المقالات
السياسة
شَمَارَاتْ نسْوانْ .. فِي الرّئيسِ المُهَانْ
شَمَارَاتْ نسْوانْ .. فِي الرّئيسِ المُهَانْ
06-15-2015 09:55 AM


السرة: شنو يعني قطعتن علي القيلولة؟ شنو المهم للدرجة دي
بتول: الاجتماع ده فوق العادة .. يعني اجتماع طارئ لانو الشمارات من النوع التقيل
فاطمة: الزول ما قبضوا حيا أنا حبسوا حبسوا .. حيا أنا بهدلوا بهدلوا .. عجبني ليك يا المكعوج كرعيك
ست البنات: و الله ده شراد شرادة شديدة خلاص و تاني برضو حيعملا زي ما عملا في نيجريا
بتول: يعملا قالت بالله شوفن الغبيانة دي إنتي قايلة جوهانسبيرج دي حلة كوكو
فاطمة: قولن عايز يشرد حيشرد كيفن مع ركبوا المسيحة دي و الله إلا كان يحبا حبيان
السرة: و الحبيان ما داير ليهو ركب يعني؟
بتول: في حبيان صُلب صلب .. أليخلي الرقيص و يشوف الحبيان أب صلب صلب ده
فاطمة: و الله يا بنات أمي أضاني طرشت من سماع الأخبار و نشرة واحدة بتبشر بخير مافي
شذى: أنا غايتو عندي صحبتي زوجة الملياردير الرشيد عاملة معاي خط احمر من جنوب افريقيا خاتاني في الصورة أول بأول
بتول: شنو آخر أخبار زولنا طيب يا مراسلة الرويترز
قالت لي اتصل عليها بعد خمسة دقايق
اتصال من ريم: ألو يا شذى وينك؟
شذى: قاعدة مع صحباتي شنو آخر الأخبار؟
بتول: ختي الاسبيكر يا شذى ختي الاسبيكر
ريم: قالوا و الله شلالايفو متورمه من الزعل و بنفخ زي التور الهايج لكن قافلين عليهو الباب و خاتين عليهو حرس و معدمنو المتاوقة من الشباك
شذى: أكيد نفسياتو منهارة .. و الله ده استرس أكتر من اللازم .. في داعي يعني للكلام ده كله؟
ريم: في خبر مؤكد قالوا رجعوه بعدما شرد و اتنكر في زي واحدة
شذى: لا لا لا لا لا دي بالغت و بالغتي فيها البشير ما بسويها .. كيفن يعني يتنكر في زي مرة
بتول: هي قولن لبس باركوة وين يودي شنبو ؟
ريم: و الله قالو حلقو زي المافي حاجة و بكرة حتسمعن الكاروري يقول ليكن فقه الضرورة .. باي حاتصل بعدين
شذى: باي ..
فاطمة: إنتن عارفات .. ديل مستشارينو العملوها فيهو المسكين .. جنوب افريقيا دي ما عضوة في المحكمة الدولية دي و الله ورطوه ورطة الكلب في القفص
فاطمة: و الله قايلك عاقلة و فهمانة مستشارينو و مساعدين شنو .. المساعد الجديد بتاع الاتحادي ده سألوا عن الموضوع قال ليهم شنو قال هو مستغرب الناس قلقانة في شنو و قائمة و قاعدة في شنو؟ قال هو اتصل بالرئيس شخصيا بانجمينا و هو بخير
بتول: مستشار السجم ده ما عارف رئيسو وين .. انجمينا قال انجمينا التعطشك ما تروى يا بركة النبي
شذى: إنتن عارفات راجلي معاهم و لمن أشوفوا لبس عمتو الكبيرة ديك أكيد في حاجة خطيرة .. إلا سمعتو بتكلم و جابو سيرة بلة الغائب
بتول: ده مش الراجل بتاع الودع داك و دايرين منو شنو ده كمان
ست الناس: قالوا يحلهم الحل بله
فاطمة : سجمنا الراجل مرمط سمعتنا و الله .. عليكن الله شوفن جنس الكلام ده .. بقينا في لسان البسوى و اللي ما بسوي ىرايكن شنو لو جا راجع بكرة؟
بتول: نلم كراتين المجاري و نكتب عليها فضحتنا و يا عوقة .. عود بيقفاك و نرفعها في وشو
فاطمة: و الله ده لو تضربيهو بالبيض الفاسد ما يأثر فيهو .. أمس ما خلوه زيا لعوير في شرم الشيخ يتكلم .. و قبليها ما رجعوه من السعودية و قبليها ما شرد من نيجيريا .. ده راجل ما بستحي
بتول: طيب كده خلونا في الموضوع .. حسع النجيضة شنو؟
فاطمة: النجيضة الأكيدة المؤكدة إنو محبوس لحدة بكرة يشوفو ليهو حل يا جانا يا ودعناه الله
بتول: يا فاطمة إنتي قهوتك دي مالها دراش دراش كدي .. ما عندك مسحنة بتاعة بن ولا شنو
شذى: دراش دراش يعني شنو يا بتول؟
بتول: يعني ما ناعم يا ناعمة أبوكي
شذى: (مطنشة تعليق بتول) يخسى عليهم يعني كيفن يدعوه و يعملوا فيهو كده يعني؟
فاطمة: هي الشلاقة الودتو شنو؟ هو ما عارف إنو مطلوب
بتول: و الله رئيس الهنا ساطها هنا و هناك
(يتبع في جلسة شمارات أخرى)
[email protected]


تعليقات 5 | إهداء 0 | زيارات 5710

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1286276 [محمد ابراهيم]
5.00/5 (1 صوت)

06-15-2015 07:36 PM
سيناريست شريفة شرف الدين ابداع ومزيدا من الامتاع

[محمد ابراهيم]

#1286230 [محمود]
1.00/5 (1 صوت)

06-15-2015 06:30 PM
قولي للنسوان ديل راجلكن دا جايي في السكة اية واحدة تجري على بيتها

[محمود]

#1286113 [abu ali]
1.00/5 (1 صوت)

06-15-2015 03:51 PM
بالله عليك الحقينا بالباقى ،، ولو جاء راجع داء اسواء خبر أسمعه،،، لاااهاااى

[abu ali]

#1286012 [سوداني]
5.00/5 (2 صوت)

06-15-2015 02:25 PM
!This is absolutely hilarious! Fantastic.
يجب ان لا تضيع هذة الموهبة سدي، لذا اقترح الاتصال ب محمد نعييم سعد واقتراحك لكتابة سيناريو مسرحية كاملة بهذا العنوان وهذة الشخصيات يقوم هو بتولي امر اخراجها.

[سوداني]

#1285951 [اللهم العن الانقاذ لعنا كبيرا]
5.00/5 (1 صوت)

06-15-2015 01:24 PM
ياااارب يااااارب تكون النهايه



لقد هرمنا لقد هرمنا لقد هرمنا



من اجل هذه اللحظه التاريخيه

[اللهم العن الانقاذ لعنا كبيرا]

شريفة شرف الدين
 شريفة شرف الدين

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة