يعني جاي يترجم؟
08-13-2015 01:46 PM


سألني قبل عدة أيام إبني (ناجي) الذي لم يبلغ الحلم بعد قائلاً :
– لو في زول يا بوي حفر ليهو بئر بترول ممكن يشيل البترول ويبقي حقو .
كان سؤاله مباغت مما أثار (إستغراشي) وهكذا أسئلة هذا الجيل العجيب ، إجبته :

– طبعن يا إبني مش ممكن لأنو البترول ده بتاع الشعب كووولو .. يعني أنا عندي فيهو نصيب وإنتا عندك فيهو نصيب وأي مواطن عندو فيهو نصيب ثم أضفت .. شوف يإبني أي حاجة تطلع من الأرض دي بتاعت الناس كووولها مافي حاجة ممكن الزول يشيلا وتبقي بتاعتو إلا السمك والحاجات الفي الموية دي (إلا يعملوا ليها جمارك) !!
– طيب يا بوي الناس البتمشي مناطق التعدين ويلقو الدهب ديل بيشيلوهو ليه ؟
وهنا إكتملت حالة (الإستغراش) ووجدت نفسي لا ألوى على شيئ ! فقلت له والله يا إبني فعلا سؤال وجيه !

تذكرت سؤال ولدنا (ناجي) وأنا أقرأ أن وزارة المعادن السودانية قد قامت بتوقيع اتفاقية مع أحدي الشركات الفرنسية نجحت بموجبه في الحصول علي مربع للتعدين عن الذهب بإحدى المناطق التي تقع بالولاية الشمالية.

ولم يكن هذا هو ما جعلنا نستغرش بل هو تواجد أحد (الشيوخ) المثيرين للجدل وحضوره التوقيع على هذه الإتفاقية علماً بانه لا يملك أي صفة حكومية مما يعني ضمناً أنه قد جاء مع الطاقم الفرنسي الذي يمثل الشركة !

وحيث أن إسم الشركة المكون من مقطعين أحدهما مأخوذ من إسم هذا (الشيخ) فهذا يعني بالضرورة أن الشركة تتبع له أو على أقل تقدير مساهم فيها .

نقيف هنا (ونبلع الحبة) عشان نسأل :
هل قامت وزارة المعادن السودانية بطرح عطاء للتعدين في المربع المذكور بحيث تقوم الوزارة بتترسية العطاء على الشركة ذات الإمكانيات الأكبر والأليات والأجهزة الأوفر والسعر الأقل وذات السمعة الطيبة في هذا المجال ! وللا القصة ذي قصة شركة (عارف) بتاعت البرسيم الجابوها (بدون عطاء) مساهمة في الخطوط الجوية السودانية ؟

وحتي لا نتهم الوزارة والقائمين على أمرها بتهمة (الفساد) والمحسوبية والتصرف في ثروات وممتلكات البلاد بصورة مخلة ضاربين بالمصلحة العامة عرض الحائط فالعبد لله وبما أن له في هذا الذهب (جعل) ونصيب يطالبهم بالرد على السؤال (الفوق) ده !

لفائدة القراء فإن هذا الشيخ الذي ظهر عند توقيع العقد بين (الحكومة) والشركة (الفرنسية) هو ذات الشيخ الذي سبق وتداولت الوسائط الإجتماعية من قبل خبرا بانه يحمل رسالة من (حكومة السودان) إلى أحد الرؤساء العرب مما حدا بالمسؤولين الحكوميين ليس بتكذيب الخبر (الموثق صورة وصوت) ولكن بتصحيحه حيث قالوا :
(الزول ده بس حضر التسليم) …. يعني جو (يكحلوها ) !!

عموما نحن لسنا معنيين أن ينقب شيوخ (الصوفية) في (الذهب) أو أن يبحثوا عن (الماس) أو أن يمتلكوا الطائرات والمنتجعات واليخوت ثم يجدوا بعد هذا الإنشغال (بالدنيا) وقتاً للتصوف والذكر والعبادة ولكن الذي يعنينا هو ألا تضيع مكتسبات وممتلكات هذا الشعب الصابر المحتسب فيجد إبننا (ناجي) والذين يأتون من بعده البلد (إتباعت) وما فضل فيها (أبو النوم) !!

عموما نحن في إنتظار صورة من العطاء الذي تم نشرة في (الغازيتة) الرسمية يا وزارة المعادن !! وإلا فأبشروا (بكسرة ثابتة) !!

كسرة :
يكون (الشيخ) جاء مع الطاقم الفرنسي (مترجم) ؟

• كسرة ثابتة (قديمة) :
• – أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و


تعليقات 27 | إهداء 0 | زيارات 8756

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1321672 [جنو منو]
0.00/5 (0 صوت)

08-16-2015 09:11 AM
سوف يطول انتظارك .. اكسر ساى من هسه ..!!

[جنو منو]

#1321356 [عبدالماجد قنديل]
0.00/5 (0 صوت)

08-15-2015 02:57 PM
هي شركة فرنسية والله روسية يا عم الفاتح جبرا ؟؟؟ظ

[عبدالماجد قنديل]

#1321338 [karbinto]
0.00/5 (0 صوت)

08-15-2015 02:26 PM
يا جبرا المنجم (المكان) بحتاج منجميين و حاشا شيوخنا يقبلوا
يعنى بدل المنجم (الشخص) جابوا اصحاب العلم اللدني
يعني شكلك كت دايرها لبله الغايب""

[karbinto]

#1320982 [ابو محمد]
0.00/5 (0 صوت)

08-14-2015 07:16 PM
كسرة شنو تاني .
أخبار ملف خط هيثرو العند النائب العام شنو (ووووووووووووك عليا)+(ووووووووووووك عليا)+ (ووووووووووووك عليا)+(ووووك عليا)+(و+و+و)+وك عليا.
قال كسرة تانية قال

[ابو محمد]

#1320878 [gornas]
0.00/5 (0 صوت)

08-14-2015 01:24 PM
استاذى الفاتح هذا الشيخ مثير ( للدجل )

[gornas]

#1320802 [حكم]
5.00/5 (1 صوت)

08-14-2015 09:02 AM
يا جبرا الشيخ بدل الستلايت عشان يعرف الحتات الفيها الدهب
وبدل الفيين لمعرفةالعمق ونسبة النقاء
بركاااااااتك

[حكم]

#1320770 [د. هشام]
5.00/5 (2 صوت)

08-14-2015 07:45 AM
أكيد ناجي و أخوانو من الشعب السوداني "حيلقو الحتات كلها باعوها"...ممكن يقدمو للخطة الإسكانية في تشاد!!

[د. هشام]

#1320748 [hamad]
5.00/5 (1 صوت)

08-14-2015 04:39 AM
مش دا هو بي زاااتو الشيخ القالوا عليهو(محايتو ببسي وحيرانو جكسي)

[hamad]

#1320706 [foiee]
5.00/5 (1 صوت)

08-14-2015 12:04 AM
المفروض الكسرة تكون وين الدهب زاتو لانو لا ظهر فى ميزانية ولا صورة تلفزيون تقول الرئيس بدقو غوايش و كراسى جابر لنسوانه

[foiee]

#1320634 [ود قلبا]
4.25/5 (3 صوت)

08-13-2015 07:53 PM
ياخوي الشغلانه واضحه الشركه دي شركه بين الفريق طه عثمان مدير مكتب التور الجخس و شيخ الامين

[ود قلبا]

#1320611 [بت ملوك النيل]
0.00/5 (0 صوت)

08-13-2015 07:01 PM
ده يكون الشيخ شيرو من share

[بت ملوك النيل]

#1320609 [الدرب الطويل]
4.88/5 (4 صوت)

08-13-2015 06:54 PM
اكيد يا جبرا لما ابنك ناجي ومن في عمره يبلغوا الحلم تكون ثروات الدهب كوولها سرقوها.. بعد ما الحتات كولها باعوها.. وآبار النفط شفطوها.. والثروة الحيوانية بشتنوها وحتى الإناث صدروها.. والمشاريع الزراعية نشفوها.. والسكك الحديدية فككوها.. والخطوط الجوية والبحرية في الدلالة سمسروها.. يعني ناجي واقرانه ما حيلقوا شيئ غير شوية خرابات تسمى سدود وجسور هو كل انجازات بني كوز خلال ربع قرن امتلكوا خلالها قصور وفارهات..

للمرحوم الساخر صلاح حمادة قصة طريفة عن قرية اسمها شلعوها الشفوت.. مشى بعض الصحافيين عشان يعملوا استطلاع لاكين لقوا الشفوت وما لقوا القرية.. ولما سألوهم قالوا ليهم انتو ما سمعتو انو انحنا شلعناها؟ وانتو ذاااتكم الليلة حنوريكم.. الصحفيين بقوا في اليحلهم الحلّا بلّه ما غايب (طبعن)..
اكيد صلاح حمادة كان قاصد دولة السودان الشلعوها الكيزان..

[الدرب الطويل]

#1320608 [abushihab]
5.00/5 (1 صوت)

08-13-2015 06:51 PM
والله يا احباب انا يا دوب عرفت كمال غبد اللطيف بكي ليه لما فنشوه.

[abushihab]

#1320607 [الطيب]
0.00/5 (0 صوت)

08-13-2015 06:46 PM
"وتصدى ولد الشيخ وترجم" كما قال الكابلي. إلا تكزن ترجمة صوفية.

[الطيب]

#1320602 [جبرا شيخ الامين بسخطك!]
3.00/5 (4 صوت)

08-13-2015 06:33 PM
شيخ الامين الان السودان في يدو
يلعب لعبة عسكر وحراميه مع الكيزان
هم يستغلونه للغطاء وهو يستغلهم للانتشار
وبينهم البلد ضايعه!


وكلو وع
هم في وهم

[جبرا شيخ الامين بسخطك!]

#1320593 [البعير]
0.00/5 (0 صوت)

08-13-2015 06:08 PM
الاستاذ الفاتح جبرة جيل أبنك ناجي والجيل البعده حايلقي الحتات كلها باعوها ( الحتات دى من تصريحات وزير الدفاع بالنظر بعد مابقي والي )

[البعير]

#1320537 [Abdo]
0.00/5 (0 صوت)

08-13-2015 04:21 PM
كان تبدأ الكسرة من أسي و أقترحها ليك كما يلي ( يكون (الشيخ) جاء مع الطاقم الفرنسي (مترجم) و الا شنو ؟
و أبشري يا واوات بطول التسلسل .

[Abdo]

#1320510 [مصطفي سعيد]
0.00/5 (0 صوت)

08-13-2015 03:44 PM
ياخي اديني علبة الحبوب كلها وارتاح

[مصطفي سعيد]

#1320491 [رحمة]
0.00/5 (0 صوت)

08-13-2015 03:09 PM
أستاذ جبرا احنا كل ده ناقشينوا وعارفينه، حس لازمة تذكرنا شنو ونحن دواء الضغط مافى فى السوق !

[رحمة]

#1320489 [معجب بيك]
5.00/5 (2 صوت)

08-13-2015 03:01 PM
هو مترجم ساي
دا مترجم من نوع خاص
بس الله استر ما يكون شايلو
قزازة عرقي معاه
اقصد ببسي
بعدين ف حاجة ي جبرا
في مثل معروف بقول ليك
لو تخاصم اللصان ظهر المسروق
وهسه ناس الحكومة والمعادن والشيخ
لسه حالتهم م سرقوا
في راي ظهر المسروق
عشان ربنا بحب عبادو المنكوبين من
هؤلاء الحرامية
---
بعدين اي انسان عادي متلقي بعرف الحاصل
بعدين دكتورنا الهمام صابون
متعة الله بالصحة والعافية
صبنها ليهم تمام التمام
بس باقي ليهم الحلاقة بس
---
بعدين عشان تعرف تضارب الكلام
مرة الوزارة تقول حاجة
واسكتوها صم بكم عمي
والمستثمر اقول حاجة غير
بس لو الدكتور صابون نفض
ما عنده ليكون اللعب علي المكشوف
وهناك اخرين في السودان في اياديهم الكثير
عن هذه الشركة ومنتظرين الفرصة
زي م قلت ي جبرا شركة ماسورة زي شركة عارف
بس دي والله شركة ماسورة
وحا تلحق البلد امات طه

[معجب بيك]

#1320476 [سوداني الهوي]
5.00/5 (2 صوت)

08-13-2015 02:50 PM
هذا الشيخ خصص له زمن غالي جداً ضمن خارطة برامج عيد الفطر المبارك السابق ... في ماذا؟؟؟ الله اعلم... محن سودانية او كما قال استاذنا شوقي بدري.

[سوداني الهوي]

#1320467 [أبو محمد الأصلي]
0.00/5 (0 صوت)

08-13-2015 02:42 PM
لا وانت الصادق يا استاذ جبرة الشيخ ده جا حازمها يعني غسيل اموال وكده مشي حالك اي واحد في البلد بقى بتاع كله .

كسرة:

يا مصطفى عثمان شحاتين اخبار الاستنكاح قصدي الاستثمار شنو .

[أبو محمد الأصلي]

#1320451 [واحد تاني]
0.00/5 (0 صوت)

08-13-2015 02:20 PM
سؤال ناجي الاخير يحتاج لأجابة من وزير المعادن ....؟

[واحد تاني]

ردود على واحد تاني
[ashshafokhallo] 08-14-2015 05:45 PM
استازنا جبرا سمي ولدو ناجي باعتبار ما سيكون ودا طبعن قمه التفاؤل كما قال الشاعر:
سميته يحيي ليحيي

يعني
سميته ناجي لينجو
(بعد الانقاز ...وكدا


#1320449 [ابوبكر]
0.00/5 (0 صوت)

08-13-2015 02:17 PM
لا يا استاذ الشيخ جاي منجم (كذب المنجمون ولو صدقو)

[ابوبكر]

#1320444 [Abushazaliya]
5.00/5 (1 صوت)

08-13-2015 02:07 PM
كسرة :
وجه الرئيس بتقديم مخالفي الارنيك الالكتروني للمحاكمات.

كسرة:
بداء مريخ الفاشر في الفشل لان الوالي كبر غادر الولاية.
كسرة كبيرة :
هو الشيخ بتاعكم دة ماشيخ لله بس اسم ساي ذي ناسنا دة بقول هم اسلاميين ولكن برضو اسم ساي ما تحملوا الناس بصفات قالوها بس مجرد يقول انا حامي هو ما حرامي بس عاجبو الاسم بتاع اللص دة.

[Abushazaliya]

#1320433 [أبوأسامة المهاجر]
0.00/5 (0 صوت)

08-13-2015 01:56 PM
مقال رائع من الأستاذ المبدع الفاتح جبرا

[أبوأسامة المهاجر]

#1320432 [على ادريس]
0.00/5 (0 صوت)

08-13-2015 01:56 PM
من من من خو الشيخ ؟

[على ادريس]

ردود على على ادريس
[ashshafokhallo] 08-14-2015 05:48 PM
يا مد الريس عاوز تودي جبرا في ستين داهيه؟


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة