المقالات
مكتبة كتاب المقالات والأعمدة
الفاتح يوسف جبرا
أحلام وتفاسير
أحلام وتفاسير
04-23-2015 02:55 PM


الحلم :
حلمت يا أستاذ بانني اسير عاريا (كما ولدتني أمي) في برندات شارع الجمهورية وأنا أحمل في يدي كوب مثلج من عصير الليمون !
التفسير :
سير الإنسان عارياً يعني أنه مقبل على درجه عظيمة من (الفلس) ، الثلج في العصير مؤشر لتقبلك الأمر بروح رياضية أما كونو العصير (ليمون) فهذا يعني بأنك سوف تبلغ مرحلة عصية من (القرف) والطمام فخليك مستعد.
الحلم :
حلمت إني واقف في موقف (الشهداء) راجي المواصلات وفجأة يجي شاب وكف يختف الموبايل الجلاكسي بتاعي ويجري ويجري لحدت ما إختفي عن الأنظار علما بأنو الموبايل بتاعي تلاتين عشرة !
التفسير :
إنتظار المواصلات تفسيره الصبر وشدة الإحتمال ، أما ختف الحرامي للموبايل وجريه دون أن يقبض فعادي شفتا ليك الزمن ده حرامي بينقبض؟ أما كونو موبايلك تلاتين عشرة وما جلاكسي فأنصحك بفحص الدم إحتمال أنيميا وكده
الحلم :
رأيت في المنام أنني أسير بينما المطر ينهمر بشده فيغسل الشوارع وتنساب المياه نحو فتحات في أطراف الشارع وبينما أنا كذلك إتجه شخص نحوي يحمل مايكرفون وإلى جانبه شخص يحمل كاميرا ظننت أنهما سوف يسألاني عن هذاه التجهيزات التي تمت للخريف فإذا بالمذيع يسألني عن رأيي في الإنتخابات فأفقت ..
التفسير :
من الواضح انك كنت تسير في شارع القصر (دون سواه) والحلم بان تسير في شارع القصر مقروناً بسؤال المذيع لك عن رائك في الإنتخابات يعني أنك سوف تترشح للرئاسة في الإنتخابات الجاية ... ما تقول ليا ما بحصل لأنك زول مغمور والناس ما بتعرفك هسه الخمسطاشر الإترشحو ديل في زول بيعرفهم ؟
الحلم :
حلمت بأنني تزوجت وأنجبت عشرة من البنين والبنات علماً بأنني عاطل عن العمل مع إني خريج ليا عشره سنين
التفسير :
يخرب بيتك .. حلم تلاته دقئق تنجب فيهو عشرة أرواح ؟ تمشي من حتتك دي ديوان الزكاة وتقول ليهم الأستاذ قال ليكم أدوني من الخمسين ألف دولار الأديتوها لقناة (الضحي) عشان أكل نصف ديني لأنو الوضع شكلو بعد شوية ح يكون خارج السيطرة !
الحلم :
رأيت في المنام أنني اقود عربتي واسير في الطريق وعندما حاولت دخول أحد الشوارع إستوقفني شخص يرتدي ثياباً بيضاء وقال لي مبتسماً :
- يا عزيزي عد أدراجك هذا الشارع إتجاه واحد فلا تدخله !
التفسير :
كنتا ح أقول ليك ده (رجل مرور) من ملابسو (البيضاء دي) لكنو ما رجل مرور بدليل وقوفو في (أول الشارع) الإتجاه واحد !
الحلم :
حلمت بأنني أضع أمامي صحن (شية جمر) وقدامو صحن فيهو (خمسة) قرون بتاعت شطة خدرا ومعاهم رغيفة (سغيرووونه) قدر حبة البندول وأول ما جيت آكل لقيت (يد) جات من وراي شالت (قرن من قرون الشطة الخدرا) ودخلتو ليا في خشمي وقفلتو .. قمتا من سخانة الشطة صحيت !
التفسير :
صحن الشية يرمز للنعمة وللخير وكونو إنو الرغيفة قدر حبة البندول ده بيعني إنك ما ح تقدر تاكل منو وح ياكل منو الناس العندهم رغيف (كبار) والخمسة قرون شطه ديل وديهم لي (عالم تاني) يفسرهم ليك وكويس إنو اليد دخلت ليك القرن في خشمك !


الحلم :
حلمت بأنني قاعد (أعوم) في بحيرة من (الفول المصلح) شئ زيت سمسم وشئ جبنة وشئ شماااار .. وكل شوية البحيرة تجف ... كل شوية البحيرة تجف .. لحدت ما فضل فيها (فولاية) واحدة قمتا شفتا ليا زول سمييين قاعد ليهو جوه عربية برادو جديدة مشيت عليهو قلتا ليهو :
- يا زول إنتا السحبتا الفول من (البحيرة ) دي دي؟
طوااالي قام قطع فيني كف وقال ليا :
- خلاس (الحاويات) عملت مفعولا !! – (وقمتا صحيت)
التفسير :
- ده حلم يا إبني غريب شوية ... لكن كل الأقدر أقولو ليك إنو بعد صحن الفول المصلح بقى بي عشرة ألف قصة العوم و(التجدع) فيهو بتبقى صعبة بالنسبة ليك كمواطن (الجفاف) ، أما باقي (الحلم) فخلي (الزول بتاع الشطه) الفوق ده يسوقك معاهو !!!
كسرة :
- قال لي : رأيت فيما يرى النائم إنو واقف في كاونتر بنك قاعد أورد ليا في كميات من القروش لمن طلعتا من البنك لقيت واحد موقف ليهو حافلة وبيكورك : مكة نفر .. مكة نفر !
قلت ليهو : الحلم ده تفسيرو إنك ح تختلس قروش المصلحه وتعمل (تحلل) وتقوم الحج !!

- كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و+و


fatih.jabra@gmail.com


تعليقات 14 | إهداء 0 | زيارات 6356

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1253691 [عادل احمد]
0.00/5 (0 صوت)

04-24-2015 10:11 PM
نسال الله أن يخفظك يا استاذ حبرا للسودانين ففي وسط هذه القتامة زالرداءة تطل علينا فترسم الابتسامة علي وحوهنا وتنثر الفرح بين جوانجحنا وتجدد الامل فينا وأن الفجر آت أت . نسال الله ان يخلصنا من هذه الطغمة الحاكمة الفاسدة القمئية وان يشفي الله صدور قوم مؤمنين .

[عادل احمد]

#1253512 [khalid]
5.00/5 (2 صوت)

04-24-2015 01:09 PM
اللهم ازهق روح عمر البشير

[khalid]

#1253320 [سفروق]
5.00/5 (1 صوت)

04-24-2015 01:17 AM
حلمت بالأمس أني فائز في انتخابات الرئاسة وعند سفري بالطائرة الي الفاشر للاحتفال بالنصر بصحبة د. نافع و د. الطيب ابراهيم ( سيخة ) .. اذا بالطائرة تسقط في منطقة نائية و أنا بداخلها أحتضر .. بينما الطيب يمدد جسدي محاولآ اسعافي و د. نافع يلقنني الشهادة .. ثم صحوت مذعورآ و أنا أستففر و أقول اللهم أجعله خير ... أفدنا أكرمك الله بتأويل هذا الحلم .. و الله غالب علي أمره .

[سفروق]

#1253231 [الصادق]
5.00/5 (1 صوت)

04-23-2015 08:12 PM
ابداع يا استاذ الفاتح - لكن امبارح عنتر ما انتحر

[الصادق]

#1253227 [فتح الرحمن السر]
0.00/5 (0 صوت)

04-23-2015 08:05 PM
اناشد مبدعي بلادي دوبيت - شعر - اغاني - رسم تشكيلي - كاريكتور - نكت - كتاب - فوزير - اسماء موديلات جديدة يشتغلو في حاجة اسمها الخمسة سنين

[فتح الرحمن السر]

#1253221 [ابوعبدالله]
5.00/5 (2 صوت)

04-23-2015 08:00 PM
هو بالله لسه في ناس بتحلم وهي نايمة دى خليناهو زمان وحلمنا بقى صباحي والعين زي الفنجان بنحلم بالمستحيل

[ابوعبدالله]

#1253209 [الحلومر]
0.00/5 (0 صوت)

04-23-2015 07:35 PM
حلمت انه غول ضخم جداً قبل ان يجثم علي صدري ضربني بقعر بندقيته وبكلتا يديه محاولاً فقع عيني قمت مذعوراَ وحكيت لزوجتي التي تجيد تفسير الاحلام ... قالت لي يا راجل ما تخاف نوم نومك ساي الغول ده ما قاصدك انت ...انت عندك جواز امريكي والغول ده لو كحلوه بالشطة ما بقريك الغول ده قاصد عثمان ميرغني وحملة الجوازات السودانية

[الحلومر]

#1253194 [محمد]
0.00/5 (0 صوت)

04-23-2015 07:08 PM
سلام

[محمد]

#1253191 [ودالحاجة]
5.00/5 (1 صوت)

04-23-2015 07:06 PM
ربنا يحفظك يا أستاذ يا مبدع يا رائع .. نحو عقدين من العطاء المتواصل المبدع في كشف وملاحقة هؤلاء الكيزان بأدب رائع وساخر وجميل ومهذب .. نتمنى لك الصحة والعافية فأنت قد أصبحت رمزاً من رموز هذا البلد العظيم ..

[ودالحاجة]

#1253177 [julgam]
0.00/5 (0 صوت)

04-23-2015 06:59 PM
خلاص أغرقت عنتره وبقيت ابن سيرين ..وحاتك إلا ترجع عنتره تانى..أصله البطل ما بموت ..خلينا من تفاسيرك دى،،

[julgam]

#1253173 [بت البلد]
5.00/5 (1 صوت)

04-23-2015 06:53 PM
هههههههه أبدعت والله يا أستاذ جبرا كدى فسر لي الحلم دا :أنا كل يوم بحلم اني ماشة وماشة وماشة كداري طبعا, في منطقة خلوية خالية من كل المعالم الطبيعية والصناعية وحتى من الرقشات , وكلما أمشي أحس انو لسه ما وصلت ... دا تفسيرو شنو؟؟؟ غايتو لو قلت لي ناس الحكومة دي ما معروف يطيرو متين تكون أحبطني شديييييد ... عليك الله اجتهد شوية وشوف لي طريقة وصول أخخخخخخ أنا تعبت خلااااااص وراجيا الله يخلصنا من الكذب والوسواس

[بت البلد]

ردود على بت البلد
United States [بت البلد] 04-24-2015 07:33 AM
هههههههاي خطيب شنو يا أبوعبدالله ؟؟؟!!! أنا حبوبة والانقاذ أضافت لي 26 سنة شيخوخة, ومرض ونكد وأيادينا بقت مملوخة ,ونوم مافي بس حتة دوخة ,وفترنا من الأسطوانات المشروخة

[ابوعبدالله] 04-23-2015 09:17 PM
اكيد خطيبك بتاع نجر وانتي ماشة وراء سراب



مع تحيات مفسر الاحلام


#1253145 [نيض التعب]
5.00/5 (1 صوت)

04-23-2015 05:56 PM
(وكويس إنو اليد دخلت ليك القرن في خشمك )!....
هههههههههههههه ... غايتو كان دخل (القرن) ده في (حِتّة تانية) كان المؤتمر الواطي كسِب ليهو عضو جديد .. البركة على الخشم .. وسخانة وتفوت .. ولا سخانة تلازمو لغاية الموت .. هاهاهاهاهاها .. جبرا يا شفت.

[نيض التعب]

#1253058 [سيف الدين الجميلى]
5.00/5 (2 صوت)

04-23-2015 04:01 PM
الخمسه قرون بتاعت الشطه دى خمسه سنين عجاف من حكم البشير والقرن الاول دخلو ليهو فى خشمو والقرن الثانى حايكون فى نخرتو والثالث فى اضانو والرابع مامعروف وين اما الخامس حيلحقو امات طه

[سيف الدين الجميلى]

#1253028 [حوراني]
0.00/5 (0 صوت)

04-23-2015 03:06 PM
رررررررررررررررررررررررائع الله يحفظك سوداني جميل نظيف

[حوراني]

الفاتح جبرا
 الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة