المقالات
السياسة
مسدار الصمود لمكافحة السدود
مسدار الصمود لمكافحة السدود
12-03-2015 12:45 PM


(مسدار الصمود لمناهضة السدود)

يا عمر البشير هاك قولي واضح ودغري
وأرخي لي أضانك ، لو بتسمع وتدري
سكان الشمال عاشوا الكفاف والعُسْرِ
جاي تشرِّدُن وتجيب مكانُنْ مصري ؟
***
بني فرعون زمان خدعوا الرئيس عبّود
وغرّقوا حلفا ماصانوا إتفاق وعهود
لا جات كهربة لا مدّوا سلك وعمود
ولا شايفين طريق عبر الحدود ممدود
***
وسد مروي الفشنك كهربتو طلعت كذْبة
والمنصوري فارق لي ترابو الخصبة
يزرف في الدموع لفراق أهل وأحبّة
والأرض القبيل فيها اتولد وإتربّى
***
والرفض الرحيل وسكن ضفاف السد
نادب حظّو والكان قد بناهو اتهد
بابوره بيدور بالجاز ، حقيقة وجد
وعايش في ضلام بالحسرة كاتلو نكد
***
أسمع يا البشير هاك الكلام مكشوف
نجيضاً ماهو ني خاتي الخجل والخوف
من قومة الجهل كاتلانا حِرّة جوف
وحا نقاوم سدودك بي حراب وسيوف
***
إرثاً من قديم ورّثنا ليهو إمام
وسلّ السيف وكبّر فوق حصان بلجام
وحّد للقبائل عاشوا وُد وسلام
وطرد الإنجليز قِدّامُو كالأنعام
***
دقنة من الشرق والغرب علي دينار
معَ ود النجومي .. الفارس المغوار
كوّنوا للجيوش من كل قبيلة ودار
وحرروا للوطن من غازي دني غدّار
***
وبي (فرّق تسُد) فرّقتوا كل الناس
وزرعتوا الفتن قامت حروب ودواس
بسياسة اليهود .. الغاصبين انجاس
شرّدتوا الشباب الكلّو خير وحماس
***
القِطْ جوّه قفصو بكون ولوف وحنين
وما بهاجم أحد في طبعو دايماً لين
وإن هاجمته يوم شايل معاك سكّين
بي خربش وشيك ويقدد العينين
***
ما شلنا السلاح أبداً زمانا الفات
وحباً في الوطن ضحّينا نكران ذات
معارضين باحترام هجرة وسفر وشتات
وفي حماية الأرض نلدغ كما الحيّات
***
وأيّ قِطار يجينا ملان حديد ومواد
وماشي علي السدود بنقولو أرجع صاد
يا سمع الكلام من دون نقاش وعناد
ويا ولّعنا نيران صار حطام ورماد
***
واسمعوا قولي زين يا عصابة الخرطوم
حالفين باليمين في أرضنا سد ما يقوم
إلاّ نموت جميع نرحل إلى القيّوم
نكون تحت التراب في قبورنا ينعق بوم
***
وإن درتوا الدواس بالدانة والدبابة
أولادنا القبيل كانوا الأسود في الغابة
ليهم هيبة وسط الجيش حضور ومهابة
وإن جيتونا بي نهدِر نسوّي حرابة
***
ضرب الدانة والجيم والكلاشنكوف
أسألوا منها الفي وطنا صار معروف
في الجيش بقى علم بشجاعتو كان موصوف
ومرفوع راسو فارساً ما بيعرف الخوف
***
زمان وقت العدم ما كنتو بتفقدونا
وإن جابكم طريق ما كنتو بي تغشونا
حين ظهر الدهب فتّحتو وعرفتونا ؟
لحس الكوع تضوقوه يوم تجوا تطردونا
***
والعصبية نتركا نبقى وحدة قويّة
من كجبار لدال وشريك مع العبيدية
تتوحّد صفوفنا جميع نصفّي النيّة
لنحطّم عَرِشْ حُكّام بقولنا أذيّة
***
نتواعد جميع يوم جمعة تبقى أكيدة
من جوّه المساجد تبدأ ثورة فريدة
في أرض الشمال نشعل شرارة جديدة
تحرق للحكومة الطاغية فاسدة عنيدة
***
وحكومة الفساد نبقالا شوكة حوت
بتتعارض تقيف .. لابتتبلع لا تفوت
وإن دايرين دُواس تلقونا نحن شفوت
وصامدين في ثبات وآخر شهيدنا يموت
***
إستووا في الختام إتحازوا اقيفوا صفوف
خلاس الكيل طفح قد ولّى عهد الخوف
أرفعوا للهتاف دقّوا النحاس ودفوف
لنهدِر وننتفض في كل قرية نطوف
[email protected]


تعليقات 3 | إهداء 0 | زيارات 4962

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1380015 [رياض]
1.00/5 (1 صوت)

12-04-2015 09:57 AM
فعلا ماساة عبود لن تعودوطيلة كل الحكومات العسكرية منذ الاستقلال درجت علي اهمال مناطق النوبة لأجل طمس الهوية النوبية ولكن هيهات كلما زاد بِنَا الغدر والخسة نزيد تشبثا بالأرض والإرث وان حرقو نخلة سنشتل الف نخلة وان وضعو حجرا لبناء سد سنكسر بها الاصبع التي وضعت وان إنسان النوبه قبل نصف قرن ليس إنسان النوبة الان ولا يلدغ المؤمن من الجحر مرتين وشعارنا الله النوبة ثم الوطن وستعلنها عالية لااااااااااااااا للسدود لادال ولا كجبار في بلاد النوبة نحن احرار سترددها حناجرنا ماحيينا وباطن الارض اشرف لنا بعزة عن فوقها بذلة ولانامت اعين الجبناء والمتخاذلين

[رياض]

#1379868 [كوشن تود]
1.00/5 (1 صوت)

12-03-2015 08:19 PM
يا بشيرأنت فصلت جنوبنا الحبيب وكتلت أهلنا وأطفالنا في الجبال ودارفور والأنقسناوكتلت شبابنا في شوارع الخرطوم ومدني وبور سودان ومن قبلهم كتلت الشاب مجدي محجوب لا لشئ بل لأنه وارث وأنت معدوم ( الفقر ليس عيبا ولكن العيب أن تسرق وتقتل ) .

يا بشير أنت غدرت بالمناصير.


يا بشير أنت أن شاء الله نهايتك في دال.


وليس قذافي وبن علي منك ببعيد

[كوشن تود]

#1379666 [سمير حامد شريف]
1.00/5 (1 صوت)

12-03-2015 01:37 PM
عفارم عليك كفيت ووفيت دل الكلام

[سمير حامد شريف]

عزالدين حسن محجوب
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة