#1237062 [محمد]
4.00/5 (1 صوت)

03-29-2015 07:11 PM
"الزوجة – الحكومة : عايزين طواااالي" عايزين شنو؟؟؟!!! دي قوية شديد !!!! متعك الله بالصحة والعافية

[محمد]

#1237060 [محمد]
0.00/5 (0 صوت)

03-29-2015 07:09 PM
"الزوجة – الحكومة : عايزين طواااالي" عايزين شنو ؟؟؟!!! دي فوية شديد !!!! متعك الله بالصحة والعافية

[محمد]

#1237014 [ود الحاجة]
0.00/5 (0 صوت)

03-29-2015 05:28 PM
دار الفنانين – الادبخانة : الإتنين الزول بيمشي ليهم مزنوق >>>> ههههههه يعني ما الدخول بالكراع الشمال ... والله يا أستاذ إنتا لماح وذكي ربنا يخليك ...

[ود الحاجة]

#1237006 [Awad]
5.00/5 (1 صوت)

03-29-2015 05:13 PM
حاويات المخدرات- القضاء- براءة المتهمين- باى باى القانون الذى لحق أمات طه.الأشتراك فى حرب اليمن-بيع الملالى- ملىء الخزينة الخاوية على عروشها.مبيدات المتعافى المضروبة- أنتشار السرطانات.الفلل والعمارات السوامق- السرقة المحلله(رزق ساقه الله لنا)- 4طائرات مشتركة فى حرب اليمن- فرحة أهل كاودا من غياب رمى البراميل المتفجرة.

[Awad]

#1237001 [amin]
5.00/5 (1 صوت)

03-29-2015 05:08 PM
وين الكسرات ولا نسيتها ولاما في صنف اليوم ولافي مفاجات قادمة لقيت خط هيثرو والملف طلع من النايب العام ولا قالوا ليك كفاية كده ولا الحبس
مع تحياتي

[amin]

#1236999 [عثمان]
0.00/5 (0 صوت)

03-29-2015 05:03 PM
ابدااااااااااااع وكفى

[عثمان]

#1236985 [الدرب الطويل]
4.50/5 (2 صوت)

03-29-2015 04:44 PM
ياخ انت كل يوم بتتفوق على نفسك.. كل يوم مقال ساخر اروع من سابقه.. يديك العافية..

- دار الفنانين – الادبخانة : الإتنين الزول بيمشي ليهم مزنوق (الأولي لي حفلة طبعن).. والاتنين بخشوهم بالكراع الشمال ههههههه..

[الدرب الطويل]

#1236980 [العشر المنتظر يقوم ليه شوك]
5.00/5 (1 صوت)

03-29-2015 04:34 PM
الليلة خط هيثرووووووووووووووووو مشي اليمن ولا شنو ياجبرة تشكر يا استاذ انت مقالاتك ذي عصير الكركدي البارد في سخانة الخرطوم دي

[العشر المنتظر يقوم ليه شوك]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة