وزير متقشف
12-03-2015 06:53 PM


كثيرا بل كثيراً جدا ما يعرف الفلس سبيله إلى جيوبي فتصبح بيضاء من غير سوء (ومعظم بطانات الجيوب تخاط من قماش أبيض ليه ما تعرف) ، أحاول كثيراً كأب أن أقوم بتوفير أدنى مقومات الحياة لأسرتي الصغيرة فتجدني أواظب على كتابة عمودي دونما (إحتجاب) مجتهداً فيه بأن يكون ذو (طعم) لينال رضاء القراء وإدارة الصحيفة (كمان) ، وليت الامر إقتصر على ذلك (فقط) ، ففي مواجهة هذا الغلاء الطاحن يقوم العبدلله بين الحين والحين رغما عن الحالة الصحية (اللى مش ولابد) بتقديم بعض البرامج التلفزيونية والإذاعية وبرضو (قرشين حلوين) !
ولكن على الرغم من ذلك فما أن ينتصف الشهر حتى تبدأ المعاناة والمجابدة والإستدانة والخروج من المنزل بعد رسم (خارطة طريق) تحاشياً للمرور بالأكمنة الثابتة المتمثلة في الدائنين الذين لم أوفق في التسديد لهم حتى منتصف الشهر .

كثيراً وأنا في مثل هذه (الزنقات) أسأل نفسي (الحل شنووو) ؟ فكّرتُ كثيراً بكل (الورطات) التي أنا بها ، حاولت كثيرا أن أجد لها (حلولا) لكن كلّما وجدتُ حلاًّ وجدتُ معه عيوباً و (مخاطر) لا حصر لها (أخير منها الفلس)
أعلم أن السواد الأعظم من القراء هم مثلي تماماً يعانون هذه (المرمطة) وهم يقفون عاجزين أمام تلبية حاجاتهم الضرورية ويستهلكون كثيرا من التفكير في محاولة تجاوز هذه الأزمة المزمنة ، عموما العبدلله قد تيقن تمااامن بأنه لا سبيل لخروجه من هذه الورطات إلا أن يصبح وزيراً .. أيوه وزير .. فيها شنو يعني ؟ وإنتو ذاااتكم مافي ليكم طريقة إلا تبقوا وزراء (ههههههه) .. مافيش زول يقول ليا (إنتا ما عامل لينا فيها معارض) فأشرس المعارضين قد تسنمو (الوزارات) وأمورهم ظبطت .. جواز دبلوماسي ..سيارة فخمة وحرس شخصي وحصانة وموتر قدام وموتر ورا ودبل كاب لمدارس الأولاد وأكسنت للمدام وكاميرات وتصريحات والعجب الأسفار والطائرات والنثريات الدولارية و(الفنادق) .. يوم في باريس ويومين في جنيف وأسبوع في ماليزيا وأسبوعين في ما بعرفو شنو داك !
الحاجات الفوق دي كووولها العبدلله (ما عاوزا) .. ح أكون وزير متقشف.. نعم كل الترف (الفوق) ده ما عاوزو طالما إنو حاجاتي ح تكون (مزبوطة) فالشخص (عندنا) في هذا العهد الميمون عندما يصبح وزيرا فإنه يستطيع (تزبيط) أموره كلّها .. حصل شفتو ليكم وزير بيتابع (الجمرة) ويشوف فضل فيها كم؟ هل يوجد وزير يحتار كيف يدخل أحد أبنائه المستشفى .. هل سمعتو ليكم بي وزير ما قدر يعطي أولادو الصباح (حق الفطور) ؟ هل شفتو ليكم وزير إشتكى من إرتفاع سعر (الطماطم) أو (البصل) أو (العجور)؟ أم هل سمعتم بوزير تم طرد أبنائه لعدم سداد الرسوم؟ وللا سمعتو ليكم بي وزير عارف رطل زيت السمسم بي كم؟ ولا سمعتو ليكم بي وزيلا كان جوهو ضيوف بيقعد (يتلفت) ويعلن حالة الإستنفار القصوى؟..لا يوجد بالقطع لا يوجد..!!
الآن سوف توافقوني بعد أن علمتم طموحي أنا (المواطن) الغلبان في أن أكون وزيراً ؟ نعم أريد أن أكون وزيرامن أجل أن أنتهي من كل هذه الكوابيس المزعجة .. من هذه القصة اليومية المملة التي لا نهاية لها .. كي أشعر بأنني مواطن غير مطارد من تفاصيل الحياة اليومية ..هذه التفاصيل التي يراها حكامنا أكثر من تافهة ونراها تستهلك أعصابنا لدرجة الألم .

كسرة:
قال لي صديقي : يا أستاذ بتبالغ عاوز تكون وزير بعد ما الحفلة إنتهت والكراسي قاعدين يلمو فيها .. (ما عرفتو يكون قاصد شنوووو) !!

كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)


تعليقات 4 | إهداء 0 | زيارات 6911

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1380949 [دلدوم حجر التوم]
0.00/5 (0 صوت)

12-06-2015 01:53 PM
قال لي صديقي : يا أستاذ بتبالغ عاوز تكون وزير بعد ما الحفلة إنتهت والكراسي قاعدين يلمو فيها .. (ما عرفتو يكون قاصد شنوووو) !!
ياود جبرا ياخى المعنى واضح ،،،يعنى صديقك دا قاصد إنك جايى تبقى وزير عريس وحفلته بيلموا فى كراسيها،،،،
غايتو يا ود جبرا أنا نفيستى أكون وزير دولة فى وزارة البهجه والمسرة،قبال ما أطلع على أقرب صينية فى أقرب شارع،،،،

[دلدوم حجر التوم]

#1380585 [ali]
0.00/5 (0 صوت)

12-05-2015 09:42 PM
ايه رايك يا جبرا نعملك وزير النقل وتشوف بالمرة خط هيثرو وين مشي
لكن الخوف بعد تشوف الكاش تمسح الواوات النشفتا ريقها دي

[ali]

#1380103 [عبدالواحد المستغرب اشد الإستغراب!!]
4.25/5 (3 صوت)

12-04-2015 03:52 PM
والله يا ود جبرا (ترانا كلتا راجين وزارة السجم دى وكل ما نسأل بيقولوا لينا لسه الدور ما جا عليكم !!) الظاهر الواسطات شغاله تش ترجى قطعة واطه من وزارة الإسكان او انبوبة يوتجاز أسهل بكتير من ترجى وزارة مع إنو المؤهلات المطلوبه للحصول على وزاره أيسر بكتير من حصولك لقطعة واطه او انبوبة بوتجاز فبينما الاخيرتان تتطلبان قروش كتيره لزوم رشها على الموظفين فالاولى لاتحتاج إلا الى قرار جمهورى وكما تعلم المؤهلات غير ضروريه ثم حصولك على وظيفة وزير حق يكفله لك الدستور والظريف إنك لن تحتاج لتقديم اى رشوى لرئيس الجمهوريه لان فخامتو قادر يدبر حالو!! وما محتاج يمد يدو لاى واحد جربوع عايز يستوزر !!.

[عبدالواحد المستغرب اشد الإستغراب!!]

#1379884 [صلاح عثمان]
4.00/5 (3 صوت)

12-03-2015 08:57 PM
زمان كان في دكتور انسان بمعني الكلمة
ربنا اعطاه ابتسامة دائما علي وجه ---- وكان فخر لزملائه في جامعة الخرطوم
في يوم سالني باكستاني عنه وقال انو كان مريض بالملاريا والاطباء ما عرفوا ليه علاج وسمع صاحبنا وجاءه في البيت بالليل وركبه في عربية بوكس وفصح ليه وعالجهفي المستشفي وكان ساعتها المدير الطبي ---
قلت للباكستاتي صاحبك اصبح وزير في السودان وتاني الا تشوفوا في التلفزيون
وكنت اتوقع انو يكون حاجة اكبر من وزير بحسب سيرته وامكانياته وعلاقته

لكنه طلع ما كيشة زي وزيك ياساتاذ الفاتح و فارق الانســــــــانية -- ومؤسف جــــــــــــدا انو احلام كبارنا تصبح بيت منازل ورغيف

كانــــــــــــــــــــو ا كبار في نظرنا ----- ياريتهم كانو بقدر احلام الناس

[صلاح عثمان]

ردود على صلاح عثمان
[نور] 12-05-2015 03:45 PM
والله أوفيت وكفيت يا أخ (صلاح )
كانوا كبارا فى نظرنا ... يا ليتهم كانوا بقدر احلامنا
هذه هي حالة الاحباط التي يعيشها كل مواطن سوداني بعد ان انفرط عقد القيم والاخلاق والامانة وتناثرت حبيباته فى وحل الزيف ......
رحم الله اولئك المعلمين الذين علمونا معني الوطن ورحلوا وبرحيلهم ضاع الوطن ...

European Union [الطيب] 12-04-2015 11:33 AM
في الصميم. مؤسف أن يفتقد الإنسان لأدنى حقوقه.


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة