المقالات
السياسة
التفكير والتدبير في امر بدلة الوزير ...
التفكير والتدبير في امر بدلة الوزير ...
07-14-2015 08:32 PM

image
يا جماعة .. لينا كم يوم كدة ممعوطين بصورة وزير السياحة أبو بدلة مفتولة .. في الواتساب .. في الفيسبوك .. في الانستجرام .. في السناب شات .. ما فضل الا يجيبوها في قناة الجزيرة .. والموضوع دة خلاني افكر .. شنو يعني زرارة ركبت غلط ؟! ما البلد كلها زرايرا مركبة غلط .. وكان قعدت اعد ليكم كمية الزارير المركبة غلط وفتلت كتف البلد ووسطا ويديها وكرعيها ما حنخلص من هنا للسنة الجاية .. لكن كدة النذكر الناس بحبة زرارير يمكن الذكرى تنفع المؤمنين ويقوموا يجلوا موضوع زرارة الوزير المشهور .. اها نبدأ بالزرارير المهمة البتعتمد عليها حياة الناس وبتعتبر مقياس لتقدم ورفاهية البلد ..

متذكرين زرارير التعليم في السودان زمان كانت مرصوصة كيف ؟! رصة بت كلب .. مظبطة زي حقت البدل العسكرية .. ستة سنين ابتدائي .. تلاتة سنين ثانوي عام .. تلاتة سنين ثانوي عالي .. اها الجماعة ديل هفت ليهم فجاة كدة انهم يقطعوا زرارة من زراير التعليم ويقفلو عروتا .. ما سهواً ولا نسياناً .. بل مع سبق الإصرار والترصد .. بتروا سنة كاملة وخلوا سلم التعليم مفتول زي بدلة الوزير دي .. وبعد ما كنا بنتفاخر بالتعليم الحكومي ( المجاني ) وكنا بنخلص الثانوي وراسنا ملان .. هسة تعال اتفرج وشوف خريجي ( بعض ) الجامعات الحالية البطلع منها الطالب وهو ما ناقش كوعو من بوعو وحدود ثقافته وفهمه ولغته اقل ما توصف بانها مخجلة ..اها هسة لو وزير التعليم الاخد القرار دة كان فط زرارة ولبس بدلته مفتولة موش احسن من فتلة السلم التعليمي لبلد كامل ؟! خليكم عميقين شوية ياخي ..

الزرارة الجاية دي مهمة شديد .. زرارة العلاج والصحة .. ودي كمان ادهى وامر .. واخير منها بدلة الوزير بمليون مرة على الأقل البدلة التي أصبحت شهيرة جداً بفضل زرارة ركبت غلط اهي نقدر نقول عليها مغطية وساترة .. لكن زرارير العلاج في بلدنا الهامل بقت ميح .. مافي .. لا مركبة غلط .. ولا العراوي مقفولة .. الجماعة ديل الظاهر لقونا شعب ثقيل .. دمنا بارد .. ما بنحس .. قدر ما عملوا فينا ابينا نتخارج بالحسنى او بالقوة او باي طريقة .. قاموا قرروا انه الطريقة المثلى للقضاء علينا انه يقطعوا كل زرارير العلاج المجاني ويقفلوا العراوي ويخلوا غالبية الشعب المسكين المحتاج قاعد في السهلة .. بصراحة كدة عاوزينكم تموتوا من المرض .. باعوا مستشفيات .. قفلوا مستشفيات .. خلوا مستشفيات .. وحتى الخلوها دي انت كمريض ملزم تجيب حقنتك وقطنك وشاشك ولو في طريقة تجيب دكتور برضو ما بطالة معاهم .. دحين هسة لو كانو خلو كم زرارة كدة حتى لو مفتولة موش كان أخير من الحاصل دة ؟! .. خليكم عميقين شوية ياخي ..

اما عن زرارير الخدمات فحدث ولا حرج .. زرارة الكهرباء الممحوقة .. زرارة الموية الوسخانة .. زرارة الرسوم والجبايات على خدمات مفروض تكون مجانية .. زرارة البنى التحتية المشققة ومكسرة ومشاترة .. الشوارع القذرة برغم رسوم النفايات التي تؤخذ قسراً من المواطنين .. زرارة الخريف المفاجيء البطمبج الشوارع وبحولا لبحيرات مليانة بالبعوض .. كان أخير شنو .. زرارة واحدة مركبة غلط ولا مافي زرارير خالص زي الحاصل هسة دة ... خليكم عميقين شوية ياخي ..

اها كلو كوم والزرارة الجاية دي كوم براها .. زرارة الفساد الطال الجانب الاقتصادي والاجتماعي والأخلاقي .. ودي زرارة بقت شبه معدومة في بدلة البلد الا من رحم ربي .. والمشكلة انه زرارة الفساد دي كعبة شديد .. فضيحة عديل لانها خلت حتة حساسة كدة ظاهرة للعيان .. وكل يوم نعاين للحتة دي ونرجع نغض البصر خجلاً من المنظر .. يعني بس لمن تشوف سرقة الاقوات البتحصل ليل نهار .. لمن تسمع انه اغلبية المصالح الحكومية مرهونة .. لمن تفاجا بانه المشاريع بتتباع .. لمن تلقى انه كل يوم الفقير بيزداد فقراً والغني بيزداد غنى .. لمن تشوف اهل العلم والشهادات في اسفل السلم الاقتصادي.. وتلقى ناس يادوبك بتفك الخط بتتعامل بالمليارات .. لمن تلقى الشعب كلو بحلم بالهجرة وعاوز يطفش .. الحاجات دي كلها بتحسسك انك محتاج لزرارة تقفلا وتغطي بيها عورة البلد الماشة من سيئ لاسوأ .. فعليكم الله سيبو بدلة الوزير المفتولة وخليكم عميقين شوية ياخي ..

هسة بدلة الوزير دي ذكرتني كم سؤال كدة .. هي وينا السياحة العندنا عشان يعملوا ليها وزير ؟! يعني وزارة السياحة دي مهمتا شنو ؟! .. غايتو انا ما سمعت بسياحة في السودان .. انتو سمعتوا بيها ؟! هسة راتب الوزير المن غير مهام واضحة ومعروفة دة كم ؟! اكيد ملايين .. والله ما حاسدين ولا بقرانين لكن يعني الراتب دة موش كان أولى يمشي للشعب المتعفف الما لاقي ياكل دة ؟! موش كان أولى يشتروا بيها محطات توليد كهرباء وتنقية مياه بدل ما قتلو الناس بقطع الكهرباء والموية وخلوهم قاعدين في الحر وبشربوا الموية العكرانة في شهر رمضان ؟! موش كان أولى يصلحو بيها الشوارع المكسرة .. أو يدعموا بيها السكر والبنزين .. او حتى يوزعوها مكرمة عيد للموظفين التعبانين .. خليكم عميقين شوية ياخي ..

غايتو بعد النقة دي الواحد حاسي انه شرط صيامو عديل موش جرحه بس .. عشان كدة عليكم الله يا جماعة بلاهي فكونا من زرارة وزير السياحة المركبة غلط .. فكروا في باقي الزراير التانية .. خلوا نظرتكم بعيدة .. صح هو الوزير بالغ .. وحرمه المصون بالغت الخلته يطلع من البيت بالطريقة دي .. والمذيعة بالغت الما انتبهت للزرارة المفتولة دي .. والمخرج زاتو بالغ .. لكن نعمل شنو .. قدرنا كسودانيين اننا ما بنشوف كويس .. وقدر الوزير انه يقع فينا ناس نباشين وشيالين حال ناس ما منطقيين ولا حقانيين .. عينا للفيل الكبير ونطعن في الضل الصغير .. فعليكم الله خليكم عميقين شوية ياخي ..


فيسبوك


تعليقات 7 | إهداء 0 | زيارات 5821

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1304593 [ود العمدة]
0.00/5 (0 صوت)

07-16-2015 11:29 AM
م قصرتي والله اديك العافية
زبطتي الزراير كويس وحبكتيها مع انها م داير اي حبك ولا اي شي
بس زي م قلتي الناس م بتشوف بالمنظار الثاني - صراحة تحليلك جيد وموفق
وشعبنا الطيب دا لو نظر للاشياء بالزوايا الاخري ، كان علي الاقل قلع هؤلاء الاقزام من سدة الحكم وللابد ولكن للاسف بطريقة مباشرة او غير مباشرة الظالم يستمد قوته مننا نحن كشعب او ربما يكون العكس صحيح .. ونحن كشعب سوداني لا نهتم بقيمة الزمن زي باقي الشعوب ... ولكن نوصي الان كل الشعب السوداني بكل اطيافه الاهتمام بقيمة الزمن .. خصوصا ف هذا الوقت من عمر السودان .. يجب علينا نحن كسودانين ان نهتم باليوم اكتر من الغد .. وعلينا جميعا ان نهب هبة رجل واحد لاقتلاع هؤلاء الوحوش ... صراحة لو لم نفطن للزمن وخاصة الزمن اللي جاي .. فعلي الدنيا السلام وربما نفقد فيه حاجة اسمها السودان وللابد
والله المستعان

[ود العمدة]

#1304442 [Dr. Osman]
0.00/5 (0 صوت)

07-16-2015 04:24 AM
I cant believe that this is z man on top of tourism industry.It is very ironic and saaad.Throw this misreable creature out as soon as possible OMG he is not fit for ANY official representation.God bless Sudanese people,Amen

[Dr. Osman]

#1304079 [خليفة احمد]
5.00/5 (1 صوت)

07-15-2015 01:03 PM
السيد الوزير مشروع فنان كوميدي خطير وممكن يشارك في المسلسلات السعودية والعربية مثل طاش ماطاش وعنترة قلب الأسد ......وهلمجرا وبالطريقة دي سعادتو يدخل لينا عملة صعبة من اعماله الفنية وشهرته المتوقعة ستزيد من السياح خصوصا العرب من فئة جمعة الجمعة واخوانه الزلنطحية العرب !!!!! وزير مسخرة ورئيس أكثر مساخر !!!!! الزرارة الغلط تعبر تعبير واضح عن كل البلاوي والرزايا التي يئن الشعب تحت نيرانها من مثل هؤلاء العبط !!!!!

[خليفة احمد]

#1303938 [nubian]
0.00/5 (0 صوت)

07-15-2015 07:11 AM
والله فضيحه هسه الترزي ده بجلدو ولا ممكن يتححل لنه افسد في القماش افتونا في الامر

[nubian]

#1303896 [المحتار]
5.00/5 (1 صوت)

07-15-2015 03:06 AM
ترابط سخيف و التعليم كان 4 و 4 و 4 و الشهادة بتتصحح فى لندن و المواد كلها بالانجليزى طبعا ما عدا التربية الاسلامية و اللغة العربية بالتاكيد و النتيجة بى قريد ون وتو و ثرى دا التعليم الودا السودان حبة لى قدام جا نميرى مع محى الدين صابر لخبت الشغلانة و عارت و جا سبدرات لقاها عايرة و اداها سوط ولى اللليلة ما لمين فى تعليم

[المحتار]

ردود على المحتار
European Union [مواطن] 07-18-2015 10:16 PM
ولماذا تصحح الشهادةالسودانية في لندن ؟ بريطانيا الآن لو دعوها لاعادة استعمار السودان سترفض لأنها ليست بريطانيا القرن التاسع عشر ولأن الشعوب
تفتحت وفوق هذا الاقتصاد الانجليزي لن يتحمل الكلفة فاقتصاد بريطانيا يكفي بريطانيا فقط .. فيا عزيزي الثقة بالنفس والأمانة هي التي تبني الأوطان ولكن في السودان يحدث العكس ليس هناك ثقة بالنفس وليس هناك أمانة ...


#1303830 [abushihab]
5.00/5 (1 صوت)

07-14-2015 11:21 PM
يا وزير السياحة خليك سياحي يا خي؟

[abushihab]

#1303804 [محمد الامام على]
5.00/5 (1 صوت)

07-14-2015 10:14 PM
ده منو اسمو منو بقول فى شنو بقول لى منو زول ما قادر يصلح لبسو يصلح وزير يصلح الاولى الصاد بالفتحه والثانيه الصاد بالضمه

[محمد الامام على]

ردود على محمد الامام على
European Union [abushihab] 07-16-2015 12:44 AM
يا الامام كان تخلينا نفهمها زي ما نفهمها بس سطتها جنس سواطة الله يجازيك.... تحياتي,

European Union [sudani] 07-15-2015 09:23 AM
إنت يا وجيه شكله إختلط عليك حابل الللام بنابل الصاد ;
بعدين المضوع دة اصله ما فيهو فتحه .
غايتو شكلك عستها عواسة كسرة.
(مافي داعي اقول وين فتحه و وين كسره)


سناء جعفر
سناء جعفر

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة