قال ايه تعليم ؟؟؟
05-12-2015 10:27 PM


تم إعلان نتيجة مرحلة الاساس فبدأت المدارس الخاصة في الإعلان عن سلعتها .. كل مدرسة تقول للتانية (إنتي وين)
أكاديمية ايه كده مش عارف (الحديثة) ومدارس مين كده مش عارف (النموذجية) ومؤسسة مين كده (التعليمية)!
مدارس خمس نجوم .. الكاميرا تتجول وسط الفصول..
المكيفات و(الاسبليتات) والأرضيات (السيراميكية) .. كل طالب ( ما شاء الله) يجلس على كرسي مريح وأمام درج (انما ايه) .. تدلف الى قاعة فخمة تتناثر عليها أجهزة (الحاسوب) والطلاب منهمكون في تشغيل (الويندوز) ومواقع التواصل الاجتماعي والصفحات العلمية .. ثم تدخل الكاميرا إلى أحد مكاتب المعلمين حيث تقوم بالتركيز على الاثاث الفاخر من دواليب زجاجية حديثة تحتوي على أحدث الوسائل التعليمية بينما المعلمون منهمكون في تحضير الحصص وامام كل واحد (لابتوب) آخر موديل
الكاميرا تركز على لافتة مكتوب عليها (العقل السليم في الجسم السليم) ثم تتنقل الى ميدان (الباسكت) و(الطائرة) والطلاب يمارسون هوايتهم .. تنتقل بعد ذلك الكاميرا اإى قاعة اجتماعات فيها يجتمع مجلس الاستاذة يتوسطهم (المدير) والابتسامة تعلو شفتيه (ما مرتاح وكده!) والجميع طلابا ومعلمين ( نايرين ونضيفين) .. ولا تنسي الشركة (اقصد المدرسة) ان تبث في نهاية الاعلان الجائزة التي تنتظر الطالب إن استفاد من هذا الجو التعليمي الصحي وهي عبارة عن عربات (موديل السنة) تمنح للخمسة الأوائل ! فتقوم الكاميرا بالتركيز على الطلاب الفائزين وهم يستلمون مفاتيح العربة ويجلس كل واحد منهم امام (الدركسون) متهيئا للانطلاق ! يتبع ذلك ظهور أرقام الهواتف التي يجب الاتصال عليها إذا اراد المواطن أن يضمن مستقبل ابنه ونعم المصير!
على قناة اخرى هي قناة (الواقع المر) .. كانت تبث ذات الاعلانات التي تعلن فتح باب القبول للعام الدراسي الجديد الكحيانين من ابناء (مهدودي) الدخل والمعدمين أن يقوموا بالتسجيل .. نحن نتميز بفصول (آيلة للسقوط) من غير شبابيك ولا حتى أبواب وإنت وبختك مرات سقف (في ) ومرات (مافي)
لدينا مراحيض غير آدمية تبعث على التقيؤ وتزكم رائحتها الانوف وتتسبب في إثارة (الربو) وخمة النفس والذبحة الصدرية وكل أنواع الجلطات.
مدارسنا تهتم بالياضة كرياضة (النط من فوق السور) كما أن لدينا مقررات دراسية لا يستطيع حملها ( خليك من قرايتا) إلا عتاة الجبابرة وابطال المصارعة الحرة
لدينا معلمون لكافة المواد والتخصصات لم يقبضوا رواتبهم لأكثر من عامين لذا فهم أكثر حماسا لتعليمكم في هذه الجو الدراسي المثالي على الرغم من أنو (أخلاقهم في راس نخرتم) من الفلس.
نحن نؤهلكم للالتحاق بصفوة كليات (الضلله) بنين و(الشرشحة) بنات ،وجميع كليات (الصياعة والضياع) قسم الوقوف في الاشارات وبيع ا(الكلينكس)!
لا تحلم عزيزي الطالب بشيء اسمه كرسي لتجلس عليه لانو (المعلمين ذاااتم ما عندهم) شوف ليك كم طوبة واقعد عليهم .. ثم انتا ذاااتك القاعد ليها شنو اساتذه يدرسوك ذاااتو ما في والكتب ما جات من الوزارة .. لن تشعر عزيزي الطالب بالوحدة مطلقا ففصولنا ذات كثافة قياسية (3 طلاب كل سنتميتر مربع) لذا نحن ننصحك لو بدت عليك علامات الاختناق من عدم توفر الاوكسجين ان تطلع بره الفصل (تجر ليك نفس) وترجع وللا احسن ذاتو ما ترجع وتمشي بيتكم على طول..
كسرة : قال ايه؟50 عربية كرولا بي 22 مليار ..شفتو الكلام دا كيف؟؟؟
كسرة ثابتة (قديم)
أخبار ملف خط هيثرو العند النائب العام شنو
(ووووووووووو)+(ووووووووووووو)+(وووووو)+وو
كسرة ثابتة(جديدة:أخبار تنفيذ توجيهات السيد الرئيس بخصوص ملف خط هيثرو شنو (وووووووووووو)+(ووووووووو)+(وووو)+و





تعليقات 12 | إهداء 0 | زيارات 6460

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1266082 [سامي]
0.00/5 (0 صوت)

05-14-2015 06:21 PM
أبو الزفت ودا حالتو حفل الرقيص للرئيس لسع مااتعمل أيها الشعب السوداني الهمام تاكلوا نيم ولا نركبكم كلكم في بواخر ونقددا لما تكون بعرض البحر اختاروا واحدة ياشطار

[سامي]

#1265054 [جملون]
5.00/5 (4 صوت)

05-13-2015 10:33 AM
يا جماعه فى واحد مغترب ولدو دخل جامعه خاصه فى السودان واشترى لولدو عربيه كرولا موديل 2015 وهسى هو متمحن وخايف على ولدو الجماعه يفلقوهو قال عاوزيبيع العربيه قال طلبة المؤتمر عندهم حمايه ومسدسات لكن ولدى مسكين

[جملون]

#1265050 [كمال الهدع]
3.00/5 (3 صوت)

05-13-2015 10:29 AM
عندما زار الرئيس نميري الصين طلب من الرئيس ماو تس تونج قرض بمبلغ عشرة مليون جنيه استرليني وكان ساعتها مبلغ ضخم فقال له ماو كم عدد السكان عندكم قال له النميري عشرة مليون فقال له ماو جيبهم كلهم عندنا ونسكنهم ليك في عمارة عمارتين او كما يقال برج برجين ونزرع السودان كله ونقيم فيه مصانع وما في داعي للامم المتحدة وخلافه ونرتاح من جهجهة ناس الجبهة ديل والالم المخليننا فيه

[كمال الهدع]

#1265047 [متشتهي الفول]
5.00/5 (2 صوت)

05-13-2015 10:25 AM
مولد وسيدو غايب ديل بشتغلوا شنو ورئسهم السجد للريس ما عشان كدة شغلم شنو ما انجيية وكتالين كتلة قال50كورلا بي22مليار الواحدة بي440مليون جنيه لا حول ولاقوة الا بالله والله ماشاء الله البلد فيها خير كتير لكن منهوب ومحمد مغلوب على امره مالاقي حق دواء الملاريا

[متشتهي الفول]

#1265039 [كمال الهدع]
5.00/5 (1 صوت)

05-13-2015 10:16 AM
امم متحدة وما ادراك امم متحدة لي شنو افضل حاجة اقتراح الرئيس ماو تس تونج للنميري
عند ما طلب النميري قرض بمبلغ عشرة مليون جنيه استرليني قال ليه ماو عدد السكان عندكم كم قال ليه عشرة مليون قال ماو جيبهم كلهم عندنا في الصين نسكن ليك في عمارة عمارتين ونزرع ونصنع في هذه الأرض ونخلصك من مشاكلهم بدل البهدله العاملنها علينا عديم الفهم ديل

[كمال الهدع]

#1265019 [جنو منو]
5.00/5 (1 صوت)

05-13-2015 09:54 AM
المدارس الحديثه والنموذجيه لاولاد ذوات الدم البارد .. أما مدارس الواقع المر لاولاد
ذوات الدم الحار .. شفت الكلام ده كيف ياجبرا..

[جنو منو]

ردود على جنو منو
[مدرسة يستهبلون (اوضة وبرندة )] 05-14-2015 11:24 AM
المدارس الخاصة هى مؤسسات خاصة وليس هناك مانع ان تكون شركات كما استغرش اخونا جبرة وما العيب فى ذلك دى مؤسسة تجارية ومن حقها الترويج والدعاية وانفاق الاموال فى سبيل ذيادة المبيعات
المشكلة فى المدارس الخاصة فى البيوت القديمة اوضة وبرندة عملوها مدرسة خاصة وليس بها ادنى درجة من مواصفات المدارس حيث تضم فى حوش صغير عدد كبير من الاطفال
وتجد المدرسة ملاصقة للبيوت وتسبب ازعاج كبير جدا للمواطنين
درسنا فى مدارس حكومية الحوش مشاء الله حدادى ممدادى والمدرسة الخاصة لازم تكون افضل من المدرسة الحكومية
وحقو معتمد الخرطوم بتاع هجم النمر يهتم بالمدارس الخاصة ومراجعة بنياتها وتصاديقها بدلا من حكاية الجنبة دى اهم شى


#1264984 [حمزاوي]
5.00/5 (1 صوت)

05-13-2015 09:14 AM
الأهواء والشهوات التي تسيطر على الكل تعطل التفكير وتصنع مناخا عاما من الغفلة واقتناعا وقتيا بأن هذه الدنيا هي كل شيء .. ويظل الكل سادرا في الغفلة حتى تأتي لحظة الموت ولا تعود هناك رجعة. - مصطفى محمود

[حمزاوي]

#1264980 [jaaah]
5.00/5 (1 صوت)

05-13-2015 09:11 AM
يعني العربية ب440 بس
ما كتيرة.قراية شنو ووجع راس شنو
تفوووووووووو

[jaaah]

#1264975 [بت البلد]
0.00/5 (0 صوت)

05-13-2015 09:08 AM
المال السايب بعلم السرقة

[بت البلد]

#1264947 [محمد]
5.00/5 (2 صوت)

05-13-2015 08:42 AM
أقسم بالله حتى مجلس الأمن اذا سلموه السودان الآن ما حيقدر يعمل شئ ، لأن البلد انتهت خلاص ، أجيال بكاملها راحت .

[محمد]

#1264871 [المكتول كمد]
5.00/5 (1 صوت)

05-13-2015 06:52 AM
إنتو الحسادة ليكم شنو ... جبناهم بضراعنا.... والراجل يطلع لينا في الشارع !!! وأحسز تنطموا !!

[المكتول كمد]

#1264796 [سارتانا]
5.00/5 (1 صوت)

05-12-2015 11:02 PM
50 عربة كورولا ب 22 مليار جنيه !! علشان كده بطلوا القراية و حولوا الجامعات لافلام كاوبوي

[سارتانا]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة