شفافية أخوان الرئيس..اا
03-15-2011 01:27 PM

إليكم

الطاهر ساتي
[email protected]

شفافية أخوان الرئيس ...!!

** لا أدري، هل هي بشائر الديمقراطية التي طال شوق الناس إليها أم هي محاولة تريد أن تقول للناس : ما حدث في تونس ومصر لن يحدث في السودان لأن دولتنا ديمقراطية بالميلاد؟..على كل حال، ينهمر - حاليا - على صحف الخرطوم ومجالس الساسة سيل صراحة ووضوح لم يكن مألوفا من قبل..لا أعلم سر هذا السيل المفاجئ، وكذلك أجهل مصدره ، نبعا مؤمنا بالصراحة وصادقا في الوضوح كان أم هو محض سراب عابر يحسبه المحروم وضوحا وصراحة .. فالمهم - فجأة كدة، وبلا أي مقدمات - توغلت الصراحة إلى صفحات الصحف ثم مجالس الساسة منذ نصف شهر تقريبا..على سبيل المثال، ما أن يلتقي أي صحفي بأي مسؤول إلا وكانت مكافحة الفساد محور حوارهما..وكذلك، ما أن يلتقي مسؤول بمسؤولين إلا وكان التحذير من الفساد محور إجتماعهم.. وهكذا..ومن لطائف سيول الشفافية هذه، هي أن كل جهة رسمية تحذر الأخرى، طبعا بعد أن تضع ذاتها في موضوع ( النقاء الكامل)..بحيث لم نعد نعرف ( من يحذر من ؟)، حيث كلهم صاروا - بين ليلة وضحاها - ملائكة ..!!
** وعلى ذات النسق، أي لمواكبة موضة الشفافية، عزفت ثلاث صحف - خلال أسبوع - على وتر قضية واحدة حملت عنوانا فحواه : ثراء أخوان الرئيس، ما بين الحقيقة والخيال..التيار حاورت رئيس البرلمان وسألته عن نشاط أخوان الرئيس في دنيا المال والأعمال، فرد قائلا : سمعت عن أخوان الرئيس ولكن لايوجد دليل..ثم صمت، ولم يسترسل بحيث يوضح للناس : ماذا سمع عنهم ؟.. الصحف - على قول أحمد بدير في مسرحية ريا وسكينة - لم تسمع عنهم إلا كل خير.. أها، بغض النظرعن الدليل : إنت سمعت عنهم شنو يا مولانا ؟.. أوهكذا تساءلت أمام حوار التيار، بمظان أن رئيس برلمان البلد يجب أن يكون أحرص الناس على الرصد والمتابعة ثم التحقيق والمساءلة حول أي همس عام يخص حياة الناس العامة، أوهكذا أحسنت الظن.. يعني بالواضح كدة : لماذا لم يحقق رئيس برلمان البلد عن ثرائهم وسوء إستغلالهم لنفوذ رئيس البلد ، بعد أن سمع بهذا الثراء وذاك الإستغلال، أوكما قال؟..هكذا تساءلت ثم ( قلبت الصفحة ) ..!!
** وبعد تلك الصفحة بثلاثة أيام، صدرت السوداني والرأي العام بحوار وتحقيق حول ذات الموضوع ، أي : ثراء أخوان الرئيس.. فتساءلت بدهشة : الله، الحاصل شنو يا جماعة ؟ بلف الشفافية إتحلج في السودان ولاشنو؟..المهم، مالك طه هناك ورفيدة يس هنا، طرحا أسئلة في غاية الذكاء على السيدين محمد وعبد الله حسن أحمد البشير، وكل الأسئلة لم تتجاوز محطة الثراء وإستغلال النفوذ..علما بأن هذا الثراء وذاك الإستغلال هما حديث المجالس، ولقد أحسن مالك ورفيدة في مواجهة أخوان الرئيس بحديث المجالس، وبالتأكيد الحكم على إجاباتهما من سلطة القارئ وفطنته ..ومع ذلك، نقتبس من حديث اللواء الدكتور عبد الله البشير ما يلي : ( لست ثريا، وأعيش براتب من الجيش ثم بأخر من مركز القلب ثم بثالث من شيكان ثم برابع من هيئة دعم القوات المسلحة التي لي معها بعض الأشغال والمهام)..هكذا يوضح عبد الله البشير مصادر دخله المحدود، بمنتهى الشفافية طبعا..وليس لنا إلا أن نقول : ما شاء الله، أللهم زد وبارك بحيث يجد من الوقت والطاقة ما يجعله يتوظف في المزيد من المؤسسات والمرافق، الخاصة منها والعامة..فعلا مع الغلاء ده أربعة وظائف محترمة بقت ما بتكفي أوجه الصرف..هل الحكومة على علم بهذه المعلومة المهمة؟..ليست بتلك الوظائف، بل ب( عدم كفايتها )..إن لم تكن تعلم فعليها أن تعلم، لتضع وزارة المالية خطة إقتصادية تساوى عباد الله - مع عبد الله - في عدد الوظائف..!!
** ثم من مرافعات اللواء الدكتورعبد الله البشيرعن نفسه وشقيقه العباس: ( العباس رجل أعمال وقدم الكثير للسودان بعلاقاته الطيبة مع أهل الخليج، سوداتل من هذا الكثير، وكذلك التصنيع الحربي ثم مصنع جياد، وأنا أحضرت الراجحي إلى السودان ليستثمرولم إستلم حتى العمولة،و\" خلونا في حالنا\".. )..تلك مرافعته على سؤال إستغلال النفوذ، مرافعة صريحة، وليتها - تلك المرافعة - أكمل صراحتها بحيث توضح للناس : بأية صفة كان ولايزال يتحرك عبد الله والعباس في الخليج لإستقطاب الدعم وإنشاء المصانع والشركات ؟.. لومرافعتهم أجابت على هذا السؤال، ل ( خليناهم في حالهم )..وما لم أكن مخطئا في فهم وتفسير معنى مفردة المؤسسية،فان حراكا كهذا يجب أن يكون في إطارمؤسسية الدولة وأجهزتها التنفيذية والتشريعية..وكذلك نشاطا كهذا يجب أن يكون مجازا من قبل مجلس الوزراء ومباركا من قبل رئاسة الجمهورية ومراقبا من قبل البرلمان، وأحسب أن وزراء الصناعة والتجارة الخارجية والخارجية - وغيرهم من أعضاء مجلس وزراء الحكومة ثم ولاة الولايات - هم الذين يجب عليهم مثل هذا النشاط ، بأمرو توجيه ( مؤسسية الدولة التي ليس لعبد الله والعباس موقعا أو منصبا فيها).. ولذلك، تلك المرافعة لاتختلف كثيرا عن مرافعة سيف الإسلام القذافي عن حكومة بلده عقب إنتفاضة الشعب هناك.. نعم، ترافع سيف الإسلام - ولايزال - عن حكومة بلده بلا أية صفة رسمية..ولذلك،لايخطئ من يطالب بتغييريعيد هيكلة الدولة بشكل مؤسسي يليق بهذا الوطن الحبيب، بحيث يصبح المسؤول مسؤولا في موقعه وكل من يمت له بصلة قربى يصبح مواطنا فقط لاغير، مثل كل أهل السودان..هذه شفافيتي كما كانت تلك شفافية عبد الله والعباس، والناس سواسية في الشفافية أيضا، ولا كيف ياجماعة ؟.. وأهلا بالمزيد من الشفافية، فقط نأمل أن يكون مصدرها نبعا مؤمنا بها وصادقا فيها، أي لايكون محض سراب مراد به إتقاء ما حدث في مصر وتونس..!!
.................
نقلا عن السوداني


تعليقات 33 | إهداء 2 | زيارات 7953

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#112501 [ابو كوج]
0.00/5 (0 صوت)

03-16-2011 05:50 PM
دائما ما يناكف هذا الساتي امور معهوذة ومعروفة بالضرورة ليس عيبا ان يثرى اخوة الرئيس فقد كان اصحاب رسول الله (ص) اثريا بل مليارديرات بمقياس اثريا العالم من من اثريا العالم ان يجهز جيشا غازيا فامريكا بقوتها وجبروتها لم تستطع التقدم خطوة لغزوها للعرق الا بعد ان جمعت معها بني الاحمر والاصفر ماذا لو صار اخوة الرئس او حتى اعوانه اغنياء المهم السؤال البديهي الذي يطرح هو من اين جاء هذا الثراء ناهيك امن شخص يتوجع من عدم قدرته لشراء تزكرة طائرة دعوكم بالله فاتركوا الخالق للخالق


#112362 [ود نمرة 2]
0.00/5 (0 صوت)

03-16-2011 02:35 PM
ما حنخليك فى حالك يا عبدالله البشير انت و اخوانك و الوظائف القلتها دى ولا تساوى حاجة من اللغف بتاعكم من دمغة الجريح و شركة رام و غيره ونحن ناس فى السوق و عارفين اى حاجة ويوم الحساب قرب يا حرامى و اخوك العباس اشترى ليه عربية مارسيدس بى 900 مليون قايل نفسه ولد شيخ زايد وتقول لى رجل اعمال اسامه داؤد زاتو ما سايق زيها خليه يجى يشرح لينا الاعمال دى شنو و الله شكله كده ما بيعرف كوعوه من بوعو بعد يوم 21 حيكون عندنا معاكم كلام تانى


#112182 [محمد كسلا]
0.00/5 (0 صوت)

03-16-2011 10:29 AM
راتبو 8 مليون وما مكفيهو طيب البصرف 300 الف وعايل امو وابوه المريضان وزوجتهو واولاده ومصاريفه الشخصية يكون عايش كيف دا زكرني الكمبيوتر وتوزيع راتب الموظف السوداني (بعد ما ادخل الموظف مصاريفه الشهرية من اكل ومواصلات وعلاج وايجار بيت وادخل ما ياخذه في الشهر من مرتب ما كان من الكمبيوتر الا ان رد عليه وقال ليه قوم عليك الله ما تهاظر معاي) فعلا الله في ونعم بالله


#112162 [ابومح]
0.00/5 (0 صوت)

03-16-2011 10:07 AM
ياخوان انتم طبعا لا ااقصد الكيزان المصدية هل يوجد شخص في السودان لديه شك في هوية الطغمة الحاكمة يكون اطرش في الزفة عصابة اقسمت بالله ان تستولي علي كل الموارد الاقتصادية في البلد وتوظفها لمصلحتها الخاصة وبهذه الثروة المنهوبة تشتري الزمم من المسئولين في الجيش الشرطة الامن البوليس لتحيده لجانبها ومن يقف في طريقها تطلق عليه كلاب ابولهب لتمزقه اربا اربا والما عاجبه يلحس كوعة والراجل يهز ضراعة ذي ما قال ابوالعفين والنساء المتمردات عقابهم الأغتصاب


#112141 [شنقيطى]
0.00/5 (0 صوت)

03-16-2011 09:38 AM
وين شفافية رئيس التحرير او الرقابه القبلية (الامن) الحجبوا هذا المقال من الصحف امس

بعدين حصل شنو لقصة انو ما مفروض موظف دوله يعمل بعمل خاص اثناء عمله الحكومى
اذكر ان د. الصادق المهدى الطبيب وليس الامام وقد كان يملك عياده وتم تعيينه وزير وكان مره مره كدا بمشى يعالج المرضى بالمستشفى الخاص تبعو وحسب روايتو بالمجان ولكن حتى لو بقروش المشكله شنو ؟ طالما القصه هايصه
وعليك الله يا ساتى فايده وزير المالية شنو اذا كان هذا الشخص يمشى 3 ايام يجيب كل القروش دى وبعدين الناس الجابهم ديل ناس خرباش ما ياهو نفسو خرباش الهسى بالسجن الرسمى بادانة الاختلاس والارشاوى ولا كيف
بعدين سؤال اخير لمن كان بسافر كان بقول لمديرو داير اذن حق شنو دا بافتراض انو موظف وبياخد اذن
يعنى مثلا كدا بقول لى كل مدير من تلك الوظايف على حده ولا بخطاب واحد كالاتى
السيد / الساده الرؤساء
الموضوع طلب اجازه لمهمة رسمية
اشاره لاعلاه واحوجة الدولة الماسه للنقد الاجنبى اتقدم بطلب اجازه عارضه (محليه) اضطرارية بغرض السفر واللف على دولة دولتين لاستقطاب (شحد) كم مليون دولار نسبة لما لى من اسم عالمى خارج الحدود
ملحوظة
لا يفوتنى ان انقل لسيادتكم سلام الاخ الرئيس
مع خالص الشكر
مقدمة
د. لواء اركان حرب عبدالله
ولا حول ولا قوة الا بالله (دى ما من الخطاب دى منى)
طيب ياخوانا احيلكم على موقع الراكوبه نفسة او الى كتبة الفساد بسودانيز اون لاين عشان تشوفوا الشركات حقت هذا المواطن المالاقى جنية
ياحرام والله حننت الشعب السودانى
يعنى بالله زول عندو عربتين طبعا بالبنزين وحوالى 8.600 جنية ( جديد ) وبيت فى كافورى بى حرسو وعرس تانى جديد ومالاقى دا يقولوا عليو شنو


#112118 [مخير]
0.00/5 (0 صوت)

03-16-2011 09:09 AM
يا دكتور ... أنا وظيفة واحده وبعيش اسرتين شالونى للصالح العام .... تفتكر انت 4 وظائف وما شالوك ليييييييييه .....مش عشان انت اخو الرئيس.. واللا مش كده يا شاطرررررررر .... فاااااااااااالح تكبر تفهم.... حلاتو يا يا ناس .... خلو فى حالو عليكم الله .....


#112042 [ehab]
0.00/5 (0 صوت)

03-16-2011 02:10 AM
لا حولا ولا قوة إلا بالله ..... الزول دا كان أحسن يمسك لسانو لانو كدا فضح نفسو وفضح اهلو .... والمثل بقول الحرامي على راسو ريشه .... أربع وظائف ليه ؟؟؟ إنت عالم زمانك وانحنا ما عارفين يعني السودان دا كلو ما فيه ناس مؤهلين غيرك إنت...خلاص يعني الشعب السودان كله شغال وعايش في بحبوحه من العيش .... حرام عليكم .... عندنا مثل بقول الشوفتو في بيت أبوك ما بخلعك .... حسبي الله فيكم وفي أخوكم وفي حزبكم


#112023 [ابو عيسى]
0.00/5 (0 صوت)

03-15-2011 11:25 PM
طلب بسيط من الجبهجية عدم ادعاء ان عمايلهم من الاسلام عشان ما يحصل تشويش على غير المسلمين اذا اسلموا فاليهود مثلا عندهم العدل والصدق والاخلاص وهى من الاسلام وهم غير مسلمين ولكن اذا هداهم الله واسلموا على يد الجبهجية حا يعتقدوا ان الاسلام ليس فيه عدل ولا صدق ولا اخلاص ( تحياتى لابراهيم قمبور وربيع المتواطى )


#112015 [كلور]
0.00/5 (0 صوت)

03-15-2011 10:53 PM
وكيلك الله ااود ساتي الناس ديل قايل نفسهم بحكمو ليهم في دولة شعبها غنم وتيوس ....تاني ما في عفا الله عما سلف ؟؟؟؟الحق يرجع ولو بعد حين


#112014 [شفافية]
0.00/5 (0 صوت)

03-15-2011 10:51 PM
طبعا انا سميت اسمي شفافية عشان الموضوع شفاف طيب اخوه محمد بتاع قناة الشروق ومسجد النور ده بناه الرئيس نفسه بشنو والفلل لاهله واخواته بنوها بشنو والمدام طلقوها ليه لانها كانت جايبة معاها من دبي اطنان دهب واحرجت الرئيس ومعها مرت مدير عام الشرطة وتاني يوم طوالي شالوه وقصر بت نافع وقصر الجاز وما حوله اتقوا الله في الناس ما لاقية تاكل ولا تتعالج يا اخوان الرئيس وبعدين ده يا تو قانون للقوات المسلحة بيسمح للواء يشتغل الشغلات دي كلها وضحوا لينا بشفافية يا ساتي


#111995 [ابوالعازة ]
0.00/5 (0 صوت)

03-15-2011 09:03 PM
الفي بطنو حرقص براهو يرقص


#111991 [على موسى]
0.00/5 (0 صوت)

03-15-2011 08:52 PM
اخو الريس اللواء لقبة فى السوق عبداللة ففتى.مرة سافر اثيوبيا بالميرى مع الكاردنال وصورة جبوها فى الجرايد ياربى كان ماشى بالكاكى فى مهمة رسمية


#111985 [واحد مستغرب]
0.00/5 (0 صوت)

03-15-2011 08:12 PM
السادة والسيدات قراء وقارئات موقع الراكوبة اشهد الله بأنى لاول مرة اجد نفسى عاجزا عن التعليق رغم ان موضوع المقالة تلهم من لم ينعم الله علية بنعمة التعليق وبحثت عن كلمات علها تنفس ما بداخلى وأكتب ولو سطرا واحدا (ادين واشجب واستنكر) بها (علوج) و(عجول)حسن احمد البشير!!الذين (يرتعون)كما شاء لهم كما ترتع (الفريزيان) فى سهول وبرارى هولندا،وده كله كوم ورئيس المجلس فاقد للبصر والبصيرة ورئيس الجمهورية الذى ما انفك يحدثنا عن الامانة والخزى الذى ينتظره فى الاخره ماتزال ترن فى اذانناوالخال(الما بطال) الذى قام بتقليد ابناء اخته وسام الشرف والامانة00وساوى بينهم والاخرين الذين فقدوا وظائفهم بين ليلة وضحاهاوبالتالى فقدوا مرتباتهم التى كانوا يقدحون من اجلها ما لشىء إلا من اجل توفير العيش الكريم لاسرهم ، والسادة/آل البيت ينعمون بمجموعة وظائف فى وقت واحد وربما العباس يجوب العالم بالطائرة الرئاسية لجمع الصدقات لاطعام الشعب السودانى!! ورب قائل فى زمن الانترنت واخواتها لم يعد لرجال الاعمال حاجة لركوب الطائرات فهنا نذكر السائل الكريم انها صدقات ولا يجوز (الكشف عنها او التحدث بها) حتى لاتحبط الصدقة!! وبينما انا فى حيرة من امرى واقف عاجزا عن الكتابه فإذا بهاتف يهمس فى اذنى (إحتسب) فصحت دون ان اشعر بصوت عالى وانا ارفع كف الضراعة (حسبى الله ونعم الوكيل00حسبى الله ونعم الوكيل00حسبى الله ونعم الوكيل) ثم تذكرت ما آل اليه حال حبيب العادلى والشباشب التى انهالت عليه ،وغررت استيراد خمسة اطنان من (الكركب) واعدها ليوم نرجو من الله ان نراه قريبا 00وقريبا جدا(ولمعلومية الجيل الذى لم يرى الكركب) فهو عبارة عن شبشب مصنوع من اقسى انواع الخشب الخالص!!0


#111980 [ابـــــوعـــــمـــــــر]
0.00/5 (0 صوت)

03-15-2011 07:58 PM
اللهم اضرب الظالمين بالظالمين واخرجنا منهم سالمين يا رب العالمين


لله درك يا وطن
ابـــــــــــــــــــوعــــــــــــــــمــــــــــر


#111978 [الهلالي ]
0.00/5 (0 صوت)

03-15-2011 07:53 PM

مركز القلب وما أدراك ما مركز القلب ..
هل سئل هذا التمساح عن كيفية وصوله لمستشفى القلب وكيف تم ابعاد الدكتور أحمد السيد صاحب الفكرة مع الأخوة الخليجين ..
ما تم لابعاد دتور أحمد السيد كان مؤامرة مدبرة من قبل هؤلاء التماسيح ، ولنا كثير من التفاصيل المهمة حول هذا الموضوع ذودنا بها ( الشيخ الاماراتي ) الذي صدم مما رأى وتأسف على أنه كان مستثمراً ، فهو يجزم بأنه حتى هذه الللحظة ما تحصل على شيء من هذا المشروع ..
ويضاف إلى ذلك أن هذا المشروع أنشيء من أجل علاج المرضى الفقراء وذلك على حساب نسبة (20%) التي هي حقاً للمستثمرين الخليجين ..
ولكنهم يجزمون بأنهم لا يعرفون شيء عن كيفية سير العلاج بعد رحيل دكتور أحمد السيد ..
وإن غداً اناظره لقريب لنكشف لكم الفساد الذي ينخر جسد مركز القلب الذي أصبح مكاناً للتربح وفقد رسالته التي أنشيء من أجلها والتي سعى إليها الدكتور أحمد السيد له التحية والتجلة وهو الذي وجد نفسه خارج المشروع بجرة قلم متمرجية حاقدة على هذا الشعب ..
لسة في فضائح كثيرة عن موضوع الراجحي .. وغيره ..
الله يمهل ولا يهمل


#111968 [جاهل الجاهل]
0.00/5 (0 صوت)

03-15-2011 07:14 PM
اخوان الرئيس ديل بتكلموا جد
كدي نحن خلونا عقلاء وشرفاء الانقاذ بصدقوا الكلام ده ؟؟؟؟؟؟؟
نصيحتي لكم بااخوة الرئيس خلوها مستورة وفي ستين داهية السودان
واهل السودان
خلونا نحن للمرض والفقر
لاننا بستاهل


#111966 [ابو السرة]
0.00/5 (0 صوت)

03-15-2011 07:10 PM
1- اخو الرئيس
2-اخو المتعافى
3- ود اجاز
4زوجة الرئيس
5- اخو عبدالرحيم حسي
6- ود عثمان فلل سوبا
7-نسيب البشير مقاول كافورى
8- ود الطاهر رحمة الله علية مسنثمر الوطنى
9- زبيع طبال الوطنى بيت الرياض
كفاية كده بكرة نكمل من القديم شدبد يعنى من زمن عصام الترابى وحكايات السكر والدقيق والفاتح عز الدين وشباب الوطن وعلى الحاج وقروش المفاوضات زنقة زنقة ملف -ملف


#111957 [مستاء]
0.00/5 (0 صوت)

03-15-2011 06:52 PM
دا اللشغل ولابلاش هلا جلس البشير فى بيت امه وابيه لنرى هل صار عبدالله طبيب وجراح قلب ومن برطانيا كمان فى زمان البعثات حرمت على ابناء الشعب الكادحين وهل صار العباس رجل اعمال وفى الاتصالات كمان وكم حاجة تانيه كمان مالكم كيف الشعب دا عندو قنبور


#111956 [الجعلي ]
0.00/5 (0 صوت)

03-15-2011 06:51 PM
خلونا في حالنا دي على وزن خلوها مستورة
اخوان الرئيس


#111953 [جاهل الجاهل]
0.00/5 (0 صوت)

03-15-2011 06:34 PM
الراجل اعترف عنده 4 وظائف بس نسى حاجة زوجته في القوات النظامسية برتبة لواء ياربي كم وظيفة عندها
منتهى الشفافية
وينك يالخبير الوطني
وينك يابو العفين


#111928 [ سين]
0.00/5 (0 صوت)

03-15-2011 05:27 PM
على الطلاق كان صدقتهم ياانا مجنون ياغبى ومافى كوز نظيف مافى جبهجى شريف كلهم طينة واحده ولو فى زول عارف كوز شريف وامين وماسك وظيفة من 1989 والى اليوم حاله نفس الزمان يخبرنا عشان نمشىء نتبرك فيه لانه عينه نادرة
الزعيم اسماعيل الازهرى اخته ساكنه فى بيت من طين الجالوص فى حى الركابية والى ان مات بيته مرهون وكل اسرته الى اليوم حالهم مستور وعادى ونحن بنلغبهم بال بانقطربلسى على وزن ال الطرابلسى


#111926 [Aman]
0.00/5 (0 صوت)

03-15-2011 05:22 PM
بمناسبة كده انت يا طاهر قاصد الاخوان المسلمين و ال ( اخوان البشير ) علي العموم كل عند الكيزان صالون اقصد (صابون من اجل غسيل الاموال ) ههههههههههههههههههاي .


#111924 [kalifa]
0.00/5 (0 صوت)

03-15-2011 05:20 PM
سعال واحد ......من أين للدكتور عبد الله معرفة الراجحي امبرطور المال بالسعودية وكمان إحضاره للسودان ؟؟؟؟؟ ممكن يشرح لينا ظروف وسبب المعرفة الغير في محلها!!!!!! أنه إستغلال النفوذ البشع وإستثمار منصب أخيه ليتحرك هو وباقي أخوانه في السعودية ودول الخليج لجلب المنافع للأسرة المعروف حالها قيل 30يونيو1989 لكل أهل السودان .....وكما ذكرت سابقا الفقر ليس عيب خصوصا في السودان ف90% من أبناء هذا الشعب هم أولاد مزارعين وعمال ورعاة بسطاء....العيب هو إستغلال المناصب لمص دم البشر....أما حكاية ال 4 مناصب لضابط بالخدمة فنحولهالسعادة رئيس اركان القوات المسلحة لإتخاذ الإجراء اللازم


#111895 [lمحمدزين]
0.00/5 (0 صوت)

03-15-2011 03:49 PM
(ثم براتب رابع من الهيئة الخيرية لدعم القوات المسلحة التي لي معها بعض الاشغال ) لو وريتنا طبيعة الاشغال دي والتي لا يؤديها الا اخو رئيس برتبة لواء جائز نفكر نخليك في حالك ولا عايزين تقولوا لينا انو اهيئة الخيرية لعم القوات المسلحة دي ترجمة للمؤسسة المايوية جمعية ودنميري .اقول ليك حاجة ياطاهر السمعوا احمد ابراهيم الطاهر خليه انت ماسمعت بقضية الهبروا العباس الخاص ببعض افراد الجيش المسجونين عشان مادفعوا نصيب العباس من عقد شركة الديار القطرية لكن يبدو لي فساد البضع في المية الذي ذكره شيخ حسن تضاعف بربح وفوايد مركبة تماما كما ديون الاطباء حاجة اخيرة في داعي تابيتا يقولوها انو الاطباء عطالة وبايرين ومافي زول شغال بيهم اهو دا طبيب مننالا عندو اربعة وظائف والخامسة انو حفيد الشريف حمد اب دنانة


#111894 [haj abbakar]
0.00/5 (0 صوت)

03-15-2011 03:47 PM
لسنا اغبياء اوسذج
احترموا عقولنا
شفافية ايه وهباب ايه
البلد فى تسارع نحو الهاوية
نتمنى زوال هذا الكابوس اللعين
ان موعدهم الصبح اليس الصبح بقريب


#111890 [اكرم]
0.00/5 (0 صوت)

03-15-2011 03:34 PM
العباس ده مش الكان عندو زريبة فحم فى برى ابوحشيش كان ده هو جاب القروش الخلته سافر السعودية وكمان يفاوض باسم السودان والؤهلات بتاعتو شنو كمان اخو المتعافى القاعد فى ماليزياوالعندو حسابات هناك قال دى حقت الؤتمر كيف الله اعلم
ود عمك بتاع البرلمان العاوزين يعرسو لى ارملته اللهفت قروش المؤتمر
كدى خلينا من ديل كلهم وداد دى سبب طلاقها شنو ما اختلاف فى الانصبه ولاشنو كمان حكايتها مع جمال فى حكاية اراضى قاردنستى سيبك من ديل كلهم شوف لى عبدالرحيم انشاءات من الداخلية لحدى الدفاع خليك كمان من ديل كلهم شوف لى على عثمان وحكاية فلل سوبا الاربعة دى شنو ياخى احنا تعبنا اصلو الجاعة قالو نعمل استبيان كده نتكلم على حبة فساد نشوف الشعب عارف قدر شنو


#111887 [خالد حسن]
0.00/5 (0 صوت)

03-15-2011 03:28 PM
شفافية الانقاذ ليست سوي سراب بقيعه يحسبه المواطن تحول ديمقراطي حتي اذا أراد ان يمارسه وجد كلاب الأمن والنجده والعصايات تضربه وتغتصبه وتوفيه حقه من العذاب ، ناس الانقاذ قايلين عندنا فنابير ! هم خائفين من ثورة الشباب والأيام دي تشوف قناة السودان التي تسبح ليلا نهارا طوال


#111876 [mohamed Seif]
0.00/5 (0 صوت)

03-15-2011 03:12 PM
ما عارف ليه خطر في بالي المتعافي وانا بقرا في الحوار مع اخو الرئيس بجريدة السوداني!!!
ياربي الناس ديل بتشابهو في الشكل وللا.......
علي قول د.البوني (انا مابفسر وانتا ماتقصر)
عالم تماسيح


#111867 [elghefari]
0.00/5 (0 صوت)

03-15-2011 03:01 PM
عن اي دولة تتحدث اخانا الطاهر وعن اي مؤسسية تكتب فالرقابة هي من عند الله علي راي اخاناا احمد ابراهيم الطاهرالذي عليه فقط ان يكون حارسا لامر الله في الارض
ان هؤلاء القوم الذين يدعون بالاسلاميين جعلونا نشك في اسلامنا وفيما نؤمن به من قيم العدل والمساواة بين المسلمين اذ لا فرق بين ابيضهم واسودهم عربهم واعجميهم الا بالتقوي هكذا تعلمنا واقتنعنا وقررنا ان ندخل في ملة الاسلام بعد ان شاء حظنا ان نولد لابوين ينتميان للاسلام
عموما توصلت لقناعة مفادها ان الاسلام الذي اؤمن به ليس هو ما يدعو اليه معشر الاسلاميين في السودان بدا بكبيرهم الذي علمهم السحر الترابي
ان الله قد ابتلانا بهم ربما ليعلم مدي صبرنا علي الابتلاء نسال الله ان يكتب ذلك في ميزان حسناتنا ويرينا فيهم يوما - احسب انه قد دنا- لان الله سبحانه قد حرم الظلم علي نفسه وجعلم محرما بين عباده-
اللهم انا لا نسالك رد القضاء ونسالك اللطف فيه


#111866 [zahi]
0.00/5 (0 صوت)

03-15-2011 02:58 PM
زنقه زنقه


#111864 [zahi]
0.00/5 (0 صوت)

03-15-2011 02:57 PM
انتو خليتو منو في حالو ؟؟؟؟؟؟؟؟


#111863 [الزول السمح ( الأصل )]
0.00/5 (0 صوت)

03-15-2011 02:55 PM

والله يا طــــــاااهر دى مسألة تحير!!!!دكتور /لواء أخو مشير رئيس يشغل أربعة وظائف ؟حسب إعتقادى واحدة ثابتة وهى طبيب بالسلاح الطبي..جميل جداً الثلاثة وظائف الإنت ذكرتهم هل هم بدوام جزئى؟ أم أنهن تطوع فى ميزان والدهم ( العارف بالله) وكم يا تري من كوادر الإنقاذ قد تمكن من حيث الموقع بكم وظيفة بدوام جزئى؟ بوجود آلاف الخريجين الذين لايستطيعون تلبية حاجاتهم وحاجات أسرهم الضرورية.

حسب قراءتى للشفافية هذه ومجرد ظهور أخوان الرئيس والتحدث فى الموضوع توحي بأن الرئيس قد فاتح أخوته فى الموضوع وحثهم على تبرئة ساحتيهما مما يشاع وهذه خطوة إيجابية ستعقبها خطوات وخطوات نأمل أن تتكشف خلالها كل بؤر الفساد لتطال جميع من ساهم فى إهدار المال العام..

وزارة ..وزارة...ولاية.. ولاية...محلية ...محلية....لجنة ....لجنة ...



#111854 [قرفان من الكيزان]
0.00/5 (0 صوت)

03-15-2011 02:41 PM
سعادة اللواء (طبيب) عبدالله بيصرف أربعة رواتب _ من الجيش ومركز الفلب وشيكان وهيئة دعم

القوات المسلحة __ وفى مكان آخر صرح أنو رصيده فى البنك جنيه واحد!!!!!!!!!!!!!!!!!!!!!!!!!!!!!!!!!!

دى يفسروها كيف ياأستاذ ساتى والقراء الكرام ؟؟؟؟؟؟؟؟؟؟؟؟؟؟؟؟؟


أنا ماعارف العالم دى راجية شنو ؟؟؟ فى فساد أكثر من كده ؟؟؟؟؟؟؟؟


قذافى شنو ومبارك بتاع أيه ___ وبن على وزوجته بالنسبه للحرامية ديل ؟؟؟

وحسب معلوماتنا البسيطة جدا جدا ضباط القوات النظامية لايمارسون أى أعمال تجارية ولا حصل

تغيير ___ أفيدونا ياعالم ___؟؟!!!!!!!!


الطاهر ساتي
 الطاهر ساتي

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة