المقالات
السياسة

06-25-2015 10:51 AM


ودالخدر ،،ثمانيني في امريكا،،عبدالعزيز عثمان
جاري الجديد ،،، بين عشية وضحاها....
بحديقة الحي التقيته قبل عدة ايام،،،سودانيا قحا،،ولولا خشيتي الكضب،،لقلت انه من الضهاري،،ورا الكنار عديل كده،رغم مطارقه المنتصبه، الجزيرة تشكل عاشقيها،، لا تخطئهم العين ،كان برفقة حرمه المصون،،سبحان الله،،،ظننتها في البدء،،اسيا،،بت جدي زروق،،الخالق الناظر،،تعارفنا تلك العصرية،وتالفنا،،قال لي ان العيال قد طشو جميعا في شعاب ام الدنيا الجديدة دي،،وانه وام عياله ،،شرو بيتا في حلتنا دي،،وجعلوها مسكنا ومقاما،،حتي يريد الله امرا كان مفعولا...
في تلك الجلسة،،،وازهار الربيع تتفتح امامنا،،يمتد بساط اخضر مد الافق،،يهب نسيم،،ويحوم غيم،،سالني ود الخضر وذا اسمه..
- بتسف ؟
قلت لا والله... احسست بغلالة من الاسي الشفيف تحوم حول وجهة،،لحظة تعجب ،،او لعلها استنكار،،اخرج من جيب صديرية،، حقة،،ياااا،نفس حقق الايام الخوالي،،كتح سفة،،عالجها بلسانه،،قال لي،،مستمتعا بخدر اللحظة..
- السيجة بتعرفا...؟
قلت الله !
بان عليه الانبساط،،ذهب لمكب القمامة،،جاء بقطعة كرتونة،،عالجها بحنكة واناة..وبدا مهرجان هزائمي،،وشماتته المحببه
...
- يازول ماتزعل ساي،،،حرم انا غلبت المؤسسة كلها..
قلت مؤسسة شنو
- الري والحفريات كان بينا انه من نواحي الشمال،،المطارق المنتصبة تزين وجهه المبجل،، اللسان الممزوج،،يقطر منه عسل القول الشهي...
قلت انا من الجزيرة،،من الطالباب...
توقف عن غلبي في سيجته المحكمة،،رنا الي بحنين،،كاني لمحت وميض دمعه...
قال بلطف،،صوت كانه مشروق..
- ابوك الله يرحمو ذاتو صاحبي...
تبدلت الدنيا والاحوال،،وحكي...
ياولد اخوي،،،ترعتكم الليلة صبير دي،،،حفرتها انا ده،،،واتعهدها دوما بالاصلاح،،،انتو ياصغار يامشيتو المدارس،،بقعد في ديوان خالك العمده،،الحلة كلها بيتي،،،وناسها صحبي...
لم يبق منا ،،المشروع،،احد ولاشئ..وهانحن اخر الزمان،،،تفرقنا علي بلاد الدنيا...
اخرج حقته المبجلة،، كشح بسفته المميزة بغفل الحقه،،،ومضي بحر حكيه الحبيب...قال لي،،،بكريه ان بقي رمضان خلو،،اليوم التاني ،الفطور معانا...
قلت بفرح،،،خير...
احسست بان الدنيا غيمت لي،،،وانني جد بخيت،،في هذا الزمان،،والمكان،،تجد تماما من تبحث عنه...
في اليوم التاني ضهرا،، التقيته بدكان العربي،،سلمت عليه،،اوما،،قلت كيف الحال،،،اظنه لم يرد،،،قلت لم يعرفني،،قلت ياحاج انا...،لم يدعني اكمل،،،قال بضيق..
-عارف عارف..
وهو متخارج من الدكان،،قال بتبرم،،،بكرة،،رماها رميا...
عصر بكره رايته في طرف الحديقة،،،قلت سلاااام...
اشر بيده ،،كخوااجا قلت لاهل بيتي انا ماماش معاكم..
قالت زوجتي علي كيفك ،،،بس زوجته ضربت الان قالت ليك عمك قال ليك جيب الكشتينة معاك قلت في نفسي،،عمي ده قطع شك مودر،،خلينا نشوف اخر حكايتو شنو...
اتصلت علي ناس الشغل،،،قلت بجي بعد منتصف الليل،،خلو لي الترلة بعتلا براي...وافقوا..
دلفنا لبيته،،،استقبلتنا زوجته بكل وداد الدنيا،،ومحبة وبشر..
المائدة جاهزة،،الكسار بوخا الوي،،،والملحات اشكال...
اذن الاذان،،،لم ياتي عمنا...
ازمعت ان اشرب شوية،،،اكل لقمتين وانصرف...
بعد خمس دقائق بان...
بدا عاديا،،، سلام يااهلنا....
شرب،،،اكل،،،وبان عليه انه هو....
قبل نحوي،،،وقال لي قوم صلي،،،انا مابقدر اكان ما طبقت...
صليت،وانا مشغول بطباقه،،قام بعدي صلي...
ثم فجاة كانه عاد للحياة من جديد...
قلت كدي فهمني قال - افهمك شنو.؟
حكيت له ماحدث،،،امس واليوم وهسع...
قهقه بمسرة...
ياجنا ات غبيان،،هو انا صدقتا لقيتك عشان احاربك،،والله قايلك بتعرف...
-اعرف شنو،،
-التمباك،،،انعل ابو التمباك لا ابو خرمتو،،ياجنا حرم يوم المعاينة للجنسية اكان ما الولدالخواجا طلع فالح قوام قوام خارجني،،وانا طقطقت الانجليزي المو خمج،،، -قاطعته اتعلمت انجليزي هنا ،،،نهرني ،، ياود انا قريت تانية وسطي،،، ثم رجع للتمباك والجنسية ا كنت مرقت خليتا ليهم..اصلي نسيت الحقة،،،اول مرة في حياتي انساها...
قال لي انه مستعد اصوم يومين...
بس اشوفو لينا طريقة للتمباك،،،اتبكم طوال يومي،،،وهسع لو ماسفيت،،،مابشرب موية ذهب معي اخر الليل،،،عتل معي كامل الترلة،،،انشط مني،،،كمل حقة كاملة،،،،عينوه معي مساعد عتال،،نعمل حتي الفجر،،،اجمل اسبوع,,,
[email protected]



تعليقات 1 | إهداء 0 | زيارات 1953

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1292533 [الحتة دي...]
0.00/5 (0 صوت)

06-25-2015 11:59 AM
في اليوم التاني ضهرا،، التقيته بدكان العربي،،سلمت عليه،،اوما،،قلت كيف الحال،،،اظنه لم يرد،،،قلت لم يعرفني،،قلت ياحاج انا...،لم يدعني اكمل،،،قال بضيق..
-عارف عارف..
وهو متخارج من الدكان،،قال بتبرم،،،بكرة،،رماها رميا...
عصر بكره رايته في طرف الحديقة،،،قلت سلاااام...
اشر بيده ،،كخوااجا قلت لاهل بيتي انا ماماش معاكم..


خربت الرصة تماماً....

كتبتها وإت خرمان و لا شنو؟

[الحتة دي...]

ردود على الحتة دي...
United States [azooz] 06-25-2015 01:08 PM
سلام يا الحبيب،،،اليوم التاني للقائي به،،،مش لرمضان،،،عليك الله اكان ظبطت قول لي،،وان لم صححني،،ياخ والله لنا فارذين الليلة من بكرة،،دخل العضم،،تمنتاشر ساعة،،شكري .


عبدالعزيز عثمان
مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة