حسن...(أنسى) !!
08-26-2015 09:47 AM

*والصحيح لغوياً هو(انس) - بصيغة الأمر- ولكنا نريدها هكذا..
*فبعاميتنا السودانية هي تعني أن (سيبك) من الموضوع الفلاني ولا تشغل بالك به..
*وقبل خوضنا في الموضوع المذكور نقول إن المعني بعواننا هذا ليس محض زميل..
*فهو كان عضواً بلجنة الإعلام السرية لحزب الأمة التي كنت أنا رئيساً لها..
*أي أنه كان (حبيباً) قبل أن يصبح زميلاً - بل وجاراً - في العمل الصحفي..
*ومن قبل كان أحد أشرس الكوادر الطلابية لحزب الأمة بجامعة الخرطوم..
*إنه حسن إسماعيل الذي أضحى وزيراً الآن بحكومة ولاية الخرطوم..
*وأنا هنا لا يهمني أن يصير وزيراً أو حتى والياً مكان عبد الرحيم نفسه..
*ولكن ما يهمني هو (همو الغالبو يشيلو) إزاء كثرة الانتقادات المصوبة نحوه..
*فمنذ لحظة إعلان اسمه - وزيراً - وهو لم تُترك له (جنبة يرقد عليها)..
*حتى ما هو (خاص جداً) من ماضيه نُبش وُوضع على طاولة التشريح الإلكتروني..
*وما انكشف لي من حال (النابشين) هؤلاء يجعلني أنظر إلى الأمر من زاوية مختلفة..
*وأصر - ما زلت - على أن الأزمة تكمن في المعارضة ذاتها بأكثر من الحكومة..
*وأعني المعارضة ذات الصراخ الإلكتروني الذي يصمُّ (آذان الحواسيب!!)..
*أما في فضاءات الواقع السياسي - خارج الغرف- (فلا تسمع إلا همسا)..
*ومن ثم فإنني أقول لـ(الحبيب) حسن أن خطوتك هذه يعود تقديرها لذاتك..
*فأنت حر في خياراتك السياسية ولا أحد من حقه أن يفرض عليك شيئا..
*ولكن إن كانت مشكلتك هي فقط ما يقوله الصارخون هؤلاء فـ(انس)..
*فقد سبقك آخرون نالوا نصيبهم من الصراخ هذا ثم عادوا معارضين وكأن شيئاً لم يكن..
*عادوا إلى قواعدهم سالمين ، شاتمين ، مناضلين ، (غانمين!!)..
*ألم يدخل مبارك الفاضل القصر ثم خرج منه معرضاً (لا يُشق له غبار)؟!..
*وألم تبلغ به الجرأة حد المطالبة بمنصب الأمين العام في حزب الأمة؟!..
*وألم (ينس) له الصارخون - إلكترونياً - خطوته هذه و(يغفرون)؟!..
*وأمثال مبارك المهدي كثر ممن دخلوا (مشاركين) وخرجوا (معارضين)..
*وسوف يغفرون لك أنت ذاتك بالتأكيد - عزيزي حسن- عند خروجك و(ينسون)..
*فنحن في زمان جيل إلكتروني يجيد الصراخ والنباح و(النسيان!)..
*فخذ بنصيحتي- إذاً- و(أنسى !!!).




الصيحة/السياسي


تعليقات 38 | إهداء 0 | زيارات 6291

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1329496 [المندهش]
0.00/5 (0 صوت)

08-27-2015 10:56 PM
بصراحه لم افهم نصيحة عووضه الذى يستعد للتنقلات القادمه هل يسخر من حسن ام يسخر من الشعب . حتى لو افترضنا يا عووضه ان اهلنا بسطاء ومتسامحين فهل هذا يبرر خيانة حسن ..وضعك فى هذه الايام شبيه بوضع الهندى عزالدين عندما قرر ان يجاهد ضد الشعب لصالح غروره ونفخته الكذابه . امضى للامام خطوه واحده يا عووضه لتعرف عظمة هذا الشعب الذى تتواقح معه وتحتقره علانيه . سوف تدفعون ثمن تورمكم هذا

[المندهش]

ردود على المندهش
[سند] 08-28-2015 06:17 PM
انه يسخر من الاحزاب الضائفية القادتها شغالين حكومة معارضة وبالعكس ومافي حد يتكلم لا جماهير ولا قيادات يعني بقت على صاحبنا حسن


#1329326 [هجو نصر]
0.00/5 (0 صوت)

08-27-2015 05:37 PM
الهضربة بتاعتك كترت . حر في اختيارو نعم ولكن في نظام ديمقراطي رشيد

[هجو نصر]

#1328782 [TABID]
4.50/5 (2 صوت)

08-27-2015 07:26 AM
يا عووضة. كيف ينسى. وقروش الناس اللى لهفا وفيها محاكمو قضايا. لو كان الامر مال عام كنا فلنا : مفيش حرامى احسن من حمامى. ده حرامى من منازلهم وجاى جاهز للغف. زى ده ما من حقو يتولى وطيفة عامة.
مالكم كيف تحكمون. يعنى عشان جورنالجى زيك تدافع عن الباطل ؟؟؟
تانى ما بنفرا ليك لو ما اعتذرت غن كلامك ده

[TABID]

#1328649 [الدرب الطويل]
4.50/5 (2 صوت)

08-26-2015 10:02 PM
كيف تأكدت ان كل من رد عليك من المعارضة؟!..

لا أدري ماذا اصابك يا حبيب؟!..

هل نقدك في ذات البنطلون سبب كل هذه السلبية؟!..
مع كل إحترامنا وتقديرنا لقلمك فإن كثيرين وأنا منهم نرى انك لم توفق فيه بل كان عبارة عن تهكم وإزدراء وإفراغ لما فيه من قيمة ولماذا اوردت كاتبته مقارنتها من الفقه..

لا أحد يحجر عليك حريتك في الرأي او الإنتماء السياسي.. ولن يمنعك احد من الإنضمام إلى هذا او ذاك.. فقط إحترم قراءك ولا تزدريهم بالصفة الجمعية كمعارضي كيبورد لهم ذاكرة دجاجة!!..

[الدرب الطويل]

#1328639 [عبدالواحد المستغرب اشد الإستغراب!!]
4.75/5 (3 صوت)

08-26-2015 09:25 PM
إيه الحكايه يا صلاح عووضه أبلغة بك الجراءة لتشتمنا هكذا بكل بساطه وتصفنا بالكلاب التي تعوى ؟!! كان حريا بك أن تقراء (مقالة) الاستاذه النابهه رشا عوض لتقف على شهادتها في حق حبيبك وصاحبك ثم تدلى بدلوك ، ورايك الذى (كتبته)اليوم والأيام الماضيه وسعيك للتنصل من مواقفك السابقه كمعارض للنظام يجعلنا نصدق ما كتبه احد المعلقين أن النظام بصدد ترشيحك لتولى (وظيفة) المستشار الثقافي في سفارة السجم والرماد بدويلة قطر !! ومن الواضح إنك تعمل مقدمات ذلك بنصحك لحبيبك وزميلك حسن إسماعيل وكأنك تقول له (انت انسى وانا سوف أنسى وسيبك من العيال البصرخوا) او(بالمفتشى)الواضح أنك لن تعير (الكلاب)اى إهتمام!! القراء الذين ظلوا يتابعون كتاباتك وينظمون في شخصك وفى كتاباتك الشعر والنثر !! وياحسره علينا ألذين ظللنا نحسب كل ما يلمع ذهبا !! عليك يا صلاح الاعتذار للقراء عن ما بدر منك من إساءة لهم ثم افعل ما بدى لك !!.

[عبدالواحد المستغرب اشد الإستغراب!!]

#1328630 [عصمتووف]
5.00/5 (1 صوت)

08-26-2015 08:56 PM
اختلف معك شخصيا لا انسي من يخدعني ف الحقيقة ك الشمس انا مهارض لهذا النظام منذ اول يومة الاسود حتي الان والي ان اموت اهاجمة ب استمرار وبدون هدنة المهم اسمعة صوتي ويعرف راي لو تم اغرائي بذهب المعز لم ولن ابدل مواقفي ومبادئ ف الكادر حسن شخصيا اتابع مقالاتة عبر الخرطوم وهجومة الكاسح ضد النظام وكنت اعتبره جبل لا يهزة ريح اتضح لي انه عنصر رخو وضعيف ولا يستطع ان يصلح ويفعل شئ وسط ماكنة النظام هو يعرف جيددا سبقوه كقر هو مجرد ترس ف تروس النظام المقلده وب المكشوف مراكز القوي متواجده فشل البشير ف كبح جماح الاخطبوتين اراهن بفشلة والحاقة ب مبارك ف الحقيقة يجب ان يعلمها ويتعلمها اي واحد من مدرسة الاخوان انهم تروس لديهم فتره محدده ويغالوا من مناصبهم لا توجد استقالة مزاعة او منشوره حسن حرق نفسة ف مركبة انتحر

[عصمتووف]

#1328559 [sudani]
4.88/5 (6 صوت)

08-26-2015 06:14 PM
عووضه بقيت شايت ضفاري ,,, مبارك الفاضل دخل القصر وخرج معارضا ولكنه فقد احترامه عند الشعب السوداني ,,, الصادق المهدي والميرغني فقدوا الكثير بسبب مشاركة ابنائهم فهم عصا قايمة وعصا نايمة ,,, لكن ذاكرة الشعب يا عووضه ليست بخربةودخول الحمام ما زي خروجو ,,, بقيت تكتب بردوود الافعال

[sudani]

#1328522 [الباحث عن الحقيقة]
4.25/5 (3 صوت)

08-26-2015 04:42 PM
امثال حسن وانت يفهمهم كيزان جيدا يتركم تنبوحون كلكلاب ثم يرمون لكم العظم تصمتون كما القبور

[الباحث عن الحقيقة]

#1328517 [مراقـــــــــــــب للشــأن السوداني]
0.00/5 (0 صوت)

08-26-2015 04:34 PM
هــنا بيت القصيد يا السادة الصحفييين

(وزير الحكم المحلي حسن إسماعيل الذي كان حاضراً بشكل كبير من خلال تعليقاته عرف نفسه باسمه ومنصبه.. وفاجأ الحضور عند ما قال « أنا والفريق أول - ويعني عبد الرحيم - متباريين في المناطق من المناقل وفي الشمالية «)

اعــوز بالله من ســوء الظن ، ( لكن اعتقد ان هذا الشخص المدعو حسن اسماعيل كان قواصــة في حزب الامــة، ومن المرجح ان يكون رتبة في جهازالامـــن)

والايام حتظهر الكثير

[مراقـــــــــــــب للشــأن السوداني]

#1328509 [ابو الهول]
5.00/5 (2 صوت)

08-26-2015 04:22 PM
النضال الالكتروني
المناضل الالكتروني
النضال الالكتروني
المناضل الالكتروني
النضال الالكتروني
المناضل الالكتروني
شنو الحكاية ؟؟
قديت اضانا ...
وفقعت مرارتنا
انت عندك عقدة الكترون؟؟؟
قول عديل
(انا كمان داير لي عضة)
زي ما قال قريبك بكوري

[ابو الهول]

#1328457 [البنك الأهلي]
0.00/5 (0 صوت)

08-26-2015 03:34 PM
الحساب تلاشي وللا ايه ؟ ؟ يالحسن تفزعنا و بي وصايتك تلحقنا.

[البنك الأهلي]

#1328455 [ابو سكسك]
4.25/5 (4 صوت)

08-26-2015 03:32 PM
المؤتمر الوطني لو داير ينهي حسن ويحرق كرتو للابد ممكن يقيلوه من منصبه في هذه اللحظة. في حالة اقالته حيكون لا لمّ في الوزارة ولا في العارضة، يعني حيطلع ملوص

[ابو سكسك]

#1328439 [سوداني]
0.00/5 (0 صوت)

08-26-2015 03:13 PM
【*وأصر - ما زلت - على أن الأزمة تكمن في المعارضة ذاتها بأكثر من الحكومة.】

ما هي هذه الازمة التي تتكلم عنها هنا؟

[سوداني]

#1328410 [التلب]
0.00/5 (0 صوت)

08-26-2015 02:36 PM
انا على يقين تام أن اى شخص سمح له بالتملك لمؤسسه صحافيه او بالعمل فى صحافة هذا النظام اما ان يكون من كوادرهم المعروفه وهؤﻻء معروفون للجميع او ان يكون كادر امنى او غواصه ويتلقى راتبه بصوره راتبه او مغفل نافع وايضا تصله ( ظروف ) فى بعض الظروف ولكى ﻻنظلم نسبة 2 او 3% فهؤﻻء مسموح لهم ( ربما عشان يكفوا العين ) ومع ذلك يتلقون كم قرصة فى آذانهم بين الحين واﻵخر وفى تقديرى عووضه ليس من ضمنهم ..!!

[التلب]

#1328364 [OMO]
0.00/5 (0 صوت)

08-26-2015 01:45 PM
مبروك رئاسة التحرير القلت حرمت منها

[OMO]

#1328346 [الشعب الفضل]
0.00/5 (0 صوت)

08-26-2015 01:25 PM
بمناصرتك لحسن كأنك تتناسي اسلوب الطغاة باستمالة الأصوات المناهضة لهم بجعلهم كروتآ محروقة !!! هنيئآ له ولك جلباب الوطني .... و مش حا ننسي .

[الشعب الفضل]

#1328333 [ود يوسف]
5.00/5 (1 صوت)

08-26-2015 01:11 PM
لا أدري ما الذي حدث ولكن تأثير العلاقات الشخصية لا تخطئه العين في هذا المقال ، كما لاحظت في الأيام الماضية أن كتابات الأستاذ صلاح بدأت تأخذ طريقاً مختلفاً عما كانت عليه , نحن لا نصرخ ولا ننبح ولا ننسى ولا نريد من الأستاذ أن يكون كذلك ، فقط نريد منك أن تمحص المواضيع التي تكتب عنها ثم تحكم ( المنطق ) الذي تسمي به مقالاتك .
كنت قد علقت على مقال سابق بعنوان ( النضال الإلكتروني ) بما يلي :
((الأخ صلاح ..
لقد تعجلت في حكمك على جيل اليوم . فكونه جيل إلكتروني فهذا ليس بعيب .. فقد كان لوسائل التواصل الإلكتروني دور كبير في إنجاح ثورات الربيع العربي ..
لا شك أن هناك بعض الشباب غير المسئول وهناك الجاهل وهناك المستغل ( بفتح الغين ) من قبل الحكومة ( دجاج كما يحلو لرواد الراكوبة ) .. لكن التعميم فيه إجحاف ..
وإذا كان جيل اليوم خسر الدين والأخلاق كما ترى .. فيجب ألا نبرئ جيلنا أنا وأنت من بعض المسئولية ، حيث أن هذا يقدح في تربيتنا لهم ، فالأخلاق الحميدة والقيم الفاضلة متوارثة .. أو يجب أن تكون كذلك .
نسأل الله أن يصلح شبابنا ويهديهم الطريق القويم حتى يتمكنوا من النهوض بهذا البلد المنكوب بساسته .))
صحيح أن للسيد حسن حق الاختيار بين هذا الطريق أو ذاك ، ولكن طالما أنه اختار أن يكون شخصية عامة ( صحفياً أو وزيراً ) فمن حق الآخرين أن يقولوا رأيهم فيه حتى في الأمور الشخصية فالسلوكيات والأخلاق لا تتجزأ ..

[ود يوسف]

#1328330 [MICOM-127]
4.00/5 (2 صوت)

08-26-2015 01:08 PM
اليوم في صحيفة الخال الرئاسي وغدا وزير في القصر الرئاسي . ودقي يا مزيكا وسمعني سلام لاحلي وزير قادم .. طبعا في التشكيل الوزاري 2020 للوالي النيل بتاع الطلاب حدثوني قالو بقي معتمد في حكومة الليمبي

[MICOM-127]

#1328323 [ود ميدوب]
5.00/5 (5 صوت)

08-26-2015 01:03 PM
لم اكن اسمع بحسن اسماعيل اطلاقا الى ان امتلات قفة الفضائيات فجأة بشىء اسمه حسن اسماعيل وظننت أنهم يقصدون حسن اسماعيل البيلى .
ولكن يبدو لى أن قصة حسنكم هذه أشبه بقصة فتاة ميدوبية عندنا كانت دوما تجاهر بقبيلتها وبنى عمومتها بفخر شديد ولكنها اخيرا رضخت للعاطفة وتزوجت (واحد من اولاد العرب). وكانت لعنة بنى عمومتها تلاحق (ود العرب داك الخطف منهم الريلة) وليست الفتاة.
لذلك بالواضح كدة:
سيبكم من حسن ومن اعرابه.... وامسكو (الزول الوداهو للحكومة) من تلابيبو.
وبعدين محنة حسنكم هذا أنه لم يسمى عمليته هذه بعملية (تفلحون)
لو سماها لتجنب كل هذه اللعنات.

[ود ميدوب]

#1328322 [زول ساي]
0.00/5 (0 صوت)

08-26-2015 01:03 PM
عزيزي صلاح عووضة ... انس!

[زول ساي]

#1328321 [منصور]
0.00/5 (0 صوت)

08-26-2015 01:02 PM
كترتها يا عووضة ، يا غواصة ! يكفي المناضلين الكترونيا عدم نفاقهم مع ذواتهم . قال حزب امه و يستشهد بخيانة رموز حزب الامه كمبرر لخيانة "حسن فهلوة" وان الناس ستنسى. خليك نايم على اعنقادك ده و كثر مقاديف شهداء سبتمبر و شهداء بيوت الاشباح و شهداء الطلبة و ملايين دارفور و جمل افعال الانقاذ وغدا ستقف بين قضاء عادل نقيمه لك ولكل من ساند الانقاذ فردا فردا. ونحن غاب قوسين او ادني.

[منصور]

#1328319 [سودانية]
5.00/5 (1 صوت)

08-26-2015 12:59 PM
عشان حركاتك دي وحركات حسن حبيبك واخوها المستشار والمناضل الفاضل مريومة عايزة تمسك الحزب ....وزي ماقال بتاع الركشة المسؤولية في البلد دي شايلاتنها النسوان والله النهار كلو لافي كل المشاوير نسوان ماشات الشغل او جايبات العيال من المدرسة او جايات من السوق او ماشات الجامعة او المدرسة او ستات شاي وفطور وغدا وعشا شايلات الكفتيرات والحلل في الركشة والله بعد شوية الركشات دي ح سوقوها النسوان ويكون احسن برضو والكلام ده علي لسان سيد الركشة
وانا بكل براءة والرجال وين
اتلفت لورا وبضحكة مرطبين يامعلمة تحت ضل الشجر مع ستات الشاي

[سودانية]

ردود على سودانية
[سوداني] 08-26-2015 04:14 PM
يكون سايق الرقشة ده اسمه مجدي حسن؟ كان ياهو، شوفي تحت كاتب شنو! اهو ده المودي صلاح عووضة لحضن الانقاذ!


#1325625 [مجدى حسن]
5.00]/5 (1 صوت)

08-22-2015 11:50 PM
يا ريتك يا صلاح عووضة لو نصحت زميلك الساكن بيوت الايجار دا ، هو ماله ومال الايجار ؟ لو كان عرس واحدة و سكن فى بيت (راجل مرتو) السابق مش كان احسن؟ وعلى الاقل ينتقل من الاحياء الشعبية الى الراقية


#1328318 [شجرة التبلدي]
1.00/5 (1 صوت)

08-26-2015 12:57 PM
يا استاذ عووضة انصحك شيل العود وغني معاي:-مالي والهوي...انا..انا ,مالي والهوي
ترررم*ترررم

[شجرة التبلدي]

#1328314 [كرمنو قرمبو]
0.00/5 (0 صوت)

08-26-2015 12:49 PM
شكلك كداا يا عووضة خلاااص قربت تحصلوا..

كتاباتك الاخية بقت ما ياها...

بقيت تقول ..معارضة مافي ..ونضال الكتروني ..وكلامات الجماعة اياهم..

نصيحة ...اسرع وشوف ليك وزارة سريع سريع ..زمن ماف..

حصل قبال الجماعة يطيروا..عشان تبني ليك كم عمارة كدا ..وتحول ليك خمسة ستة

مليار لملاجئي الايتام برة عشان الظروف ما معروفة

[كرمنو قرمبو]

#1328308 [الباشا]
0.00/5 (0 صوت)

08-26-2015 12:46 PM
في ايه ياعووضة؟ علشان نسوك عندما استكتبت الصيحة ولاشنو؟ عووضة التاريخ تاريخ والجغرافية جغرافيا ممهما توارينا خلف الكلمات والالوان الرمادية.

[الباشا]

#1328306 [عبد الله]
4.00/5 (1 صوت)

08-26-2015 12:44 PM
صلاح عووضه اصابه الملل من ملل المعارضه وسيناريوهاتها المكرره التى لا تقتل نمله ولا تزعج فيل

[عبد الله]

#1328298 [محروق]
0.00/5 (0 صوت)

08-26-2015 12:34 PM
احتمال من زمان هو كوز ولكن شغال غواصة فى حزب الامة

[محروق]

#1328284 [نضال الكتروني]
0.00/5 (0 صوت)

08-26-2015 12:20 PM
التاريخ لا ينسي يا هذا ..

هل نسي و غفر للحاج آدم خروجه و رجوعه للوطني ؟

هل نسي و غفر لمحمد الحسن الأمين خروجه و رجوعه للوطني ؟

هل نسي لمبارك المهدي خروجه مغاضبآ من وزارة الصادق ؟

و هل نسي خروجه مغاضبآ من قصر البشير ؟

هل نسي خروج هلال مغاضبآ من الفصر و عودته مباركآ لانتخابات 2015 ؟

هل نسي ( شعبوية ) كمال عمر و عودنه مناكفآ من أجل حوار الوثبة ؟

ما لكم كيف تحكمون !!!

أم هو عدم اتزان بعد سقطة ( بنطلون لبني ) !!!

هنيئآ لدكتور بلدو ( صديقآ ) جديدآ ..

[نضال الكتروني]

#1328261 [محمد خليل]
3.00/5 (1 صوت)

08-26-2015 11:57 AM
و لماذا يصرخون على حسن اسماعيل و زعيم حزب الأمة نفسه بارك تعيين ولده عبد الرحمن فى القصر كما أن ولده الآخر بشرى يعمل مع الحكومة أيضاً و لا الحكاية خيار و فقوس؟

[محمد خليل]

#1328259 [جنو منو]
0.00/5 (0 صوت)

08-26-2015 11:56 AM
ونحن ايضا بدورنا سوف ننساك ككاتب صحفى قد كان .. ويلا دع جارك العزيز يمهد لك
للمشاركه حتى ولو ملحق ثقافى أو أعلامى بسفارة تشاد ان شاءالله .. ودعنا فى حلنا
نصرخ الكترونياوننبح الى ان ينجلى هؤلاء الانجاس .. قال الهندى عزالدين قال ..!!

[جنو منو]

#1328238 [الجمصي]
4.50/5 (2 صوت)

08-26-2015 11:25 AM
حيشتموك الناس على مقالك دا يا ود عووضة ... لكن كلامك هو عين الحقيقة

[الجمصي]

#1328235 [dougokoper]
0.00/5 (0 صوت)

08-26-2015 11:24 AM
يا أستاذ عووضه اللف والدوران ده ما بيقنع زول... ولقد سمعنا ويظهر من مقالك هذا أن لك النيه في الإنضمام إلى النظام في وظيفة مرموقة عرضت عليك... فتأكد حينها لا نأسف على أي متخاذل.

[dougokoper]

#1328213 [المُهجّر]
0.00/5 (0 صوت)

08-26-2015 10:58 AM
تصحيح معلومة يا عووضة لم يكن حسن إسماعيل من الكوادر الشرسة لقد كان من الكوادر الاركوزية بعدين انت ما طوالي بتنفي أي انتماء حزبي البقاك رئيس لجنة الاعلام في حزب الامة شنو

[المُهجّر]

#1328195 [ليدو]
0.00/5 (0 صوت)

08-26-2015 10:43 AM
صلاع عوووضة إنحرف يا جدعان !!
زولكم خلاص شكلو حيلحق حبيبو حسن إسماعيل !!!
منو العوض وليهو العوض ..

[ليدو]

ردود على ليدو
[عادل] 08-26-2015 12:48 PM
لو بتقرأ مضبوط المقال موجه ليك انت وليس حسن ... يعني انت المفروض ما تغفر لواحد انتهازي وماعندو مبادئ مرة معاك لما الكيزان يطنشوهو ومرة معاهم لما يدوهو يمص ....يعني بالبلدي كده العملها حسن انتو السبب فيها لأنكم شاربين موية (عفى الله عن ماسلف) والمعروف ان من امن العقوبة اساء الادب وعشان كده كل السياسيين قليلين ادب .


#1328168 [عوض خالد]
5.00/5 (1 صوت)

08-26-2015 10:30 AM
والله يا أخينا حسن وأنت أظنك حسن آخر وجميعنا قد اصبحتم في زمن الحسن والذي أصبح أسوأ زمن مرة في تاريخنا أخذ اسم الحسن واستبطن كل القبح والشناء فكأنما اسم حسن في هذا الزمن الويل والثبور للوطن والشعب فالاعوج عديل والعديل أعوج ، فيا اخي كل قيم السودان من الرجولة والشهامة والمواقف قد تم ضربها من حسن فأصبح اسم حسن فال نحس على البلد ولا يرجى منه الخير لأنه يحمل في سلوكياته كل التصرفات التي لا تمت إلى السودان بصلة بل كثير من الويل والثبور وعدم الأخلاق

[عوض خالد]

#1328157 [أنصاري]
5.00/5 (1 صوت)

08-26-2015 10:17 AM
وفي (الصيحة) صيح وأنبح..!!!؟؟ باسطاً يراعك في الوسيط منتظراً الجورنال الجديد الرزق بيحب الخفية يا بيه..

[أنصاري]

#1328149 [ابوكشنكه]
5.00/5 (1 صوت)

08-26-2015 10:10 AM
شكلك ناوى انت كمان

[ابوكشنكه]

#1328141 [سوداني]
4.94/5 (7 صوت)

08-26-2015 10:04 AM
يا ود عووضة من اول امس وانا اتابع سقوطك المدوي واراك تتمادى فيه .. وقد تصدى لك عدد من المعلقين وقلت لنفسي انه الراجل كفاه ما سمع ولأن كل ما اريد قوله قد قاله غيري..

لكن يا ودعووضة انت مشيت بعيييد وشايفك ما عازي تجيبها البر .. وخلينا من لغة الكيزان بتاعت معارضي الكيبورد ومعارضي الشتات وكأنك انت تستخدم قلم الحبر الجاف في كتاباتك، يا عووضة شوف منطق كلامك اليوم .. انت عايز تقول للواطي حسن : زي غيرك اسقط سقوطك وما تشتغل بي الصعاليك ديل لأنه قبالك سقطوا كثيرن وهسه أبطال

عشان أوضح ليك :

أولاً : المعارضة لم تحتفي بأي شخص سقط في ماخور الإنقاذ بما في ذلك مبارك المهدي الذي ذكرته كمثال وحيد

ثانياً : الشعب وليس المعارضة يحتقر كل من سقط ولن يغفر له ذلك سواء سقوط كامل زي سقوطك ده او نصف سقوط زي سيدك الصادق المهدي .

ثالثاً وده الأهم لاحظ انك اكتفيت بمثال مبارك الفاضل ولم تستطع ولن تستطيع ان تذكر الآخرين الذين سقطوا ولا يزالون مع النظام لأنهم منك وفيك

يا ود عووضة .. انت بالذات لو سقطت مافي زول حا يشتغل بيك لأنه لا طعم لك في المعارضة ولا الحكومة وماخد قلم في نفسك

وأعوذ بالله

[سوداني]

ردود على سوداني
[Ali Sankal] 08-26-2015 01:55 PM
واااااا أسفاي
بديت بالبناطلين بلا خجله يا عووضه و كسرتها بي شباب النت و الخاتمه بالدفاع عن الوزير الهمام العاجبك.
شكلك نستعوض فيك الله . . فترت خلاس . . واللا غالياً وعدوك بي وظيفة ملحق ثقافي في بلاد بره.


صلاح عووضة ‎
 صلاح عووضة ‎

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة