المقالات
السياسة
شَمَارَاتْ نِسْوَانْ .. وَجَعْ وَجَعْ الرَّئِيسْ رَجَعْ!!
شَمَارَاتْ نِسْوَانْ .. وَجَعْ وَجَعْ الرَّئِيسْ رَجَعْ!!
06-17-2015 09:41 AM


فاطمة: شفتن الخيابة الاستقبلوه في المطار؟
السُّرَّة: شفناهم الجماعة الرجرجة ديل شابكننا أسد إفريقيا .. و الله ده ما يسوى تيس الزريبة
ست البنات: و الله ده ديك العدة عليهو قليل .. قال شنو؟ قال الأسد النتر .. ها .. و الله ده ما يساوي صوفة قرد
ست البنات: يبقى ليكن الراجل ده بعد البشتنة و البهدلة دي تاني بيطلع بره؟
السرة: يطلع شنو الله ده يطلّع روحو .. راجل بلا الشردان ما عندو شغلة؟
بتول: يا اخواتي ده رئيس جمهورية ولا بتاع مارثون كل يوم جاري .. قلبو ده ما بنقطع من الجريان؟
فاطمة: أنا الممغصني و فاقع مرارتي في الاحراجات البدخّل فيها البلد البزورو .. بالله شوفن الراجل و سواطو لجنوب افريقيا دي؟
ست البنات: بدل المؤتمر يناقش قضايا القارة .. قضوها في بشير الهنا
السُّرَّة: الله يجازيك .. لا سوينا الآبري يا بشة و لا غبينا فيك اتفش
ست البنات: أنا غايتو توب العيد الجاي ده حلفت كن أسميهو بشة شرد
بتول: بس لازم تميزي .. ياتو شردة .. شردة ون؟ ولا شردة تو؟
فاطمة: و الله كان تباري شردات بشبوش ده و تسمي تيابك عليها عايزة ليك دستتين تياب
السُّرَّة: إلا قولن لي .. هو مالو نزّل عبدالرحيم المعاش؟ الراجل ما ختّ رجلو في المطار إلا كن طلع القرار
ست البنات: يا السرة ما تخليكي مواكبة شوية .. أكيد من فكة عبدالرحيم لصواميل عربية وزير الدفاع المكلف .. كان داير يوديهو في داهية
فاطمة: هو ما قادر يشوف طيارات و صواريخ تقول لي يفك صواميل
بتول: حسع في حساباتكن .. عبدالرحيم البعرفو ده بقدر على ولاية الخرتوم
فاطمة: و يقدر ليه يا بِتُّو؟ أصلا هم بجيبو و بعينو اللي ما بقدر و لقوه أحسن واحد ما بقدر .. تقدري تقولي لي الأحسن منو منو في الفشل و الخيابة؟
السُّرَّة: كان يخلو ود الخدر .. الصوام القوام الما بنظلم عندو أحد
بتول: أنتن طبعا ما عارفات ليه بقولو ليهو الصوام القوام
فاطمة: قول لينا يا موسوعة ما إنتي طابخاهم و خابزاهم
بتول: لأنو صوّم الناس الرغيف و قوّمهم الليل كلو يملو باغات الموية
السرة: يشهد الله أنا نمت أمس دي بعد أذان الفجر و ما مليت غير باغتين
فاطمة: تعجبك ماسورتنا .. شخيرو يجيب الطرشان
ست البنات: و الله يا بنات أمي أنا شامة لي ريحتن ماها زينة .. الجماعة ديل خلااااااااص حلتهم اتحرقت
بتول: التحرق و تبقى رماد يا بركة رمضان اللي على الأبواب
شذى: يا جماعة عندي ليكن مفاجأة قوية خلاص
بتول: يلا (فاجعينا) على الأقل نطِّعم بيها مساخة قوهتنا دي برجعة الراجل العوقة ده
شذى: ريم صحبتي زوجة الملياردير الرشيد اللي كانت في جوهانسبيرج رجعت بنفس طيارة الرئيس و بعد شوية حتجي أو تتصل تدينا الأخبار
فاطمة: حليل الخبر المسيخ الما مُطعّم على قولك يا فطومة يا بت أمي .. الخبر كان من لاهاي إلا القادر الله
بتول: و الله يا بنات أمي لو أرخيتن أضانكن حتسمعن صوت الخروف الجابو أبو أشرف عشان يضبحو .. إلا ...
شذى: ألو يا ريم كيفك؟
السُّرَّة: ختي الازبيكر ختي الازبيكر
ست البنات: بسموه الاسبيكر يا السرة إنتي لسانك ده حينعدل كيفن و بتين؟
ريم: كويسة و الله بس تعب السفر لكن الحمد لله .. كيف الشلة بالله؟
شذى: كويسات لكن محبطات و قرفانات شديد و الله يا ريم بفلتت البشير من الجنائية
بتول: أحكي لينا يا ريم أنحنا سمعنا قالوا الطيارة غسلوها بعطر الصندل
فاطمة: يعني شنو غسّلوها بعطر الصندل؟
السرة: يا فطومة ما دايما أنتي تفتيحة و بتلقطيها على الطاير إشمعنى المرة دي يعني؟ في غير إنو الرّيّس يكون عملها
فاطمة: و الله فاتت علي (تطلق ضحكة مجلجلة و لا تكاد تتوقف)
شذى: أنحنا معاكي يا ريم .. شنو الحصل .. بالتفصيل يعني
ريم: مع إني مرهقة و الرحلة طويلة و مليانة توتر لكن الأخبار الطازجة أحسن
السُّرَّة: صدقتي و أنحنا ذاتنا ما عندنا صبر لباكر
ريم: إحنا أصلا ما كنا مرتبين نسافر و لا حاجة .. فجأة دخلو علينا ناس لابسين فُلْسُوت و قالو لينا لازم ننقذ البشير و مافي غيركم .. قالوا إنو الرشيد ما حيسافر و حيسافر بدالو الرئيس
ست البنات: الخايب العوقة بسويها و الله أنا عارفاهو
ريم: و بما إنو زوجي كان مريض شوية فبركو حكاية إنو لازم يمشي السودان بأسرع وقت
بتول: و الله لو كنت مكانك يا ريم كان فضحتو و لميت عليه خلق الله ناسو و بهايمو
ريم: و أنا ماشية بجنبو كان بيهمس لي طوالي .. غطيني كويس و ما تمشي بسرعة .. غطيتني؟ في حاجة من وشي ظاهرة؟ و أنا أقول ليهو لا .. تاني يرجع يقول لي .. قولي لي يا الرشيد إنت كويس؟ حاسي بحاجة؟
فاطمة: و وين راجلك هو الخايب الآخر كمان
شذى: خلوه في جوهانسبيرج طبعا
ريم: بدل المطار ودونا في سيارات مظللة لقاعدة عسكرية و على طول إلى السودان.
(بقية الشمارات في الحلقات الجايات)
[email protected]



تعليقات 6 | إهداء 0 | زيارات 3491

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1287973 [سوداني]
0.00/5 (0 صوت)

06-17-2015 06:32 PM
هذا رائع!
يا محمد نعيم سعد وباقي عقد فرقة الاصدقاء:بالله عليكم الزولة شريفة دي كده اقعدوا معاها واعملو لينا حاجه (او حتي حاجات) تضحكنا تفرتك مرارتنا. وعشان كمان تكون عندنا نسخنا السودانية من مسرحيات عربية ايقونية مثل: (شارد؟) شاهد ما شاف(ش) حاجه ؛ الزعيم؛ الخ، وكده …

[سوداني]

#1287835 [زول]
0.00/5 (0 صوت)

06-17-2015 02:26 PM
روووعه والله

[زول]

#1287801 [داوودي]
0.00/5 (0 صوت)

06-17-2015 01:43 PM
ونسه بتجيب الهواء

[داوودي]

#1287750 [abu ali]
5.00/5 (2 صوت)

06-17-2015 12:30 PM
وأنشاءالله بعد عطر الصندل الريحة مرقت،،ما أعتقد

[abu ali]

#1287671 [AbuAhmed]
5.00/5 (2 صوت)

06-17-2015 11:18 AM
وصف دقيق

[AbuAhmed]

#1287637 [اللهم العن الانقاذ لعنا كبيرا]
5.00/5 (2 صوت)

06-17-2015 10:34 AM
هههههههههه مبدعة والله ياشريفة

ربنا يحفظك ...

المشكلة انحنا شعب ندمن تزييف الحقائق

قال اسد افريقيا

اسد افريقيا بتاع شنو

طلع ساااااااكت


البشير هرب شد شد شد

[اللهم العن الانقاذ لعنا كبيرا]

شريفة شرف الدين
 شريفة شرف الدين

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة