القنبور ده !
05-22-2015 01:23 AM


كثيراً ما يتلقى العبد لله عددا من (الرسائل الأليكترونية) والمهاتفات من بعض المتابعين من القراء تطالبه بتناول موضوعات وأحداث (غريبة) و(عجيبة) تدعو إلى الاستغراب والسخرية ، وقد تلقيت مؤخراً عدداً من المهاتفات والرسائل التي تطالب بتناول حادثة (الخبير الوطني) و(المحلل السياسي) والأستاذ (الجامعي) والقيادي البارز بالحزب الحاكم والذي تعرض لعملية احتيال من قبل عصابة تنزيل أموال مؤلفة من ثلاثة أجانب من جنسيات إفريقية نصبت عليه بدعوى استثمار أمواله وسلبت منه مبلغ "68" مليون جنيه (بالقديم) ولاذت بالفرار !
بداية عجبت والله لرجل يحمل كل تلك الألقاب أن يقع فريسة لعملية احتيال (ساذجه) من عصابة (أجنبية) لا يقع فيها (شافع صغير) تستخدم في الإيقاع بضحاياها السحر والدجل والشعوذة على الرغم من أن (خبيرنا الوطني) لا يفتأ يشنف مسامعنا عبر الفضائيات عن العقيدة وتمكين دين الله والشنو ما عارف !
وقع (صاحبنا) في الفخ لأنه ببساطة يود أن يضاعف ثروته (الما معروفه جات من وين) ، حتى يصل إلى ما وصل إليه رفاقه الميامين من ثراء فاحش وغنى لا تخطؤه العين وقد علم المحتالون بأنه (قيادي إسلامي) ولن يجرؤ عند افتضاح الأمر إلى اللجوء للقضاء (عشان القصة شينة) ولا تتناسب مع وضعه (المتأسلم) إلا أنه (لخبط) حسابات (العصابة) ومضى برجليه إلى (قسم الشرطة) ،غيرآبه لما قد يسببه له ذلك من فضيحة (بي جلاجل) يسير بها الركبان عبر الأسافير في المواقع والمنتديات وتصبح مادة للسخرية والتندر في جلسات السمر وبيوت العزاء ، ولو كنت مكانه لأكلت القصة (في حناني) وعملت (نائم) ، لكنه حب المال الذي يعمي الابصار الذي جعله يختار (المال) مقابل (السمعة) !
تخيلت (خبيرنا الوطني) بعد أن وقعت الواقعة وقبل أن يهرع إلى (قسم الشرطة) لتدوين البلاغ وهو يسائل نفسه :
- هسه الزول يقول شنووووو؟
وطبعا عندو حق .. يكفي أن يقول أن ثلاثة أفارقة قد أخذوا منه مالاً فيعرف أي زول (عندو ريالة) بأن المسألة مسألة (تنزيل) أو (دولار أسود)، فما الذي يجعل شخصاً بكامل قواه العقلية يقوم بتسليم (أجانب) لا يعرفهم مبلغاً كبيراً من المال كهذا ؟
ولأن خبيرنا الوطني (يجب) في بلاغه لدي الشرطة أن يتطرق إلى أسباب تسليمه (الأموال) لهذه العصابة فقد قام وهو في هذا الموقف الذي لا يحسد عليه (بنَجْر) قصة لا يمكن لطفل في (روضة الحنان) أن يقوم بصياغتها نسبة لركاكة محتوياتها وعدم تجانسها ... قال (خبيرنا الوطني) والمحلل الإستراتيجي والأستاذ الجامعي والحجة الإعلامي :
(إن ثلاثة أفارقة زاروه في مكتبه في الخرطوم وعرضوا عليه استثمار أمواله وأن لديهم عفشاً يودون تخليصه من السلطات الجمركية وأخذوا منه مبلغاً من المال ولاذوا بالفرار) !
قد تتعجب عزيزي القارئ مما قاله (خبيرنا الوطني) أعلاه .. وأكيد الكلام ما دخل راسك .. لكن ما تخليك (وحش) ونيتك سيئة، فاحتمال أن يكون هنالك قراراً قد صدر بان (العفش في الجمارك على مسؤولية خبيرنا الوطنى) .. يعني أي زول عندو عفش عليهو جمارك يمشي لي (الخبير الوطني) يوريهو (البوليصة) ويقوم (الخبير) طواااالي يديهو القروش حتى لو (68) مليون !!
وعن معرفته بالمحتالين أضاف (خبيرنا الوطني) أن المتهمين استدلوا على هاتفه من أحد الأشخاص واتصلوا به وحضروا إليه في مكتبه وصلُّوا معه الظهر والعصر وقالوا له إنهم يعرفونه من جامعة افريقيا التي يدرس بها !!
يعني (صلة قرابة) لا توجد ... (علاقة سابقة) لا توجد ... (صلة مواطنة) ... لا توجد (أجانب) .. الوقت الذي مكثه معهم (بين صلاة الظهر والعصر) ... ساعات يعني ... وعلى الرغم من كل ذلك يقول (خبيرنا الوطني) بأن (الجماعة) قد أخذوا منه المبلغ بزعم استثماره !! إستثمار مين يا عم ؟ طيب كان تقولو لينا الاستثمار أبو سريع ده شنوو؟ ومع ناس إنتا ما بتعرف عنهم أي حاجة !!
وأخيراً .. عزيزي القارئ لابد قبل أن تستمر في المقال أن تتوقف عن القراءة وتذهب إلى أقرب (بقالة) وتشتري ليك (مقص) !!
إشتريتو ؟ طيب نواصل : في نهاية إفادته نفى الخبير الوطني أن يكون المتهمون قد عرضوا عليه مضاعفة أمواله بالتنزيل !!
كسرة :
طلع المقص وقص لينا (القنبور) ألفي راصنا ده !!
تنبيه للناطقين بغيرها :
القنبور هو خصلة من الشعر تترك في وسط رأس (جنا النديهة)، وهو الطفل الذي يأتي بعد طول انتظار ، وكان في الغالب يتسم (بالعوارة) ... والغباء !
كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+و

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+و

التيار


تعليقات 29 | إهداء 0 | زيارات 9989

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1272318 [الشنبلي]
0.00/5 (0 صوت)

05-24-2015 10:22 PM
hahahahahashahahaahahahahahhhhhaaaaaaaaaaaaaaaaaaay
God bless uuuu

[الشنبلي]

#1271893 [جنو منو]
0.00/5 (0 صوت)

05-24-2015 10:04 AM
تعرف ياجبره فى أهم لقب ونسيتو انو صاحبك ده ما أمام مسجد كمان .. يعنى الناس بصلى
خلفه.. يعنى انت بتقصد بجماعة التنزيل .. انو يقوموا يعملوا ل68 مليون دى downloading
فى الكمبيوتر وتبقى مليارات .. كدى شوف لينا القصه دى كيف بماأنك خبير كمبيوتر وكده ..

[جنو منو]

#1271891 [الوليد ابراهيم عبدالقادر]
0.00/5 (0 صوت)

05-24-2015 10:02 AM
الله يجازي محنك يا شبتاكا..حالتي دي كنت فائل الفاتح جبرا دا سخرجي درجة أولي لكن لقيتك قطعت لي السخرية في راسو..ياخي الخبير الما كنا خابرنو دا.. والنجار الاسمو الأصم دا ما جهجهت باكاتم..ان شاء الله ربنا يسخر سخريتك دي للبتمسخرو علينا ديل..

[الوليد ابراهيم عبدالقادر]

#1271653 [ابراهيم دياب]
0.00/5 (0 صوت)

05-24-2015 12:35 AM
وقنبور الخبير قصو جماعة التنزيل ارجو ان لايسخر من خبيرنا الوطني ومقدراته العاليه في خلق الشربات من الفسيح ياود جبرا الخبرا ديل طمموا بطنا كفايه كده

[ابراهيم دياب]

#1271553 [ابوجمال]
0.00/5 (0 صوت)

05-23-2015 09:00 PM
يا حبيبنا بكون كوتاااار الزيو لطشوهم الافارقة

بس شقي الحال يقع في بلاغ

[ابوجمال]

#1271545 [قساس فادي]
0.00/5 (0 صوت)

05-23-2015 08:45 PM
بالله شوفو الانانية بتعت المؤتمر الوطني حتى في الدجل .. معظم الشعب السوداني ظروفهم الاقتصادية زي الطين .. ما كان يكون عنده شوية وطنية ويخلي الجماعة ديل يضاعفو ميزانية البلد عشان الخير يعمنا كلنا ولا كيف

[قساس فادي]

#1271398 [awadalkareem ahmed]
0.00/5 (0 صوت)

05-23-2015 01:45 PM
المشكله ياخوى الفاتح ان صاحبنا القروش دى ماضاربو فيها حجر دقش وهى مال حرام ويذهب الحرام من حيث لتى انشاء الله مع افارقه او اوربيين انشاء الله من واق الواق - انت يالفاتح اخوى الزول ده ياهو نفس الزول الخلوا بيته الحراميه ولفحةا شى دولارات وشى استرلينى وريال وووو وخلوا ليه الجنيهات السودانيه لانها مابتجيب حق تعبها - كده اسالوه ياناس اسالوه ولو زعل خلوه قولوا ليه جبتها من وين- واذا عندو لقفه تانيه عايز يستثمرها يديناخبر

[awadalkareem ahmed]

#1271393 [كمال الهدع]
0.00/5 (0 صوت)

05-23-2015 01:42 PM
يا أستاذنا جبرة خليهم يضيعوها بهذا الأسلوب الما معروف فهمهم فيه شنو مره عندى أخوي قال لي عارف قروش الراقصات والشبه منه اللبنانيات في الخليج بجمعن المال ويذهبن بيه للبنان ويقومو ببناء قصور ومحلات للرقص والمنه كذلك وتأتي اسرائيل بخطفة تدمره ليهم وديل يودو قروشهم لمليزيا وغيرها وبعد الثورة يفتشو ليها ما يلقوها ماهم عبطه

[كمال الهدع]

#1271301 [عنفوان]
5.00/5 (2 صوت)

05-23-2015 10:34 AM
غايتو سمعت من أحد الصنايعية أنه كان عنده شغل في بيت ربيع هذا ، وأنه كان دائما يرى شيخا هرما "مجدوعا" دون أي اهتمام بشؤونه في غرفة طرفية خالص من ذلك البيت الكبير..جنب باب الشارع.. وهي في العادة تكون غرفة الشغالين في البيت مثل الخفير أو غيره .. وظن أنه واحد من معارف أسرة الخبير القدامى "زول مسكين" كان في الحلة مع ناس أبوه والراجل "البروف" دا لماه واستحسن فيهوأهو وفر ليه حتة يخت فيها راسه بدل يضيع ساكت في الشوارع مع "الهوامل" الكثيرين في هذا البلد..ولكن وبعد مدة من مواصلة عمله في بيت السيد الخبير الوطني .. اكتشف الحقيقة المرة .. وتأكد منها من صغار البيت .. ذلك الشيخ الهرم المهمل هو ببساطة والد خبيرنا الوطني الهمام .. أبو عديل كدة .. طيب يا سعادات الشعب السوداني: برضو لسه راجين منه خير؟؟؟؟

[عنفوان]

#1271249 [على كرار]
5.00/5 (2 صوت)

05-23-2015 09:09 AM
ألأخ جبرا تحية طيبة
هسى تلقى المتعافى ميت من الضحك من (كياشة الخبير البغل ده).
الله يجازيك با شيخ حسن،مش كان أحسن تخلى البغل ده يرعى فى برسيمه بدل ما تدخله التنظيم.

[على كرار]

#1271139 [saad]
5.00/5 (2 صوت)

05-22-2015 11:36 PM
ما خاب من استشار .. أتاريها البلد منكوسة يوم بعد يوم .. فعلى قدر أهل (الوطني) تأتي (الخبرات)..
حصلت مرة مع ضابط شرطة في الإمارات .. فأحيل للمعاش في الحال !!
ترى هل سيحال خبيرنا الوطني للإستيداع على أي حال ؟؟..والا حا يواصل كخبير (محتال عليه) في الإحتيال على بلدي المنحول؟
جيتك يا خبير تشورني ..لقيتك يا خبير (منشور) !!
ولا حول ولا قوة إلا بالله.

[saad]

#1271119 [عصمتووف]
5.00/5 (1 صوت)

05-22-2015 10:50 PM
جنا الندية ما هو زاتو ابو القنفد ال بتكتب عنة دة لكن هو تبيعة عمنا عبدالعاطي دفن المولود زماااان وربي التبيعة المتخلقة دي

[عصمتووف]

#1271041 [Nader]
0.00/5 (0 صوت)

05-22-2015 07:55 PM
يا جبره ده مش بتاع 1800 دولار ما عادى

[Nader]

#1270909 [khalid osman]
5.00/5 (1 صوت)

05-22-2015 11:59 AM
ياتري الطلبة القاعد يدرسهم الخبير دافي قاعات الدراسة بيقول ليهم شنو وهم مقتنعين بالبيقولوا؟

[khalid osman]

#1270890 [samer]
5.00/5 (1 صوت)

05-22-2015 11:09 AM
لو العالم دى عندها اخلاق مفروض يمنع من اى وظيفه و قال كمان امام جامع يا للعجب , واحدة منافق كيف يكون امام؟؟؟؟؟؟؟؟؟؟؟؟؟؟ التنزيل شقل سحر و سبعه لا يظلهم الله بظله يوم القيامه منهم من يمارس السحر و الشعوذه , قال رساله حضاريه قال

[samer]

#1270883 [عبد الملك]
0.00/5 (0 صوت)

05-22-2015 10:51 AM
ذكروا أن اليهودى أول من إبتدع الإستثمار فى الحمامات فقط لاحظ فى احد المحطات رجلا يجرى جيئة وذهاباً فقام بمراقبته حتى رآه قد إنفرد بنفسه غير بعيد من الناس وجلس لقضاء حاجته فعرف من وقتها ان ذالكم الرجل سيدفع كل ثمين إذا وجد حماما فى متناوله ...من هذا أقصد المنبر أدعو أصحاب العقول المتفتحة والأموال المكنوزة لتكوين شركة بإسم الخبراء لمساعدةالمتعثرين فى تخليص بضائعهم من الجمارك سواء المطار أو الميناء بتسليفهم فلوس التخليص وذلك من واقع الحكمة ( العفش فى الجمارك تحت مسئولية الخبراء ) وبعد هذا اليوم لن نجد بضائع متكدسة فى الجمارك مع الإحتفاظ بكامل الحقوق لصاحب براءة الإختراع ..

[عبد الملك]

#1270864 [A. Rahman]
5.00/5 (3 صوت)

05-22-2015 09:40 AM
كلامك صاح، حكاية ما عايز يعمل منها قضية و ىنفضح، فعلا هو راح تنازل عن البلاغ و شطبته النيابة، لكنه انفضح، و بما ان هذا الربيع (و أزهاره) متبلِّدا الإحساس فحكاية الفضايح دي هو متعود عليها و ما فارقة معاه كتير. بس يا استاذ الفاتح في حاجة انت قلتها غير صحيحة، و هو تساؤلك عن كيف يعطي ناس ما بيعرفهم مبلغ كبير زي دا؟ دا مبلغ كبير للزيي و زيك و زي القرّاء الكرام، بس بالنسبة للجماعة ديل دا مبلغ بسيط،ًما شايفسيارات طلابهم بي كم؟

[A. Rahman]

#1270859 [ود كردفان]
5.00/5 (1 صوت)

05-22-2015 09:19 AM
لاحول ولاقوة الا بالله!!!!!

[ود كردفان]

#1270858 [شبتاكا]
4.50/5 (4 صوت)

05-22-2015 09:17 AM
طيب انتخابات المفوض الوطنى الاصم بتاع 46.4 فى الميه متدافع نشترى له من المغلق كوريك وازمة عشان نقلع القنابير الراكبه فى رؤوسنا من ايام رئيس وحبيس مرورا بتوالى ووثبة..وبعدين الخبير الوطنى ده ما تلوموه ...عملته دى اتجبر عليها لان خزنة الدولة فارغة وهسع براكم شايفين قطوعات الكهرباء والموية والغاز وزحمة الطلمبات البقت تظهر واحتمال فجوة فى الدقيق والدولار الكاسح.... وشغلة قفيل مراكز التشيع والاصطفاف مع عاصفة الحزم ما جابت همها ووزير الماليه كل اسبوع بتكلم عن الودائع لمن حسه رااااح والعرب مطنشين وفلاحتهم فى انو دايرين نزيد الاستثمار ودكتور اصفار دنكل له سفره ومشى لهم جوه بيتهم ومرق منهم بحبة اصفار جديده وطبعا خبيرنا الوطنى زول غيبيات ومعروف انو فى سحر وكلام زى ده وبحكم فقه الضرورة الخلت مجلسنا الوطنى المنتخب بالتوالى السياسى يجوز القروض الربويه لبناء السد الرد ويخلى والى الخرتوم يسقط تهم الفساد عن غلمان مكاتبه ويكتفى بتفعيل فقه الستره والتحلل لحد ما لحقوهم امات طه ....خبيرنا الوطنى فعل شغلة التنزيل وما ضر اى زول وقال احسن يجرب الشغلة دى فى نفسه ولو نجحت ح يقوم طوالى يروح لريسنا المنتخب ب 46.4 فى الميه متدافع ويقول له بكل ثقة ادينى الولايه على خزائن السودان وتانى ما تشيل هم وقريشات ناس العميد جنجويد حميدتى رقبتى سداده..فى النهايه دوافع الخبير الوطنى وطنيه بحته وبعدين ما جاب جديد هسه اماتكم وخالاتكم لما الحال تزنق والدروب تتقفل ما قاعدات يروحن للفقراء وناس الكوره لمن يلاقو فريق قوى ما قاعدين يحوطو الشغله وناس فضائيات الشروق والخرطوم والسودانيه لمن يردح مراسلينهم عن الحضور الطيب لانتخابات الخج وانهاتتم بسلاسة كما خطط لها وكاميراتهم بتتجول فى الفضاء العريض الفارغ من المتدافعين اتارى كانت المشكلة فى عيوننا التى لا ترى كما ترى عيون الخبير الوطنى الانتخابى الاصم الذى فعل شغلة التنزيل وجابها 46.4 فى الميه متدافع..........

[شبتاكا]

#1270856 [واحد تاني]
5.00/5 (1 صوت)

05-22-2015 09:11 AM
القنبور في راس خبيرنا الوطني ....!!

[واحد تاني]

#1270826 [شعبول]
5.00/5 (2 صوت)

05-22-2015 06:22 AM
الفارة دقس ..
يخادعنا باسم الدين ..
فخدعوه بين الظهر و العصر ..

[شعبول]

#1270824 [julgam]
5.00/5 (1 صوت)

05-22-2015 06:18 AM
الله يخت محنك يارايع ،،فشيت غبينتنا فى منتفخ الأوداج الخابور،،،وعلى فكره كل الخدعه كانت فى العفش. ،،لقد سلموا الخابور نسخ مزوره لأوراق جمارك العفش وقبض أبقدوم الريح،،،
ياود جبره أنا جبت المقص ولكن غلبنى أقص القنبور ،،، لقيته قرن كيراتين قوى خلاس ،،يمكن عايز ليه منشار كهربائى،،،ياود جبره من كترت مااستقنبرونا الجماعه ديل تكلست فى روسينا القنابير،،

[julgam]

#1270822 [حاج علي]
0.00/5 (0 صوت)

05-22-2015 06:09 AM
مبدع يا جبرا
بس كان اسم ربيع عبد العاطي يكون في العنوان مع القنبور

[حاج علي]

#1270816 [Almisahir fi izallail]
0.00/5 (0 صوت)

05-22-2015 05:34 AM
يا جماعة الخير .. الخبير الوطنى اتنازل عن البلاغ وقروشو رجعت ليهو.. خلاص فكّو شوطو! * اكلتو لحمو ولحم اللى عينوه ولحم البيخطب فيهم وبيصلّى بيهم..فى جامع اوفى مكتبو ..
*القروش دى اكيد ما ضاربو فيها حجر "دغش بضم الدال والغين) والآ ما كان فرّط فيها .. * لآكييين الراجل غرضو نبيل بعد امامته لزوارو الافارقه .. بس هل "كانو" كلهم متوضئين!
* هو فين ديلوكيت؟ لسّ قاعد فى السودان؟ ولآ رجع السعوديه لشغلتو القديمه..
* يكونش "حاريلو شى.. منتظرو .. الله ما قطع العشم.. عسى ولعل يلقالو "فرقه - بفتحة على الفاء والراء والقاف) فى التعيينات القادمه.. منصب وزير دوله .. مدير جامعة افريقيا سفير (ولو درجه تانيه)بتنزّل عليهو تنزيل استثمارال 68 الف( هى جنيه ولآ دولار).. ؟

[Almisahir fi izallail]

#1270813 [kaka]
5.00/5 (2 صوت)

05-22-2015 05:27 AM
القصة نجروها ليه ناس الشرطة الخلعة ما ليه قلب ينجر

[kaka]

#1270800 [ودالبله]
4.75/5 (3 صوت)

05-22-2015 03:14 AM
ينصر دينك ياجبورة طلعت زيتو الجزمة الزول ابو قدوم ده المنافق الدجال

[ودالبله]

ردود على ودالبله
United States [مدرسة يستهبلون (اوضة وبرندة )] 05-22-2015 07:38 PM
شنو حكاية صلو معاى العصر والضهر
شنو حكاية الوالى بيصلي الصبح حاضر
شنو حكاية الدجل والشعوذة الماشة فى البلد اليومين ديل


#1270797 [غربةوشوق]
4.00/5 (1 صوت)

05-22-2015 02:31 AM
رائع

[غربةوشوق]

#1270791 [راسه دايش و رقبته معسمة]
4.00/5 (2 صوت)

05-22-2015 01:55 AM
الاخ الفاتح
يبدو إن مركز المسأله هو ( العفش) العند ناس (الجمارك)! مش عادل امام دفع عشان خايف يشيلو ( العده)؟ عفش او عده المهم الاتنين دفعوا عشان ما يشيلوهاهاهاها,

[راسه دايش و رقبته معسمة]

#1270786 [عمدة]
4.25/5 (3 صوت)

05-22-2015 01:39 AM
يجازى محنك ياجبرة. بالصدفة كان جمبى مقص فتناولته وانتظرتك فاذا بالقنبور فى صنقور الخبير الوطنى وضيع الواطى. هسى عليك الله جنا النديهة مش أشطر من خبيركم الوطنى ده !! !!!!!!!!!!!!!!!!!!

[عمدة]

الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة