المقالات
السياسة
محادثة هاتفية من امرأة مجهولة مع الليمبي !!!
محادثة هاتفية من امرأة مجهولة مع الليمبي !!!
07-05-2015 01:47 AM


آلو يا الليمبي ... شكيتك علي الله ياالليمبي لا بتفوت ولا بتموت ، تصقع سااااي في القراريص مع حاجة هدية وتتحاوم كدي من الداخلية للدفاع للولاية تقول حواء دي ما ولدت غيرك ... لكن والله يا أخوي طالما رُكازتك حاجة هدية أقدل سااااي فوق عديلك ... والله ماسك ليك في شعبة قوووووية
حمد لله علي السلامة ياالليمبي ربنا مرقك من كراكير كاودا وبلاويها وصيفها الما معروف حده وين دا ... اسع في زول بيصدق أربعة سنين لاخمنا الصيف الحاسم الصيف الحاسم الصيف الحاسم ، وفي النهاية تنحسم انت وتترمي في كوش الخرطوم !!! والله أنا بيني وبينك سمعت قالوا العملية كان اسمها السيف الحاسم لكن لسانك الكبير المالي خشمك دا بدَّل السين سوَّاها صاد ودخلت نفسك والنَّاس في ورطة !!! غايتو انت انفكيت وارتحت من صاحبك الكل يوم قاديك بالصلاة في كاودا !!!
قلت شنو ؟ كيف طالع ليك بي شنو الأيام دي ؟ قال ليك لازم تنضف الخرطوم ؟ والله دي عاد ياها قصة أبو الجعران مع القمرا !!! صاحبك دا ياالليمبي مسكك اضنين مرفعين خرطوم شنو يا زول البتنضف !!!
آي معاك فعلاً تعداد الخرطوم تمانية مليون شايفاك متجرس من العدد الكبير دا والله ديل ينشفوا ريقك .... باكر دي تجيك مظاهرات الموية ومظاهرات الكهرباء شد حيلك ... قلت لي كيف ترشهم زي ما رشيت ناس الجريف !!! هووووي ياالليمبي اعمل حسابك الدم السال دا دم كتير والنَّاس ديل صبروا والموية والكهرباء دي قروشها مدفوعات مقدم ما عندكم أي حجة ولا عذر ، تجيبوا الهوا من قرونكم بطلوا التجنيب والعواليق البتسوا فيها دي ... اسع مدير الموية المسكين دا فصلته وقطعت عيشه والحال في حالها ... شفت قبل كم يوم الخضر قالوا سلمك رئاسة المؤتمر الوطني بس ان شاء الله يكون سلمك القروش بتاعت الإيرادات المجنبة يا هي دي البتحل ليك مشاكل الموية والكهرباء .... كيف ما أداك ولا مليم والله كان كدي واطاطتك أصبحت !!! يازول دي ولاية فيها تمانية مليون شوف داير ليك كل يوم كم رغيفة ؟ وشوف من اسع أنا بنبهك سنة ٢٠٥٠ ناس الخرطوم ديل تعدادهم حا يكون ٣٦ مليون ما تقول لي بعدين اتفاجأت ، العالم دي بتشتغل شغل صاح كهربا قاطعة والتفريخ مدور. انت لازم تعمل استراتيجية مضادة توفر الكهرباء عشان التلفزيونات والموبايلات تشتغل وتلهيهم شوية من شغل التفريخ دا .
يوم داك شايفة صاحبك أول مرة يظهر من فركة ساوث أفريكا وشايفاه عمل ليك تكريم وأداك وسام الجدارة !!! مخير الله ياالليمبي ياتو جدارة ؟ يمكن تكون الجدارة في انهيار العمارة ؟ ولا الجدارة في ضربة اليرموك الما معروفة صاروخ ولا طيارة ؟ ولا الجدارة في الدفاع بالنظارة ؟ ولا الجدارة في نسف القراصة بالتركين والبصارة ؟ ولا الجدارة في العوارة ؟ مخير الله علي الجدارة !!!
آها وقالوا قدمك هدية لي ناس ولاية الخرطوم !!! هدية من ود هدية مقبولة معناها إننا علي باله
ناس الخرطوم شافوا جكتك في الجريف وعرفوا الفيك وقول لي صاحبك شكراً الهدية وصلت ... الليمبي يا أخوي أنا طولت معاك أخليك تستمتع بالقراريص قبل الخريف ما يفاجأك والله مطرة واحدة في الخرطوم دي الا تخليك تتمنى كراكير كاودا ... من اسع حضر كوريقك وطوريتك واستعد للخواضة وفتح المجاري ودفن الحفر هنا ما عندنا دفاع بالنظر .... قلت كيف ما سامعاك !! باعوا الأراضي وما خلوا ليك أي حاجة ؟ عادي جداً انت كنت فاكر الخضر ممكن يكون مخلي ليك حاجة كدا علي طرف ؟ دا يا زول تمساح كبير ، أسأل غسان كان ما مصدق ... بِسْم الله غسان وين هو ربنا يرحمه ... انت ما تبدأ تبيع توتي وجزيرة التمساح والضفاف ومشيرب ... كيف مبيوعة لقيتها ؟ بيعها تاني وجوط الحكاية يازول خلاص أنا فترت منك حضر كوريقك السحابة دي شايلة ، غايتو من هنا لي ليلة القدر تصقعك مطرة لما تعرف حاجة ، من أسع حضر استقالتك !!!
Mahdi Zain
[email protected]




تعليقات 1 | إهداء 0 | زيارات 5554

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1297951 [بكري النور موسى شاي العصر]
5.00/5 (1 صوت)

07-05-2015 03:27 AM
خيال خصب وواقع لما هو واقع.سلم يراعك أيها الرائع مهدي زين الرجال.

وهنئا لإدارة وقرأ الراكوبة، بهذا القلم القامة الذي جمع الفصاحة

والبلاغة واللياقة واللباقة.وجمع الثقافة والأدب والسياسة والرياضة.

[بكري النور موسى شاي العصر]

مهدي زين
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة