طبق اليوم
07-05-2015 03:58 PM


سيداتى آنساتى سادتى قراء ومشاهدى (برنامج) أقصد (عمود) ساخر سبيل : حقيقى أنا آسف جداً لأنو الأسابيع الفاتت دي (البرنامج) والجريدة ذاااتا مرات بتختفى وده سببو وما (أدس عليكم( إنو مرات الواحد قاعد يفشل فى مسألة تشفير (البرنامج(، أصلو مسألة (التشفير) دي بقت موضة وأى واحد عاوز يشفر أي حاجه لأى زول فى أى حتة وإنتو عارفين إنو (العمود بدون تشفير زى الشرا فى القندول) أو كما قال (الحبشى) وهو يردد المثل العامى المأثور !
المهم حلقات البرنامج التى لم تشاهدونها (على الهواء) نسبة لمحاولات (البث التشفيرى) بمناسبة (الخمسة سنين الجديدة) يمكنكم مشاهدتها والحصول على نسخة منها على موقعنا على (الشبكة العنكبوتية) والذى يظهر لكم أسفل الشاشة (أقصد الصورة).
حلقة اليوم سيداتى آنساتى سادتى ونسبة لبداية (البث التجريبى المشفر) فسوف تكون عن (طبق اليوم) وقد أخترت لكم مادتها من كتاب (أبلة نظيرة) في فن (الطبخ) وسوف يكون (طبق اليوم) هو (المكرونة بالباشميل) ، أنا شخصيا بعرف (المكرونة) لأنها من (النشويات) وأنا (زول سكرى) وممنوع منها وكده ، لكن (الباشميل) ده كدى تعالو نشوفو سوا ونحنا مع بعض كده نقوم بتحضير طبق اليوم اللى هو (المكرونة بالباشميل) وتعالو نشوف المقادير:

المقادير :
– كيس مكرونة (تأكد من تاريخ الصلاحية فلا توجد جهه تتأكد بالإنابه عنك)
– ماء (إذا كنت في الأماكن التى لا تصلها المياة جوار النيل – زينا في بيت المال – فيمكنك شراء زجاجه مياة معدنية )
– شويت ملح (الحاجه الوحيده الما فيها مشكلة)
الحشوة:
– ربع كيلو لحم مفروم (أطلب من الجزار إزالة طبقة الذباب الموجوده على اللحم حتى تتأكد من عدم وجود ختم السلخانه)
– بصلة ، فلفل، كمون ، ثوم ، زيت (لا تبتئس إتجه لمحلات قدر ظروفك حيث يباع الكمون والفلفل بالدستة والتوم بالفص .. بس حاسب عند شراء الزيت فقد تم مؤخرأً إكتشاف عصابه تقودها إمرأة تقوم بخلط زيت العربات الراجع ووضعه في جركانات )
البشاميل:
كوب زيت (أوع من الراجع) ، نصف كوب طحين (حاول تشوف ليهم دبارة) ، أكواب حليب (أحذر حليب الإغاثات) ، يستحسن أن تتحصل على جهاز فحص مواد مشعه ، ملح , فلفل (قدر ظروفك) ، بيضة واحده (كفاية عشان ما نكتر عليك)
الطريقة:
– تسلق المكرونة (وتسلق مقالنا ده ذاااتو) وتضيف اليها ملعقة طعام زيت حتى لا تلتصق المكرونة.
– نحمر البصلة مع الثوم واللحم المفروم والبهارات (لو لقيت غاز طبعن)
– نضع الطحينة والزيت على النار حتى يصبح لونها ذهبي ثم نضيف الحليب والبيضة بعد أن نخلطها مع الحليب والبهارات على الطحين والزيت ونقلبه جيدا.
– بعد استواء المكرونة وتصفيتها من الماء نضيف قليلا من (البشاميل) ونقلبه ونضع نصفه في الصينية في شكل طبقة غير سميكة، ثم نضيف اللحم ثم نغطيها بالمكرونة وندخلها الفرن حتى تتحمر وبالهناء والعافية.
أعزائى القراء (المشاهدين) المتابعين :
طبعا أنا كنت ذيكم كده مفتكر (الباشميل) ده حاجه كده ذي (جوز الهند) أو (البناتى) أو (الزيتون) لكن البركة في كتاب (أبله نظيرة) و (الرقابة وكدة) عشان لولاهما ما كان الزول عرف إنو (الباشميل) ده هو (خلطة) بتاعت طحين وزيت وبيض وحليب ومش عارف شنو داااك !!

والمهم لو ما لقيتو طريقه تعملو (الباشميل) ده والأمور ما (تيسرت) أعملوها ( مكرونة ساااكت والسلام) المهم هي أكلة جميلة لا (توسخ إيدينا) ولا تغلط علينا ولا على إيدين (الخلفونا)

أعزائى القراء والمشاهدين لو عندكم أي وجبات يا جماعت الخير عاوزين تعرفو بيعملوها كيف لا تترددو بالإتصال برقم البرنامج الظاهر على الشاشة وهو (صفرين تلاته أصفار زيرو) وذلك قبل إنتهاء الدورة البرامجية الحالية وبداية الدورة الجديدة …. وبالهناء والشفاء مع تحيات الشيف …. (الفاتح جبرا)

كسرة :

إذا الرقابة (القبلية) دي إستمرت بعد شوية إلا نكتب ليكم (حظك هذا الأسبوع) !
تنبيه :
توجد واو جديدة (لنج)
كسرة ثابتة (قديمة) :
– أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+و+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+و+و+و
عن هذه الإعلانات


تعليقات 7 | إهداء 0 | زيارات 7305

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1299078 [على]
0.00/5 (0 صوت)

07-06-2015 07:52 PM
يالفاتح مكرونة شنو وبشميل شنو كدى ادينى وصفة ام شعيفة والرشوشة وفى رواية اخرى السخينة حاجات زى دى فى متناول اليد اما مكرونة وطحين وزيت فى رمضان مع السكرى والكرسترول مافى طريقة ورمضان كريم بس ماتنسى انه حلايب سودانية

[على]

#1298817 [SASA]
0.00/5 (0 صوت)

07-06-2015 12:59 PM
الاستاذ الفاتح جبراء الرجاء مراسلتى على هذا البريد الالكترونى

وشكرا
[email protected]

[SASA]

#1298775 [الطيب]
0.00/5 (0 صوت)

07-06-2015 11:53 AM
فلفل بالدستة! لكن ما غريبة. منو كان قايل البصلة بتتباع لأكثر من شخص. قبل الإسلام, أكبر مصقعاتي ما كان حيتخيله.

[الطيب]

#1298648 [جنو منو]
5.00/5 (1 صوت)

07-06-2015 09:09 AM
كده ياشيف دايرين نعرف ملاح الورق بالشمار بسوى كيف وشكرا ..!!

[جنو منو]

#1298375 [بت البلد]
0.00/5 (0 صوت)

07-05-2015 07:00 PM
كتر خيرك يا أستاذ : وصلتنا المعلومة أدناه هذا هو بيت القصيد وكويس انو ايدينا ما بتتوسخ لأن النظافة من الايمان ونظافة اليد مطلوبة في هذا الزمان ...

والمهم لو ما لقيتو طريقه تعملو (الباشميل) ده والأمور ما (تيسرت) أعملوها ( مكرونة ساااكت والسلام) المهم هي أكلة جميلة لا (توسخ إيدينا) ولا تغلط علينا ولا على إيدين (الخلفونا)

[بت البلد]

#1298338 [حكم]
5.00/5 (4 صوت)

07-05-2015 05:25 PM
رايك شنو تكتب عن حالة الطقس؟؟
واللا بتجيب لينا (الكتاحة) ؟؟

[حكم]

#1298316 [عبدالواحد المستغرب اشد الإستغراب!!]
4.50/5 (2 صوت)

07-05-2015 04:25 PM
أمانه عليك تقطع إضنيك يا ود جبرا (ده ما التشكيل الوزارى الجديد؟!!) اصلو محسوبك بيفهمها وهى طايره !! إيدك على الجائزه لو سمحت وإلا ما بيحلنى منك غير المحكمه الجنائيه الدوليه على الاقل لتحدد إقامتك !!.

[عبدالواحد المستغرب اشد الإستغراب!!]

ردود على عبدالواحد المستغرب اشد الإستغراب!!
European Union [abushihab] 07-05-2015 07:45 PM
برافو عليك صححححححححححححححححح. لاستلام جائزتك نرجو الاتصال علي الهاتف 0079 مزوووووووووووووووووووووووووووووووك.


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة