ما تقفلوها 100؟
06-22-2015 12:57 PM


تسارعت دقات قلبى المعطوب بالخفقان.. سرت فى جسدى رعشة خوف.. نظرت إلى طفلى وطفلتى الصغيرين نظرة (مودع).. هرعت إلى الثلاجة التى أضع فيها (أدويتى).. حبوب تنظيم ضربات القلب.. حبوب الضغط.. حبوب السكرى.. حبوب منع التجلط.. (عشرة حبات) أتناولها يوميا لتبقينى على قيد هذه الحياة الفانية التى يظن ناس (هي لله) بأنها دار خلود!

كيف لا ينتابنى هذا الخوف والذعر وأنا أقرأ على أحدي الصحف بأن وزارة الصحة الاتحادية كشفت أن (٨٠٪) من الدواء المستخدم في المؤسسات الصحية (مغشوش) (يعنى بالعربى كده تمانية حبات من كل مجموع عشرة حبات مضروبة وكذلك بقية أنواع الأدوية(
وضعت أمامى (العشرة حبات) وقلت فى نفسى (يعنى هسه العشرة حبات حبات ديل فيهم تمانية حبات مضروبات)؟ وغير مطابقات للمواصفات؟ وحبيتين بس سليمات ياربى يكونوا ياتو (حبتين) من الحبوب ديل الكويسات وما ضاربات ؟ بتاعات (منع السيولة ومنع التجلط) وللا (الضغط) وللا (السكري) وللا …
وبدأت أحدث نفسى بصوت مسموع: هسه الزول يعرف الحبتين الكويسات ديل كيف؟ والله دي مصيبة .. وبينما أنا على هذا الحال (البطال) سمعتني زوجتى وأنا أخاطب نفسي :
– يا راجل شنو خاتى حبوبك قدامك وبتتكلم براك؟ جنيت؟
– والله أخير الجن من النحنا فوقو ده..
– فى شنو كمان؟
– مش ناس وزارة الصحة قالو ليك 80% من الأدوية الموجودة في البلد مضروبه وفشنك ساكت ، وأنا هسه محتار فى حبوبى ديل ما عارف الفشنك فيهن من الما (فشك) ؟
– بسيطة!
– كيفن بسيطة يعنى إنتى عاوزانى أموت وإلا شنو؟
– لا بسيطة .. بس أنادي ليكا (التومة(
– (التومة) دى شغاله فى (المواصفات)؟
– مواصفات شنو؟ والتومة الوداعية دي تحلها ليك في دقايق لا تقول ليا (مجلس طبي) وللا (مواصفات ومقاييس) هم كان فيهم فايده كان ده حصل؟
– يا ولية تومت شنو؟ إنتى جنيتى؟
– أها يعنى عندك حل تااانى؟ وحات الله هسه كان جاتك إلا تمسك ليك حبوبك دى واحدة واحدة.. حبه حبه وتوريك المضروبة من الأصلية!
بالطبع وبصفتى عامل فيها (زول مستنير) ومثقف فقد رفضت رفضاً باتا عملية الإستعانة (بوداعية) لعمل فحص (معملى) لتحديد الحبوب (الضاربة) من الما (ضاربة) لعلمى بإستحالة أن تقوم (التومة الوداعية) بالعمل الذى من المفترض أن بقوم به ( المسئولون) عن (الرقابة الصيدلاتية) بالبلد! لكننى فى نفس الوقت وجدت نفسى فى حيرة من أمرى فهذه الحبوب التى أتعاطاها هى من فصيلة الدواء (المنقذ للحياة) يعنى أى تلاعب فى تركيبتها أو مواصفاتها بيودى الزول إلى حيث لا (أمنيات تخيب ولا كائنات تمر)!
سادتى القراء الأفاضل:
منذ أن قرأت هذا التصريح وأنا أعانى من حالة خوف وذعر وعدم إطمئنان شديد بينما المسئولين عن هذا القطاع الحيوى و(الخترى) والهام وعلى الرغم من معرفتهم بهذا الأمر (الخطير) ينامون نوم (العوافى) ويمارسون حياتهم (عااادى) فى أمن وطمأنينة، يؤدون صلواتهم فى (خشوع) يلبسون الساعة باليد اليمنى (مخافة أن يزغ الشيطان قلوبهم) ويبسملون عند التحدث حتى يفقه قولهم ثم يصلون على النبى كثيرا من الصلوات ثم يحجون إلى بيت الله (أفواجاً) ويخرجون (ربع العشر) زكاة لأموالهم ويتركون (تمنية أعشار) الأدوية (فاسدة) على أرفف الصيدليات ليموت بها من لم يمت (بالسيف) !
بالله ده إسمو كلام؟ ونحنا نقول الحاصل شنو؟ الناس با ماشة (المقابر) يا ماشة (الأردن) عشان يجيبوها راجعة تمشى (المقابر)! أتاريهو (تمنية أعشار) الدواء الفى (السوق) مضروب ؟
الرقم يا سادتي الأفاضل رقم مخيف (80%) .. نعم (80%) من الدواء الموجود (لعلاج افراد الشعب الفضل) بالمؤسسات العلاجية دواء فاسد ومغشوش ومضروب وعلى الرغم من ذلك فإن هذا التصريح قد مر مرور الكرام .. ولم تصدر عن الجهات المعنية أي قرارات أو توجيهات لمواجهة هذه (الكارثة) التي تهدد حياة المواطنين ، والعبدلله يعتقد بأن هذا البرود الذي تعاملت به هذه الجهات المسؤولة مع هذا التصريح الخطير هو شئ طبيعي فهذه الجهات المسؤولة لا يتلقي افرادها العلاج في مستشفيات الرجرجة والدهماء من أفراد الشعب الفضل وأقل (نزلة برد) على مشافي (ألمانيا) و (سويسرا) حيث الدواء من الشركات والمصانع (العالمية) التي لا يتسرب إليها الشك !
لقد سبق وأن أقترح العبدلله في ظل هذه الفوضي (الدوائية) وغياب آليات الفحص والضبط والتفتيش على الدواء الفاسد وإبادتة ومعاقبة (المتاجرين) فيه انو تفرغ شعبة (مكافحة المخدرات) بالداخلية للقيام بهذه المهمة.. على الأقل (البنقو) ما بكتل طوااااالى!
كسرة :
هل هنالك مشروعاً حضارياً يوفر لمواطنية 80% من الدواء الفاسد؟ طيب ما تقفلوها (100%)
كسرة ثابتة (قديمة) :
– أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+و+و


تعليقات 16 | إهداء 1 | زيارات 9540

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1292247 [وجع وانفقع]
0.00/5 (0 صوت)

06-24-2015 11:33 PM
بصراحة استحدم قطرات لالتهاب عيون لا بنتهى والدواء غالي يعني انا طوالي مخروت

والله لو كنت مكان الرئيس لاعدمت كل مسول وعلى الاقل اطحت بهمفورا وحاكمتهم
الشركات ملك الجماعة وهم اهل البضاعة والحكومة حقتهم والموظفين حقنهم

ونحنا ذاتنا حقينهم

وووووووين حماية المستهلك المسنهلك وهى بامانة عاجزة ومجرد عرض فققط ةالله عدت من الخارج فبل ايام ورغم رفضي للهجرة احسيت انهم اصحاء سعداء قاكلهم نظيف سليم ووالله شفن زملاء اكبر منى سنا عادوا من امريكا بنفس الشكب اما انا فكركببت وتلجنت
وهم والله مرماء علينا ادزنا 20% هامش سلامة ويعنى تمزت طزالى كدةوتساها وموك اوت لا طيب ميا يقرا لواووووات الا تنتهى

وانت واللهباضبع وقتك ساي وووووووووووووو

[وجع وانفقع]

#1291832 [صابر]
0.00/5 (0 صوت)

06-24-2015 12:47 PM
لي كلامك دا احسن الزول يقعد ساكت بلا دواء ويرجى يومه ميتة وخراب ديار؟انا لله وانا اليه راجعون

[صابر]

#1291796 [ود احمد]
0.00/5 (0 صوت)

06-24-2015 12:14 PM
يااستاذ ولسع الساقيه لسع مدوره

[ود احمد]

#1291629 [البصير أبو حمد]
0.00/5 (0 صوت)

06-24-2015 08:27 AM
استاذ جبرا .. مافى داعى للوداعيه .. ابلعهم العشره واكان ( قلبك زاد خفقانو ) قل واحد بتاعت القلب مضروبه .. واذا ( إزددت حلاوه) فاعرف ان حبه السكرى مضروبه وديل بقو اتنين .. وعلى ذلك قس.

[البصير أبو حمد]

#1291429 [على]
5.00/5 (1 صوت)

06-23-2015 08:06 PM
والله يالفاتح كان انا منك تسمع طوالى كلام مرتك وتجيب التومة الوداعية توريك الدواء المغشوش وكمان الجابو منو ومن ياتو بلد وبيتخزن فى ياتو حله عليك الله جيبها عشان كمان نحن نعرف المصادر من وين ووين هههه ولاتنسوا حلايب سودانية

[على]

#1291264 [عوض الله جابر]
5.00/5 (1 صوت)

06-23-2015 02:10 PM
والله أنا لمن قريت العنوان إفتكرتك قاصد يتموا الوزراء مائه....!!!!

[عوض الله جابر]

#1291093 [محمد أحمد المغلوب على امره]
5.00/5 (2 صوت)

06-23-2015 09:55 AM
وازيـــــــدك من الشعر بيت ، 100% من الادوية تعاني من سوء التخزين لقطوعات الكهرياء احيانا ولعدم الاهتمام احيانا.

يا ربي هذا التردي يقع ضمن " المشروع الحضاري " - " فساد ، تمكين ، تجنيب ، عنصرية"

[محمد أحمد المغلوب على امره]

#1290822 [عبدالواحد المستغرب اشد الإستغراب!!]
5.00/5 (1 صوت)

06-22-2015 07:07 PM
ياجبرا الحكاية دى ما بقت قديمه!!إنت كنت وين الزمن داك؟!! الحكايه ما جد فيها جديد ورئيسنا الاسد النتر والله كان شفتو طرف الجلابيه بين سنونو والزوغه الياها وطبعا خبر زى ده جبه ما كان قبله!! المهم كده طيب خاطر الزوجه عشان وداعيتكم كان تقدر تعرف الاسد النتر (كبه الزوغه كيف) وبيقولوا ناس جنوب إفريقيا لمو كل الوداعيات والسحره ونفسهم يموتو ويعرفوا الزول ده قدر يزوغ الزوغه دى كيف وربما وداعيتكم تنجح فى ما فشل فيه الاخرين !! والمحيرنا آكتر إنو الجماعه بقيادة حبوبه سعاد الفاتح كانت فى المطار بصفتا وداعيه موتقه !!وقالوا ليك غندور بعد ما رحبيهم بشوية بكيه ما عرفنا ليها سبب (وربما كان سين بينو وبين المرحبين بيهم)قال ليناالرئيس كان نجم المؤتمر وده الزاد فى حيرتنا ما قدرنا نعرف الرئيس كان فى جنوب إفريقيا عشان يقدم وصله غنائيه تبع إستار اكاديمى ولا مشى يسجل فى فريق كوره هناك طبعا نحن مخنا مشى لكده ودى معرفة حقيقتا براها عايزه وداعيه بوزن سعاد الفاتح !!وبعدين انت عمرك ما سمعت بمن لم يمت بالسيف مات بغيره؟!!النظام ده إنتو حيرتو عديل إستعمل كافة وسائل القتل وبزل من اجله الغالى والنفيس ذى الطيارات وعربات آخر موديل وارخص السبل ذى حرب الجنوب ودارفور وجنوب كردفان وجبال النيل الازرق ما خلا وسيله والتقول الشعب بسبعة ارواح وكمان العلى عليهم يكتلوا الف يلدوا الفين تقول ارانب!! يا اخى الناس ديل أقصد جماعة الاخوان متفقين علينا عديل اول ايام الانقاذ الزبير رحمة الله عليه الرجل الطيب وحسب الكلام الختوهو فى لسانو قال لينا لازم يموت تلتين الشعب عشان التلت يعيش براحتو وسبحان الله محمد مرسى فى زياره للسودان كرر نفس الجمله بعد 24سنه من كلام الزبير وده إستحاله يكون مجرد توارد خواطر !! إذن الحكايه جد ما هظار وخطه ممنهجه ومدروسه وقيد التنفيذ والفهم فهم والما فهم عنو ما فهم !!.
فتنه جاهزه: ازكرك وده كلام سر بينى وبينك وما يطلع لاى زول وبمناسبة علاج الجماعه بالخارج بذكرك ب(ولد) وزير الماليه القديم الجديد سفرو وين لما إشتكى من أذنو الوسطى ؟!!بتذكر لمن البشير فى اول ايامو جاتو (طجه) فى رقيتو سفروهو وين والغريب اياما ديك كان خاتنها معاهم قرض ويشتمو فيهم ليل بنهار ويصفوها بالدوله الكافره وللناسين الدوله كانت بريطانيا العظمى وطبعا لانها دوله عظمى ما ختو عقلهم بعقل الجماعه ورحبو بيه وعملو معاهو الواجب !!وياريت فى الوقت داك كانوا كسروها ليهو عشان التلات اتلات يعيشو فى سلام وآمان!!

[عبدالواحد المستغرب اشد الإستغراب!!]

#1290772 [المندهش]
5.00/5 (2 صوت)

06-22-2015 05:09 PM
طبعا لو فى اى دوله فى العالم قالو فى 1..،% من الدوا مضروب كان الحكومه سقطت لكن فى بلدنا لو قلت المويه مسممه مافى زول بقول ليك انت بتقول فى شنو لانو الناس ما حريصه على حياتها عايزه تتخارج من المأسى دى

[المندهش]

#1290771 [julgam]
5.00/5 (2 صوت)

06-22-2015 05:01 PM
ياود جبره سيب المواجع سيبها وأنا ما عايز أحول خفقان قلبك لذبحه بس الحقيقه ياريت تكون 80 فى الميه من الأدويه مغشوشه وبس ياخى دى هى مواد غير خامله وتتسبب فى مضاعفات خطيره ،،،،ياخى ديل من أيامهم الأولى وزمن محاليل أنكور الهنديه وبابكر الدولفين والحكايه عايره،،،أما التأمين الصحى وأدويته الرخيصه فحدث ولاحرج ،،،ياخى نحن قبل بلاء الإنقاص دا لم نسمع بأدويه هنديه ،إيرانيه ،أردنيه او مصريه ،،،،الشركات الكانت موجوده إنجليزيه ،ألمانيه وسويسريه،،

[julgam]

#1290769 [مصطفي سعيد]
0.00/5 (0 صوت)

06-22-2015 04:49 PM
الكلام دا صهي
هنا في البلد دي

لمن بكيت يا ست الدار

[مصطفي سعيد]

#1290688 [A. Rahman]
5.00/5 (1 صوت)

06-22-2015 03:06 PM
لاحظ يا استاذ انه هذا مع النقص المريع في توفر الأدوية الذي قد يصل هو ذاته الى 80٪، يهني البلد فيها حوالي 20٪ فقط من احتياجات الدواء، و من هذه ال 20٪ توجد 80٪ مضروبة، يعني حسابيا ياها ال100٪. و التصريح صادر من وزارة الصحة الاتحادية، يعني مافي جهة تقدر تنفي الا يتبعوا الصحة للدفاع ليتمكن "البرادعي خالد سعد" النفي، و انه لم تكن هناك اي أمراض في السودان خلال تلك الفترة من قيام الإنقاذ حتى الان. اما حكاية البسملة و الساعة كم كلمني و حج البيت دا كله عرفناه لكن حكاية اخراجهم لربع العشر دي جبتها من وين؟ و الله ديل لو بيطلعوا ربع العشر كنا اطعمنا الشعب الصيني مرارة و شية. ديل الجنيه اللي بيدخل جيوبهم تاني ضكر الضبان ما بيشوفو الا عند حاجتهم لممارسة هواياتهم في شهوتي البطن و الفرج، ماتقولها نحن في رمضان، تتذكروا صاحبهم القبضوه داك و معاه أربع حرمايات في نهار رمضان؟

[A. Rahman]

#1290680 [حوراني]
5.00/5 (1 صوت)

06-22-2015 02:57 PM
تحياتي واحترامي لك يااستاذ حفظك الله في هذا الشهر المبارك ونصيحة اتعالج بالادوية البلدية احسن ليك وجنا تعرفو ولا مجهجه والعمر واحد فقدناك في رمضان كنا نتمنى مواصلة مسلسلك الكوميدي في قناة الشروق كل البرامج الكوميدية هذه السنة بايخة جدا حرمتنا البسمة في هذا الشهر الكريم

[حوراني]

#1290608 [مغترب]
1.00/5 (1 صوت)

06-22-2015 01:42 PM
طبعا الرد حيكون جاهز إن ردو فى الاصل ومفاده ان الرقم كان مغلوط وان النسبة كانت 0.8%، اخوي الفاتح اقترح عليك ان نبدأ حملة صلاة ودعاء ضد البشير وزمرته وان كل الناس تقف وتدعي عليهم في كل صلواتها ونشوفهم كمان حيقدرو يمنعو الناس يدعو الله ؟!

[مغترب]

#1290599 [محمد عثمان]
0.00/5 (0 صوت)

06-22-2015 01:28 PM
ال20% لما تقابل الدكتور

[محمد عثمان]

#1290596 [جنو منو]
5.00/5 (2 صوت)

06-22-2015 01:26 PM
على الطلاق ما تجيك الحبه دى أسمع كلامى بلع ساكت .. وخلى الولد قريب عشان يجيبها
ليك من الثلاجه ..أقصد الدولاب ..الكاتل الله ..

[جنو منو]

الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة