المقالات
السياسة
عودة إلى (لصوص الخرطوم)..!
عودة إلى (لصوص الخرطوم)..!
08-09-2015 10:41 AM

image

خروج:
* كاتب هذه السطور المتواضعة من (عشاق الشعر الفصيح والعامي) وليس من الناظمين المجيدين له؛ قال:
يا كافي البلا ويا حافظ المعمورهْ
من بلدٍ "حالها شين!" بالحصار مزروره
حاميها الحرامي ومعطّنة في التلاف والبورهْ
اسْتعلَى الكِضِب ركّ الضلال مُذ كسَّرو "السبّوره"!
لا شارع يكيل العين ولا فسحات ضاحكة زهوره
لا الصحة صاح لا "السد الوهم" وفــَّـرلو نورَه
الموية قاطعة وشاهِدَاْ الماسوره
ورغم المَطحنة اليوماتي؛ الدنيا جَت في الكوره
النص:
* ما يلي ليس بشعر نضج على "مناقد!" الفكرة والخيال واللغة؛ إنما سجع و"أنس عفوي" أخرجه واقع الحال؛ جمع بيني وبين المبدع متعدد المواهب طارق الأمين، وهو صاحب "بيت الفنون" الذي "شلَّعه" قباح السلطة في الخرطوم..!
ــ كيف لقبيح أن يحب مشتلاً للوعي والحُسن؟!
* طارق عنده حضور البديهة يماثل حضور ذلك النفير الشهير الجميل (عديل المدارس) حيث يعمل بيده الخضراء في تأهيل صروح التعليم ترميماً وتلويناً؛ متقدماً الشباب (العامل لوطنو وما داير ثواب)؛ ولطالما أفلح في رسم المسرّات على وجوه التلاميذ والأهالي، قبل سرور الحيطان الحزينة "الغبشاء" حين يرحمها الطلاء..!
* جمعني بطارق ما جمعني بشعراء وشاعرات أتحفونا بلمساتهم في (المجادعات!) بين هجاء وغزل..!
* النصوص ــ البسيطة ــ أدناه؛ كانت مجاراة بيني وبين ود الأمين في الأيام الفائتة.. أحببت أن أهديها إلى (قارئ) أوحشني؛ كما توحشنا طرقات السودان (الكيزاني) رغم المطر والأغنيات والناس..! وكما توحشنا (الراكوبة) حينما نغيب عن معاقرة سطور كتابها ومعلّقيها..!
* التحية إلى قراء وقارئات وكتاب وكاتبات في الخاطر دائماً.. ثم.. (للقارئ أفضال نراها بلا مزايدة!).. والخزي لتوابع السلطة أينما كانوا..!
* أتمنى أن تكون عودتنا خفيفة؛ في مقام (التسخينة) بالتعبير الدارجي.. والمشوار طويل جداً.
* هذه النصوص بما حملته من (إخوانيات!) أنشرها بناء على رغبة القلة الأعزاء (بكل صدق).. وهي (قطِع أخدَر) كما نقول..!
* البداية موجهة إلى السلطة الراهنة في السودان.. السلطة ربّة الإفك والإتجاه المُنحرِف المسمّى (المشروع الحضاري):
مشروعنا الحضاري متسامح شويهْ
ومشروعكم مكندك بالموت والأسيّه
مشروعنا الأغاني وشاي المغربيه
ومشروعكم جماجم ونيران داعشيهْ
(ود الأمين)
مشروع انحداري معمول للأذيهْ
لا بعرف حضارة ولا تهِمّو البريه
مشروع انتحاري والشعب الضحيه
بدل "بيت الفنون" ثكنة وبندقيه
(ود شبونة)
مرحب يا شبونة جر القوافي وزيد
وشوف كيفن صِبحنا وداخلين قبايل عيد
المشروع حضاري إلاّ الحضارة بعيد
والزمن انكشاري والساق دَرِبنا بليد
(ود الأمين)
شايف الزول دا قام لَىْ جنّو
وجن "العُقلا" مافي أجمل منو
متعنا طارق بى حلاوة فنو
نجاريهو في القافية ويوت يروينا دنو
(ود شبونة)
الجن يا شبونه انواع وكلّو بيان
جناً صاغوه ناس فرح الخليل رويان
ومتّعو فينا أجيالاً من امدرمان
وجناً من نيالا وكردفان وديان
وجناً من شرقنا وكسلا بورسودان
وجناً من شمالنا مع النخيل تريان
بس جناً يجينا يِقدِمُوْ الكيزان
أخير منّو القيامة ومنظر الشيطان
(ود الأمين)
الشيطان حليلو ما خلولو فرصَة وفرَقهْ
حاشاهو لا ذلّانا لا شالْ من خشُمْنا الطَرَقه
كيزان السجَم سَكّوهُ من غير سيوف أو دَرَقه
القيامة طالت.. راح البلد شمار في مَرَقه
(ود شبونة)
كل المصَايب جافله حتماً يا صديقي وجافله
مهما حِزِنّا ما بيفوتنا زمن القافله
لا تقول النفوس من المظالِم غافله
إلاّ فرِضنا بنصَلّيْ ونكمِّلو نافله
(ود الأمين)
طارق.. بعد صليت الفرِضْ والنافله
يا ستار عليك من عين الحسود السافله
شيّدت "العديل" رغم النفوس الجافله
لو الأمنيات جوّه البنوك القافله
نسحبْلك أماني ونشحَنِن في حافله
(ود شبونة)
فنان إنت يا صحفي وكريم زي حاتم
تفتش في الأسى وتلقى الظلم متراكم
كم جهجهنا أفكارو وصرعنا الحاكم
وكم حيرتهم إنتَ وكسبت محاكم
..........
زغردي يا حواري وقولي نضم الذات
عطشانين نضاري الدمعة بالضحكات
قنعانين غضب إلاّ الضمير ما مات
وعشمانين قريب نهَدِر نجِز الفات
(ود الأمين)
الفات ما بموت بأخوي واخوك وطول المُدّه
إلاّ علينا تنجيد العَشَم سواتو مخدّه
شدو العصب مطو الغضب هيَّاكُمْ نعِد العُدَهْ
لو ما اترصينا واتّحَدْ الرجال بالجِدّه
أقنعو من رحيل هذا "الحرامي" القِـدَّه
(ود شبونة)


تعليقات 22 | إهداء 0 | زيارات 6741

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1318596 [jafar]
0.00/5 (0 صوت)

08-10-2015 04:12 PM
فرحنا بطلتك الرائعة يا رائع جدا

[jafar]

#1318479 [إندستين]
0.00/5 (0 صوت)

08-10-2015 12:51 PM
ودشبونه سويته شينه. وانشا الله عافيه

[إندستين]

#1318459 [المستشار]
0.00/5 (0 صوت)

08-10-2015 12:20 PM
عموما بغض النظر عن ما كتب أعلاه ولكن والله الذى لا إله إلا هو فرحانيين بعودتك شد الفرح وإنشاءالله المانع كان خير وربنا مايحرمنا منك ومن كتاباتك الشجاعه والنابضه بحب الوطن

[المستشار]

#1318201 [سوداني انا]
0.00/5 (0 صوت)

08-10-2015 12:18 AM
حمدلله علي السلامة من بين انياب الدواعش العضا ...ونقول عودا حميدا لعازة ديل شبابك شدا..منهم شبوتة وطارق الامين بين العصار جدا هزا ...لي سيوف النضال والكرامة من جيبهم انسلا
ونواصل مشوار نصرة عازة

[سوداني انا]

#1318176 [حسن عوض]
4.50/5 (2 صوت)

08-09-2015 10:29 PM
عوداً حميداً .. والعود أحمد *** طال غيابك يا فارس الصحافة الأوحد ,

كل التحية لك و التقدير يا أستاذ عثمان شبونة , كما التحية و جل التقدير للأستاذ طارق الأمين على هذه (التسخينة) الأدبية الرائعة ..

الابيات التالية عجبتنى و قمت بنقلها الى هنا من الفيسبوك , صراحة لا أعرف من قائلها:

الليلة البلد نهبوها بالزندية ,
راقدة مقسمة بالكيمان حدود الميه ,

يا بلد الملاقيط الكُلهم شوارعية ,
لا خلّت حرامي لا كضاب عديم مسئولية ,
انعل ابو كل البسميك دولة اسلامية ,

دجال آخر الزمن الساكن المنشيه ,
يحرق فى البخور و ينافق صباح وعشيه ,

[حسن عوض]

ردود على حسن عوض
[المانجلك] 08-10-2015 11:48 AM
القصيدة للشاعر سيد احمد الحاردلو له الرحمة .
الحقيقة كلمة نهبوها ليست الكلمة الاصلية فى النص هناك كلمة اخرى
عودا حميدا شبونة


#1318174 [عمر محمد الحسن]
5.00/5 (1 صوت)

08-09-2015 10:25 PM
فرحنا برجعتك وبفرحة ناسك بيك..
حبابك وحباب ود الامين

[عمر محمد الحسن]

#1318096 [سوداني حر]
4.00/5 (2 صوت)

08-09-2015 06:55 PM
عودا حميدا ايها المناضل الجسور عبر الحروف لك التحية والتجله والتقدير وللرائع طارق الامين

[سوداني حر]

#1318069 [zhjan]
4.00/5 (1 صوت)

08-09-2015 05:45 PM
عودا حميدا

[zhjan]

#1318059 [حكومة مؤلمة]
5.00/5 (1 صوت)

08-09-2015 05:33 PM
التحية لود شبونة ارجو ان لا تنقطع من راكوبتنا الظليلة٠ الله يحفظك و يغتي عليك

[حكومة مؤلمة]

#1318019 [منير البدري]
5.00/5 (2 صوت)

08-09-2015 04:20 PM
ابو نبيل منووووور و الله عودا حميدا مستطااااااااااب
و التحية عبرك لطارق الامين الفنان

[منير البدري]

#1317999 [Mamado]
3.00/5 (2 صوت)

08-09-2015 03:47 PM
انت فين ياخي طولت الغيبة سيذكرني قومي اذا الخيل اقبلت
وفي الليلة الظلمـاء يفتقـد البـدر

[Mamado]

#1317986 [التمساح]
0.00/5 (0 صوت)

08-09-2015 03:19 PM
الأخ عثمان ,,, تحية حارة ولو سمحت اكتب لى جوال المبدع طارق الأمين على الراكوبة’’’شكرا للرائعين وسحقا لداعش السودان,,,,

[التمساح]

#1317985 [سيف الدين خواجه]
1.75/5 (3 صوت)

08-09-2015 03:18 PM
اولا حمد لله علي السلامه حفنا سؤالنا يكشف الحب الماخافي والجوه الجوف تظهره العيون من الخوابي وانت مشتول فينا زي زهر الروابي ...عبقك فريد دعاش رذاذ برقو عبادي هين ولين قلبا حلو ما بعرف يعادي .....شالع نورو ضو السهول لي غادي عاصر الوجعه المدده فوقنا حدادي مدادي ليك ولي طارق نمد قلوبنا حديقة قبل الايادي عودا حميدا كتلتنا القريفه ها زول وين انت ليك مدة ما بنت (بتصرف محمد احمد وابوسريع ود حسنين ) هذا وطن معطون بالحب والشجن !!!شكرالك

[سيف الدين خواجه]

#1317956 [رحال]
5.00/5 (1 صوت)

08-09-2015 02:46 PM
عودا حميداً يا رائع ... افتقدناك بشدة .

[رحال]

#1317951 [المندهش]
5.00/5 (1 صوت)

08-09-2015 02:38 PM
حمدالله على السلامه الحبيب شبونه وتحيه لأخوك ود الامين

[المندهش]

#1317945 [توفيق عمر]
0.00/5 (0 صوت)

08-09-2015 02:35 PM
مرحب بيكم
مشتاقين

[توفيق عمر]

#1317921 [julgam]
0.00/5 (0 صوت)

08-09-2015 02:08 PM
يارائع شفقتنا،،

[julgam]

#1317896 [جنو منو]
5.00/5 (1 صوت)

08-09-2015 01:37 PM
لكما التحيات المباركات .. ونحن الان بصدد برنامج الاصلاح الحكومى .. بعد 26 عاما
من الخراب .. تصلحوا شنو وتخلو شنو( شلعوها الابالسه)

[جنو منو]

#1317889 [ليدو]
5.00/5 (1 صوت)

08-09-2015 01:29 PM
حمداً لله على السلامة أيها المبدع عثمان شبونة ،، وحشنا قلمك يا رجل ،،
التحية للإنسان الجميل طارق ( اللمين ) .

[ليدو]

#1317863 [Abdo]
0.00/5 (0 صوت)

08-09-2015 01:00 PM
اوحشتنا إستعاذتك يا شبونه ، التحية لطارق الأمين من خلالك و لك وطني غيور صاحي الضمير .

[Abdo]

#1317857 [الطيب عبدالكافي]
5.00/5 (1 صوت)

08-09-2015 12:51 PM
التحية لطارق الامين وعثمان شبونة

[الطيب عبدالكافي]

#1317844 [متابع قرفان]
5.00/5 (1 صوت)

08-09-2015 12:29 PM
عثمان شبونة ... يا رائع .. حمد لله علي سلامتك ..يا راجل خفنا عليك ..التحية عبرك
للمبدع طارق الامين ..

[متابع قرفان]

ردود على متابع قرفان
[gogo] 08-10-2015 01:05 PM
welcome back Shaboona Osman


عثمان شبونة
عثمان شبونة

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة