المقالات
منوعات

07-31-2015 01:40 PM


تعبت من شوفتك تصاوير
في الاسافير والصحف
تعبت من نوم في الرصيف
في الشارع المنفى البعيد
تعبت من طول المناجاة لي طيفك
الماداير يلين
في تجاويف السهر
تعبت من قول الكلام
مليان وحيح جوه في جوف القصيد
كيفن وصولك والمتاريس
كيفن اجيك اتوهطك
اقعد حاك اتنشقك
كرف السنين
الالفة والشوق الاكيد
احساس مشبع بالوفا
وناساً صفا
وقلبا عليك وحوح هفا
وفضلت فيك زي
حوار اللوح مقيد في المسيد
كتبت ما خليت وصف
ورصيتا ليك اجمل حروف
مليانة بي كل الولف
وهمست لي قاسي
القوافي النافرة
زي خيلا بتصهل
كلما حست خطاي
تتمد وتزيد
تعالي يا اجمل روي
انا اصلي متقريف افتش
لي روايح البن بتمرق
من مسامات الحروف
كلما نتحت قوافي
مارقة من قلبي البريد
لمتين اساسق
بين بدايات المسا
ونجمة صباح
شان الاقيك انت كوكب
بين ثريات
شايلة من حسنك جمال
خمرة محاسنك
اسكرتني وانتشيت
وشعرت نتحات الوريد
جواي زغرد ناي حنين
واتدوزن الوتر العصب
هاك مني موال طولو نيل
ايقاعو من موجة بتناغم ضفة
تحتضن النخيل
واتشهقك
دهشة وذهول
حلة انبهار لي زول مرق
طول سنين
رجع الصباح والدنيا عيد
شلتك معاي زمنا النزوح
تيراب محنه ودخري
لي وقت التواريب البذار
عينة خريف نديانة
شاقيها البرق
خصب مساماتها العشم
نادت جروف نشفانا من طول السنين
يامطيرة صبي لينا
ويتردد الصدى في العميق ( هل من مزيد)
هل من مزيد
اتدفقت عبر الصدى
كل الاماني الكانة في رحم الحلم
عن يوم جديد
فيه المدارس زي مدارسنا الزمان
والناس بتركب بابتسام
توي ساكوبيس شان الشغل
ابيض جديد
لا ركشة
لا امجاد
ولا ذلة زحام
وانا وانت والواقع البعاين للشمش
نكدح عشان اولادنا تكبر بي فهم
تكتر تسد عين الشمش
انا وانت والعزة البتهدر
جوة شراييني
وتقول
العزة عزة عزة
والشاعر خليل
وغدا نعود
وبس
[email protected]


تعليقات 1 | إهداء 0 | زيارات 2017

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1313388 [عزالدين عباس الفحل]
0.00/5 (0 صوت)

08-02-2015 09:46 AM
يا سلام يا دكتور محمد حسن ، أجمل ما قرأت في هذا الصباح الباكر ، قريحتك الشعرية بمزمار داوؤد ، روعــــــة ،،،




عزالدين عباس الفحل
ابوظبي

[عزالدين عباس الفحل]

د. محمد حسن
مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة