المقالات
السياسة
السودان -رغم كل شيء - لسه بخير
السودان -رغم كل شيء - لسه بخير
06-17-2015 04:28 PM

image

على صفحتها بفيسبوك كتبت الأستاذة رندا الكاروري:

يلا... شفتو الزول البي هيبتو دي؟؟!!
ده باختصار شدييييييد سوداني أصيل... يلا.. هو شغال في جوازات العلاقات البينية.. مامهم اسمو.. ومامهم مركزو.. المهم انو (بي فخامتو).. مابقعد في مكتبو ولا خمسة دقايق... بدخل أي مكتب فجأة.. وبشرف على سير العمل بي نفسو... وكل الاصطاف عامل ليهو ألف حساب... وبرتب صفوف المواطنين قدام شبابيك الخدمة بي نفسو.. ويقدم كبار السن والمرضى ويرجع الشباب بي ورى بي جملة سودانية بسيطة (ياشباب قدموا أبوكم دا).... لأ.. والشي الخلاني أفرح من قلبي.. شوف عيني في ناس شكلهم (عندهم فيتامين (و)...(واسطة يعني)... جو داخلين توووووش في المكتب... ونحن الغلابا واقفين في الصفوف... بس زولنا ده جا خاشي المكتب فجأة وطردهم ليك برا.. وقدر ماحاولوا يتفاهمو معاهو قطعها معاهم ناشف.. وقال ليهم (أنا هنا مابعرف أبوي.. أمشوا بيوتكم وتعالوا بكرة من صلاة الصبح هناك في صف الشباك)... وحمر عيونو للناس الشغالين في المكتب وقال ليهم (نهاية اليوم.. حضور في مكتبي)... طبعا أنا -وكالعادة- مشاعري دايما مفضوحة... فشنو... قمت ضحكت بي صوت... وعاينت بي نظرات شماتة (للناس المهمين).. طبعا شموني شدييييد... ههههههه... وبعدين بقيت متابعة (هذا الرجل) في كل حركاتو... وبعدما انتهيت من اجراءاتي مشيت عليهو وقلت ليهو (سعادتك... يااااخ تسلم البطن الجابتك).. قام ضحك وقال لي (ليه؟! أنا ماعملت غير واجبي)... قلت ليهو (ممكن أصورك؟!)... قال لي (ماتكبري الموضوع.. أنا زول بيأدي في واجبو وبس) وطنش فكرة النجومية دي...!
يااااااااااخ.... التحية ليك... ولكل سوداني أصيل... شهم... مخلص... بديك احساس انو السودان -رغم كل شي- لسة بخيييييييير!!!!


تعليقات 5 | إهداء 0 | زيارات 3396

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1288247 [السودانى]
0.00/5 (0 صوت)

06-18-2015 10:27 AM
للامانه الشرطه اذا وضعنا فى الاعتبار الهزات العنيفه التى تعرضت لها البلاد خلال نصف قرن واذا ما قارنها بمؤسسات الدوله الاخرى المدنيه والعسكريه نجد انها لحد كبير محافظه وبه شئ من المهنيه والانضباط

[السودانى]

#1288220 [عمار بورتاوي]
0.00/5 (0 صوت)

06-18-2015 10:06 AM
والله فعلا البلد محتاجه لي امثالو
راجل ود رجال
ربنا يكتر من امثالو

[عمار بورتاوي]

#1288160 [محمد محجوب]
0.00/5 (0 صوت)

06-18-2015 08:27 AM
نعم السودان لسة بخير. وياليت الأعمال الخيرة تجدنصيبها في الإعلام لتصبح قدوة.

[محمد محجوب]

#1288128 [سودانى طافش]
0.00/5 (0 صوت)

06-18-2015 04:52 AM
يااخوانا واحد يفهمنا علاقات بينية دى شنو .. جوزات عرفناها !

[سودانى طافش]

#1288027 [hassan]
0.00/5 (0 صوت)

06-17-2015 09:02 PM
very good article at least something positive

[hassan]

رندا الكاروري
رندا الكاروري

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة