36 ألف وخمسة !
07-15-2015 10:24 PM


قال أحد شعراء النظام المايوي وهو يصدح بإنجازات النظام والحياة الرغدة التي وفرها لمواطنيه: وريتنا جديد ما كان على بال (يا مايو).. ونحن في هذا العهد النضير يستأذن العبد لله شاعر الأغنية ليستلف ذلكم البيت ولكن (مستغرشاً) مما آل إليه الحال ووصل إليه المآال .. فها هو (أحبتي الكرام) وزير ماليتنا يصرح بملء فيه بأن البدء في استخدام نظام التحصيل الإلكتروني قد مكنهم من كشف عدد مهول من الرسوم التي تتحصل في البلاد.. إلى هنا والخبر عادي جداً وما فيهو أي حاجة وخاضع لتقديرك عزيزي القارئ.. يعني ممكن تقول العدد المهول ده (خمسمية).. ألف.. ألفين (مثلاً) !!
لكن كما يقولون: (كضباً كاضب) فأي رقم يمكن أن يقدره ويخمنه خيالك الواسع سوف يكون بعيداً عن الرقم الذي أفاد به الوزير وهو (ما تستغرش): 36 (ألف) نوع من الرسوم والجبايات !!
وأضاف السيد الوزير لبرنامج (مؤتمر إذاعي) الذي تبثه الإذاعة الحكومية في يوم الجمعة من كل أسبوع (ليس وزير المالية وحده، ولكن حتى على كل المستويات لا أحد يعلم أن هنالك 36 ألف رسم من الرسوم) !
العبدلله ليس مندهشاً من هذا الرقم ففي السنوات الأولى للحكم كنا نصبح على جباية ونمسي على نوع آخر من الجباية الشيء الذي دعاني لكتابة عدد من الجبايات المتخيلة إمعانا في السخرية من (عشوائية) فرض الرسوم والجبايات في تلك الفترة وكثرتها.
فكانت جباية أو رسوم (إقامة صيوان عزاء) والتي تفرض على أسرة المتوفى دفع رسوم بحجم مساحة الصيوان وعدد الكراسي و(الصبانات) والصواني والكبابي (والخرتوش) البرشو بيهو الموية ذاااتو (بالمتر طبعن) !
وكذلك رسوم (عدم إقامة حفل) والمعلوم أن هنالك رسوم لإقامة حفل (عرس طهور أي حاجة) لكن ما على كيفك لو عندك أي مناسبة وما عاوز تجيب فنان فيجب عليك أن تدفع (برضو) وتقوم بإيداع صورة من قائمة المطربين (الما ح تجيبهم) والويل والثبور وعظائم الأمور لك لو ما جبتا (حنان مس كول) وكانت في القائمة ما موجودة !!
وأيضاً هنالك (رسوم لافتة محل) حيث يتم حساب مساحة اللوحة بالملم المربع.. وحساب نوعية الخامة المكتوبة عليها.. اللمبات وحساب (الواط) وأخيراً الألوان و(الحروف التي كتبت بها) حيث إن لكل حرف سعر حيث الحروف المستهلكة (الألف واللام مثلا) أعلى سعراً بينما (الضاد والظاء) وما شاكلهم أقل سعرا.
وهنالك أيضاً رسوم (دمغة غريق) وهي تشابه رسوم (دمغة الشهيد) غير أنها يتم تحصيلها من كافة أفراد الشعب الفضل ليصرف منها على (الغرقى) بالداخل (شفتو كيف؟) من إيجار (غطاسين) واللازم لستر الجثة من كفن وحنوط وخلافه (صرف تقيل)، أما غرقى الخارج فقد أنشيء لهم (جهاز الغرقانين بالخارج) حيث تؤخذ الدمغة منهم بالعُملة الصعبة حتى لو كنتا في دولة لا فيها نهر ولا بحر !!
وهنالك أيضاً (رسوم رخصة فنية) حيث تتم الإستفادة من هذا العدد المهول من المطربين وأي مطرب عاوز يغني (يترخص وكده) حيث تقوم مباحث الرخص الفنية بعمل (غارات) على صالات الأفراح للتأكد من أن الفنان أو الفنانة التي تحيي العرس (مرخصة)، في ذات يوم إمتلأت الصالة بالمدعوين، نصبت (الساونات) في أركان الصيوان الكبير وجلس العروسان على الكوشة التي إزدانت بالأنوار الملونة والزهور، أخذ عازف الأورج في ضبط النغمات في ذات الوقت الذي تقدمت فيه الفنانة (عوضية عضلات) تتبختر نحو المسرح وهي تتزين بغوايش ومشغولات ذهبية تفتح ليها (محل صاغة) بررراحة. وترتدي ثوباً شفافاً يظهر من خلاله (البودي) الذي يخفي من تحته (عضلات تبش) والتي كانت سبب التسمية.. قبل أن تفتح (عوضية عضلات) فمها صادحة بالغناء تقدم نحوها شخص يرتدي بدلة سفاري (بنية):
- لو سمحتي الرخصة بتاعتك؟
- رخصة شنو البشيلا معاي هنا.. الرخصة في العربية برة مع السواق !
- لا أنا بقصد رخصة الغناء !
- إنتا بتهظر.. هو الغناء عملو ليهو رخصة كمان؟!
- ما تعملي فيها مجنونة جيبي الرخصة بتاعتك وإلا أطلعي أركبي معانا في البوكس البرة ده.
-- (في تحدٍ): أركب معاك وين؟ بوكس شنو البركبو معاكم إنتو قايلني (ست شاي) واللا (بتكلم براي)؟
- شوفي يا (عوضية عضلات) نحنا ما عاوزين معاكي كلام كتير.. يا الرخصة يا تدفعي الغرامة يا تسيبي الحفلة دي وتطلعي وتركبي معانا. 
-(وهي تعطي الإشارة لعازف الأورج الذي بدأ بالعزف) :
ووووي دشكا.. دشكا دشكا دشكا.
يا مباحث الفنانين 
ووووي دشكا 
إنتو ما عارفين
ووووي دشكا
أو تكونو ناسين
ووووي دشكا
عوضية عضلات
وووي دشكا
قاعدة تحي حفلات
ووووي دشكا
فيها صفقة ورقيص
ووووي دشكا
وكلو بدون ترخيص 
ووووي دشكا
ثم تلتفت لبتاع المباحث وتوجه له لكمة خطافية ينقل بعدها إلى مستشفى المخ والأعصاب عنبر (الكاضمين) !
كسرة :
جباياتي دي لو ما عندكم أعملوها عشان الرقم يكون 36 ألف وخمسة !!
• كسرة ثابتة (قديمة) :
• - أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+و+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+و+و+و.

التيار


تعليقات 6 | إهداء 0 | زيارات 8432

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1305161 [Mohammed Ghalib]
0.00/5 (0 صوت)

07-18-2015 02:05 AM
كل عام والسودان واهله بكل خير واقصد باهله الوطنيين فقط واقصد بالوطنيين من يحبون السودان وليس المؤتمر الوطني
وبمناسبة الرسوم ي جماعه والله الحكومة مسكينه ومحتاجه وبتصلح في البلد شوفوا الشوارع والكباري والابراج وعيني باردة الدوا المجاني الاطفال
سير سير يالبشير نحنا جنودك لاي شيء
اللهم ارحم السودان رحمة واسعة

[Mohammed Ghalib]

#1304794 [hijazee]
5.00/5 (1 صوت)

07-16-2015 06:25 PM
يه رايك استاذ جبرا وبما انك صحفي ومشهور ان تقترح على ناس جائزة نوبل ان بخصصوا جائزة باسم "جائزة نوبل للجبايات" وتمنح خصيصا وحصريا واحتكاريا لحكومة السودان. ما رايكم دام فضلكم. لا تتجاهل اقتراحي العبقري هذا يا استاذ كما انك ستكون ساهمت في فتح نافذه جديدة للصراع على خم هذه الجائزة بين جهابذة حرامية الانقاذ.

[hijazee]

#1304627 [النون الساكن]
5.00/5 (1 صوت)

07-16-2015 12:26 PM
هسع يا الفاتح جبرا ال 360000 واو حقتك دي مرخس ليها و لا حتدفع ترخيس ووات جنيه عن كل واو...
وبعدين ليه ما كتبت رخسة الضحك في زمن البكاء..
اشكرك و اسعد الله ايامك و كل عام و انت بخير يا رائع...

[النون الساكن]

#1304489 [سؤال...]
5.00/5 (1 صوت)

07-16-2015 07:38 AM
يا جبرا...تحية طيبة

مسعول من الخير...

قالو اكتشفوا جباية اسمها: جباية سرج حمار!

دي تطلع شنو كمان...

[سؤال...]

ردود على سؤال...
United States [عمدة] 07-17-2015 07:50 PM
سرج الحمار ده يطلع كرسى الرئاسة رلأيك شنو!!!!!!!!!!


#1304355 [حكم]
5.00/5 (2 صوت)

07-16-2015 12:08 AM
يا زول انت اقتراحاتك دى العملتا فينا

بكرة يعملوا لينا رسوم للمشى كدارى

والله يكضب الشينة

[حكم]

#1304329 [ابو طربوش]
5.00/5 (1 صوت)

07-15-2015 10:55 PM
الرسوم في العالم مجتمعة مابتحصل الرقم المهول ده
بس تبقى ليهم رسوم على النفس الطالع والنازل
كما قال لهم رسوم رسوم انتو بترسمو في شنو؟؟؟

[ابو طربوش]

الفاتح جبرا
 الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة