لقد تنازلت
03-16-2011 11:56 AM

ساخر سبيل

السيد مدير عام الشرطة (لقد تنازلت)

الفاتح جبرا

عزيزى القارئ لابد أنك تتذكر ذلك المقال بتاريخ 1 سبتمبر 2010 و الذى بعنوان (فى كلام تانى) والذى يتحدث عن موقف تعرضت له من إثنين من (منسوبى الشرطة) حاولا إرهابي وترويعى أنا وأسرتى وعندما إحتجيت قالوا لي (إنتا لو ما كنتا زول كبير كان يكون عنك معانا كلام تااانى) ، وقد قمت حينها بتسليم شكوى للجهات المعنية قمت فيها بتحديد الآتى -

- الزمن الذى وقعت فيه الحادثة باليوم والساعة والدقيقة

- يوم الأربعاء 1 سبتمبر 2010م الساعة الثامنة والنصف ليلاً

- المكان تحديداً : شارع الحرية بالخرطوم – أمام محل لذيذ للأيسكريم

- رقم العربة التى كان يشتغلها منسوبى الشرطة : لوحة رقم 39082 (شرطة)

- نوع ولون العربة : دفار متسوبيشى أبيض اللون

وأنا أقوم بتسليم هذه الشكوى وقد قمت فيها بتحديد (كل هذه الأشياء) كنت أعتقد أن المسألة (ما بتاخد ليها ساعات) حتى يتم القبض على هؤلاء المنسوبين وأخذ أقوالهم فى هذه التهم الموجهه لهم والتى تمس بشكل مباشر (جهاز الشرطة) وصلته بالمواطن إذ أن سرعة التحري والتحقق تعتبر ذات أثر فعال فى جمع الأدلة .

ولكن يبدو أننى كنت متفائلاً بعض الشئ إذ بعد مضى أكثر من شهر (وما فيش حاجة) أضطررت أن أقوم بعدها وتحديداً فى 13 أكتوبر 2010 بكتابة مقال ساخر بعنوان (الشرطة ورقم الشاسى) تندرت فيه مما يحدث من تباطؤ وتلكؤ فى القبض على منسوبى الشرطة المشار إليهم مخاطباً قيادة الشرطة قائلاً ( والله بعد ده إلا أجيب ليكم رقم الشاسى بتاع الدفار) .

بعد نشر المقال (تحركت المسالة شوية) وقام الإخوة المسئولون بعمل طابور شخصية لأفراد القسم الذي يتبع له (الدفار) و(بسهولة) قمت بإستخراج السائق من طابور الشخصية ولكن الشخص الآخر لم يكن موجوداً .

أول أمس (الإثنين) وبعد حوالى (سبعة أشهر) من وقوع الحادث تم عقد أولى الجلسات (بمحكمة الشرطة) وكنت أظن وبعض الظن إثم بأن هذه السبعة اشهر كفيلة بأن يقوم (المحققون) فيها بتقديم (بلاغ ما يخرش المية) ولكن لدهشتى فقد كان البلاغ (الموية ذاااتا) وحتى تتأكدوا أعزائى القراء من ذلك فهذه الحصيلة :

- الدفار المعنى هو فى عهدة المتهم صباحا ويقوم بتسليم المفتاح بعد نهاية ساعات العمل وهو غير مسئول عنه بعد ذلك

- المتهم لم يستخدم الدفار فى مساء ذلك اليوم

- لا يوجد فى (الأحوال) ما يفيد بخروج الدفار مساء ذلك اليوم !!

ولعل الشئ (الغريب) حقاً هو أن (المحقق فى البلاغ) عنما سالته (طيب المتهم التانى وين؟) ، فوجئ بأن هنالك متهماً آخر وأجاب بانه لم يبحث عنه علما بأن الشكوى توضح أن المتهمين هما إثنين وليس فردا واحداً بل أن الشخص الثانى هذا هو الأعلى رتبة وهو المسئول عما حدث من تجاوزات .

هنا كان قرار مولانا القاضى بإعادة الأوراق للتحقيق من جديد (والبحث عن المتهم الآخر) !! .. بعد (سبعة شهور) – عزيزى القارئ- الشرطة عاوزة تبحث عن المتهم الآخر !!

طيب بالعقل كده إذا الشرطة لم تستطع إثبات أن (المتهم ) سائق الدفار (والدفار فى عهدتو) هو من كان متواجداً لحظة الحدث كما لم تستطع الشرطة إثبات أن (الدفار) كان (سايقنو) فكيف تستطع الشرطة التوصل (للزول) الكان قاعد مع (السواق) الما أثبتت الشرطة إنو كان سائق الدفار (الما معروف) كان طلعوا بيهو وللا كان واقف فى (القسم)

.. دى مش الإستحالة ذاااتا !!

السيد مدير عام الشرطة :

لقد كان إعتقادى بأن الشرطة حريصة كل الحرص على محاسبة منسوبيها الذين يسئيون إليها والتعامل بسرعة ودقة وحزم لكل من يحاول من أفرادها إستغلال القانون لإرهاب وترويع المواطنين لكن ما حدث من تلكؤ وإبطاء وتساهل فى التحقيق يوضحه بجلاء عدم مقدرة الشرطة فى معرفة تواجد إحدى عرباتها ومن كانوا بها بالرغم من معرفة وتحديد الزمان والمكان يجعلنا – للأسف الشديد - نعيد النظرفى ذلك ..



السيد مدير عام الشرطة :

أنا العبد الفقير إلى الله المواطن : الفاتح يوسف جبرا أقر بكامل قواى العقلية وبحالتي المعتبرة شرعاً أننى قد تنازلت عن الشكوى المذكورة التى تقدمت بها والتى تنظرها محكمة الشرطة الموقرة بالقسم الأوسط بأم درمان وذلك لإيمانى المطلق بأن التعامل مع هذه الشكوى والتحقيق فى ملابساتها لم يكن بالجدية والمهنية المطلوبة الشئ الذى جعل المتهمون يفلتون من العقاب ليظلوا داخل منظومة هذا الجهاز الذى نأتمنه على أرواحنا وأموالنا وأعراضنا وممتلكاتنا



كسرة :

إذا سألنا أى شركة (مياه غازية) قلنا ليهم الدفار بتاعكم (رقم كذا) الكان واقف (الساعة كذا) قدام (سعد قشرة) الكان سايقو منو ؟ أكيد ح يعرفوا


تعليقات 32 | إهداء 1 | زيارات 5937

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#115757 [حسنة]
0.00/5 (0 صوت)

03-23-2011 10:12 AM
الاستاذ الفاتح جبرا ... بعد السلام

هم اصلا قاصدين يعملوا كده يعني بخطة مسبقة ما تفتكرهم جوا ما رين ساي عشان

كده يحاكموهم كيف وهم مرسلينهم ... ديل هم في النهاية ما الا عبد المأمور


#113472 [تغير]
0.00/5 (0 صوت)

03-19-2011 01:31 AM
والله بالغت ياجبرة دخلت عش الدبابير برجلينك كما كنت صحفى كان طيعوك وخلوك تشوف الدفار غير
انا عندى قريبى حجزو الركشة بتاعتو ناس المرور لمن رجعك يخلصه لقاها اتسرقت من المرور هاك يامحاكم وفى الناهية لا الرقشة ولا الحمارة طلع من المولد بلا حمبص تقول لى بتاع الدفار غلطان ان بتقول غلطان لا نحن ما بنغلط ;( الله فى وهو القاهر فوق عباده


#113463 [قاسم الامين عبود ]
0.00/5 (0 صوت)

03-19-2011 12:55 AM
صديقي الفاتح نحن والشعب السوداني كلوا محتاجين ليك ارجوك اكتب اعتزارك الان لانو التنازل ساكت ما بنفع انت ديل ما شفتهم عملوا في البنية المسكينة شنو والقاضي واقف ويدعم فيهم بكرة نسأل منك ما نعرف مكانك وين يعني كان حبينا نعمل معاك الواجب ساكت ونجيب ليك ايسكريم ما نقدر ارعي بقيدك لاننا بنحبك اعمل شريط وخليك بعيد لاننا محتاجين ليك واعمل لاين وخليك بهاين عشان مانجي نعاين بشباك الحراسة ياود جبرة ما تحرمنا شوفتك بره


#113399 [الملك]
0.00/5 (0 صوت)

03-18-2011 07:10 PM
تشتكي الشرطة .. انت تشتكي الشرطة؟ يا اخوانا حقو الناس ما ضيع زمنها وزمن الناس ساي.. نحن في ترتيب دول العالم الثالث وفي الثالث المتخلفة كمان وحكمها ديكتاتوري عسكري.. ومعروف في كل الدول المتخلفة .. ان الامن والعسكر لهم حصانة وتفويض يعملوا الدايرنو .. مدام هم في خدمة الحكومة وامنها ظز في الشعب يعملوا فيهو زي ما عايزيين.. .. السودان دولة متخلفة والحاكمنها متخلفيين .. يا تولوعوها نار فوق روؤس الكيزان ديل .. ولا كمان استحملوا .. الاهانة وبطش العساكر وامن المؤتمر واسكتو ساي.. وزي ما قالوا .. من يهن يسهل الهوان عليه....


#113274 [بنانكو]
0.00/5 (0 صوت)

03-18-2011 10:33 AM
الزول السمح الاصل اعجبني تعليقك الذي ينم عن عين ثاقبة ومطلعة دمت اخي وربنا ينصرك على الذي استولى على توقيعك الاصلي


#112892 [Mamoun]
0.00/5 (0 صوت)

03-17-2011 12:33 PM
عزيزى جبرة احمى نفسك لازم يكون معك الدليل للمستندات التى فتحت بيها البلاغ وتحتفظ بها فى مكان امين وياحبذا خالرج السودان لان بعد سحب بلاغك ده انت عارف الجماعة ممكن يتبلو عليك وتصبح بدل شاكى متهم ربنا يحفظك للشعب الفضل وكلنا خلفك الى ابوجنزيرززززززززز


#112843 [صلاح]
0.00/5 (0 صوت)

03-17-2011 11:31 AM
انت لسه يا الفاتح ما عرفت انو البلد دي حا ميها حراميها اشكي لي ربنا بس خاصة وانو ما عندنا ميدان تحرير عشان نشكي ليهو


#112829 [ودالجزيرة]
0.00/5 (0 صوت)

03-17-2011 11:16 AM
عمر بن الخطاب

عمر البشير

عمر بن عبد العزيز

عمر المختار

الكلمه الشاذه








حليل زمنهم

الاول قال لو واحد دخل النار لظننتو انا









#112778 [ابو احمد]
0.00/5 (0 صوت)

03-17-2011 10:21 AM
العزيز جبرة اريد ان اروي لك قصة شاهدتها بام عيني في التلفاز ملخصها انا مقيم في دولة اوربية تم عرض فيلم لاشخاص من البوليس يقومون بالتسابق في الشارع علي الحدود ومن دون تردد تم فصلهم من عملهم بمجرد الاسراع بسيارات الشرطة التي هي اصلا تابعة للشعب مابال من يروعون الاشخاص نصيحتي ليك استاذي الفاضل اشكيهم لربنا لانك حاتضيع زمنك في الفارغة معاهم اعانك الله


#112681 [ashref]
0.00/5 (0 صوت)

03-17-2011 04:39 AM
السيد جبره .الموضوع بيبدو كوميدى لكن بيبين مدى الماساه الاخنا فيها والله العظيم انها ماساه.وللاسف الشديد سوف يعانى منها السودان لعشرات النين حتى ل اتغير نظامالانقاذ.لقد استطاعوا تشويه الوجدان السودانى وهذا الشئ صعب تغيره.فمن اراد ان يربى اولاده فى وسط نظيف عليه ان يخرجهم بره السودان فورا.لان الوسط السودانى الحالى لا يساعد على تربيه سليمه.


#112616 [ابو عبد الله]
0.00/5 (0 صوت)

03-16-2011 11:15 PM
الاستاذ الكبير جبر لك التحية وانت تتنازل عن حق اصيل لك كمواطن سوداني
وحقيقة ان فاقد الشئ لا يعطيه
ربما يتم ملاحقتك علي التنازل المعلن علي الملا كما قال احد المتداخلين

ما ثورة مصر الا لتراكمات سنين بمثل هذه التجاوزات من الشرطة والقوات الامنية الاخرى

لكني اعذر من قام بهذا التصرف لانه جاهل ولا يدرك انه في خدمة الشعب ويتخيل ان الشعب هو الذي في خدمته

واعتقد ان كثير من الشباب ينتسبون لهذا الجهاز للتشفي من المجتمع وليس للخدمة
والله المستعان


#112543 [دعد]
0.00/5 (0 صوت)

03-16-2011 07:33 PM
اقول ليكم حكاية افظع .......!
انا ابوى رفع قضية تزوير ضد واحد كوز واستاذ شريعة فى جامعة القران الكريم والتهمة لابساه تمام وعندنا سبع شهود والقضيه مشت فى صالحنا لحدت ماوصلت اعلى مرتبة قضائية بعد وزير العدل طوالى وفى يوم عندنا جلسة مشينا ، بى كل بساطة القاضى قال ملف القضية ضيعتو البنت بتاعت السيرك .. مشينا لى البنت وسالناها وين الملف...؟
اتخيلوا انها مشت مع المحامى تبعنا وواجهت القاضى مستنكرة وقالت ليه بالحرف :-

كيف تقول انا ضيعتو انت موش جيت ومعاك الراجل ابو دقن محنن ومعاه تانى واحد وشلت الملف واديتو ليهم ..؟؟؟!!

يعنى حسى نشكى لى منو غير الله ..؟

والله غالب ......


ردود على دعد
Sudan [مها] 03-18-2011 05:07 PM
واقوليك قصه افزع عندي اخواتي عندهم قضية ارض زراعيه ملكهم تم التعدي عليها من جهه حكوميه بدون علمهم وبدون تعويضهم يعني رجاله ولم تستطيعا زراعتها بسبب التعدي لثلاثه مواسم اي تم تفويت فرصتهم في العائد اليهم من الارض تم رفع قضيتهم ورسوم ومحامي ومواصلات للمحكمه الفي صقط لقط وشهود وترحيلهم وكان من ضمن طلابتهم ازالة الضرر وتعويض 70000 ج بالجديد وبعد ده كله وكل الادله والبراهين في صفهم والخبراء والشهود شهدوا بان هناك ضرر و المدعي عليها فشلت في الدفاع بل لم تقدم دفاع ولزمت الصمت ونطق القاضي في النهايه بالقرار بازالت الضرر وتعويض المدعيات ب50 ج فقط هذه الخمسين لا تساوى ثمن المواصلات ومواصلات الشهود اين الحكم العادل اين حقهم في ثلاثه مواسم لم يزرعوا ارضهم؟ هذا القاضي نصر الظالم علي المظلوم , القوى علي الضعيف واتمني ان ياتي يوم ياخذ كل زى حق حقه


#112539 [محمد ودام سنط]
0.00/5 (0 صوت)

03-16-2011 07:26 PM
ياسيد ياجبرة انت برئ خالص للمعلوميه البلد دي هي فيها قانون اصلا دي عبارة عن حاجات مابتتوصف وانت كانسان مهان حتي المهانه تتبراء منك دوله بولسيه السيادة فيها فقط لمن يلبس الزي فهو سيدي وسيدك -ينهب يسرق يقتل يزني كله باسم القانون --ياسيدي هناك رب --حتي كل شئ اصبح لاشئ


#112530 [الشافوه خلوه]
0.00/5 (0 صوت)

03-16-2011 07:07 PM
هااااااااااااااا هاهاها ... تهي تهي تهي تها هااااهههههههههههههههههها ما كان توصلها للآخر عشان تعدم المليم ورجليك تحفى من المشاوير وأمشي وتعال وفي النهاية تطلع من المولد بلا حمص... لكن خلاص أرفع شكواك لله الجبار القوي الذي لايرد دعوة المظلوم... وأخيرا أقول لك دا أنت الصحفي الذي يكتب ويتابع فمابالك بنا نحن ناس قريعتي راحت ؟ لنا الله وهو حسبنا ونعم الوكيل.


#112505 [أبورماز]
0.00/5 (0 صوت)

03-16-2011 05:52 PM
قال لى صديق أنه ذات مره حجزت سيارته لدى المرور وفى اليوم التالى جاء لتسوية المخالفه واستلام سيارته.. فوجدها بدون بطاريه وبدون مسجل وقد نزع أحد إطاراتها . .. ولما ذهب للمسئول لعرض الأمر عليه قال له .. إنت متأكد لمن جبته عربيتك دى و وقفتها هنا كان فيها مسجل وبطاريه وإنك ما أخدت الإطار معاك. !!!!!!!!
قال صديقى .. ضحكت وضحك سيادته وتبادلنانظرات وداع .. والله يا جبره للمره التانيه تخيب ظنى وتطلع زول دقوسه ساكت ...


#112498 [mahmoud jadeed]
0.00/5 (0 صوت)

03-16-2011 05:39 PM
الأخ الفاتح جبرا جيب لي أتر الأرنب وجلد النمل أنا أجيب ليك الجماعة في ثواني .. أبو الكجور ذاتو .( الشرطة في خدمة الشرطة والمواطن يأكل نيم بعد الايسكريم ).


#112470 [ سين]
0.00/5 (0 صوت)

03-16-2011 04:45 PM
والله ياعم جبرة انت طيب خلاص ياتو شرطة انت بتتكلم عنها دى مهنة من سنة 1989 المعين بها هم كادر الجبهة الاسلامية وبعد نيفاشا بعض منهم ناس غابة وجزء من الحركة الشعبية ووزيرها مشكوك فى جنسيته ورجل سمسار يعنى انت بتاذن فى مالطه وماتتعب نفسك الشرطة السودانية ماخفى عنها اعظم وكلهم فى طريق حبيب العدلى سايرون لاتعشم فى فاقد تربوى ومتحزب واجنبى انهم كارثه كارثه وانسى والله ماسمعته عن الشرطة والامن من لفه لفهم والله يعمل مجلدات للفساد والاطهاد للمواطن الغلبان


#112417 [مها]
0.00/5 (0 صوت)

03-16-2011 03:32 PM
الاستاذ الفاضل انا لديه قصه مشابه من ناحية تقديم الادله والبراهين وشخصية المتهم ومكانه للشرطه ولكن الشرطه لم تفعل شئ ولم تكلف نفسها سوي حفظ البلاغ
قام شخص بسرق موبايلي القيم وقام باتصالات من موبايلي باشخاص اقربائي بالخارج بطلب اموال باسمي كما قام بالاتصال بي بنمرتين من موبايلاته الشخصيه عملت بلاغ واحضرت للشرطه بعد اعطائي خطابات لجهات الاتصالات لمعرفة السارق وعنوانه وسلمت الشرطه كشف الحساب الخاص بالسارق وبعد كل هذا لم يتم القبض علي المتهم ومرة علي هذا البلاغ 9 اشهر والشرطه تعرف كل هذه المعلومات عن السارق ولم تكلف نفسها القبض عليه ! نفسي اعرف كيف تكون الشرطه في خدمة الشعب .


#112413 [lمواطن]
0.00/5 (0 صوت)

03-16-2011 03:28 PM
بس ياجبرة انته كبرت الموضوع!!!11شوووووية او حبتين ذي مابقول اولاد بمبة(وهم بالمناسبة حلو موضوعم مع الشرطة حل جذري)!!!!
لانك ممكن تكون بتشتري الايسكريم والجماعة ما عندهم حق فتتة العشاء!!!! فحبو يدوروك عشان يطلعوا بي حق الفتة!! ات عملت مجنون واشتكيتم كمان!!!!!
وذي ماقال اشكيوه لمين القدر!!!!
اشكي المقادير ليمنو!!!1;)


#112363 [بلطجى ضدالانقاذ]
0.00/5 (0 صوت)

03-16-2011 02:36 PM
الاخ العزيز الفاتح جبرة يعنى انت لا تدرى ان أفسد ما فى السودان هى أجهزة الأمن بكل مسمياتها؟........انا أعطيك عينة من فساد الشرطة ضابط الان برتبة عقيد ويدعى حسن حامد أحمد واصوله مصرية صرفة من الاقصر بصعيد مصر ووقتها كان بالداخلية وبرتبة نقيب والضابط العظيم الكان يرئسه حصلت له مشكلة فقهية طلق زوجته اربع مرات وحينها استعان بالنقيب المصرى تيسا مستعار وزوجه المدام لعدة ساعات وقام بتطليقها منه (فقه الضرورة)وابتعثه بعد هذه الواقعة الى القاهرة للعمل بالسفارة السودانية وبعدها ساءت العلاقة بين مصر والسودان ايام حادثة حسنى مبارك فى أديس واغلقت السفارة السودانية القاهرة وابتعثه مرة اخرى الى السفارة السودانية بالعراق ومنها الى جامعة الرباط يعنى كلو بزنيس والان لدية عمارتين بالخرطوم وكمان زوجتين .....وياما تشوف ياجبرا !!!!!!!!!!!!!!


#112356 [Saif Al Hagg]
0.00/5 (0 صوت)

03-16-2011 02:27 PM
لماذا يا استاذ جبرا تنازلت ؟؟؟!!!! عارفنك ياست وعاوز توصل رسالة ولكن مشكلتنا كلها عدم المحاسبة --------

يا جماعة المحاسبة دى دايرة صبر ---- كان تصبر بس تشوف حيعملوا شنو او كان ترفع الشكوى الى وزير الداخلية نفسو عشان يشوف الموضوع ده شنو ؟؟ اذا ما حصل شئ ترفعوا لرئيسنا الرصين !!!

كان تقعد ليهم شوكة حوت بس على الاقل

اذا ما حصل شى بعد داك تكون امنا دى ما تمام

كسره: لقد تنحى السيد الفاتح جبرا عن بلاغه ضد الشرطة (وزيه ناس كتار مسترهبين) فنحن نشكو ضعفنا وهواننا الى الله ونسال الله ان ينصفنا عاجلا


#112348 [سوداني مخلص]
0.00/5 (0 صوت)

03-16-2011 02:23 PM
الله يكون في عون الجوه البلد من البوليس والامن والجيش البقو كلهم من المستعمرين الكيزانيين
وبعدا يا شعب السودان عندكم حلين اما تقوموها وتولعو فيهم او الحل الجزئي الشغال دا تخلو ليهم البلد يحكمو روحهم ويشيلو الضرايب من روحهم واضاربو بعضهم
دا كان كلام الحرقه
اما كلام العقل هو العصيان المدني كان خايفين تقيفو في وشهم ماتدوهم ضرليبهم ما تدهم الزكاه ما تشتغلو ليهم العصيان المدني يا اخوانا كلو يعتبر روحو في الصالح العام قبل ما ينحال اضغطوهم وصدقوني الناس دييل انا عارفم كويس والله حيخلوها ويجرو لقروشهم البره اصلهم خوافين وقاعدين عشان المال حيفضل قدامكم البشير براو لانو ما بقدر يهرب بره الباقين كلهم حيفرو


#112335 [حلاوى]
0.00/5 (0 صوت)

03-16-2011 02:00 PM
انت يا الفاتح زااااااااااااتك تستاهل , انت عارف و متاكد انو مافى واحد من المنسوبين ح

تحصل ليه حاجه .


كككسره .. كان تشيل نمرة المكنة


#112327 [ساجد]
0.00/5 (0 صوت)

03-16-2011 01:49 PM
انت كويس!! سمعت عن اللذين يغادرون السجن بعد اربعة وعشرين ساعة من القبض عليهم!!!!!!وكمان مش ذي قصة سبدرات!!!! جوكية صغار بينهبو في الخلق بشيكات طايرة!!! ثم ببساطة عندما ترفع عليم قضية يخرجون من السجن!!!في اربعة وعشرين ساعة!!!!وهناك قضايا ضد الشرطة والسجون مرفوعة منذ سنوات !!!لاتاس اطلق سراحه وهربوا باموال ضحاياهم!! والتبرير!!!قمنا بمعاقبة الشرطي بخصم راتب شهر!!!!! طيب مانا بديو راتب شهرين واطلع باللايين التي سرقتها!!!!


#112321 [الزول السمح ( الأصل )]
0.00/5 (0 صوت)

03-16-2011 01:43 PM

ياجماعة والله الأيام دى فى حاجات كده بتحصل ما قادرين نفهمها!!!! زى الراجل الورا عمر سليمان ...والمرا الورا القذافى.. والبوليس المعا التانى فى الدفار ...والمستشار والخبير الوطنى والطبيب البيشتغل فى 4 وظايف يومياً والزول الكتب الكرتونة بتاعت عمنا نُقُد.

يا أستاذ جبرا

يازول إنت متأكد من حكاية الدفار دى حقيقة واللا كنت حلمان ؟؟ لأنه الدفار ده كان مقرشنو ....يمكن ساقو الزول الورا عمر البشير!!!!!


#112302 [الساير]
0.00/5 (0 صوت)

03-16-2011 01:14 PM
خيرا فعلت بهذا التنازل لأنك كنت حتتعب بدون فايدة لكن أترك أمرك للذي لا يظلم أحدا .


#112295 [حمدان]
0.00/5 (0 صوت)

03-16-2011 01:02 PM
البلاغ من اساسو كاذب..... قال ايه شارع الحرية في الخرطوم...حرية ايه يا عمك...اوعي يكون ده الشارع اللي بودي السجانه..


#112294 [nasrabi]
0.00/5 (0 صوت)

03-16-2011 12:59 PM
أستاذي/ الفاتح جبرا

يادابك دقست إنت قايل دخول الحمام زي الخروج منه

أحسن تسحب طلب تنازلك من الشكوى

قبل ما يجيك عسكري بأمر قبض وتمشي النيابة تجد الشرطة فاتحة بلاغ رد شرف

وأقلها بلاغ إزعاج السلطات والإتهام الباطل

مادام بديت كمل حتى ولو يطلعوا براءة


#112287 [ابو كره]
0.00/5 (0 صوت)

03-16-2011 12:46 PM
اللذيذ يا جبره اتدخلوا في قضية اغتصاب صفية بكل ثقة قالوا البت دي لا اغتصبوها ولا حاجة ما بقى ليهم الا يقولوا دي باعوضة ساي ..

ليها حق البت تجري تطفش تتخارج من البلد لانهم بعد شوية راح يقولوا انه اصلا ما في بت اسمها صفية تكون دي بت ابليس جات لناس الامن وهم نايمين بالليل بعد ما سدوا خدمة


ردود على ابو كره
United States [نمرة شاسي] 03-16-2011 02:21 PM
حلوة يا ابوكرة .. ضحكتني والله لحدي ما دمعت .... بت ابليس بت ابليس هو نحن نقدر على ابليس وبناتو عشان نقدر نقبض لينا بتاع امن وهو نائم يتفسح مع البت اياها...!

اما الاخ الفاتح... الجاتك في سمعتك امام اولادك سامحتك .. في ناس جاتم في رويحتم امام اولادهم في الطريق العام .... افتكر سمعت بواحد اسمو علي بشير (يرحمه الله) ويأخذ له حقه يوم القيامة ونحن شهود انشاء الله
اما سمعت بالحكم الذي صدر في حق بعض منسوبي الشرطة لما لقو المتهم ميت بسبب الضرب .. والقضية معروفة
ذفار ايه وشاسي ايه .. ده انت تحمد ربنا انو لقوك زول كبير ما بتتحمل النشاط القدو قدوي ... والا كان اكلت العلقة في حنانك وتنسى انه كان هناك دفار في شارع الحرية مش نمرتو

لكن ابشرك ..... حقك ما حيضيع رغم التنازل المعلن .. قول لي كيف؟


#112280 [Aman]
0.00/5 (0 صوت)

03-16-2011 12:38 PM
لك التحية ياالفاتح جبرا والله مقالك مضحك ومبكي إن منسوبي جهاز الشرطة من الضابط ( المناوب ) في قسم حتي اخر جندي كلهم شبكة اجرامية قليلون منهم مهزبيين مع المواطن .المضحك هو رقم الشاسي و المبكي يا جبرا هو التعامل مع كل قضائة المواطن ( بالواسطة ) واقول ازا حدثت هزا الموقف لاحد من ال (؟؟؟؟) لتمت معالجة هزه القضية بالتلفون فقط . علي قول المثل الماعندو واسطة مايأكول باسطة.


#112279 [Aman]
0.00/5 (0 صوت)

03-16-2011 12:37 PM
لك التحية ياالفاتح جبرا والله مقالك مضحك ومبكي إن منسوبي جهاز الشرطة من الضابط ( المناوب ) في قسم حتي اخر جندي كلهم شبكة اجرامية قليلون منهم مهزبيين مع المواطن .المضحك هو رقم الشاسي و المبكي يا جبرا هو التعامل مع كل قضائة المواطن ( بالواسطة ) واقول ازا حدثت هزا الموقف لاحد من ال (؟؟؟؟) لتمت معالجة هزه القضية بالتلفون فقط . علي قول المثل الماعندو واسطة مايأكول باسطة.


#112267 [امين الشريف]
0.00/5 (0 صوت)

03-16-2011 12:22 PM
اخي اخي الفاتح اذا كان خصمك القاضي فمن تقاضي ؟؟؟؟؟؟؟؟؟؟؟؟؟؟؟؟؟ الفاتح اذا كان خصمك القاضي فمن تقاضي ؟؟؟؟؟؟؟؟؟؟؟؟؟؟؟؟؟


ردود على امين الشريف
Saudi Arabia [عزالدين الشريف] 03-16-2011 06:15 PM
الاستاذ/ الفاتح جبرا، هذا جزاء من يتقدم الى استرداد حقه من الشرطة ... اذا كانت القوانين نفسها تحمي الشرطي حتى عند اطلاق الرصاص والقتل والتعذيب فما الذي تنتظره من الشرطة او من السلطة المتحكمة في الشرطة؟ بعدين حكاية محكمة الشرطة دي شنو؟ اذا كانت للشرطة محاكم فهذا يعني انها لم تعد ضمن الجهاز المدني في البلد ... يعني عسكروها وستضيع الكثير من الحقوق .... عزيزي لدى من محبي \"الشراب\" في يناير 2001 قبضوه عند بيت \"الشراب\"... قبضوا عسكري جنوبي والعسكري كان ضمن كشه والعسكري مسيحي وفيهو باقي شربة ريحتها طاقة ... قال المشروع الحضاري ... حدث هذا في الخرطوم جنوب وليس في اطراف جوبا! صديقي ما زال يحكي هذه القصة حتى الان!


الفاتح جبرا
الفاتح  جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة