المقالات
منوعات
فضائح الفضائيات ( 1)
فضائح الفضائيات ( 1)
04-15-2015 10:25 AM


أحرص دوماً على تجنب مشاهدة الفضائيات السودانية تفادياً لأمراض الضغط والسكري وتصلب الشرايين ولكن ولـ(شقاوتي) جلست مساء يوم الجمعة الماضي أمام فضائية النيل الأزرق بعد أن(طقش) (أضاني) صوت الفنان (أحمد الجابري) فأسرعت للاستمتاع به (صوت وصورة) ، ولكني فوجئت بأنه ليس الجابري إنما هو الشاب المبدع الفنان(ياسر المرضي) والذي كان يغني على العود رائعة الجابري(حكمة والله وحكاية تشغل أذهان العباد) .



المهم استمتعت بالأغنية جدًا و جلست لمتابعة باقي الحلقة بعد أن استبشرت خيرًا.



هنا أطلت المذيعة الجميلة شهد المهندس ومعها المذيعة الحسناء(إسراء سليمان) وبدأت سلسلة من الملافحة وتداخل التعقيبات ، كانت المهندس تحاول السطو على فرصة زميلتها في الحديث بمقاطعتها والتحكم في بداية الفقرة ونهايتها ، وأحياناً تضطر للضغط على الحروف بأسنانها لإسكاتها .



في الحقيقة المنظر كان (جباناً جداً) وذكرني (خفة) و(لفة) الفتيات المراهقات حينما يمر بقربهن رجل وسيم وجذاب فيحاولن لفت نظره بأي طريقة حتى لو صرخت إحداهن .



والصراخ وحده هو الذي كان ينقص شهد المهندس لتقول أنا موجودة ، وهو ما لا تحتاجه فهي مذيعة جميلة جداً، والطريق أمامها طويل ولديها من الأدوات الأولية ما يمكن أن يضعها في طريق أخضر.



المهم أنه وعقب الفاصل الغنائي قدمت فقرة من الرياضة العالمية، وبعدها تمت استضافة الشاعر والإعلامي السر قدور، واستضافة قدور دي موضوع تااااني.



حيث ظلت المذيعتان طيلة فقرة السر قدور وما قبلها تعملان على التلويح بيديهما وتكثران من الحركة في استعراض واضح لـ (لأساور) و(المانكير) وصل مرحلة ما بين(حضن الكفين والصفقة) .



وبالمناسبة فقد سبق وتلقيت دورة تدريبية في فن التقديم والحوار البرامجي من أحد المراكز الكبيرة المعتمدة لدى (قناة الجزيرة القطرية) ( بمعنى أننا لو مامتنا شقينا المقابر ) وفي تلك الدورة دخلنا استوديوهات وسجلنا برامج ، وكان أهم درس هو توصيل المعلومة عن طريق الحديث وعدم التلويح واستعمال اليدين إلا في الضرورة القصوى .



المهم بدأ الحوار مع السر قدور في فقرة بين النجم والجمهور وكانت تعتمد على قراءة الرسائل من جهاز لاب توب وضع على أريكة أنيقة أمام المذيعتين.



وكانت (إسراء سليمان) (تتشابى) لتحريك شاشة اللاب توب وقراءة الرسائل وهي تتكئ على ساعديها في وضع يشبه (عواسة الكسرة) عند أمهاتنا من على (البمبر) ، وفي الحقيقة (خمت نفسي) وكانت كلما (دنقرت ) للعواسة، أقصد لتحريك الشاشة (ادنقر) أنا معها بحركة لا إرادية،



ولا أدري من هذا العبقري الذي تفتقت عبقريته على فكرة اللاب توب و(المشاباة) فهناك اختراع اسمه (آيباد) كان بالإمكان أن تستعين به المذيعتان .

وإذا كانت إمكانات القناة المادية ضعيفة ولا تسمح فهناك فن في التسويق اسمه (مقاصة) يعني اتفاقية مع شركة سامسونج أو أبل أو أي فون لبث إعلاناتها مجاناً على القناة مقابل أجهزة آي باد.

نعود إلى البرنامج حيث جاء سؤال من أحد المشاهدين للسر قدور السؤال كان لماذا لم يغنِ لـ قدور أحد غير حسين الصادق؟



ولأن شهد ما (مذاكرة ) ضيفها كويس فقد نقلت السؤال كما هو دون أن يظهر لنا دورها بمعرفة الضيف ففاجأها قدور بالقول لم يغنِ لي حسين الصادق فقط بل غنى لي أيضاً عاصم البنا ، حينها ارتبكت المهندس قليلاً وحاولت الالتفاف حول السؤال .........؟؟بعدها جاء المصور بلقطة لها على الشاشة أحسسنا أن لديها ( وجع بطن ) .

أما زميلتها إسراء فقد كانت تصر على قدور أن يغني بين كل سؤال وآخر، حتى قال لها قدور (ياخي أنا ما مطرب) .



أخيرًا



المذيعة إسراء ماهو السر في شعرك المنكوش، أنت شابة جميلة جداً وجذابة جدًا ولكني كل ما أرى شعرك أتذكر (زعافة العيد) .



*نقلا عن السوداني


تعليقات 17 | إهداء 0 | زيارات 7395

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1247523 [ابودعد]
0.00/5 (0 صوت)

04-15-2015 04:11 PM
إِلى agaba

بالغت!!!

[ابودعد]

#1247511 [Almisahira fi izallail]
0.00/5 (0 صوت)

04-15-2015 03:44 PM
*ييا سهير انت والله شاف ليك ونجدك من حضور حلقة "ياسين ابراهيم " على "الفضاة القنائيه" قبّال كمّين سنه.. الحلقه "المفرغه" "المفزعه" كانت عن "السغاله والسغلا" يعنى "تقالة الدم". بالعربيه الفصحى ياسين دا (قبل ما يعملوه المسؤول عن الفضاة القنائيه بعد سواة محمد حاتم ود سليمان سفير درجه تانيه وحردا ..ما كان بيظهر على الشاشه.. يوم واحد ما شفناه! جابوه من وراء الكواليس يا ربّى!
* المهم انّو ياسين كان بينضم وبيضحّك وبنكّت براه .. مرّه مرّ بيدخّل معاه فى السغاله دى واحد نافش تفّتو زى "سعّأفة العيد" (اللى قال عليها السر قدور) ومغطيها بطاقيه مقنبره فوق التفّه.. ومرّه مرّه تقع من التفّه ويشيل ويصلّح فى قعدتا على راسو! .. اب تفّه كان أخر ابتهاج وكل مرّه والتانيه يفتش على طريقه يعلن بيه انه من ذوى "الثلاث" وان شاءالله ناوى يكمل ما تبقى ليهو من نص دينو وايمانو ولازمة يصل بيهن الى العدد ألأمثل ألاعلى!(فى ناس قال العدد دا هو 9 (مثنى2+ثلاث3+رباع4=9) كضاب ساكت شن قدّرو!
*من بين ألأسئله اللى ياسين كان مفتكرانه اظرف سؤال وكان يصر على كل واحد لازم يجاوب عن كيف هو تزوج .. هل زواجو كان عن "حب خالص" ولآ كان "ارضاء والد او والده" ولا كمان "تعكيم وفرض راى اهل او حجز من السغره" ..او " تغطية قدح" ولاّ كانت "صدفه واجمل صدفه"!
* بعض المشاركين كانو متحرّجين وما حبّو يتكلمو عن مسائل شخصيه وعائليه زى دى,, لكن ياسين كان مبسوط عل ألآخر وبيضحك ويتنخج وهو يتنقل من مشارك الى آخر عشان يكلّمو انّو عرّس كيف!
*بس الرسول شنو يعنى اللى حيستفيدوهو المشاهدين من معرفة زيد او عبيد عرّس كيف او حتى ما "حنّنوهو ولا فرحت امّو" ولا جرتقو الصادق ..
*الرسول .. يا سهير فى اسغل من كدا؟ كان ما تبقى شفتيها الحلقه دى .. اكيد الله شاف ليك.. انا لي حسّ رغم ان ليها زمن الآ انها للّيله ما دايره تنزل لى من حلقى من السغاله الفيها اللى لو قسموها على السودانيين كووولهم حيكونو آخر سغاله واسغلن مقدم البرنامج!!! برى برى!

[Almisahira fi izallail]

#1247489 [اب طابوزه]
0.00/5 (0 صوت)

04-15-2015 02:58 PM
غايتو المستمع ليه الله
وانا كنت ممتعض جدا من احجام الاجيال عن مشاهدة القنوات السودانية لكن لقيت معاهم حق والله ..

[اب طابوزه]

#1247463 [د. معز]
5.00/5 (1 صوت)

04-15-2015 02:31 PM
الموضوع شيق والاسلوب جميل جداً لكن في الزمان الخطاء هم لا يستطيعون فهم ما تريدين ان تصلي اليه فلكل انسان اسلوب .... بس كان من الاجمل ان توصلي هذا النقد بطريقة الطف واجمل فالانسان الذي لم يطلع على كتاباتك يظن ان هناك تصفية حساب بينك وبين المذيعتين او لشئ في نفس يعقوب فالاحتمال قائم ..... دمتي استاذتي

[د. معز]

#1247457 [ساهر]
3.88/5 (4 صوت)

04-15-2015 02:29 PM
اعتقد أنك لست بحاجة إلى هذا النقد البتار وإلى ذلك الاستقطاب الحاد.... لو واصلتي مشوارك في دنيا الجمعيات الخيرية والتحيز للفقراء والأطفال فاقدي السند وجمع التبرعات، إضافة إلى الشهرة التي وفرتها لك الصحافة، ورغد العيش الذي وفرته لك شركة الإعلان التي تملكينها، والجمال الرائق الذي تتمتعين به، لكفاك وزاد عنك......... افتعال مشادات كلامية مع نجمات الفضائية التي استضافتك أكثر من مرة، لا يجدي.... وحتى لو اعتبرنا أن ما قدمتيه نقدا يرمي إلى المعالجة والتصحيح، إلا أنه كان جارجاً وفيه كثير من الألفاظ المعنفة والعنيفة...............

حالة (كشكشة) ذهب الساعدين، وفتح الثوب وتحركيه لتبدو عقود الياقوت حركات سودانية محضنة، وهي أختراع بنات حواء السودانيات وتجدينه داخل وخارج الاستديوهات على السواء......

غايتو الدايرة تقولي بتقوليه....... ودي شجاعة.... ونوع من التربية النادرة التي لم تتوفر للكثرين نساء ورجال في سوداننا الحبيب.

[ساهر]

#1247386 [محمد خليل]
5.00/5 (1 صوت)

04-15-2015 01:14 PM
كتر خيرك يا سهير الاعترفت للمذيعتين بأن أحدهما جميلة و الأخرى حسناء لأنو ما فى مرا بتعترف لمرا أخرى بأنها جميلة، هذا لن يحدث أبدا.

[محمد خليل]

#1247383 [عشم باكر]
4.50/5 (2 صوت)

04-15-2015 01:09 PM
هذه كلمات قدور غناها الكاشف

ارض الخير افريقيا مكاني..زمن النور و العزة زماني
فيها جدودي... جباهم عالية.... جباهم عالية..جباهم عااالية
مواكب ما بتتراجع تاني
اقيف قدامها و اقول للدنيا انا سوداني
انا افريقي انا سوداني
انا بلدي..بلد الخير و الطيبة
ارض و خزاين..فيها جناين
نجومه عيون للخير بتعاين
قمره بيضوي ما بغيب ابداً داايماً باين
نوره بيهدي ليالي حبيبة
عليها اغني و اقول للدنيا انا سودااني
انا افريقي انا سوداني
شمسك طلعت و اشرق نورها بقت شمسين
شمس العزة و نورها الاكبر
هلت شااامخة زي تاريخي قوية و رااسخة
ملت الدنيا و خيرنا بيكتر
خيرنا بيكتر خيرنا بيكتر
شمس ايماني بأوطاني
دا الخلاني اقول للدنيا انا سودااني
انا افريقي..انا سوداني

[عشم باكر]

#1247369 [radar]
0.00/5 (0 صوت)

04-15-2015 12:57 PM
والله يا بتنا كل الكلام القلتيه ده صاح أنا برضوا جابني القدر لحضور هذه الحلقة. بصراحة مذيعات القنوات السودانية شيء مخجل ويندي له الجبين من الطريقة المبتذلة التي يقدمن بها البرامج ويقدمن بها انفسهن للمشاهد. وهذا الرجل الذي يدعي حسن فضل المولى لا أدري من الذي عينه في هذه القناة يا جماعة لا يمكن نصل للدرجة دي من التدني مذيعات همهن الأول أبراز العقود والثوب وتاتو ودعايات اقل ما يمكن أن يقال عنها إننا شعب جوعان يعني نحن لحد الآن بنغني في التلفزيون للعدس والماجي وخزانات المياه (تيقا) والحنة ونروي قصة مكتملة الاركان لصابون اسمه التيتل أما دعايات صوالين التجميل والله هذا هو الخجل والعار بعينه - معقول يا جماعة البلد دي ما فيها أي رجل رشيد يكلم الرئيس يوقف هذا العبس. وأقول الرئيس لأن كل شيء بيده هو من يعين وهو من يفصل وهو من يرقي وهو من يسرح. يا جماعة إذا كان ما في شيء مفيد يقدم لذه المشهد المسكين غير هذه الدعايات التي تدعو لأكل أموال الناس بالباطل ودون دعاية االهيركنترول طريقة الالقاء وأنه يعمل على أنبات الشعر في 20 دقيقة اكتشاف تفرد به السودان من دون دول العالم. يا جماعة قلتوا هي لله أدعوكم باسمه أن توقفوا هذه البرامج وكما قلت إذا كان ما في شيء مفيد يقدم للمواطن من خلال هذا القنوات ما في مشكلة نقصوا عدد ساعات البث على الأقل نوفر لينا شوية مصاريف. وبرضوا نقول الحمد لله انه الواحد ما عارف الحاصل شنو الاذاعات حيث ااني بعيد عن البلد و لااستيطع أن اسمع الاذاعة.

[radar]

#1247354 [امين]
5.00/5 (2 صوت)

04-15-2015 12:44 PM
(زعافة العيد) !!﴿ يَا أَيُّهَا الَّذِينَ آَمَنُوا لَا يَسْخَرْ قَومٌ مِنْ قَوْمٍ عَسَى أَنْ يَكُونُوا خَيْرًا مِنْهُمْ وَلَا نِسَاءٌ مِنْ نِسَاءٍ عَسَى أَنْ يَكُنَّ خَيْرًا مِنْهُنَّ)

[امين]

#1247342 [جنو منو]
5.00/5 (1 صوت)

04-15-2015 12:36 PM
ونسة جبنة فى المسطبة ولا اقول ليك يره المسطبه ..!!

[جنو منو]

#1247341 [ديك الجن]
4.00/5 (1 صوت)

04-15-2015 12:36 PM
وهل صوت فى نداوة صوت الفنان الراحل الجابرى " بطقش " الأضان؟؟؟؟ طيب ياتو صوت تانى تستأنســه الأذن؟ الملافظ سعــد يا أستاذه فقد وضعتى المدح فى أخص مكان الذم بقولك طقش أضانى...مثل تلك العبارة لا تقال فى حق كل الأصوات النـدية التى عبرت بعد أن شكلت وجدان الشعب السودانى.

[ديك الجن]

#1247337 [الزول]
1.50/5 (2 صوت)

04-15-2015 12:29 PM
البنيات سمحات وشليقات
نعمل شنو دا قدرنا
يعنى الشينة كان عندها الدكتوراة مافى زول شغال بيها
منعول ابوك بلد

[الزول]

#1247295 [توتو بن حميده آل حميده]
0.00/5 (0 صوت)

04-15-2015 11:56 AM
بارك الله فيكي وريتيهن المكشن برا بصل - منشان يبطلن اللقافه الهن فيها دي ....

[توتو بن حميده آل حميده]

#1247294 [رجل المستحيل]
5.00/5 (2 صوت)

04-15-2015 11:54 AM
أحرص دوماً على تجنب مشاهدة الفضائيات السودانية تفادياً لأمراض الضغط والسكري وتصلب الشرايين ..البعرفو كم مرة يا استاذة بديتي عمودك انك كنتي ضيفة على برنامج كذا في قناة كذا طيب طالما بتتجنبي مشاهدة القنوات البوديك تكوني ضيفة عليها شنو ؟عذرا بس عمودك اليوم ونسة قطيعة ليس الا .

[رجل المستحيل]

#1247278 [سكران لط]
4.75/5 (5 صوت)

04-15-2015 11:38 AM
خلاص عرفنا كانت دورتك في جزيرة قطر ! دا وكتو؟ العمايا والمكسرين شايلين بعضم يصوتو وانتا جايا تونسينا بمذيعات ؟ طيب وين رسايلك وين كتاباتك للشعب المكلوم في يوم زي دا؟ بلاش اكتبى سطر واحد قولي ممنور النشر في موضوع الانتخابات عشان نعرف حاجة انتو الريس دا حاكمكم والا حاكم شعب تاني؟
ناوليني تلج يا انتي المصيبة دي هرت مصارينا.

[سكران لط]

ردود على سكران لط
European Union [الحلومر] 04-16-2015 01:13 PM
ممر الكأس ياخي وما تخلي الشغلانة تبرد البنية أعلنت مقاطعة الانتخابات علي الملأ... وقاصدة تورينا انو الانتخابات فطيسه وهي ما شغالة بيها...جبتو من بتاع البلح ده ؟؟!!
قوى شديد حر قلبي الله يحرق قلبك...كل يوم شايل قزازتك وجاي علينا انشاء الله يوم يكشوك الجماعة


#1247259 [واحد داقس]
5.00/5 (2 صوت)

04-15-2015 11:25 AM
ليه الحسد والحقد ده ما كان يمكن ان تنتقدي وباسلوب افضل من كده يا استاذه

[واحد داقس]

#1247222 [Ageeb]
5.00/5 (3 صوت)

04-15-2015 10:43 AM
"بعد أن(طقش) (أضاني) صوت الفنان (أحمد الجابري) فأسرعت للاستمتاع به (صوت وصورة)،"

معقولة بس! حد يحب يستمتع بصوت وصورة فنان مثل الجابري ولا يستطيع تمييز صوته؟ شخصيا لا استطيع أن أفهم ذلك. وظللت اعتقد أن المستمع الجيد يستطيع أن يعرف صوت الفنان تحديدا دون أن يراه؛ لكني على ما يبدو كنت مخطئ؛ حيث يأتي من يكتب مثل هذا الغثاء.

[Ageeb]

ردود على Ageeb
[agaba] 04-15-2015 12:57 PM
صحفيينا/الهندي/ بلال/ الزومة/ الظافر/ لطيف/خفيف/ كابو/ ديجانقو/ ابوضنب/.....كل الابواق/ والنعاق/,,,وو
الاعلاميين/والمزعيين/محمد//الجزلي/كثار التلج/الود الني/ داك/ والدبدوب/ والزيو/والاصم اعلام وسياسة/والمبتزل!!!/والمتلجلج/ والمبجبج بتاع النيل الازرق/والملظلظ/والمنكسر//// واللغة عجبا/ المنقرع/والمنفرج/ والمبهرج/ وممسحين النيل الازرق/ وكوامر القومي/ ومبجبجين امدرمان/ وناس الكورة وحران الزعلان/ووو
!!! ام المزيعات, البايركس بتاع القومي/ والخالات/ والخاليات الكيس السمحات بتاعين النيل الازرق /والمدعيات السياسة والممليات مزيعات امدرمان(اذي اكياس المخدات)/ناس شهد,وهبة/ ومها . وتسابيح ودستور, والواسطات/والطريات/وما ادراك ما الجزلي ودوره في لجنة الاختيار, وحسن بتاع النيل الازرق, والدبدوب, الفي الجكس بيدوب,,,, ووو,,,,, ووو,,,وكلام كتير,,,,!!!
علي العموم, الموهبة الحقبقبة, ماليها مكان, وسط عارضات الازيا, والاجساد,بالذات لو كانت محترمة , ومدينةو ومن اسرة فقيرةو محافظة, وماعندها واســــــــــــــطة ,ولاباســــــــــــطة, وما بتدفع, ولا بتاكل,وبنخاف علي سمعتها؟؟؟؟؟؟؟؟؟؟؟؟؟؟ وما خفي اعظم, علي العمومو الاعلام, والوسط الفني, والكورة, اوساط صعبة, والمشاكل فيها كتيرة, ودايرا ادارة واعية, ومنفتحة,وشغل كتير, في هذا الزمن, لايمكن تنصلح الا اذا ترك القوس لباريه


سهير عبدالرحيم
 سهير عبدالرحيم

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة