المقالات
السياسة
لسان حال لقاء الترابى وفاروق ابو عيسي بعد الافراج عن الاخير.
لسان حال لقاء الترابى وفاروق ابو عيسي بعد الافراج عن الاخير.
04-13-2015 08:22 AM

بسم الله الرحمن الرحيم

لسان حال لقاء الترابى وفاروق ابو عيسي بعد الافراج عن الاخير..

بدا اللقاء حميمياً رغم سمة الجدية والرسمية المتعمدة من الطرفين في الوهله الاولى.
ارتسمت نظرة حزن عميقة غير خافية فى وجه الشيخ الترابى خبيرالتعبير بكل اعضاء جسده لا سيما وجهه.
سرعان ما تلاشت الجديه بعد خروج الحواريين والسواق الخاص للترابى وخلو الرجلين ببعض..
الترابى:- السلام عليكم يا فاروق والحمد لله على سلامتك .. البركة ان الله مرقك من المجنون دا ..
ابوعيسى:- يضحك ضحكة متهالكة ويتقبل حمد الترابى له بالسلامة؛ ويضيف كنتم السابقون ونحن اللاحقون..
الترابى:- ينهنه "اه وياه واااه ووووه ولا يعلق بمفيد قبل ان يختم بتلك الضحكة المعروفة..
ابوعيسى:- تفتكر كدا يا حسن؟! ما اظنكم تقدروا، الزول دا مرقكم خلاص ومسك الدرب براهو..(سبحان الله فاروق فهم النهنهات الترابية)..
الترابى:- تقصد عيارو فلت زي زولكم ؟؟ (خلاص الترابى بدا يتثعلب)
ابوعيسى:- نهنهة صغيرة لا لا دا زمن غير الزمن داك وزولنا ما برضو عيارو فلت عليكم كمان وكان جاييكم يريح السودان منكم لكن انتوا عرفتوها.. هاهاهاهاها.. وجيبتو للناس غداء في ابريل؛ لكن يا توتو انتم ما اتعلمتوا الدرس مطلقا. هسى الجيش ده كلو ما لقيت غير اب راسا قوى وفاضي دا تجيبوا لينا بطل لمسرحيتك .. هاهاهاهاها..(تغيير اسم الترابى الى توتو بداية النفاق).
الترابى:- شوف يا فوفو انت عندك خبرة فى العمل مع ديكتاتور!! وعارف انو ما بتديهو كل الخيوط؛ فى خيوط لازم تكون عندك، عشان كان قبل عليك تقدر تضغطو بيها..صاح انا جيبتو طرطور لكن وليداتي خانوا الثقة والامانة وفتحوا ليه راسو القولت عليهو فاضي دا من وراي هاهاهاهاها وفرعنوه علي .. لكن اطمنك هو لحدى هسى عندي طريقة اضمنو في جيبى الخلفي ها هااه اهه اهوو وواااه.. (تلك القهقهات)
ابوعيسى:- يا توتو العساكر ديل ما عندهم امان .. معليش تشرب شنو ما سالتك؟.
الترابى:- يا فوفو انا بعد الدقة بتاعت كندا وعامل السن البول بقى يجري ساي احيانا، وبقيت ممنوع من حاجات كتيرة وبشرب بي حساب ومواقيت.. لكن اقوليك "خلي الرهيفة تنقد اليوم" جيب عصير برتقال خالي سكر .. كتر خير الخواجات عملو لينا وصف ومخرج لاي حاجة .. حتى لى زولى الما زى زولك..
ابوعيسى:- يا ود جيب عصير لي شيخ حسن (لاحظ تغيير الاسم) قلت لي يا توتو الخواجات عملوا ليكم مخرج للبول وللزول كمان .. هاها ها..
الترابى:- انا متوضئ يلا نصلي مع بعض وندعوا الله افكنا من الخازوق دا!..(العودة الى النفاق الدينى)..
ابوعيسى:- معليش يا توتو انا مابقدر اقيف بصلى قاعد يازول انحنا ما كملنا خلاس..
الترابى:- على بركة الله تبقى كويس لمن تخش الحكومة ها اهه واااه.
ابوعيسى:- ارجوك يا توتو تانى ماتقارن زولنا بى زولكم اب راس دا..
الترابى:- يتنهنه ويودع .. مع الف سلامة ربنا يتولاك بالصحة والعافية وتقدر تقيف على كرعينك علشان لو فى مفاوضات ولا مظاهرات ولا حاجة تكون جوة الجك .. ههها اهههاوواااه.. (تلك القهقهات الخبيثة)
ابوعيسى:- وانت كمان ربنا يديك العافية وما تنسى تمشى للخواجات عشان يظبطوا ليك جيب ورانى للجلابية علشان لامن تخت فيهو زولك ها احم ما يجئ واقع تاني. (مع ملاحظة عادة لا يوجد جيب خلفى فى الجلاليب)
الترابى يلبس وجه الجديه ويتحسس خلفيته ويذهب دون تعليق ودن نهنهات..
دخل فاروق ابوعيسى فى نوبة من الكحة مما اضطر الى استدعاء الطبيب..
قصة من وحى الخيال بعد ان رايت صورة لزيارة الترابى لفاروق ابوعيسى بعد الافراج، سرحت بخيالى فى نوعية الحوار وهذا ما جادت به قريحتى..
المبكى فى الامر:-
الاثنين من الفلاسفة والفئة المتعلمه والنخبة المثقفة،التى ركن لها الشعب السودانى فى ايجاد حلول ناجعه على مر التاريخ الحديث وهي نماذج لا تتميز بشئ افضل من تميزها بالأنانية والذاتية.
اذا استبدلنا كلمة زول فى الحوار بكلمة ديكتاتور نجد كانما لسان حالهم يقول ديكتاتورنا احسن من ديكتاتوركم..
واذا اتجهنا لعمر الرجلين نجزم بان امراض الشيخوخة تحاصرهم من كل جانب، فلماذا هذا التشبث والله انتم لست فقط صناع الدكتاتوريات بل انتم الدكتاتورية بشحمها ولحمها وبارجل تفوق تقارب المئة..
العمل السياسي والحوار يحتاج الى طاقات بدنية وذهنية كبيرة، والى نفس طويل وساعات طويلة من الاجتماعات وورش العمل والسفر المرهق المتواصل لتحقيق البرامج والأهداف الاستراتيجية الهامة..
لا نبصق على تاريخ الرجلين ولكن نقول لهم كفاكم، كتر الله الف خيركم .. جربتم كل الطرق وفشلتم ايما فشل .. افسحوا الطريق والمجال للشباب وحتما سوف يسامحكم الشعب السودانى ..
اسعدنى خبر الافراج على ابوعيسى ومن معه، انتصارا للحرية، سؤال عارض اين كانت الحرية حينما كنت وزير لي زولكم؟؟، هل تعلمت الدرس بعد سن الثمانين، اكتب مقالى هذا للشباب الصاعد لابد من التصدى للمسؤولية من الان ولا تنتظروا عمر الشيخوخة (ابوعيسى والترابى)، نحن مع الحرية وضد الدكتاتورية بكل اشكالها، نحن مع تبادل الفرص وضد الكنكشة، يجب ان ننتصر للمبادىء كاملة دون مجاملات او موازنات..

اذا كنا نتمنى ذهاب البشير فوالله ذهابكم انتم اكبر امنياتنا واصدقها.
اذهبوا ونحن كفيلون بدحر البشير وغيره.
البشير وزمرته كلما روادتهم خاطرة الذهاب تذكروكم فاستمرؤا عدم الذهاب مع لعن الشيطان ..
اذهبوا واتركونا في حال سبيلنا يرحمكم الله.

وليد معروف
[email protected]
http://waleedmarouf.weebly.com/


تعليقات 7 | إهداء 0 | زيارات 1899

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1246026 [بي كرت]
0.00/5 (0 صوت)

04-13-2015 05:03 PM
قلت لي كفيلين بدحر البشير وغيره !!!!!!

[بي كرت]

ردود على بي كرت
[وليد معروف] 04-13-2015 11:05 PM
كل دور اذا ماتم ينقلب، ولو دامت لاحد لاما االت للبشير، وسعات النصر والثورة غير بعيدة وسوف ترى حينما يقول الشعب كلمته..


#1246023 [ابو ريشه]
0.00/5 (0 صوت)

04-13-2015 04:58 PM
يا وليد معروف عاوزنى اقضحك ولا اخليها مستوره ؟؟؟ اتلم احسن ليك يا .....

[ابو ريشه]

ردود على ابو ريشه
[وليد معروف] 04-13-2015 09:44 PM
نحن فى انتظار الفضايح يا استاذ اطلق الحرية الى قلمك وقل ما تشاء، اسلوب التهويش ده حق الكيزان وخلاس انحنا شبعنا منو، وبعد ماتفضخنى بالله اكتب اسمك عشان نتعرف عليك ونستطيع مقارعتك الحجه بالحجه..


#1245787 [واحد مخلوع]
4.00/5 (1 صوت)

04-13-2015 11:24 AM
دة أسلوب إنقاذي جديد في تشويه سمعة المعارضين ،، روح بلا هبل معاك إنت زاتك ياوليد مؤتمر وطني خبيث ، بطل الهبالة و خفة الدم العفنة بتاعتكم دي ،، تعرف شنو إنت عن فاروق يا منحط ، العيب على الراكوبة اللي سمحت لواحد ....... يكتب فيها

[واحد مخلوع]

ردود على واحد مخلوع
[وليد معروف] 04-13-2015 09:51 PM
من الصعب جدا ان تاخذ وتعطى مع اسماء لا وجود لها فى الواقع، لكن نحاول اولا اذا احببت ان تدافع للاستاذ فاروق ابو عيسى دافع بالحجج وليست بالاساءة لانها لا بتودى ولا بتجيب..وكان انت معارض المؤتمر الوطنى بس انا معارض المؤتمر الوطنى وكل النخبة التى تبادلت فينا منذ الاسقلال وحتى الان اثتثناء عرمان لاعتبار انه من القيادات الشابه ولم يتخرج من جامعة الخرطوم، هؤلاء المنظراتية ضيعونا وضيعوا وقتنا..


#1245769 [AbuAhmed]
0.00/5 (0 صوت)

04-13-2015 10:54 AM
عمر الشيخوخة براهم وين ود المهدى و الميرغنى و على محمود وكل من تعدى 75

[AbuAhmed]

ردود على AbuAhmed
[وليد معروف] 04-13-2015 09:54 PM
انا معارضهم كلهم وكتبنا من قبل مقال باسم عيد الميلاد عن الصادق المهدى ومقال اخر بعنوان ابيض واسود، يجب ان يتصدى الشباب الى العمل السياسى..


#1245749 [دنيا فرندقس]
1.00/5 (1 صوت)

04-13-2015 10:35 AM
قريحتك التى جادت بمثل هذا الهراء قريحة مريضة جدا اذ كيف تساوى بين الضحية و الجلاد ؟ كيف تساوى بين البطل و الخائن ؟ كيف و كيف ؟ خلاصة موضوعك الغث فى انك تريد ان تقول للرجلين ان يترجلا حسنا هذا الكلام ينطبق على الترابى الذى لازال على راس حزب سياسى هو الاقرب للحكومة و ممكن يكون عندو اطماع فى الحكم و هذا الكلام لا ينطبق عاى ابوعيسى هذا الشيخ الذى اخجلنا جميعا و هو يتصدى للحكومة الفاسدة الديكتاتورية م ومكث بالسجن لاربعة شهور تخللتهامحاكمات النظام الهزلية الجبانة بينما امثالك لايفعلون شىء سوى الكتابة الركيكة فى الانترنت , امثال ابوعيسى مفروض ان ينحنى لهم الجميع و يمجدونهم لانهم على الاقل وهم فى مثل هذا العمر لم يتراجعوا او يهادنوا و اثبتوا للجميع انو الشعب السودانى لازال به رجال و فى الختام والله عيب عليك ان تقارن بين الرجلين فلا يوجد ايو قاسم مشترك بينهم سوى العمر

[دنيا فرندقس]

ردود على دنيا فرندقس
[وليد معروف] 04-13-2015 10:45 PM
الاخ او الاخت دنيا فرندقس اعجبنى التعليق لانك(ى) هبشت الوجع فى كم نقطة وعلى الاقل نتفق فى موضوع العمر لكن اطلب منك بدل الخجل ان تتقدم الصفوف كقوة شابه واوعدك اننا حا نكون اول الحواريين..وعشان ما نخجل نخش بدلو..


#1245744 [بت البلد]
0.00/5 (0 صوت)

04-13-2015 10:30 AM
سبحان الله اتق الله في الاستاذ أبو عيسى يا رجل ... أول مرة أقرأ موضوع سلبي في حق الأستاذ أبو عيسى يبدو أنها حمى الانتخابات

[بت البلد]

ردود على بت البلد
[وليد معروف] 04-13-2015 04:08 PM
لماذا تنظر للموضوع بانه سلبى هل انا ذكرة معلومة ملفقة ام انه تاريخ وكل الاحترام للاستاذ فاروق ابو عيسى وانا لا ارى انتخابات انها مهزله على الهواء..


#1245713 [Mohamed]
5.00/5 (1 صوت)

04-13-2015 09:50 AM
التحية والإجلال للبطل فاروق أبو عيسي والبطل أمين مكي مدني وهما يزودان الحمى دفاعا عن حق الشعب السوداني في الحرية والسلام.. والتحية والإجلال والتقدير للنبلاء من المحامين الغيورين على الوطن الذين وظفوا وقتهم ومالهم وجهدهم وعطائهم الفكري والمهني في سبيل الدفاع عن الأبطال الى أن نجحوا في الإفراج عنهم.. والتحية للمناضلين من غمار أبناء الشعب السودانى لتصديهم المستميت في الدفاع عن
الأبطال بحضور جلسات المحاكمة الباطلة الزائفة والملفقة، ولمساهمتهم بالكلمة والتظاهرة والمتابعة والدعاء..
التحية للشرفاء والشريفات من أبناء بلادي...
والخزي والعار للبلهاء الدجالين والأفاكين...
وثورة حتى النصر..

[Mohamed]

ردود على Mohamed
[وليد معروف] 04-13-2015 04:06 PM
نشكر مرور الاخ محمد لا محال بان الاستاذ فاروق ابوعيسى ومن معه من المعارضين الجادين فى القضية وان المحاكمة عبثية لابعد وخهذا طبعا ديدن الانقاذ ومحاكمة القميئة..


وليد معروف
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة