مستعجلين ليه؟
08-01-2015 10:27 PM


في عام 2011 إكتشفت وزارة الشباب والرياضة وجود مبان لا تمت لخارطة المدينة الرياضية التى لا زالت تحت التشييد بصلة وعندما قامت الوزارة بحصر هذه المساحات التى تم (بيعها) والتى خصصت لأغراض غير رياضية (فلل ، محلات إلخ) وجدوا أن مساحتها تبلغ نحو (مليون) متر مربع وتحديداً (941.415) متر مربع علماً بأن إجمالي مساحة المدينة هو مليون و488 ألف و144 متراً مربعاً (يعنى باعوا تلتين المدينة وخلو تلت) !

ولعلم السادة القراء أن المدينة الرياضية قد تم تخصيص الأرض لها وبالمساحة أعلاه بقرار من رئيس الجمهورية شخصياً يحمل الرقم 45 بتاريخ 4 يناير 1991 ، طبعا القصة دى ما ممكن تحصل فى أى (نظام في الدنيا) .. رئيس جمهورية يصدر قرار بإنشاء مدينة رياضيه .. ويقوم المهندسون والمساحون يمشوا يمسحوا (الحتة) ويحددوا الأبعاد (بتاعتا) ويحددوا (المساحة بتاعتا) ويعملوا ليها (كروكى) يوضح جيران المدينة بالجهات الأربعة .. ويسجلوها فى الأراضى ، والمعماريين يقعدوا يعملوا ليها (خريطة) .. الملاعب بي جاى .. و(المسابح) بى هنا و(المتفرجين) بي هناك و(المضمار) بي جاي .. والشنو ما بعرف بي هنا .. ويتعاقدوا مع شركة ويدوها الخريطه للتنفيذ والشركة تبدأ الشغل … وبعدين وزارة الشباب والرياضة التى يتبع لها هذا المشروع تفاجأ بأن (تلتين المدينة) إتباع !!
لعلكم أعزائي القراء (إستغرشتم) وطرأت على أدمغتكم هذه الأسئلة : (البيع ده حصل كيف) ؟ مصلحة الأراضى دى بتبيع وبتسجل ساااكت؟ مش السجل الفي الأراضي مكتوب عليهو إنو دي مدينة رياضية ؟
العبد لله لا مستغرش وللا حاجة .. شنو يعنى لمن (المسئولين) يبيعوا (واطات مدينة رياضية) ؟ دى حاجة صعبه ؟ الواحد يمشى الأراضى ويقول ليهم أنا عاوز ليا قطعه فى (المدينة الرياضية) يقوم المهندس المسؤول يطلع الخريطه بتاعت المدينة ويسألو :
– أها القطعه دى عاوزا فى ياتو موقع ؟ في ميدان (الباسكت والطائرة) وللا (أحواض السباحة)؟
– لا لا في ميدان الكورة أحسن !
– (وهو ينظر إلي الخريطة) : أها نديك ليها فى (دائرة السنتر) وللا في خط (طمنتاشر)؟
– والله ياخى لو لقيت ليا واحده في (خط سته) يكون كويس
– معليش القطع بتاعت (خط سته) دى كووولها إتباعت عشان الناس كووولها عاوزه تكون قريبه من القون !
– وبعدين؟
– ما مشكلة ممكن نشوف ليك واحده (ناصية) فى خط التماس (مواصلاً) إنتا القطعه دى عاوزا سكنية وللا إستثمارية؟
– عاوزا إستثمارية !
– وعاوز تعمل فيها مشروع شنو؟
– والله عاوز أعمل فيها مطعم سياحى
– طيب (خط التماس) ده ح يكون كويس معاك ؟ أى لاعب الكورة تطلع من خصمو (رمية تماس) يخش (المحل) يضرب ليهو (بيرقر) وكباية عصير ويطلع يرميها يوصلا القون التاني !
(قبل أن تتابع المقال لو عندك حبوب قوم أبلعا) .. السؤال البفرض نفسو هو أين وزارة التخطيط العمراني الولائية من هذا (العبث) ؟ وما هو دورها فى إيقاف هذه (الخرمجة) ؟ وللإجابه علي هذا السؤال (خلي أعصابك قويه) نقول أن وزارة التخطيط العمراني الولائية (ذات نفسها) قد شاركت (تقول ليا شنو) فى هذه (المولد) وذلك عن طريق الاستيلاء على 999 قطعة بمساحة تقدر بحوالى 513 ألف متر مربع بثلاث مواقع مختلفة من المدينة الرياضية … (شفتو الكلام ده كيف؟
الشئ الذي دفع العبد لله لكتابة هذا المقال خبر جاء بصحيفة (الصيحة) بعدد الأمس الأربعاء الموافق 29 يوليو 2015 بعنوان (لجنة برلمانية : فساد المدينة الرياضية لا تخطئه العين) ، بعد أأكثر من أربع سنوات يأتي البرلمان ممثلاً في رئيس لجنة الإعلام الفرعية الأستاذ ؟ محمد المعتصم حاكم ليصرح بوجود فساد كبير في ملف المدينة الرياضية !! يعني الملف قاعد قرابة الخمس سنين منذ أن تم فتحه بواسطة وزارة الشباب والرياضة والفساد (ريحتو ضاربة) ومافي زول عمل فيهو حاجة، ويا دوووب (البرلمان) عاوز يفتحو ..(مستعجلين ليه ياااخ خلوهو كمان خمسة ستة سنين تاااني ) !

كسرة :
إقترح بعض (المسؤولين ) إنشاء مدينة رياضية بديله فى مكان آخر .. العبدلله يقترح علي السيد رئيس الجمهورية عند إصداره لقراره القادم بإنشاء المدينة الرياضية (البدل فاقد) وعشان ما (نخش الفلم ده تاني) أن يشتمل (القرار الجمهورى) على مساحة المدينة الجديدة زائداً مساحة الأراضى التى سوف يتم الإعتداء عليها !!

• كسرة ثابتة (قديمة) :
• – أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+و+و+و

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+و+و+و


تعليقات 15 | إهداء 0 | زيارات 7592

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1313553 [ام الحسن]
5.00/5 (1 صوت)

08-02-2015 01:28 PM
عايز بشة يطلع بدل فاقد وكمان بدل هدر ....سمعنا بالفاقد التربوي لكن الفاقد الارضوي ده اغرشنا اقصد اطرشنا ماسمعنا بيو
والله سهلتها علي بشة في المدينة الرياضية لكن خط هيثرو ده يطلعو ليو بدل فاقد كيف ؟؟؟!!!كدي حك راسك ياجبرا والمقال الجاي ورينا بدل فاقد لخط هيثرو وسهلها علي عمك بشة اكيد ما ح تغلب

[ام الحسن]

#1313541 [انقاذي سادرفي فساده]
5.00/5 (1 صوت)

08-02-2015 01:11 PM
الشيخ الحردان في تركيا وزبانيته هم من باع اراضي المدينة الرياضية
ووالي الخرطوم قال الحتات كلها باعوها ويقصد اراضي الولاية التى باعها الزبن عبدالرحمن الخضر وهو من جوقة شيخ على والذى اتى به الى الخرطوم بعد ان تعارك مع كرم الله رئيس المجلس التشريعى في بعض المليارات والتي لهطها الزبن الخضر لشيخ علي من ميزانية ولاية القضارف

[انقاذي سادرفي فساده]

#1313513 [hanankokoabas]
0.00/5 (0 صوت)

08-02-2015 12:29 PM
ياخى تلتو ولا كتلتو يعنى ما سمعت بالمثل دة ولا شنو؟

[hanankokoabas]

#1313488 [حريكه]
3.00/5 (1 صوت)

08-02-2015 11:57 AM
يا حبيبنا الفاتح انت قايل شنو الشغله دي مطبوخة من
البداية. عمك بشه يهجز ليهم الاراضي باسم المدينة الرياضية وبقرار جمهوري عشان مافي زول يجي جنبها وبعد ما الحلاوة تحلا اي واحد منهم يدوهو حتة دا كل ما في الموضوع..
مدينة رياضية مين وناس نايمين.
يا سودان سلام.

[حريكه]

#1313485 [تكس راجع]
0.00/5 (0 صوت)

08-02-2015 11:47 AM
لعلمك الكثير من الشهداء تم منح عائلاتهم اراضى فى هذه المنطقة وقد كانت منح من رئيس الجمهورية

[تكس راجع]

#1313466 [حسن]
0.00/5 (0 صوت)

08-02-2015 11:28 AM
يا سيد جبره

انتو بتكتبو ليه ؟

عشان نضحك احنا!!

[حسن]

#1313438 [احمد عبدالله]
0.00/5 (0 صوت)

08-02-2015 10:49 AM
انظر في هذا الصدد برقية السفارة السعودية بالخرطوم والتي نشرت ضمن تسريبات ويكليكس الاخيرة عن وثائق وزارة الخارجية السعودية والتي اشار فيها السفير السعودي على وزارته عدم الاستجابة لطلب الدعم والشحدة التي قدمتها حكومة الانقاذ لتشييد المدينة الرياضية حيث ذكر ان فساد كبير يحيط بهذا المشروع ...

[احمد عبدالله]

#1313437 [مدحت عروة]
0.00/5 (0 صوت)

08-02-2015 10:49 AM
الله يجازى محنك يا ود جبرا مقال رهيب!!!
يا جماعة انا لمن اقول انه الحركة الاسلاموية السودانية قذرة وعاهرة وداعرة غلتان؟؟؟؟اقسم بالذى رفع السماء بغير عمد ترونها انى ما غلتان وكلامى مليون فى المية صاح!!!!!!!!

[مدحت عروة]

ردود على مدحت عروة
European Union [سودانية] 08-02-2015 01:35 PM
ياخوي قسمك مبرور تفووووووو علينا نحنا البنقرا لي جبرا عشان ننفس شيء من غضبنا


#1313383 [معجب بيك]
0.00/5 (0 صوت)

08-02-2015 09:40 AM
رئيسنا قاعد هواااااااااااان
والله لو فعلا هو عسكري صاح
ومرضع بالجندية صااااااااح
ومرضع رضاعة صااااح
اخلي الترقص بتاعوا
وامشي شايل عصايتو عدل
علي المدينة الرياضية
ما مشكلة بــ عوجة كرعينو ديل برضو رضيانين
والله السارق ليه اي سريقة
اعمل حسابوا مليون مرة
لكن المشكلة هو كاتليييين قلبو
واكتر حاجة اظن بقولوها ليه المستشارين
"" حقوا ي سعادتك تحول ملف المدينة الرياضية للقصر لاشرافك مباشرة ""
وشيخنا اقوم احولها ليك ويصدر قرار جمهوري
ولا اذا شايل عصايتوا البتهز بيها واتفنقل بيها دي ساي ومشي شاف موضوع شركة الاقطان ولا مشروع الجزيرة - قاعد كدا احركوا فيه شمال ويمين وانتظر في المساعدات من قطر ولا ايران ولا السعودية ولا من الحلبة ... والله لو كانت عند رئيسنا شجاعة النميري بس م كان جات للبلد دي حاجة
لكن المصيبة احصل فساد ولا قيامة اقوم اكتل ليك ضحكة من ضحكاتو المعروفة
ولا اجيبوا ليه وديدا ولا اخوه بتاع المسيار اقوم ارجع كم خطوة لوراء
والله ي بشيرنا لو انت فعلا بتحب الاسلام بس خلي السودان دا
تقوم تشيل عصايتك من الصباح بدري وتقعد تكش وتنبش في الوساخة العملتها كم وعشرين سنة ع الاقل الشعب احمد ليك عمل عملتو
بقولوا الرئيس والله كويس بس الحاشية معفنة
لكن استغفر الله منكم ومن عمايلكم
كلكم معفنين والحساب قادم لا محالة
لو ما السنة السنة البعديها
ولو ما البعيدها السنة الجاي
بس الحساب بجي

[معجب بيك]

#1313366 [عودة ديجانقو]
0.00/5 (0 صوت)

08-02-2015 09:18 AM
الحبوب جبره
أنا دائما ملاحظك ظالم حكومتنا الانقاذيه الرشيده..ده حسد ولا شنوو+وو؟

ياخى انت فى المدرسه مش درست الماده ولو نسيت اذكرك بأنه الماده تنشكح بالحراره وتتبربر بالبروره وبما ان ارض المدينه ماده انطبق عليها القانون.
أرض المدينه الرياضيه كما هى لم تنقص بوصه والمستثمرين أشتروا فقط زياده الارض الأنشكحت بالحراره...سيب الحسد وما تظلم أهل النعمه من المستثمرين.
تحياتى

[عودة ديجانقو]

#1313319 [جنو منو]
0.00/5 (0 صوت)

08-02-2015 08:35 AM
يعنى الوالى الجديد سوف لايجد ولا حته واحده يبيعها .. عشان كده شايف بطنو طامه
من قصة والى الخرطوم دى .. شايفو بدأ يهضرب ساكت .. لو عترت بغلة وشنو الماعارف
داك وأنا سوف أحكم مثل عمر بن الخطاب ..!!

[جنو منو]

#1313254 [كاسـترو عبدالحـمـيـد]
0.00/5 (0 صوت)

08-02-2015 04:44 AM
المفروض يلغوا منصب رئيس الجمهورية لأنه كل قرارته لا تحترم وبالتالى لا تنفذ . زى ما بيقولوا اذا اردت ان تتخلص من جريمة اعملوا ليها لجنة . وهذا يقودنا الى القول ايضا اذا اردت ان تشجع اى فاسد أو حرامى ليستولى على ميدان عام أو حديقة أو مبنى حكومى أو اراضى حكومية خلى رئيس الجمهورية يصدر بخصوصه أمر جمهورى .

[كاسـترو عبدالحـمـيـد]

#1313234 [التاج محمد احمد]
5.00/5 (1 صوت)

08-02-2015 02:35 AM
احلي شي اﻻقتراح اﻻخير ومفروض تعمل ليهو كسره ثابته وكم و+و+وووك عرروك

[التاج محمد احمد]

#1313221 [حكم]
5.00/5 (4 صوت)

08-02-2015 01:10 AM
باعوا الحتات كلها ؟؟

[حكم]

#1313183 [الدبابي]
0.00/5 (0 صوت)

08-01-2015 10:37 PM
والله البلد دي بس كلها عملاء تاني مافي جواب ولا حل لكن حق الحرام ما بينفع بيجيب المرض وسلامتكم يا رب

[الدبابي]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة