إلا نحنا
05-10-2015 06:14 PM

في كل بلاد العالم تستخدم كلمات مثل: لو سمحت .. شكراً .. متأسف.. إلا نحنا (ليه ما تعرف)؟.
في كل بلاد العالم توجد على الطرق الرئيسة خطوط عبور مشاة .. إلا نحنا (تقطع الشارع وأنت وحظك بقى)
في كل بلاد العالم يوجد ناطق رسمي واحد للحكومة إلا نحنا (أي مسؤول يمكنه النطق)
في كل بلاد العالم يوجهك شرطي المرور إلى أن هذا الطريق اتجاه واحد إلا نحنا( يخليك لمن تدخل) !
في كل بلاد العالم تستخدم الركشات لنقل الأغراض إلا نحنا( عندنا تستخدم لنقل البشر والخمور كمان)!
في كل بلاد العالم لا تتعطل دواوين الحكومة عند مجيء ساعة الإفطار إلا نحنا( الفطور وبعدين الشاي فالصلاة ثم .. تعال بكرة)
في كل بلاد العالم لا يمكن أن يزورك شخص في منزلك فجأة إلا نحنا ويقول ليك( كدى افتح لينا التلفزيون نشوف الكورة)!
في كل بلاد العالم إذا قبض عليك تقود سيارتك دون رخصة قيادة تم إيقافك إلا نحنا .. تدفع الغرامة وتمشي(ما الغرامة أهم من السلامة وكده).
في كل بلاد العالم يوجد هناك أكثر من نادي قوي يتنافسون سنوياً على بطولة الدوري.. ويمكن أحياناً لأندية الحصول على اللقب .. إلا نحنا .. يا الهلال يا المريخ (البقدر على ملايين الدولارات دي منو)؟.
في كل بلاد العالم رقم الإسعاف معروف إلا نحنا ( تفتش ليهو فتيش ولمن تلقاهو يكون المريض موضوعو انتهى)
في كل بلاد العالم يتم تخصيص حصص للموسيقى في المدارس إلا نحنا ( ومع ده عندنا عشرين مليون فنان)
في كل بلاد العالم توجد لافتات توريك إلى أين تفضي بك الشوارع التي تسير فيها إلا نحنا( لو عاوز تمشي حته فعليك الاستعانة بصديق)!
في كل بلاد العالم هناك سلال لوضع النفايات على الشوارع إلا نحنا( ويقولوا ليك هيئة ترقية السلوك الحضري)
في كل بلاد العالم لا يمكنك صرف دواء من غير روشته (من الدكتور) إلا نحنا لأنو مقابلة الدكتور (حكاية)!
في كل بلاد العالم عندما يستوقفك الشرطي فإنه يبتسم لك إلا نحنا فإنك تبتسم له (من الخوف طبعا)!
في كل بلاد العالم توجد بالمدن أماكن لقضاء الحاجة (مجاناً) إلا نحنا فإنك لا تستطيع أن تقضيها (كان ما معاك حاجة)
في كل بلاد العالم لا ينصب شخص في وظيفة دستورية إلا بعد أن يمر مترقياً بعدد من الوظائف إلا نحنا فيمكن أن تكون ( دي أول وظيفة ليك)!
في بلاد العالم تكافيء الحكومات المغتربين لدعمهم الاقتصاد إلا نحنا فالحكومة (تطلع عين أبو أهل الخلفوهم)
في كل بلاد العالم يعتزل السياسيون في سن مبكرة إلا نحنا ( كم وتمانين) ولسه عاوز فرصة يحكم!
في كل بلاد العالم لا توجد شركات حكومية تدخل سوق الله أكبر وتنافس الناس إلا نحنا أكثر من (500 شركة) ده غير (الرايحات)
في كل بلاد العالم يتم فتح ملفات الفساد والتحقيق فيها إلا نحنا (نفتح ليها حفرة) وندفنها!
في كل بلاد العالم لا يسمح للوافد (بدون أوراق) العمل إلا نحنا .. شغالات .. سواقين ركشات.. عمال كافتيريات والمسؤولين عاملين نايمين!
في كل بلاد العالم يستخدم أفراد شركات الأمن لحراسة الشركات والمؤسسات إلا نحنا إذ تجدهم شغالين في الاستقبال( مع أنو ده ما شغلهم ولا مؤهلين ليهو)
في كل بلاد العالم تعمل السفارات على حل مشاكل مواطنيها إلا نحنا فسفاراتنا تعمل على (شربكتها)!
في كل بلاد العالم يستغرق إنشاء جامعة عشر سنوات إلا نحنا ( ممكن نعمل عشرة جامعات في سنة واااحدة)
في كل بلاد العالم الحرامي بعاين في الواطة إلا نحنا (الحرامي بعاين ليك جوة عينك)
في كل بلاد العالم لا يمارس عملية التطبيب إلا من حصل على إجازة علمية وتم تسجيله من الجهات المسؤولة إلا نحنا( ناس الأعشاب والشنو ما بعرف فاتحين ليهم عيادات عديل كده )
وكمان بيعلنوا في الصحف والقنوات!
في كل بلاد العالم يعتبر اغتصاب القاصرين جريمة توقع عليها أقسى العقوبات إلا نحنا .. شهر شهرين سجن وكم سوط كده!
في كل بلاد العالم لن تجد في الصحف إعلانات لمرضى يطلبون من ذوي القلوب الرحيمة التبرع لعلاجهم إلا نحنا (العندنا ديوان زكاة )!
في كل بلاد العالم توجد بين الأحياء مساحات يمارس فيها الأطفال والشباب الرياضية والألعاب إلا نحنا( عملوها كووولها عمارات) عشان كده مش ح نتحصل على ميداليات من صفيح!
في كل بلاد العالم توجد بالأسواق أماكن لإيقاف العربات إلا نحنا ( لأنو المحلية قاعدة تاجرها لبتاعين الطبالي وكده).
كسرة
في كل بلاد العالم يمكنك معرفة مخصصات المسؤولين بسهولة إلا نحنا ما تعرفها إلا لمن المسؤول يتسرق.
كسرة ثابتة(قديم)
أخبار ملف خط هيثرو العند النائب العام شنو
(وووووووووووو)+ (وووووووووووو)+ (وووووووووووو)+(وووو)+و
كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو)+(وووو)+و.

التيار


تعليقات 21 | إهداء 0 | زيارات 6828

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1264685 [المستعرب الخلوى]
0.00/5 (0 صوت)

05-12-2015 04:58 PM
( في كل بلاد العالم يعتبر اغتصاب القاصرين جريمة توقع عليها أقسى العقوبات إلا نحنا .. شهر شهرين سجن وكم سوط كده!)
شهر شهرين شنو يااااااااااا ابو ناجى .. بيطلقوا سراحه طوالى وبقرار جمهمورى كمان ..
حصلت ولا ما حصلت ..؟؟

[المستعرب الخلوى]

#1264666 [quickly]
0.00/5 (0 صوت)

05-12-2015 04:13 PM
دي ماهبشتها ياجبرة,,, في كل بلاد العالم رؤساء محترمين وقورين ومشرفين شعوبهم الا نحنا
رئيس هجاص هرجال رقاص و مجرم حرب مطلوب من المحكمة الجنائية الدولية

[quickly]

#1264379 [عربي]
0.00/5 (0 صوت)

05-12-2015 09:01 AM
في كل بلاد العالم صلاحية جواز السفر20 سنه الا نحن الجديد 5 سنة ورسومة 4 اضعاف ازيد من رسوم اغلي جواز في العالم وصورة اسود وابيض لتقليل التكلفة كمان

[عربي]

#1264229 [المتغرب]
0.00/5 (0 صوت)

05-12-2015 02:22 AM
في كل بلاد العالم الرئيس ووزراؤه ومسؤولين الصف الاول في الدولة بيعلنوا ثرواتم قبل الجلوس على الكرسي، الا عندنا ما في زول بيشتغل بيهم الشغلة لو اعلنوا ولا ما اعلنوا...

[المتغرب]

#1264138 [المقدوم مسلم]
0.00/5 (0 صوت)

05-11-2015 06:38 PM
..

[المقدوم مسلم]

#1264136 [ابو عبدالله]
0.00/5 (0 صوت)

05-11-2015 06:37 PM
في كل بلاد العالم الناس في رمضان بيفطروا في بيوتهم الا نحن بنفطر في الشارع ونربط للمارة.....


[ابو عبدالله]

#1264087 [ممغوص]
5.00/5 (1 صوت)

05-11-2015 04:56 PM
احنا الزينا منو يا أستاذ الفاتح

[ممغوص]

#1264074 [رحمة]
0.00/5 (0 صوت)

05-11-2015 04:19 PM
فى كل أنحاء العالم النفايات الطبية تطلع بلجنة وبألوان للتخلص منها الى المحرقات الجاهزة سلفا للمستشفيات الا عندنا فان المستشفيات الحكومية تتخلص من النفايات برميها اقرب مكان مثلا البرارى ولمن تمشى تفتح بلاغ يفتحوا فيك بلاغ للتعرض لعربات الحكومة !

[رحمة]

#1263922 [جرتلى]
0.00/5 (0 صوت)

05-11-2015 11:49 AM
انا فكرتا كده اعمل لى منظمه طوعيه يكون المقال ده المنفسو بتاعنانعالج المشكلات دى واحده واحده لكن يا جبره فى واحده قولتا ود جبر ده داير يودينا فى ستين دهيه (شركات الحكومه)
خط احمر العب بعيد يا ولدما تلعب بالنار
كده يا جبره احذف الماده دى صعبه صعبه...... الله يخليك

[جرتلى]

#1263837 [مريود]
5.00/5 (1 صوت)

05-11-2015 09:56 AM
أووووووووووووووووووووك .

كأننا لسنا بشر.

واقع يدمي القلب.

الواحد داير أهلو وخايف من البهدلة دي.

رأيك شنو.

[مريود]

#1263835 [أبوقرجة]
5.00/5 (6 صوت)

05-11-2015 09:56 AM
في كل بلاد العالم الدستور هو مصدر التشريع .. إلا نحنا رئيس الجمهورية هو البشرع.
في كل بلاد العالم الفقراء الحكومه ترعاهم إلا نحنا الفقراء يرعوا الحكومة.
في كل بلاد العالم الشعب في عيون الحكومه إلا نحنا الشعب في جزمة الحكومه.

دا زمن الانقاذ يا ناس ...

[أبوقرجة]

#1263814 [خالد فارس]
5.00/5 (3 صوت)

05-11-2015 09:35 AM
في كل بلاد العالم الدخول لمواقف البصات السفرية مجان الا نحن تدخل بفلوس

[خالد فارس]

#1263805 [كردفاني]
5.00/5 (3 صوت)

05-11-2015 09:28 AM
ياجبرة انت ماسمعت اخر خبر ولاشنو ولاالصوارمي ماوراك حكاية الجسم المضيء شنو ديل جماعتك ناس المريخ كانو جاين زيارة لي عوض بريمر عاوزين يلبو طلب الدعوة إلي جماعتك بدل مايضفو الضيف ادو سلاح ناري

[كردفاني]

#1263799 [جنو منو]
5.00/5 (3 صوت)

05-11-2015 09:22 AM
فى كل بلاد الدنيا مافى حكومه وطنيه شعبها جعان ومرضان الا المتؤضيين .. تشترى 50 سياره
جديده على الزيرو لطلبه جامعات لم يتخرجوا من الجامعات بعد الا نحن ماقروش البلد حقتهم
فى زول بقول بغم .. يعنى ديل لمن يتخرجوا .. ماعندهم خمسة سنوات تانى.. حايركبوا شنو ؟

[جنو منو]

#1263774 [Tutu Tiyo]
5.00/5 (1 صوت)

05-11-2015 09:05 AM
إنت يا ود جبرا أخبار ترعتي كنانة والرهد شنووووووووووووووو (ووووووو) (و)

[Tutu Tiyo]

#1263586 [julgam]
3.00/5 (3 صوت)

05-10-2015 11:17 PM
ياود جبره أخبار عنتره الرميتو البحر شنو وووووووووووووو،هذا الهزبر الأغلب ما بموت سكت،

[julgam]

#1263569 [عصمتووف]
5.00/5 (6 صوت)

05-10-2015 10:36 PM
\

في كل بلاد العالم الرؤساءاحرار يتحركون ويس لديهم سجل جنائي
الا نحن لدينا اول رئيس في العالم تصدر المحكمة الجنائية الدوليه بحقه وهو لايزال في السلطة

[عصمتووف]

#1263562 [nona]
5.00/5 (3 صوت)

05-10-2015 10:13 PM
في كل بلاد العالم يمكنك معرفة مخصصات المسؤولين بسهولة إلا نحنا ما تعرفها إلا لمن المسؤول يتسرق.
DI KHATEEEEERA YA GABORTI

[nona]

#1263548 [الأصمعي]
5.00/5 (2 صوت)

05-10-2015 09:28 PM
في كل بلاد العالم توجد 3 _ 5 أحزاب تتنافس علي مقاعد البرلمان .. الا نحنا بس .. ما شاء الله 44 حزب مشاركة في الانتخابات !!! غير المقاطعة !!!!!

[الأصمعي]

#1263544 [الدرب الطويل]
5.00/5 (2 صوت)

05-10-2015 09:09 PM
في كل بلاد العالم التعليم الأساسي للاطفال إلزامي ومجاناً إلا عندنا.. شوف بس اطفال الدرداقات ونسبة المتسربين من المدرسة..
في كل بلاد العالم بيستعدوا للخريف إلا نحنا.. بيجينا (فجأتن) وكده..
في كل سفارات العالم تلقى الموظفين في خدمة مواطنيهم إلا نحنا.. سفاراتنا لمص دماءنا والتجسس علينا وحياكة المؤامرات وفيها كمان بيوت اشباح..
في كل بلاد العالم المسؤول لما يفشل في عمله بيستقيل او يقال إلا نحنا.. مسؤولينا بيعتبروه كالتولي يوم الزحف..
في كل بلاد العالم قوانين صارمة ضد الإختلاس من المال العام إلا نحنا.. جماعتنا ابتدعوا فقه السترة والتحلل وماعارف شنو (دا لو المختلس اتكشف).. يا ترى اين انت يا غسان؟..

[الدرب الطويل]

#1263542 [صادميم]
5.00/5 (1 صوت)

05-10-2015 08:55 PM
في كل بلاد العالم تكون نتيجة الفائزين في الانتخابات مجهولة الا نحن فالنتيجة معروفة حتى قبل ان تبدأ الانتخابات زاتها.

[صادميم]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة