من المواطن للحكومة
03-14-2011 11:57 AM

ساخر سبيل

من المواطن للحكومة

الفاتح جبرا -

العزيزة أمنا الحكومة، السلام عليك ورحمة الله تعالى وبركاته وبعد.

ما دعانى لكتابة هذه الرسالة أليك هو خوفى على البلد .. خوفى على الوطن .. والكل قد شاهد ويشاهد ما يحدث فى بلدان عربية قريبة مننا من قتل وتخريب وعدم إستقرار ، بلدان تتشابه معنا فى كل شئ .. كل شئ .. مما يجعل مستقبل بلادنا مشابه لها ولو بعد حين !

أكتب لك هذه الرسالة رغم أنني أعرف أنك لا تستمعين إليّ (والفى راسك بتسويهو) وهذه واحدة من أوجه مأساة العلاقة بيني وبينك، إذ إنك قد دأبت على أن (تطنشى) كل ما أقوله لك بل وتعتقدين بأنه هجوم منى عليك فى ذات الوقت الذى (تدى فيهو أضانك) لمن حولك من المقربين و(المطبلاتية) الذين يصورون لك أننى أعيش فى دعة من العيش وأرفل فى النعيم مع إنو حياتى أضحت حارقة كالجحيم !

لكنني بالرغم من ذلك كله يا (أمنا الحكومة) لم أقطع العشم في أن تستمعى لى مرة واحدة خاصة وأخواتك (الحكومات العربية) قد أصابتها (أنفلونزا التغيير) وقضت عليها !

العزيزة أمنا الحكومة : لو في مواطن واحد في الدنيا وقف مع (أمو الحكومة) أكون أنا.. 22 سنة وأي حاجة إنتي بتطلبيها مني وأنا على طول بعملها.. يللا نحارب مشينا نحارب.. يللا نسالم جينا نسالم.. وشوية شوية اتخليت عن أي حاجة بتقدميها ليا (وفكيتيني عكس الهواء).. عشان أتعالج بقت مشكلة.. وعشان أتعلم بقت مشكلة.. عشان آكل (ذاتو) بقت مشكلة.. لأنو كل يوم والتاني الأسعار بتاعة الحاجات الضرورية ماشة في ارتفاع وطلعت السماء.. ومع أنك يا (أمنا العزيزة) نفضت إيدك من الحاجات المهمة والأساسية دي كلها، لكنك بعد ده ما خليتيني في (حالي) وعينك بقت بس على (جيبي) الفاضى ده.. وكل يوم والتاني جاياني بي (ضريبة) شكل.. و(رسوم) شكل تاني.. وعوائد ودمغات و(جبايات) و(غرامات) وشنو ما بعرف داك!!.

قلت استحمل والحرب تنتهي ونوفر قروش الحرب الكل يوم كم مليون دولار دي وشوية الأمور تنتعش.. الحرب وقفت والسلام جا لكن مصاريف السلام كانت أكتر من مصاريف الحرب.. قلنا خلاص نشوف (حكاية البترول) ويطلع ونصدروا ويجينا قرش قرشين وشوية أشم نفس.. لكن عليك أمان الله يا (أمنا الحكومة) غير ما (الوقود) أسعارو زادت مرتين ما شفنا ليهو تأثير!!. (وما عوز أتكلم ليكى عن حكاية الإنفصال عشان ده ما وكتو) !

والله يا أمنا الحكومة وما طالباني حليفة أنا ما عندي أي طموحات -زي ما عارفة- طموحاتى ومتطلباتي (هينة ولينة) يعني بس عاوزك تشوفي ليا شغلانة وتوظفيني حسب مؤهلاتي عشان يكون عندي دخل أعيش منو و(قفة الملاح) دي تكون في متناول إيدي... وكان مرضت تعالجيني.. وتصرفي ليا على التعليم والشوارع وصحة البيئة وتعيدي النظر في حكاية الضرائب والجبايات البقت كتيرة ومسيخة دي.....وتوقفي ليا الصرف الما في محلو .. وتشوفى ليكى طريقة لمحاربة الفقر الما عاوز يخلينا ده .. وتحاربى كمان الفساد البقى وااااضح وظاااهر ده ... هو فى فساد أكتر من إنو (الحتة الفلانية) ترفض للمراجع العام يراجع حساباتا؟ .. وعاوزك كمان الناس الفاسدين وقاعدين (يلهطو) فى قروشنا تحاسبيهم وتوقفيهم فى حدهم وترجعي لينا قروشنا منهم .. وبرضو تعالجى كل الأخطاء (العملتيها) وأول حاجة تعوضى الناس (الشلتيهم) لصالحك العام .. وبعدين قصة (قطع الشطرنج) دى تخليها .. معقولة بس كم وعشرين سنة واولادك ياهم ذاااتم ... الزول يشيلوهو من هنا يودوهو هناك وبعد شوية يشيلوهو من هناك ويجيبوهو هنا ! لازم يا أمنا الحكومة أولادك التانين يشاركوا .. غايتو شوفى ليكى حل (للكنكشة دى) والمناصب والوظائف تكون بالكفاءة وبس .. وما تنسى يا امنا الحكومة مسألة (حرية الرأي) لازم تتيحى لأى زول يقول الرأى بتاعو عشان البلد دى ما بتاعت زول دى بتاعتنا كوووولنا ولازم تراعى لسيادة القانون و(حقوق الإنسان) مش عشان إنتى الحكومة تكونى أول زول يكسر القانون ! وآخر حاجه عاوز أقولا ليكى إنو لازم يكون فى (تداول للسلطة) .معليش دى أنا عارفا (حارة) عليكى لكن هو أصلو (حكم) وللا (تأبيده) ما كمان لازم ناس تانين (تحكم) ويكون عندها خطط وبرامج مختلفة للنهوض بالبلد .

العزيزة أمنا الحكومة :

أها لو سمعتى كلامى ده يا أمنا الحكومة صدقينى ح نطلع من الحالة النحنا فيها دى .. وكمان كان راسك قوى وما بتسمعى الكلام دى تكون كارثه .. وأهو أنا العليا عملتو !



كسرة :

ما بتوقع منك رد عشان عارفك مشغولة وكده !!





ابنك: المواطن


تعليقات 33 | إهداء 3 | زيارات 5784

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#112022 [ابوطيرة]
0.00/5 (0 صوت)

03-15-2011 11:18 PM
انها ليست امنا دى مرة ابونا


#111934 [دعد]
0.00/5 (0 صوت)

03-15-2011 05:36 PM
ماما ماما زمنها جاية جايبة بوليس وكرباج .... جايبة معاها كشة راكبة طارة وصاج ..

جاية تاخد جبرة وساتى وود الحاج ...

ماما ياااعسل دايرين عيش وبصل :D :D


#111900 [Mamoun]
0.00/5 (0 صوت)

03-15-2011 04:06 PM
يا جبره دى مرت راجل ما امنا لان امنا الحقيقية بتخاف علينا من الهواء الطاير وتضارينا منو خوفا منها ما ياذينا لكن مرت الراجل دى تشتغل معانا شغل الغتاتة تعصرنا وتضغطنا لتحت وتعمل كل الجلرائم التى لايقبلها اى منطق او عقل اودين سماوى مهما كان او عرف او اخلاق وهى تبتسم ابتسامتها الصفراء التى تسيل منها نتانة الروائح وتداخل المساحيق والمكياج السائل الذى تحاول عبثا ان تخفى فية صورتها الاثمة لكن هيهات ...هيهات ....... الغضب السودانى ات.....ات...ات....وانا كلى ايمان وسلمت سلمت با اخانا الكبيييير جدا جبرة


#111789 [ابوالشوش نفر]
0.00/5 (0 صوت)

03-15-2011 12:33 PM
الغريبة يااستاذ جبرة الناس ديل سامعين بالحركات البتحصل فى العالم العربى دى وهم مطنشين التقول السودان فى جزيرة وراء القمر , ولا الناس ديل عارفين المروة الفى السودان انتهت علشان كدا بعملو الدايرنو , الناس بيوتا اتقفلت وناس الحكومة ماهمهم الناس ماتت من الفقر والمرض وناس الحكومة ما هماهم , ياخى ديل ناس يتلززو بعذاب الشعب السودانى, ضرائب خرافيييييييييييية جمارك خيالية جبايات بالعضل حكومة غريبة حكومة تنبنى اقتصادها على عرق الناس , ليكم يوم ياظلام وياعمنا جبرة ماتتعب نفسك ديل ناس عايشين فى كوكب اخر ديل فى القمر والناس فى السودانيين فى قاغ الارض والله يستر من الناس الطبقو الشريعة على المساكين ويتركو المساكين دى مانهاية الدنيا ذاتا علشان كدا ياجبرة ديل خليناهم ى الله


#111779 [مازن]
0.00/5 (0 صوت)

03-15-2011 12:22 PM
جبرة يا خطير ،


#111713 [halawa]
0.00/5 (0 صوت)

03-15-2011 11:04 AM
وبعدين ........


#111521 [ابو الهول]
0.00/5 (0 صوت)

03-14-2011 11:55 PM
يا استاذ جبرة
طلباتك دي لو عندك خاتم سيدنا سليمان ما بتقدر تحققها
تقول لي امنا ال........


#111515 [فارس الحديد]
0.00/5 (0 صوت)

03-14-2011 11:04 PM
بتنفخ في قربة مقدودة يا جبرا .. ديل عاملين أضان الحامل طرشاء ..


#111502 [مندهش]
0.00/5 (0 صوت)

03-14-2011 10:04 PM
عاوز اضيف ليك كمان حاجة يا امنا الحكومة قالو رضا الوالدين الا في المعصية تفتحي مصنع سكر جديد بيزيد السكر تفتحي مصنع اسمنت جديد بيزيد الاسمنت وتفتتحي كبري ناس المرور بيزيدو الايصالات الواحد بقى لمن يسمع عن افتتاح حاجة جديدة بيشيل هم.


كسرة

رجعونا من محل ما انقذتونا.قال انقاذ قال غطستو حجرنا الله يغطس الانقذتوهم كلهم


#111479 [الميرغني ]
0.00/5 (0 صوت)

03-14-2011 08:27 PM
موعدنا معها في 21 مارس لوسمعت ولو ماسمعت


#111438 [موسى ]
0.00/5 (0 صوت)

03-14-2011 06:26 PM

عبد الله حسن البشير شغال اكثر من اربعة و ظائف و عندو شغلانيات تانية بتجيب ليه بس بين اتنين الى تلاتة مليون بالقديم عليكم الله في فساد اكثر من كدا و محسوبية


#111431 [[email protected]]
0.00/5 (0 صوت)

03-14-2011 05:49 PM
:D


#111401 [محمد ودام سنط]
0.00/5 (0 صوت)

03-14-2011 04:47 PM
اضيف ليك ياعمنا جبرة الفساد الاخلاقي كمان برضو ذكر امنك الحكومة والله الفساد بقي حتي علي القضاء طرفة :فبيل سالتني القاضيه شغال شنو قلت ليها هو في السودان في زول شغال قالت جاوب ولا---------دي سلطتم علينا ربنا يسترنا ويلطف علينا ويلانقول ياسابل الستر --------------شكرا شكرا شكرا سيدي جبرة


#111400 [أبورماز]
0.00/5 (0 صوت)

03-14-2011 04:40 PM
الجنه تحت أقدام الأمهات .. لكن أم جبرا دى .. النار تحت أقدامها ... أو بالأصح جنتها تحت قدمى إبنها جبرا .................


#111389 [منو؟]
0.00/5 (0 صوت)

03-14-2011 04:14 PM
ابونا الفاتح الف تحيه بس عاوزه اقول هناك مسلسل تركي اسمه العشق الممنوع هناك وجه شبه بينه وبين امنا الغوله اقصد الحيكومه ووجه الشبه في الخيانه وتشابه الاسماء مثلا: اسم عدنان الذي تخونه ذوجته المجرمه قريب من اسم السودان الذي يتم خيانت امانته من ابناء بلده الحيكومه .- واسم سمر = اسم عمر راس الحيكومه وايضا هناك وجه شبه بينهم الكذب والاستمرار في الخداع والمراوغه والغش .


#111381 [طشاش]
0.00/5 (0 صوت)

03-14-2011 03:55 PM
ام الكلب بعشوم............والحكومة دي ماها ام للشعب دا لانه ماشعب كلب.... يا استاذ جبرا...عرفناالحكومة دي هي البعشوم...لكن ولدا الكلب دا يكون منوووووو؟؟؟؟(؟) (؟) (؟)


#111380 [NAS]
0.00/5 (0 صوت)

03-14-2011 03:51 PM
أمنا. ما أمنا شنو يا saif alhaaj.
وبعدين في واحد بيختار أمو؟؟
ما بس من أول صرخة بتلفاها دي أمك


#111368 [فوّال]
0.00/5 (0 صوت)

03-14-2011 03:23 PM
الراجل قصدوا أمنا الغولة
وماقصرت يا ود جبرة


#111351 [ساجد]
0.00/5 (0 صوت)

03-14-2011 02:58 PM
والله يامنا الحكومة اكان ماماسكاكي نومة!!
اكان جيتي باكية والمعة في عيونة!!!!!
وقلتي ياوليدي انا مقصرة وبيك ملزومة!!!
وكل القلتو مادير ليهو عزومة!!
وانا كت طرشة سامحني يايومة!!
وات ماك جبان لكن بالصبر عمايلك محزومة!!
وان كان ماسمعتك الترابة في خشمي الملانة جضومة!!
وياهي الكوشة وخراب البلد مافي ليهو لزومة!1
وانزار وتزكيرك حلو انشاله ماكون طرشة وكمان مهزومة!
من ود حشاي العضتو بتحرق المجزومة!!!


#111339 [samir ali almadani]
0.00/5 (0 صوت)

03-14-2011 02:45 PM
يا جبره
الحكاية بانت
اذا دى امك طيب ابوك منو ؟ أوعك تكون جنى حرام والعياذ بالله

غايتو شد حيلك انا شايف التسونامى جاى ناحيتك:D :D :D :D :D :D


#111314 [بت الخرطوم]
0.00/5 (0 صوت)

03-14-2011 02:23 PM
نيابة عن امنا الحكومة واستجابة لطلباتكم الكثيرة وبما اننا لانحبذ سياسة الف والدوران وعينك فى الفيل وطعن فى ضلوا نصدر القرار التالى تقرر تعينك مستشار بمخصاصات وزير ولائى معفى من كل الضرائب والرسوم والجبايات على ان تدفع الحكومة كافة فواتير الكهرباء والمياه والهاتف والوقود والنفايات واى اعباء مالية لم يرد ذكرها (واتحداك لو فتحت خشمك لمناصرة اهلنا الغبش):D :D :D


#111310 [ودالجزيرة]
0.00/5 (0 صوت)

03-14-2011 02:18 PM
دي ما امنا دي ضرة امنا يعني مرة ابونا ما بسقينا اللبن لكن بتقش الرغوه في خشمنا دليل في الفاضي والبطن فاضيا


#111308 [مسجون فى وطنى]
0.00/5 (0 صوت)

03-14-2011 02:15 PM
اصلو حكم ولا تابيدة اصلو حكم ولا تابيدة بالجد دى تابيدة عليكم الله حكم الكيزان ما تابيدة بلا يخم الكيزان


#111302 [الزاحف الاممى]
0.00/5 (0 صوت)

03-14-2011 02:10 PM
ماما يا ماما --- ماما لبستنى الجزمة والشراب --- مشيت لجبرا كتب ليه مقال --- قال لى اكتب عربى كتبت حساب --- المزيكة تضرب بم بم بم --- الكشافة تكشف كش كش كش --- ناكل ايه ناكل شنو الشعب جعان --- نشرب ايه نشرب شنو الشعب نشفان --- نضحك كيف مابنقدر نضحك --- نبكى كيف البكا بالردوم اييي

ماما يا ماما ويا حلاوتك بالبيض يا جبرا ؟؟!!!! ده كلام شنو ...

انت نبزتنا عديل اذا كان دى أمنا ؟؟!! معناها اولادا اولاد حرام ... لانو دى ام بتمارس كل العهر الاخلاقى ولاسياسى والاقتصادى والاعلامى و... أمنا شنو؟؟!! ورينا ياجبرا الأم دى عندها راجل ولا لا ؟؟

اكتب لينا المرة الجاية عن ابونا لانو دى ما أمنا

كسره: انتى ما ماما وحرمت اكتب ليك أنا عايز باباوبس


#111291 [طشاش]
0.00/5 (0 صوت)

03-14-2011 01:57 PM
يا جبرا........بتعرف امات طه البودن الزول التوج.......امنا الحكومة دي واحدة من امات طه


#111270 [فرس الراكوبة]
0.00/5 (0 صوت)

03-14-2011 01:27 PM
يا جبراي اخوي (مسعول) من الخير دحين الرسلت ليها الرسالة دي امنا الحكومة ولا امنا
الغولة.


#111267 [Saif Al Hagg]
0.00/5 (0 صوت)

03-14-2011 01:15 PM
يا استاذ جبرا : امنا شنو؟؟!!

ديل ناس جو ومسكو الحكومة بانقلاب... فاذا هى حكومة جايه بالغصب غصبا عننا ... ولا امنا ولا بعرفا...انتى لا امنا ولابنعرفك ’ ولاعاوزين ردك وربنا حيحاسبك حساب عسير لانك اتبنيتى الشعب ده غصبا عن امه وعملتى فوقا مسئولة عنه وبتربيه على الدين ولكن ضيعتى كل شى بالانانيه وحب النفس لانك ابعد الناس عن الدين

لقد نخر الفساد كل ركن والساعد فى هذا نظرية التمكين .... بس ورينا كيف كلامك ده حيتطبق؟؟!!النطلق امنا المتبنيانة دى ولاشنو --- الا نكون اولاد حرام عشان نرضى بيها تانى على كل ما فعلته امنا بينا

بصراحة الجماعة ديل طرشقوا كل شى حتى المواطن بقا ماعنده طموح وخايف من التغيير00 الا عن طريقهم تانى ونترجى فيهم هم يعملوا التغيير

كسره: يا امنا الشعب يريد تغييرك جذريا (اى من الجذور تحت) لانو العملتيهو ماهين رجلك فوق رقبتك حتمشى كوشة التاريخ


#111259 [الفاروق]
0.00/5 (0 صوت)

03-14-2011 01:03 PM
ده شنو ياجبرا


#111258 [لمتين ]
0.00/5 (0 صوت)

03-14-2011 01:03 PM
والله يا أخوى أمنا دى بقت زى الام الحوامة والنوامة وسايبا جنياتا بدون اكل وكاتلم الجوع والاهمال دى مره خمجانة ساكت.. حقو نقول لى ابوى يطلقا ولا يشوف ليها حل ( التحية والتقدير لأمى وأمك ولكل أم سودانية ) وأنعل أم الظالم


#111253 [ولاء]
0.00/5 (0 صوت)

03-14-2011 12:59 PM
ينصر دينك يا دكتور ... كلامك ما عايز لا زيادة ولا نقصان


#111249 [nasr]
0.00/5 (0 صوت)

03-14-2011 12:49 PM
أمى الحكومة..........حبوبتى وين ؟؟؟؟؟؟؟؟؟؟؟؟


#111242 [محمد بابكر]
0.00/5 (0 صوت)

03-14-2011 12:40 PM
الفرق بين امك الحكزمة وامك الحقيقيه--انو امك الحقيقيه بتديك في الوكت المحتاج ليه فيها وبعد تكبر لو داير تديها بتشيل منك---اما امك الحكومه داير تشيل منك وانت ضعيف وانت قوي --صغير --بعد تكبر---أسمعت إذ ناديت حيا ولكن لا حياة لمن تنادي..


#111234 [مواطن سوداني]
0.00/5 (0 صوت)

03-14-2011 12:28 PM
ياجبرا لخصت الموضوع كويس وبريت زمتك زي مابقولو
اهلنا الكبار لكن اضان الحامل طرشا زي ماقالو الكبار برضو
( يارب احفظ علينا العقل والدين)


ردود على مواطن سوداني
Saudi Arabia [tarig] 04-02-2011 05:59 PM
الاخ munzir شكلو الكلام ما عجبك بدليل انك طلعت برة الموضوع
هههههههههههههه

China [munzir] 03-14-2011 02:17 PM
يا الفاتح بنقو انت صحى بتشرب جبرة ؟


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة