بنك الخروف
08-18-2015 04:27 PM

نقترب يوماً بعد يوم من (عيد الأضحية) وما أدراك ما الأضحية التي أصبح يشكل شراؤها بالنسبة للمواطن مشكلة (عويصة) في ظل الارتفاع غير المبرر في أسعار الخراف في بلد لديه ما لديه من مراع ومياه ووزارة للثروة الحيوانية .
ما أن يقترب العيد حتي يطالعنا ذلك البيان الذي تصدره (هيئة علماء السودان) وهو بيان من قبيل رفع الحرج والإحراج عن ما آل إليه حال البلاد والعباد (في ظل المشروع الحضاري) والمسغبة التي حلت بمعظم أهل البلاد .
ذلك البيان يشرح فيه (علماء الهيئة) للمواطنين جواز (الاستدانة) و(الأقساط) والما عارف أيه أصبح هذا البيان شيئاً مملاً ومكرراً يحفظه حتى الأطفال الغرض منه تطييب خاطر (المواطن) الغلبان ورفع الحرج عنه .
علماؤنا الأماجد يفتتحون (بيانهم السنوي هذا) بجواز الاستدانة ويختتمونه بأن الأضحية لا تجب على من لا يستطيع شراءها وكان الأجدر ان تكون الآية معكوسة بحيث يستفتحون البيان بعدم الوجوب ويختتمونه بجواز الاستدانة علماً بان من يستدين هو الفقير الذي لا يستطيع شراءها ولكن يبدو أنه فقه (المخارجة) !
طالما إنو مسألة عدم المقدرة على شراء الخروف دي بتتكرر كل عام بالنسبة لكل (أهلنا الغبش) فالعبد لله عندو فكرة جهنمية تريح العلماء من الفتاوى السنوية (المفصلة بالمقاس) كما تريح المواطنين من هذا العبء الثقيل والفكرة نهديها إلى (حكومتنا الرشيدة) وهي إنشاء (بنك الخروف) .. حيث يقوم المواطن بالتسجيل والاشتراك في هذا البنك مع إعطاء رقم موبايله الذي سوف يحول منه الرصيد (واحد جنيه يومياً) لأرقام البنك التى يعلن عنها ، يقوم البنك بتشغيل ما يتلقاه من أموال المشتركين خلال العام ثم عندما تقترب (الأضحية) يتم توزيع الأرباح إضافة إلى مبلغ الـ 360 جنيه (تقريباً) الذي قام المواطن بدفعه وبذلك يستطيع المواطن أن (يضحي) !! وأن ترتاح هيئة علماء السودان من إصدار تلك الفتوى السنوية (المهادنة) !
من مميزات هذه الفكرة إنو مبلغ جنيه يومياً ممكن (مجازفتو) بسهولة وممكن كمان لو وقعت في أيدك عشرة عشرين جنيه ما محتاج ليهم ترسلهم (للبنك) وترتاح ليك كم يوم كده .. وكمان ميزة تانية هي إنو القائمين على أمر (بنك الخروف) سيقومون بالشراء بالجملة وأكيد الأسعار ح تكون أقل ، وميزة تالتة هي إنو ممكن الأرباح (لو القروش إشتغلت كويس) تكون أكبر من تمن الخروف وعلى كده تضمن تطلع حق الزيت والفحم والبهارات والرغيف والضباح ذاااتو.
على ذات نهج (بنك الخروف) يمكن إنشاء (بنك التعليم) للإيفاء بأقساط المدارس والجامعات وبنك (إيجار البيت) عشان ما يجدعوا ليك عفشك في الشارع وبنك (الدواء) عشان تشتري كوتة الأدوية المزمنة سنويا خاصة والأدوية بقت كل يوم أسعارا بتزيد (مع إنها مضروبة) وبنك (الخريف) لعمل الترميمات قبل الخريف وبرضو ممكن (بنك الزواج) على الأقل تقدر تطلع حق (تصوير الفيديو) ، وبنك (النفاس) عشان تقدر تدفع (حق الدايات) وكده وبنك (الطهور) عشان تقدر تطهر الأولاد .. بس المشكلة إنو لو المواطن اشترك في البنوك الفوق دي كوووولها عاوز ليهو يومياً خمسين جنيه تحويل رصيد !! عشان كده خلونا هسه في (بنك الخروف) ده !
ولو الفكرة عجبت (أمنا الحكومة) حقو تبدأ في تنفيذها بعد العيد طوالي وتقوم بتسجيل البنك وتعيين أعضاء مجلس الإدارة والمدير العام ونواب المدير العام ومديري الأقسام ثم تبدأ في تأجير الموقع وشراء العربات والمكاتب والستائر والموكيت والأثاثات والكوندشنات وكان السنة الجاية (ضحيتو) دي دقني .. !!
كسرة : 
نحنا عاوزين لينا بنك (للصبر)
• كسرة ثابتة (قديمة) :
• - أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و


تعليقات 18 | إهداء 0 | زيارات 7114

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1324744 [الحباباوي]
0.00/5 (0 صوت)

08-21-2015 08:42 AM
الاستاذ المكرم الفاتح جبرا سلمه الله

كما هديت لهذه الأفكار النيرة التي تمكن لأهل التمكين أتمنى أن تكون سجلت ضمن الملكية الفكريةلشخصكم الكريم حتى لا تضيع الحقوق .

[الحباباوي]

#1324378 [صديق الشيخ حمد النيل]
5.00/5 (1 صوت)

08-20-2015 01:52 PM
طالما جبتم سيرة الخروف فأحكى ليكم حكاية من ذات الصياغ ...لدى خال من مواطنى مدينة رفاعة يحسن التدبير فكل عام يقوم بشراء حميل 5-6 أشهر قبل الأضحيةويتورته(يسمنه) حتى إذا حل عيد الأضحية فهو ذبح عظيم ...رأى أحد ساكنى الحى أن يقلده فقام هو الآخر بشراء حميل وأخذ يسمنه ويمرح معه حتى نمت بينهما صداقة حتى وإن الحميل وفى وقت لآحق الخروف كان يصحيه من النوم ...فقال لى خالى يوم الوقفة رأيت ذلك المقلد ذاهب بخروفه وقد إكتنز لحماً الى السوق فسألته لماذا تود بيعه ..فأجاب لا أستطيع ذبحه فهو يصعب علىَ إذ أصبح صديقاً لى .... أصلوا الولف قتَال

[صديق الشيخ حمد النيل]

#1324177 [Nader]
5.00/5 (1 صوت)

08-20-2015 09:33 AM
يا ود جبرا كدى خليك من بنك الخروف هسى وشوف لينا حل لل بقوا اتاجروا بنساء البلد وارسلوهن خادمات دى كارثه

[Nader]

#1324171 [راجى الفرج]
5.00/5 (1 صوت)

08-20-2015 09:25 AM
الى الاستاذ الفاتح سلام
فى ماليزيا مؤسسات الحج اذا عايز تحج اول ما تشتغل تمش تسجل هنالك استقطاع شهرى ومن اول يوم سجلت انت عارف انو فى سنت كدا سوف تحج وما عليك الا تجيب شنطة ملابسك وتجى لكن ماعندهم شياطين واباليس زى بتاعننا ديل يعن الفكرة موجودة فى العالم وطبقة كسرة واحد من جماعتنا سرق ليهو خروف ليلة العيد مرتو قالت ليهو مالنا مضحين بخروف مسروق قال ليها الجابوه لاسماعيل اشتروه ليهو من وين ودا فقه حكامنا

[راجى الفرج]

#1324009 [الدبابي]
5.00/5 (1 صوت)

08-19-2015 11:35 PM
من حسا اتلموا مجموعات خرفان صغيرة

[الدبابي]

#1323920 [قرفان]
5.00/5 (1 صوت)

08-19-2015 07:06 PM
اعمل حسابك يا جبرة
الناس ديل بلحقوك امات طه ويقولو لينا حادث لأانو قطع الأشارة

[قرفان]

#1323747 [المظلوم]
5.00/5 (1 صوت)

08-19-2015 12:34 PM
المساكين ماعايزين خروف ضحية عايزة تضحية من أجل الخلاص.

[المظلوم]

#1323744 [جملون]
0.00/5 (0 صوت)

08-19-2015 12:33 PM
استاذنا الفاتح جبرا لك الف تحيه وانا من المعجبين بكتاباتك بس اليوم الموضوع مش ولا بد .
معذره يا استاذ دا رأى فرد

[جملون]

#1323716 [سؤال برئ]
5.00/5 (1 صوت)

08-19-2015 11:52 AM
وبنك الصبر ده عاوز تحويل رصيد كم في اليوم يا استاذ؟

[سؤال برئ]

#1323680 [nasr]
5.00/5 (1 صوت)

08-19-2015 11:10 AM
ماهى واحدة من الانين ياضحية ياكلام غى التلغون........اذا تنزل الرصيد وتحوله طوالى مافى كلام فارغ وونسة وكدة .........اقتراح جميللكن أبعدوه من مكتب الوالى

[nasr]

#1323612 [ابو سحر]
0.00/5 (0 صوت)

08-19-2015 09:47 AM
Hاصلوا كان انت عارف النتيجة
تعيين أعضاء مجلس الإدارة والمدير العام ونواب المدير العام ومديري الأقسام ثم تبدأ في تأجير الموقع وشراء العربات والمكاتب والستائر والموكيت والأثاثات والكوندشنات

ليه مضيع وقتنا في افكارك الما حتنجح دي
شنو كل حاجة بنك
والحكومة قاعدة ليه ما تروح في ستين داهية؟؟؟؟؟؟؟؟؟؟؟؟

[ابو سحر]

#1323603 [غبور]
4.50/5 (2 صوت)

08-19-2015 09:38 AM
شكرا استاذ الفاتح والله فكرتك جهنمية على المواظن الغلبان والله انا خايف ناس الحكومة ينفذها.ههههههه

[غبور]

#1323542 [أبوقرجة]
5.00/5 (1 صوت)

08-19-2015 08:22 AM
شنو يا الفاتح جبره عايز تفتح لناس الحكومه طريق جديد للعضه... طيب لو أتعمل البنك دا ... أول حاجه تأجير مبنى فخم في حي فخم... تأثيث المكان بأحدث الموبيله... سيارات فخمه لناس البنك من المدير إلى الغفير... يعني كده البختوها الناس كلها في البنك على الخروف بتضيع ... تبقى لا ضحيه والناس خسرت قروشها.. يعني موت وخراب ديار..

[أبوقرجة]

#1323386 [أبو طلال]
5.00/5 (3 صوت)

08-18-2015 08:31 PM
أستاذ الفاتح متعك الله بالصحة والعافية
دقنك دى تحوق وين والا وين ....والا نسوى ليها صندوق

[أبو طلال]

#1323381 [فتح الرحمن السر]
4.50/5 (3 صوت)

08-18-2015 08:20 PM
وكان السنة الجاية (ضحيتو) دي دقني .. !!

شكيب محنك يا ود جبرا
بعدين الجماعة ديل قاعدين للسنة الجاية بعد ان وصلت سكرات الموت و الغرغرة

[فتح الرحمن السر]

#1323362 [عبدالواحد المستغرب اشد الإستغراب!!]
5.00/5 (1 صوت)

08-18-2015 07:50 PM
يبدو أن اخانا ود جبرا كان (قادى حساب)أيام الطلب وعايز يقرق الشعب السودانى في ديون لجنى جنى جتى جنى جنى جنياته وكأن ما يفعله النظام مع الدائنين عابرى القارات ما كفاهم شى قطر شى السعوديه شى البنك الدولى وهلم جر..!! يا جبرا الخروف ب1500جنيه بالجديد طبعن ده إذا ما طراء اى جديد وخاصة بعد (ارتفاع الدولار لعشره جنيه)والسنه فيها 365 يوم إذا كانت السنه ما كبيسه وسيادتك بتقول ندفع كل يوم (لحلوح واحد في اليوم !!) يعنى 365لحلوح في السنه وقطعا البنك حيرحل الفرق زائد الأرباح للسنه التانيه وكما نعلم أن عيد الضحيه بيجى في السنه مره ولن نقول بأنه يمكن أن يتكرر ليأتى في السنه الميلاديه مرتين وده جائز!! وبالحاله الشايفنها التي لن تتبدل ولن تتغير البته حسب بله الغائب نحن سنحتاج لخروف آخر في السنه الجديده لتتراكم علينا الديون عاما بعد عام وإذا ربنا إفتكرنا وريحنا من الدنيا سوف نورث الأبناء ديون لا قبل لهم بها ولا على عشرات الأجيال القادمه ده إذا بقت في أجيال قادمه أصلا!!وانا على يقين بأن المقدر للسودانين (الانقراض) في بحر عقد او عقدين على الآكثر !! يا جبرا بناءا على ما تقدم فأنا ارفض الفكره من أساسها واطلب من إخوتى الزملاء التضامن معى وخاصة النظام مثل هذه الأفكار تطربه وتعجبه لانها تشغل بال المواطن وتجعله يفكر في كيفية المخارجه من الفخ !!الظاهر عليك يا ود جبره نويت تورطنا ورطه سودا المنيله بستين نيله.. والله اعلم ،،

[عبدالواحد المستغرب اشد الإستغراب!!]

ردود على عبدالواحد المستغرب اشد الإستغراب!!
[julgam] 08-19-2015 05:33 AM
أخوى عبد الواحد المستغرش لا تستغرب بل إستغرش ،فود جبرا حسب الفتاوى المذكوره من علماء دينهم :الماقادر مايضحى ،وكمان ما سمعت بالأضحيه الجماعيه أو المشتركه ،فما دام خروفك دا بى 1500 لحلوح ،إتلحلح شويه وإشترك مع إثنين من فقراء الصفه اللى جنبك وضحوا بخروف واحد ،ويوم القيامه فى ليها ألف فرج ياالخروف قدر يشيلكم لتركبوا عليه كووولكم أو ثلاثتكم ،أو واحد ركب عليه وعبر،take it easy ,ود جبرا دا ماقادى حساب ولا دك يوم حصه،بس إستغراش ساكت،


#1323344 [انقاذي سادر في فساده]
4.50/5 (3 صوت)

08-18-2015 06:48 PM
ولا تنسى فاعل الخير الذي تبرع بكميات هائلة من الدولارات بعد قام بطلانها بسم قاتل الى جمعية خيرية حكومية لتوزيعها على الفقراء فمات ستة وزراء اتحاديين وعشرة وزراء دولة وثلاثة ولاة ومائة معتمد ولم يمت اي فقير

[انقاذي سادر في فساده]

ردود على انقاذي سادر في فساده
United States [ياسر هاشم] 08-19-2015 08:06 PM
استاذنا الله لا استيعد الجماعة يتبنوا فكرتك ويطبقوها وتكون مصدر سف اسلمي جديد ويبدو لي الجماعة دول عرفوا انو مسألة الحساب يوم القيامة هذه قصة نؤمن بها نحن فقط ولا ايه الرأي


#1323313 [ابو جاكومه]
5.00/5 (1 صوت)

08-18-2015 05:33 PM
يا الفاتح جبرا اذا احد المتأسلمين (والذي عين مدير للبنك ) شفط كوووول فلوس بنك الخروف وهذه السرقه مؤكده 1000000 في ال100 واتى المراجع العام وأثبت هذه السرقه فكيف لنا نحن المغفلين ان نضحي في عهد صحابة الريس عمر الكذاب .فقد ذكر احد الكتاب المجيدين ان الكذب والخسه والنفاق مصدر رزقهم الذي قسمه الله لهم .ومن هو الانسان المغفل الذي يعطي فلوسه للحرامي لكي يحرسها وينميها له فاعضاء الحكومه بجلالة قدرهم لا يودعون فلوسهم التي نهبوها من قوت وعرق الغلابه في هذه البنوك بل يودعونها في بنوك دبي وماليزيا وامريكيا وبريطانيا .

[ابو جاكومه]

ردود على ابو جاكومه
[adam] 09-18-2015 11:48 AM
أحسن الظن يا أخي عزين النضحي في العام القدم

[سيد الرواكيب] 08-19-2015 12:13 PM
ود جبرا لعبتك حلوه عايز تزيد الكيزان حطب في النار عارفهم بسرقوها!!!!
بس ابعد مننا نحن الشعب الفضل كان الله قدرنا بنضحي وكان ماقدرنا هو كريم علينا
الليله الصنف بتاعك سمح
اقسم ياجبان!


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة