المقالات
السياسة
قريباً.. ترقبوا.. عطلة سرية!!
قريباً.. ترقبوا.. عطلة سرية!!
04-02-2015 11:54 PM


رغم أن القارئ – غالباً- سيغضب مني و(يأخذ في خاطره) بسبب هذه السطور إلا أنني مضطر لتنبيه المفوضية القومية للانتخابات إلى (فخ) قد يقعوا فيه.
حسب الجدول الزمني للعملية الانتخابية.. تنتهي الفترة المسموح بها للحملة الانتخابية بعد أسبوع، أي يوم الجمعة 10 أبريل 2015.. ويصوم الجميع عن أية دعاية انتخابية، وهو ما يُسمى بـ(الصمت الانتخابي) لمدة يومين.. هما السبت والأحد.. ثم الاقتراع يوم الإثنين 13 أبريل 2015.
طبعاً الفكرة (الذكية!!!) واضحة جداً.. الصمت الانتخابي يتمدد إلى يوم الأحد.. ويبدأ الاقتراع يوم الإثنين.. والسبب هو أغلب الظن الحكومة تنوي منح الشعب (عطلة رسمية) أيام الاقتراع.. وخشيت الحكومة لو وصلت يوم الاقتراع بالعطلة الأسبوعية أن تشجع المواطنين على السفر للولايات كما يفعلون عادة في الأعياد إذ ستصبح العطلة متمددة من نهاية يوم الخميس حتى نهاية أيام الاقتراع أي حسبة حوالي أسبوع كامل تقريباً.. وعندها لن تجد من يصوت لأن الناخبين الذين يسافرون إلى ذويهم في الولايات مثلاً.. لا يمكنهم التصويت إلا في موقع تسجيلهم.. وهو في المدينة التي يقيمون بها مثل العاصمة..
حسناً.. أغلب الظن عندي.. أن الحكومة ستلعب مع الشعب لعبة (توم آند جيري).. لن تعلن عطلة الانتخابات الآن.. حتى لا تمنح فرصة كافية للتفكير والتخطيط لاغتنامها عطلة مع الأهل والأقارب في الموطن الأصلي..
الحكومة (حا تعمل رايحه) حتى يوم الأحد.. وهو يوم عمل رسمي.. فتضيع فرصة اغتنام يومي الجمعة والسبت للسفر.. ثم تباغت الناس بإعلان (يوم غدٍ عطلة).. أي يوم الإثنين بداية الاقتراع عطلة رسمية حتى نهاية الانتخابات.. حتى لا يكون أمام سكان العاصمة والمدن فرصة سوى البقاء في منازلهم أيام الاقتراع.. عسى ولعل يتكبدوا مشاق الذهاب إلى مقار التصويت..
الحكومة ستعلن العطلة لمدة يوم واحد فقط هو الإثنين 13 أبريل.. وعندما يوشك اليوم على التلاشي.. تعلن اليوم التالي عطلة أيضاً.. أي عطلة بالتقسيط.. وهو أيضاً من باب مكافحة (ضعف النفوس) الذين سيسافرون إذا حظوا بيومين (متجاورين) أو أكثر عطلة..
نصيحتي لمفوضية الانتخابات.. أن تقنع الحكومة بخطل هذه الفكرة.. فكرة العطلة المباغتة خلال أيام الاقتراع.. فالمواطن السوداني في العطلة يقيد حركته في أصغر دائرة ويرفع منسوب الاجتماعيات.. زيارات أو (ونسات).. ومثل هذه البرامج تضعف التفكير في الذهاب إلى مراكز الاقتراع.. بل – وهو الأخطر- اللقاءات وجلسات الأنس الاجتماعية تساعد على زيادة جرعة عدوى مقاطعة الانتخابات.. لأنها توفر بيئة تواصل اجتماعي ناقلة للأفكار والرأي الآخر.. ومعلوم أن (الرأي الآخر) هذه الأيام غالب وطافح جداً.. فيتمدد أكثر بالاتصال الاجتماعي المباشر.
خلاصة نصيحتي.. لا تعلنوا عطلة رسمية أيام الاقتراع.. ليس كل شعب السودان موظفين أو عاملين في الحكومة.. طائفة كبيرة من أصحاب المهن الحرة يخسرون كثيراً بالعطلات العشوائية مثل هذه..
أتركوا الناس لأعمالهم.. والتصويت (قسمة ونصيب)..!!

التيار


تعليقات 17 | إهداء 0 | زيارات 5030

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1240821 [جنو منو]
0.00/5 (0 صوت)

04-05-2015 10:12 AM
ومنو القال ليك نحن ما غضبانيين منك .. غضبانيين ونص وخمسة .. لانو تفتكرونا قراء سذج .. وليس
لدينا عقول نفلفل بيها ماتكتبون وتطبلون وتنصحون .. لقد قرفنا من هذا الهراء الذى تكتبون.. تاتى
اليوم ناصحا بعد أن أنكسر المرق وتشتت الرصاص ..لبقية الشعب رب يحمية .. قال اية اتركوا الناس
لاعمالهم .. هو كان فى عمل كان وصلنا الى هذة الحال البئيس .. تبا لكم !!!

[جنو منو]

#1240401 [الصامت]
5.00/5 (1 صوت)

04-04-2015 02:24 PM
انت تنصح ومحتاج للنصيحة بمواضيع اقل ما توصف بالخباثة والاساليبالممجوجة تحتاج لوقفك صادقة مع نفسك واقتطع قليلا منزمنك الغالى وتجول بشارع المستشفى وبمواقف المواصلات واسواق الخضار واكتب لنا ماترى ياعنترة

[الصامت]

#1240303 [الباشا]
5.00/5 (1 صوت)

04-04-2015 10:48 AM
رغم أن القارئ – غالباً- سيغضب مني و(يأخذ في خاطره) بسبب هذه السطور إلا أنني مضطر لتنبيه المفوضية بتعلم تماما ليس غضبانيين منك فقط بل نتقيا من سخافتك وكلامك السمج ايها الخبيسث
معلوم نتيجة الانتخابات سلفا حتى الحمير والطير والحجر اما انت صاحب القلم الخبيث لعية مكشوفة والعب غيرها

[الباشا]

#1240211 [TABID]
5.00/5 (1 صوت)

04-04-2015 07:54 AM
لو تيقن سدنة المؤتمر الوطمى بان الحكم لله يعز من يشاء ويذل من يشاء ما تكبوا مشاق الخج

[TABID]

#1240104 [حموري]
0.00/5 (0 صوت)

04-03-2015 09:02 PM
فكرتك يا عثمان زي فكرة احد اعضاء المفوضية قال : ما في واحد في الخدمة المدنية او العسكرية يصرف مرتيه الا بعد التاكد من أنه أدلى بصوته --- و رد عليه رئيس المفوضية و فال : النسوان القاعدات في البيوت نعمل ليهم شنو ؟ --
التصويت واقع في منتصف الشهر يعني الناس ( مقشطة ) و ما في طريقة سفر ---- و لا في واحد عندو نفس عشان يقيف في الصف و يصوت --- و بعدين يفوز المرشح و يقعد في البرلمان و الحكومة تجيب زيادات في الاسعار و يجيزها العضو البرلماني و معها تصفق و تصفير و تهليل و تكبير ---
مواطن تاني يمشي يصوت لاعدائه مافي --- زي ما صفقتوا زمان في رفع الاسعار و رفع العدم عن المحروقات المزعوم --- المرة دي نصفق انحنا بفشل الانتخابات --
هذه بتلك و البادي أظلم --

[حموري]

#1240081 [كمال]
0.00/5 (0 صوت)

04-03-2015 07:17 PM
والله اول مرةاعرف ان الانتخابات يوم 13 ابريل

اي زول سالتو قبل كده ( الانتخابات متين ؟ ) رد بانه ( ماعارف )

[كمال]

#1239991 [زول عادى]
0.00/5 (0 صوت)

04-03-2015 02:39 PM
يا جثمان ميرغنى ليه ما عايز تسيب كتاباتك الخبيثه دى .. انت يا عصمان عايز تلفت نظر الحيوان عشان ينتبه لمسألة الاجازات دى لأنك تعلم تماما ان هؤلاء الاغبياء سوف يغفلون هذه النقطه المفصليه وطبعا هذا المقال الذى ظاهره الرحمه وباطنه العذاب هو مساهمه منك فى انجاح الانتخابات ومنحها بعض الزخم

[زول عادى]

#1239975 [zaino]
0.00/5 (0 صوت)

04-03-2015 01:43 PM
ياود ميرغني بئيس الراي رايك داير تنبه الحكومة ماتعطي فرصة للناس عشان يرتاحو من التصويت موش دا رايك - انا المستغرب ليها ليش ناس الراكوبة يعطو هذا الكوز فرصة يكتب فيها - ماتقولو حرية الراي اى شخص من طرف الحكومة ما عندو راي في الراكوبة

[zaino]

#1239961 [شبتاكا]
0.00/5 (0 صوت)

04-03-2015 01:02 PM
العرور بيتباهى بان اولاده الطيارين بتاعين طيارات الانتنوف البتضرب اطفال جبال النوبه والانقسنا ودارفور بيحلقو هسع فى سماء اليمن واعتقد بانهم بيرشو حلاوة وورود على الشعب اليهودى فى اليمن وهو بفعلته بيدافع عن امن الحرميين لان الشيعة الكفار بيهددوه بالكيماوى بتاع صدام الزمان ما سمع كلامهم ورشاه على اليهود من ال سعود كما بحت بذلك حلاقيم اخوان نسيبه فى شوارع الخرطوم وقام سرقوه الحوثيين وجماعة على عبد الله صالح ....العرور نسى تماما كسفته بتاعت رجيع الطياره الانحشر فيها متخفيا ليبارك ويشارك فى تنصيب الرئيس الايرانى الجديد ولحس اهانة السلطات السعودية لما كشته زى ما بتكش غلابة اولاد وطنه الفارين من الدمار والفساد الذى احدثه اخوانه المتاسلمون المتمكنون من كل مفاصل الحياة بوطنه المنكوب ...اخوان نسيبه بعد ان اهلكو الزرع والضرع اكتشفو فجاة ان مراكز التشيع التى سمحو بانشائها طوال فترة التمكين وبمساعدة اجهزة المخابرات الايرانيه انها رجس من عمل الشيطان وانها تسئ لصحابة رسول الله وبعد ربع قرن تمكين وبيوت اشباح وشرزمة لقوى المعارضة وتهريب سلاح لاحداث الفتن فى مصر وليبيا ودعم كيزان حماس بمشورة وادارة خبراء ورثة جهاز السافاك فجاة اكتشفو انهم سنيين على السكين وان امن الحرميين خط احمر
الكيزان وبفكرهم الساقط وكرامتهم المنتهكة يظنون وهم واهمون بان تساقطهم على الملك سلمان سيجلب عليهم النفع ويمدد من عمر دكتاتوريتهم الساقطة حتما ولعل تهافت عرورهم الساذج وتصريحاته العبيطه بابتعاث لواء كامل من جيشه المحطم لمحرقة اليمن وامانى خاله الاكثر عبطا باشاعة خبر ضخ اربعة مليارات من السعوديه واغراق اجهزتهم الاعلامية فى السفسطة الفارغة عن عودة السودان الى حاضنته السنيه وانخراطه كتابع وضيع لدول الخليج وبانتهازيه مقرفة فيه مصلحة لمعايش الناس ونسو وتناسو بان موارد السودان التى اهدروها بفسادهم ممكن ان تمول كل العالم
شعبنا الطيب الكيزان ما عندهم كرامة واى فرد منهم على الاطلاق لما تفتش حياته الشخصيه تكتشف كارثة اخلاقية وتهافت عرورهم بهذا الشكل المقذذ لتلقى لهبات السعوديه يؤكد لنا بضرورة الخروج العفوى لاقتلاع جزور العفن الاخوانى

[شبتاكا]

#1239918 [السهم]
5.00/5 (1 صوت)

04-03-2015 09:47 AM
فكرة ذكية والله ذكرتنا يا عثمان الله يذكرك الشهادة .. نحن مالنا ومال التصويت لفضل شعيب او البشير او الداقير .. امي قاعدة في الشمالية هي واختي الكبيرة ودي فكرة امشي الخميس بالليل واقضي الجمعة والسبت والاحد والاثنين ..ولو واحد سألني بقولوا انا صوت للشجرة .. وهنا خلاص ما في حد حا يتجرأ يسالني .. وطبعا كل المدراء والمسئولين خايفين على مناصبهم في التوزيعة الجديدة عشان كدا ما في حد فاضي يدوش رأس التاني..
لكن انا عرفت وتأكد لي سوا شاركنا ام لم نشارك المؤتمر الوطني فايز طيب طالما هو فايز انا ليه متعب روحي واشارك في الاثم والعدوان

[السهم]

#1239916 [ساتي ودعيسى]
0.00/5 (0 صوت)

04-03-2015 09:42 AM
بئست النصيحةللحكومة النطيحة من كتاب التسبيحة...

[ساتي ودعيسى]

#1239906 [تجان مصطفي]
0.00/5 (0 صوت)

04-03-2015 09:00 AM
.. أنا مثلاَ واظن يتفق معي غالبية الشعب السوداني لن نصوت حتي لو جابوا لينا الصندوق جوة البيت .. ليس بأمر مايسمي بالمعارضة ولكن قناعات داخلية بان نتيجة هذه الأنتخابات محسومة وانا اكاد اجزم بان عدد الدوائر التي سيفوز بها المؤتمر الوطني معلومة وكذلك تلك التي تم رميها لكلاب احزاب الفكة الجيعانة معروفة وكل شئ محسوب بدقة .. الكيزان ياعثمان مرغني وانت كنت منهم ولعلك لازلت لايرضون ان يخسروا مقعد في اتحاد طلاب مدرسة ثانوية .. ناهيك عن كراسي وثيرة وعربات فارهة ومخصصات بلاحدود وصفقات وعمولات وسمسرة ... الخ ... الخ .. لن أرضي بأن أكون تمومة جرتق ولن اشارك في تشييع جثمان في داخله كلب ميت فطيسة .. اعوذ بالله ياقول .. عثمان الآخر ..

[تجان مصطفي]

#1239901 [صالح عام]
0.00/5 (0 صوت)

04-03-2015 08:49 AM
يا عثمان انت عامل نفسك ذكى انت خائف الناس تسافر وجريدة التيار ما تلقى زول يشتريها يعنى تبور

[صالح عام]

#1239898 [الحلومر]
5.00/5 (1 صوت)

04-03-2015 08:35 AM
انتخابات السكر كل واحد يجيب معاهو شوية شاي وشريط كاست واغنية يا حمام شتت ليك سكر حم ،حم والسكر الفاسد يسممكم ويوم الاقتراع تكون في مستشفى الزيتونة وتناول وجبة قعونج دافيء تعيد النشاط الحيوية للاستمرار في كذبة انتخابات ابريل لمنح الشرعية لحكومة تعشق الفساد... مبروك الفوز مقدماً

[الحلومر]

#1239897 [صادميم]
0.00/5 (0 صوت)

04-03-2015 08:34 AM
بصراحة انت معانا ولا مع الخيانة لأنو انا شايف انه العطلة دي هي الفائدة الوحيدة للانتخابات المعروف نتيجتها سلفاً.

[صادميم]

#1239886 [الأصم]
0.00/5 (0 صوت)

04-03-2015 07:09 AM
و هو الماشي يصوت منو ؟؟ الا انت بس !!

[الأصم]

#1239872 [مسلم]
0.00/5 (0 صوت)

04-03-2015 04:30 AM
ارحل

[مسلم]

عثمان ميرغني
عثمان ميرغني

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة