فل الفل
05-03-2015 04:55 PM


كان (عوض) مولعاً بفك وتركيب الأجهزة الكهربائية والأليكترونية منذ صغره مما جعل الجميع يطلقون عليه إسم (ماركوني) مخترع الراديو ، وكما أن ماركوني (سيد الإسم) لم ينل تعليماً منتظماً فإن (عوض) قد شابهه في ذلك أيضاً حيث أكتفي بالتدرب في كثير من الورش الهندسية حتي يسر الله له أن يقوم بفتح محل بسوق أم درمان لتصليح الراديوهات والمسجلات .
في نهار شديد الحرارة وبينما المعلم (عوض ماركوني) داخل المحل يقوم بتجربة أحد راديوهات (الفليبس) القديمة ويدير في مؤشر (الموجة) تناهي إلي سمعة صوت (متحشرج) سرعان ما بدأ في الوضوح بعد أن قام بموالفة الموجة :
- هل تسمعني ... هل تسمعني ... حول
إعتقد عوض لبرهة ان هذا الإتصال لابد أنه قادم من أحدي عربات (النجده) أو العمليات أو من لاسلكي أحد أفراد الحراسة الذي يقومون بحراسة المنشأىت القريبه من (دكانه) لولا أن قياسه للموجة التي يستقبلها أوضح له بان الإتصال يأتي من مكان جد بعيد
- ألو ألو ... (أكسلوز) يتحدث هل تسمعني
- نعم أسمعك .. الأخو من وين؟
- أنا (أكسلوز) من المريخ ... هل تسمعني !
- المريخ الواااحد ده ؟
- نعم من المريخ .. نحن نجري أبحاث للإتصال بالكواكب الأخري .. من أي الكواكب أنت
- أنا من كوكب الأرض ... وفي الأرض من السودان شفتا كيف؟
- كم درجة الحرارة لديكم الآن
- والله كان قصدك حرارة المواطنين فـ (صفر) بعد الإنتخابات دي .. لكن حرارة الجو زي كم وتلاتين درجة مئوية
- ما معني كلمة (مواطن) التي ذكرتها ؟ جهاز الترجمة الفوري الذي أستخدمه لم يقم بترجمتها لي !
- والله يا مستر (لوز) أنحنا ذااااتو ما عارفين نترجما لكن المواطن ده هو الزول الما عندو موقع مسؤولية .. يعني وزير .. والي ... معتمد .. وكده
- على ذلك فأنتم المواطنون تمثلون الأكثرية ..
- تتخيل لا .. البلد فيها مليون مسؤول
- لقد شوقتني لزيارة بلادكم .. هل تستطيع أن تدعوني لزيارة بلادكم !
- ياخ بلادنا دي ما دايره ليها دعوة وللا زيارة أي زول ممكن يدخل ويطلع ... بس المركبة بتاعتك البتجي بيها لو ما مرخصة بيقبضوك (و يفكوك) جهز غرامتك !
- وماذا تتنفسون في كوكبكم هذا ؟
- والله يا لوز الناس الفي الكوكب ده كووولهم بيتنفسو أوكسجين لكن نحنا (بالذات) الأوكسجين ده في المستشفيات تلقاهو مافي
- هل تمرضون ؟
- يا لوز إنتا وضح ليا سؤالك ؟ إنتا بتقصد ناس الكوكب وللا أنحنا هنا في بلدنا دي ؟ عشان نحنا كوووم وباقي العالم والكورة الأرضية دي كووولها كوم !
- أنا أقصد سكان الكرة الأرضية !
- سكان الكرة الأرضية ما بيمرضو كتير عشان بياكلو نضيف لكن كان مرضو بيتعالجو وعندهم مستشفيات ذي الفل ومجانن
- طيب وأنتم؟
- أنحنا ؟؟ والله كنا بناكل لكن هسه بقوا ياكلونا !
- هل هنالك من يأكلكم ويتغذي بكم ؟
- هو داب أكل يا لوز والمشكلة الأكلك منو ما تعرفو؟
- وهل انتم اذكياء ؟
- ذكاء حاد .. في التخطيط واللغف .. والله لو في (عطاء) مش لو مقدم من (المريخ) كان مقدم من (الترسانة) ما تفوز بيهو
- أنا مهندس متخصص في أنسجة الإتصالات الكونية هل يمكن أن اجد وظيفة إن حضرت إليكم ؟
- معاك كرت؟
- ماذا تقصد؟
- والله ما يكون معاك كرت توصية من مسؤول لو بقيت جاي من (برشلونة) ومتخصص (ضربات جزاء) ما تلاقي ليك شغل !
ياااخ الناس دي كووولها عاوزه تطلع تتخارج !
- إذن فلتكن زيارة فقط !
- والله يا لوز أخير ليك تقعد في (مريخك) ده وأهو أنا كلمتك ... غايتو إنتا تعال وجيب ليك معاك كم شوال قروش؟
- ما هي عملتكم بالمناسبة
- الجنيه؟
- وماذا يمكنني أن اشتري بهذا الجنيه؟
- كبريتة
- وبكم جنيه يمكن أن أبني لي مسكناً
- والله في ناس ببنوهو مجااانن .. لكن إنتا وقدرتك ! ...(ينقطع الإرسال) ... ألو ألو لوز هل تسمعني
- نعم أسمعك بوضوح
- ياخ ما تشوف لينا فيزا وللا عقد عمل؟
- المواطن هنا يا عزيزي لا يعمل .. لا يوجد لدينا موظفين .. كل الكوكب يعمل بصورة آلية
- يعني شنووو ما هنا ما برضو الموظفين نايمين وبشتغلو بي صورة آلية
- (مواصلا) : ثم لا يمكن لقادم من كوكب آخر أن يعمل حتي أن كانت هنالك وظيفة
- أها دي نحنا عكسكم تمااامن .. تجي من سقط لقط إن شاء الله من (زحل) تشتغل زي السلام عليكم وزول يسالك مافي .. في كافتيريا في طلمبة تفتح مطعم تفتح مغسلة زول يقول ليك تلت التلاته كم مافي
- لقد شوقتني للحضور إليكم ومشاهدة إنسان هذا الكوكب
- والله يا لوز إنتا بس راسك قوي لكن تعال مرحب بيك .. بس في حاجه
- شنوووو
- لمن تجي تنزل بي مركبتك في (كوكبنا ده) ... ما تنسي إنك تطفي النووور !


كسرة :
الشي الذي لم يكن يعلمه (عوض ماركوني) أن الرحلة من المريخ إلى الأرض تستغرق خمس سنوات وأن (أكسلوز) عندما يحضر إلى البلد سوف يجد واقعاً مغايرا لما حدثه به فحينها سوف تكون النهضة قد إستكملت والحال ح يكون فل الفل !

إنتبه :
يوجد (واو) جديد في (دورة جديدة) وكده !

كسرة ثابتة (قديمة) :

- أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+و


fatih.jabra@gmail.com


تعليقات 12 | إهداء 0 | زيارات 7722

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1260095 [خالد فارس]
0.00/5 (0 صوت)

05-05-2015 09:41 AM
واو الخمسة سنوات العجاف

[خالد فارس]

#1259803 [الجقود ود بري]
0.00/5 (0 صوت)

05-04-2015 07:24 PM
ههههه كان يتم نصيحتو ويوصيهو ينزل وقت الصلاة

[الجقود ود بري]

#1259455 [الداندورمي]
0.00/5 (0 صوت)

05-04-2015 10:58 AM
هههههههههه صباح الفل للناس الفل .

[الداندورمي]

#1259313 [مصر المحروسة]
5.00/5 (1 صوت)

05-04-2015 08:42 AM
يا شيخ جبرا نحن في كوكب خارج كوكب السودان ان شاء الله بعد خمسة سنوات نرجع السودان نلقى الوضع مغاير ونلغى النهضة استكملت وما حانقوي راسنا ونرجع الان.

[مصر المحروسة]

#1259304 [جنو منو]
0.00/5 (0 صوت)

05-04-2015 08:31 AM
صحح معلومتك ياابو الجبور المسافه تستغرق خمس سنوات و36 يوم أو كما قال ذلك الدجال
وكيل الجن الاحمر ..!!

[جنو منو]

#1259197 [سيزر]
0.00/5 (0 صوت)

05-04-2015 05:54 AM
رااااائع

[سيزر]

#1259150 [fatmon]
2.25/5 (3 صوت)

05-04-2015 01:16 AM
أولا اسالك عن عنترة والحصل ليه شنو؟ لازم نعرف حصل معاه شنو وهو عبله
ثانيا بتاع المريخ ده أحسن يقنعه زولك ده ما يضيع وقته ساي لأنه إنت عارف كان الحاصل ده ما تغير الشهر ده تاني الله أعمل يجي يلقى زول أصلا ( يا ناس السودان ماتوا كلهم يا قتلوهم وهم بعد داك القاعدين ليها شنو؟؟ يا هاجروا لما ما يلقوا زول يحكموه وينبذوه وياكلوا حقه ويمصوا دمه )
ثالثا الكسرة الأخيرة الحاصل شنو السؤال ده ليه كم ومتين حتغيره أصلا أنت لا حياة لمن تنادي أصلا؟

[fatmon]

#1259072 [مجنون جن]
3.00/5 (1 صوت)

05-03-2015 09:23 PM
طفي النور !!!! بلغة ناس الكورة ده باص زي الباص بريالتو عديل كده

[مجنون جن]

#1259009 [على]
5.00/5 (1 صوت)

05-03-2015 06:19 PM
حتى لو طفى النور مالنظر قوى 60 على 6 ههههه ولاتنسو حلايب سودانية

[على]

#1259007 [julgam]
0.00/5 (0 صوت)

05-03-2015 06:10 PM
- لمن تجي تنزل بي مركبتك في (كوكبنا ده) ... ما تنسي إنك تطفي النووور !
يعنى ماركونى عايز اكسلوز يجى وقت صلاة العشا ومركبته طافيه الأنوار عشان يفلت من مضادات الدفاع بالنظر؟؟؟
عليك الله ياود جبره أخبار عنتره الرميتو البحر شنوووووووووووووووو؟ أمانه ماحيرتنا فى فارس حوبه

[julgam]

#1259002 [بت امدرمان]
5.00/5 (3 صوت)

05-03-2015 05:57 PM
هههههههههههههههههه والله خطيييييييييير يا جبرا ، الله يديك العافية و يخليك لينا

[بت امدرمان]

#1258971 [ودالنور]
5.00/5 (1 صوت)

05-03-2015 05:16 PM
لمن تجي تنزل بي مركبتك في (كوكبنا ده) ... ما تنسي إنك تطفي النووور ! ههههههههه القفلة عندك يا ودجبرة...تسلم.

[ودالنور]

الفاتح جبرا
 الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة