ثور الساقية !!
08-24-2015 09:35 AM



*واجهت نفسي بسؤال عجيب مساء البارحة..
*ما الذي بقي من كلام في السياسة لم نقله حتى الآن؟..
*سواء شخصي أو الذين يُصنفون في خانة (الضد)؟..
*وهمست لي نفسي - سريعاً- بإجابة أشد عجباً..
*لم يبق هنالك شيء (خالص) ليُقال سوى ترصد (هدايا) المسؤولين..
*وحتى هذه لا تخلو من تكرار ممل ذي شبيه له بين ثنايا الأرشيف..
*أرشيف الصحف أو مواقع التواصل أو أثير (الونسات)..
*أرشيف عمره (26) عاماً من الهجوم المتواصل على الإنقاذ..
*ثم لا شيء من ذلكم كله نجح في إيقاظ الشعب من سبات (خنوعه)..
*فقط (ولولات) على المواقع الإسفيرية بأسماء مستعارة..
*وأعني بالهدايا أن يصحو الواحد منا من نومه ليبحث عن (شيء) يكتب فيه..
*ثم يجد هدية من نمر - مثلاً- عن مصارف الخريف والعاصمة تغرف في (شبر موية)..
*أو من إيلا عن فضائية (مهرجانات) عوضاً عن بحث أزمة مشروع الجزيرة..
*أو من عصام البشير عن ضرورة محاربة الفساد مع وجود (بدعة الحصانات!!)..
*أو من الصادق المهدي عن قول الشيء ونقيضه في آنٍ واحد..
*ثم يشرع في (كلام) سبق أن قيل ألف مرة من قبل..
*ما من جديد - بالمرة - في كل الذي نكتب على الصعيد السياسي..
*وحين يحاول أحدنا (تحويل الموجة)- كسراً للرتابة- يسمع عبارات الاحتجاج..
*فالحديث عن الرياضة (ترف) وعن الفن (زوغان) وعن الماضي (هروب)..
*فقط ما عليك فعله هو الدوران - كثور الساقية - إلى ما لانهاية..
*وليتها كانت ساقية ذات نفع وإنما هي مثل (ساقية جحا)..
*ثم عندما تسقط بفعل (ضربة شمس!) لا أحد يلتفت إليك..
*فالثيران كثيرة - بحمد الله - وهي تواصل عملها (من النهر للنهر)..
*وبعض من هذه الثيران صار الدوران (في الفاضي) غاية لها..
*غاية وليس وسيلة تهدف لإزاحة النظام من أجل سواد عيون المعارضة..
*فهي تعلم أنه ما من (عضةٍّ !) لها مع الإنقاذ أو المعارضة على حد سواء..
*ولكن يكفيها فقط من (التصفيق) ما هو بمثابة (العلوق)..
*وعليه فإنني ثور الساقية - كاتب هذه السطور- قررت التمرد..
*التمرد على (السجن) الذي يريد أن يحبسني فيه (المرطبون) بالخارج..
*ولا أعني أنني سوف (أرطب) مثلهم وإنما فقط أريد أن أشعر بـ(حلاوة) التغيير..
*أريد أن أشعر بأنني كاتب (حر) ولست (مقيداً!)..
*فأنا حزبي هو (الحرية) وليس الشيوعي أو الاتحادي أو الأمة..
*ولـ أكن (ثور الله في برسيمه!!).


الصيحة/السياسي


تعليقات 19 | إهداء 0 | زيارات 5062

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1328574 [Fatima]
0.00/5 (0 صوت)

08-26-2015 06:52 PM
يا عووضة خلينا من البنطال واضنين الحمار , وتكلم لينا في القمح والدقيق ,وسيقا وويتا دا المهم ..

[Fatima]

#1328411 [محمد علي]
0.00/5 (0 صوت)

08-26-2015 02:38 PM
دا اسمه متلازمة الصيحه تلحق حسن

[محمد علي]

#1327445 [ابوالشوش]
4.00/5 (1 صوت)

08-25-2015 10:59 AM
ههههههههههههههه مبالغة يا ابوصلاح ( التغيير مهم و مفيد برضو )

[ابوالشوش]

#1327337 [جنو منو]
0.00/5 (0 صوت)

08-25-2015 09:23 AM
وايضا ل أكن تيس الخليفه فى مزرعى الحلفاوى ..!!

[جنو منو]

#1327187 [Magdi Ali]
0.00/5 (0 صوت)

08-25-2015 05:12 AM
هذا النوع من الكتابة يا عووضة بدأ يكتبه الصحفى المستوزر الجديد حسن ، أظنك فى الطريق خاصة وانك مثله سبق وان دخلت مجلس الصحافة

[Magdi Ali]

#1327110 [الدرب الطويل]
4.00/5 (2 صوت)

08-25-2015 12:10 AM
هل هذا بسبب مقالك مولانا ذات البنطلون؟؟.. انا اعتبر ان فيه خلط فهم وتهكم في غير محله..

اخي ود عووضة لك كل الإحترام في كل ما تكتب.. فقط تذكر ان قلمك قد يكون موجّه للرأي العام وناشر للوعي بين من يبحثون عنه..

[الدرب الطويل]

#1327091 [ادروب]
0.00/5 (0 صوت)

08-24-2015 11:07 PM
ما دام ما عايز تكون تور الله في ساقيته , كون تور الله الانطح ...

[ادروب]

#1327062 [عبدالواحد المستغرب اشد الإستغراب!!]
0.00/5 (0 صوت)

08-24-2015 10:06 PM
انت الخلاك تهبش السنيوره شنو ؟!! انت بتفتكر هبيشك للصحفيات هي الحتكسر الرتابه ؟!! تكرارك لكتاباتك هي البتسبب ليك الملل وتحسسك بالرتابه ؟!! وبالنسبه لمحاولة إظهارك بأنك اديت واجبك كصحفى معارض لمدة 26سنه وتدى نفسك حق التهكم على الشعب وتصفه بأنه شعب (خانع!!)لانك لم تصل لنتيجه أمال نحن ليه ما شايفين إذا قلنا صحفيين عدد مقدر منهم يفوقونك خبره مازالوا على مواقفهم سوى داخل البلد او خارجه ولم يرفعوا الراية البيضاء زى ما عايز تعمل سيادتك !! وإذا قلنا سياسيين ماعندك الصادق المهدى ومجموعتو ومولانا الميرغنى ومجموعتو قضو زهرات شبابهم وكهولتهم والتحق بهم الترابى وزمرته وكأن الأصل أن يعيشوا ويموتوا وهم قابضين جمر المعارضه ولم يحسو بالملل ولم تغشاهم الرتابه وبالعكس ربما تحس بأنهم في غاية السعاده!! وإذا قلنا الفنانين ما ياهو محمد الأمين ربنا يديه الصحه ما زال يلعلع ولم يزهج !! وختاما هل هجومك الغير لائق على زميلاتك دون زملائك بيبدد الملل ويكسر الرتابه من وجهة نظرك ؟!! اركز يا ود عووضه وانا شامى والله اعلم ريحة (بمبونايه) مقدمه ليك من تلقاءالنظام وربما الخاطره السطرتها دى مؤشر الى ركضط من النقطه A الى النقطه B فى خط نظام الإنقاذ الغير مستقيم ولسان حالك يقول أنتم السابقون ونحن الاحقون!!!!.

[عبدالواحد المستغرب اشد الإستغراب!!]

#1327037 [عصمتووف]
0.00/5 (0 صوت)

08-24-2015 08:57 PM
اجمع حصيلة ال26 عام وحولها للاستاذ محمد الامين ليقوم ب تلحينها لنا اهو كسر للرتابة والملل جدد نفوسنا نحن ايضا مللنا الحديث والكتابة الدائرية والمعاد تدويرها

[عصمتووف]

#1326938 [Wad alfa7al]
0.00/5 (0 صوت)

08-24-2015 05:09 PM
ده أحلي مقال لأنيس منصور السودان ..لسه ما زهجنا من موضوع بنطلون لبني ..انا رأي كل يوم تكتب عنه ..مقال عن الجيب اليمين المقال البعده يساري البعده عن الحزام وهكذا ..ما تحرمنا من ابداعك يا عزيز
بالمناسبة لبني الحسين صحفية عظيمة وشجاعة بي بنطلون او عريانة ...ده مجرد رأي ما تزعل

[Wad alfa7al]

#1326924 [julgam]
0.00/5 (0 صوت)

08-24-2015 04:51 PM
ياود عووضه إنت ما اتحررت عندما كتبت عن مولانا ذات الطرحه أو التنوره،،لكن الترطيبه أو العضه مافى ليها مجال أبدآ ،خليك فى حالك،،،

[julgam]

#1326830 [الطاهر النقر]
4.75/5 (3 صوت)

08-24-2015 02:14 PM
الاستاذ صلاح

لك التحية وانت تقرر التمرد على المعتاد

وفي الاخر كل حركة (عقلية) معاها بركة (تمرد).

لكن احذرك تحذير شديد اللهجة من ان يفضي بك التمرد الي

وزارة الحكم المحلي

[الطاهر النقر]

#1326762 [kentoona]
5.00/5 (1 صوت)

08-24-2015 01:02 PM
عوووووووووضة
مقالك عن موضوع لبنى خصم كل رصيدك لدى الناس
.

[kentoona]

#1326690 [hudhud]
5.00/5 (1 صوت)

08-24-2015 11:36 AM
ههههههههههههههههه يعني عايز تبقى مؤتمر وطني يا زول قشة ما تعتر ليك ، الذين بالخارج متى كانوا مرطبين يا هذا ، على كل حال كلامك واضح

[hudhud]

#1326670 [ابراهيم1£2]
0.00/5 (0 صوت)

08-24-2015 11:14 AM
هلْ غادرَ الشُّعراءُ منْ متردَّم أم هلْ عرفتَ الدارَ بعدَ توهمِ
سبقك عنترة بهذا القول ولكنه اتي بقصيده صارت من المعلقات ، هل يمكن ان نري معلقة صحفية لصلاح عووضة

[ابراهيم1£2]

#1326632 [سودانية]
5.00/5 (2 صوت)

08-24-2015 10:31 AM
المعارضة عايزة عضة... والحكومة عايزة عضة ...والشعب عايز عضة...حتي الصحفيين قالو ح نتمرد كان مالقينا عضة ..
ياعالم هي البلد دي فضل فيها حتة تتعض!!!!
الصحافة الحرة النزيهة -مش الصحافة الصفراء وشغل المكاواة وكسير المقاديف والتلج -الصحافة ذات المنهجية والمهنية العالية الان سلطة اولي وليست سلطة رابعة سلطة باقية لاتنتهي او تزول بزوال نظام حكم ومجيء غيره... لانو اي صحفي في اي جريدة اخطر من رئيس وزراء فبامكانه ازاحتة بمقال واحد -مكرب- من منصبه...ده طبعا في دول العالم الاول
اما في السودان الصحافة خسارة ورق وحبر لسببين الاول والاهم غياب الحرية والثاني وهو الانكي عدم ثقة او اقتناع الصحفيين بانفسهم وبخطورة مهنتهم ودورها السلطوي الغير مرهون ببقاء نظام او قوة او ضعف وولولة معارضة

[سودانية]

#1326629 [mubark atta]
0.00/5 (0 صوت)

08-24-2015 10:28 AM
ستة و عشرون سنة الكلب ينبح و الجمل ماشى ما فيب اتغير بالعكس راجعين ورا علي مستوي المقاومة و علي مستوي الاقتصاد و علي مستوي الاخلاق كلو ورا ورا دحين يا ود عويضة الاسباب شنو و الحل شنو شخص لينا الساقية المدورة دي واضع الحلول الناجعة او خليك مدور في الفاضي و المليان زي خال البلد

[mubark atta]

#1326610 [صالح عام]
5.00/5 (2 صوت)

08-24-2015 10:07 AM
انت تمشى تدخل عش الدبابير ليه مالك ومال لبنى احمد حسين وهى اشجع منك تقول للاعور اعور وما بتلف وتدور زيك اكل عيشك يازول

[صالح عام]

#1326609 [اسمر]
4.50/5 (2 صوت)

08-24-2015 10:06 AM
نعم اكتب بحريتك مافى مانع
لاكن إياك والتبخيس فى حق الاخرين
وانت من هم الآخرون.

[اسمر]

صلاح عووضة ‎
صلاح عووضة ‎

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة