المقالات
منوعات
ساق الركشا سافر خلانى وين !؟!؟
ساق الركشا سافر خلانى وين !؟!؟
06-28-2015 02:55 PM


" ج "

قبل كتابة الحلقة الأخيرة من ثلاثية ساق الركشا سافر خلانى وين .. إتصل بى صديقى " سايق الركشا " , قال لى قرأت الحلقة الأولى وما عرفتها دى ركشتى إلا بعد ما قرأت الحلقة الثانية , وقال أنا هو ذاتو كان عندى ركشا , أنا كان عندى قطر بضاعة , قال لى الحمد لله أنا ركاشى بالمعاش الإجبارى , كما سنرى فى نهاية هذه الثلاثية ..
فى هذه الحلقة الأخيرة قال لى : لا المسألة فيها إنة أكيد فى جهات أجنبية بتراقب تحركاتى لأن الموضوع تجاوز إطاره المحلى , قال لى أنا كنت قاعد فى البيت وقبل ما أطلع أركشّ الشارع طرق على الباب رجل كبير ومعه زوجته كذلك , قال لى رحبت بهما وأدخلتهما إلى الصالون بعد أن أعيد تأسيسه من عائدات الركشا وبعد المجاملات والإبتسامات والنظرات المتبادلة, وأنا اسكب فى الشاى التايلندى الما خمجان , تحدث الرجل قائلا :
- مش إنت صاحب الركشا
- نعم يا حاج إن شاء الله خير
- لا.. إنت كترت
- السكر ياحاج , أوعا يكون عندك سكرى , أنا سكرى إعتيادى , عشان كدا بفتكر آى واحد عادى زى , سكر شنو وبصل شنو , إستلمت زوجة الرجل صلب الموضوع , زى ما قال صديقى
- يا حاجة إنتى خاشة غلط
- أنا لاغلط وما بعرف الغلط , غلط إنت من رأسك لى لستك ركشتك
- اللة .. اللة الحاصل شنو بالضبط
- إنت أسع ليك سنة من إشتريت الركشا دى , وجيت خطبت بتنا ونحن وافقنا , لاجيت سألت فينا ولافى خطيبتك , والله بتنا أولاد أعمها دايرنها يقوم ويقعوا فوقنا , إلا قلنا سيد الركشا أولى , وهى كمان قالت ستين آمين ما بتدور غير سايق الركشا السافر .. ولحسن الحظ قال صديقى أنو زوجته جاءت من مشوارها وإستلمت الموضوع , وطبعا كلمة كلمتين التالتة كانت المرأة وراجلها واقفين على حيلهم ومارقين بشة إنتى .. إنتى بشة .. وفى النهاية طلع أنو الراجل ومرأتو ما غلطانين بس فى خلط ما بين نهاية رقم ركشتى وركشتا خطيب بتهم , ونحن مارقين بعد ما إنفكت الأزمة قال صاحبى قلت للراجل فى همسة ونحن طالعين يا حاج أنا أجئ أخطب يد بتكم كيف وأنا ركشتى عندها غرفة متابعة مركزية .
بعد ذلك طلعت أركش الشارع على باب اللة والقصة ديك طالعة لى فى رأسى , لاقت صاحبى شابة صغيرة وأنيقة :
- ركشا .. ركشا
- نعم ياروح الركشا .. ويا أناقة ويا قيافة
- لو سمحت ياعمو , أنا عندى مشاوير كتيرة ومسيخة ما تقولى لى ركشتك ما فيها بنزين ولا اللستك الورانى بايظ , وما تقول لى ما فيها بورى ح أدفع ليك مقدم , وما تقول لى مافى طريقة لانى مستعجلة .. مستعجلة .. الأخيرة قالتها فى لكنة أجنبية
- ما تخافى ركشتى بى بنزينا ولساتك مية المية وأها كمان البورى مقدم
- أول حاجة عايزة امشى الكوفير وتانى مشوار عايزة أمشى صالة أفراح أحضر فيها الفاصل الأول وأرجع تانى الكوفير وأمشى صالة ليالى المدينة أحضر فيها الفاصل التانى , وأرجع يا عمو تانى الكوفير وأمشى للصالة الأولى أحضر فيها الفاصل التانى .. قال لى صاحبى عشقت الركشا طوالى وقلت ليها :
- يا رشاقة ويا أناقة دى ركشا ما عربة تلفزة خارجية
وأنا زايغ من الرشاقة والأناقة لاقتنى فى الطريق مرأة سمحة العافية قطع عريض قالت لى مستعجلة ماشية ابوروف , قال لى الحريم ديل التقول فى واحد بيحدثنى يقول ليهن أنا طالع بالركشا ..
- مرحبا بيك إن ماشالتك الركشا يشيلك الرأس ,
- تسلم إن شاء الله من كل بلاء , لكن ما باين , إنت ذاتك عايز ليك ركشا تانية تشيلك
- الحمد لله ركشتى شايلانى , الزقاق دا ياحاجة
- لا.. لسة
وصديقى قال لى أنا عاصر الركشا ماشى ورقة بس
- دا ياحاجة
- لا..لا أظنو دا
وهو فى سرعته تلك
- ولا كدى .. بس .. بس لف بى هنا
بس صاحبى قال لى نسيت أنو دى ركشا وعندها تلات كرعين , بس كبرت ليك اللفة , الركشا لم تتمالك أعصابها طوحت بينا , كان نصيبى الخور , والمرأة الماهلة والركشا , الحيطة , قال لى لو ما كان الخور أعرض منى بى شوية , كان أهلى نشلونى من بحر البلطيق , جاءت خفيفة والحمد لله , كسر فى مفصل اليد اليمنى وتهتك فى عضلات الرقبة وكدمات هنا وهناك , قال لى أخدونى الجماعة على البيت , بعد أن أخدت علاج أورنيك 8 العلاجى .. وأنا داخل على البيت لاقتنى زوجتى :
- سجم خشمى , دا شنو ؟
- يعنى التمويل الأصغر ما دى الركشا..
قال لى صديق وهو يضحك كما لم يضحك من قبل , القروش الإشتغلتها كلها إشترينا بيها ترمس .. عندى ليك ركشا إستعمال دبلوماسى نبيعها ليك ؟
- لا يا أخوى دا كلام تقولو لى زول ما عندو حديدة , ألعب غيرا ..
[email protected]


تعليقات 0 | إهداء 0 | زيارات 1687

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




د.فائز إبراهيم سوميت
 د.فائز إبراهيم سوميت

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة