المقالات
مكتبة كتاب المقالات والأعمدة
الفاتح يوسف جبرا
إتصرفو وكده
إتصرفو وكده
08-27-2015 04:58 PM


عزيزي المواطن مهدود الدخل .. أو بالأصح (معدوم) الدخل .. لا عليك أن صار كيلو الطماطم 40 ألف جنيه أو البصلة الوااحدة ألفين جنيه او كيلو اللحم بي 80 ألف جنيه .. أو الليمونة بي ألف جنيه .. والعجورة بي 10 ألف .. لا عليك إن إرتفعت أسعار السلع الأساسية والما أساسية (كمان) فهنالك الكثير من الحلول والابتكارات التي عكف العبدلله على وضعها وتقديمها لك في كتاب بعنوان ( فن التدبير في الواقع المرير) ها أنذا أقتطف لكم بعضاً منها وأؤكد لكم أن من شأنها أن تعينكم على البقاء أحياء (حتي اليوم الثامن من الشهر) والباقي (إتصرفو وكده) !

(1) التوم :
التجهيز : يتم دق الثوم ناعماً ووضعه داخل علبة مصمته لعدة أيام
طريقة الإستخدام : تفتخ علبة الثوم أمام فوهة (الحلة) لتنداح منها رائحته على الملاح مباشرة
تحذير : يجب أن تكون العلبه موجهة لفوهة الحلة بدرجة حاده حتي لا يندلق الثوم داخل الحلة والميزانية تبوظ
تنبية : بعد الإستخدام تأكد من أقفال العلبة بشكل محكم حتى لا يتسرب (غاز الثوم) من العلبة
وتكون الطبخة الجاية من غير توم !

(2) البصل :
التجهيز : يتم إزالة طبقة خارجية وااااحده عن البصلة ، بإستخدام إبرة وخيط قم بإدخال الإبرة في منتصف البصلة واجعل الخيط يتدلي منها ، قم بعمل خرم صغير في منتصف غطاء الحلة
طريقة الإستخدام : إدخل طرف الخيط داخل الخرم الذى في غطاء الحلة ثم أعقده لتصبح البصلة متدلية داخل الحلة ثم قم بقفل الحلة بإحكام حتى تتسبك رائحة البصلة مع محتويات الحلة .
تحذير : تأكد من أن البصلة المتدلية لا تلامس محتويات الحلة حتي لا (تتهربد) مع المحتويات وحقك يروح
تنبية : بعد إكتمال الطهي تأكد من فك الخيط ووضع البصلة داخل علبة وتأكد من أقفالها جيداً حتى تتمكن من استخدامها طوال الشهر .

معجون الاسنان (3)

طريقة الإستخدام :
1- أمسك المعجون باليد اليسري بعد أن تقوم بفتحة
2- أمسك الفرشاة بيدك اليمنى
3- قم بتمرير رأس الفرشاة على فتحة صباع المعجون لمدة 20 ثانية
4- تسوك على بركة الله
تنبيه : لا تنسي أن تغسل الفرشاة بعد الإستخدام للتخلص من بقايا المعجون (ههههه) !!

(4) الأحذية :

التجهيز : قم بإحضار (جوز) من قارورة مياه معدنية فارغة (موبايل) للذين يرتدون مقاس 39-41 أو(فاميلي سايز) لمن مقاساتهم أكبر
الخطوات :
1- قم بواسطة المقص بقطع الجزء المسلوب الذي يلي رأس القارورة
2- قم بقطع القارورة طولياً إلى نصفين متساويين على مقاسك
3- أقلب نص القارورة المفتوح إلى أعلى ثم ضع رجلك داخلها بعد ربطها بخيط قوى ويلا أكسح على بركة الله
تنبيه : لو الواطة سخنت يمكنك قم بوضع (قطعة قماش قديم) كأرضية تحت الرجل مباشرة وكان المسألة (سخنت أكتر) يمكنك رش بعض الماء عليه للتبريد وكده !

تحذير :

تأكد من وضع الحذاء في مكان آمن عند دخولك إلى المسجد حتى لا يسرق !

(5) العلاج :

– توجه إلى التيمان وقم شراء الآتي وضعه في صيدليتك العائلية :
– شوية زيت سمسم+حبة قرض+حبة كمون+شوية عسل+شوية حبة سوداء +شوية حرجل
– لا تنس أن تسأل (العشاب) عن طرق الإستعمال والجرعات وبلاش تسألو عن (الأعراض الجانبية) لأنها مش ح تكون أسوأ من النحنا فيهو ده

(6) المواصلات :

تعلن شركة (كداري ولا نقوم سداري) عن وصول حمير جميع المقاسات والموديلات صنعت وصممت لتلائم أجواء السودان وذلك بالمواصفات التالية :

– إقتصادية في إستهلاك الغذاء (قصب برسيم عيش ناشف أبو سبعين أبو مليون أبو أي حاجة في أي حتة)
– مدربة على تفادي الحفر والمطبات الماليه البلد
– قوة 10 عجلة (دبل) مقاس 26 ( ما تخاف بتطلع الكبري عادي)
– دفع رباعي وتعشيقة متعددة المهام (أضان شمال يمين ، إشارات جنب ، ضنب خلف)
تنبيه : توجد إكسسوارات (كاتم صوت) و(بامبرز) عشان بتاعين (النفايات) وكده
أيها المواطن سارع بإقتناء حمارك الآن عشان الجماعة لو شموا الخبر ده ح يمنعوا إستيراد الحمير إلا (موديل السنة) و يعملو رسوم (فرق موديل) وكده

كسرة :
بعد ما الدولار وصل 10 ألف .. بعد ده لو عملتا الأفكار الفوق دي ده يكون تبذير !!

• كسرة ثابتة (قديمة) :
• – أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و
عن هذه الإعلانات


تعليقات 10 | إهداء 0 | زيارات 6928

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1330899 [Abushazaliya]
0.00/5 (0 صوت)

08-30-2015 12:55 PM
متعتنا وعوستنا عي السياسة طبعا الكثير عايشة بطرق تانية بس بنفس التدبير
سنة 1986 كان الغرب مولع مع ليبيا ولي صديقين ارادوا الاغتراب بس بالغلط ذهبوا الي ليبيا وعندما ضاقت بهم قالوا احسن نشوف امريكا وبعد وصولهم ارجعوا من المطار ولكن الى بوركينا فاسو في العاصمة وقادوقو , هناك شافو العجب والله كان السودان بمثابة جنة لهم
اولا اي نوع من الاكل تنتهي قبل الساع 3 ظهرا( اذا كانت غباشة روب ولا بيض السمك الغالي داك
اذا اردت الحمام تقصد دكان العطور لتاخذ الصابونة وبعد الانتهاء صاحب الدكان يقدر الاستهلاك ويدفعك وايضا اذا استعملت اي عطر كذلك تقدر الاستهلاك
كانو ياخذون الرغيف ويقعدو جنب المطعم وياكلوه على انغام الرائحة وبرضو تقدر النغم
بحثوا عن عمل ولم يجدوه سوى ان تذهب الى خارج المدينة وتاتي العلف ( القش الجاف) وتكون محظوظ اذا سالك احد باي ثمن واذا لا فانك تضتر الى حمله الى خارج المدينة لانها اوساخ اذا تركت .
الاخوة اضطروا الى السير بالاقدام مسافة 350 كلم حتى وصلوا الى بلد يوصلهم الى ليبيا

كسرة:
نحن فقدنا عنصر الدهشة اي شيء ممكناذا لم تحصل اليوم تحصل غدا
كسرة غريبة:
احد المعلقين وصفك بالكيزان لماذا هل هو احوص ام انك تستعمل المعاني الحكر اي التي يرددونها
كسرة جديدة:
صحيح كان حيوقعوا في روتاناشغل ب 70 حاجة كدة دولار وهل
حكمة :
اذا الكلاب اتشاكلو تكون بخت الارنب)

[Abushazaliya]

#1330812 [مدحت عروة]
0.00/5 (0 صوت)

08-30-2015 10:21 AM
الحل الوحيد لهذه المعضلة هو فى استزوار كل الشعب السودانى او حكام ولايات او مستشارين وخلافه عشان يرطبوا وكده ونجيب بنقالة وهنود وباكستانيين لامور الزراعة ورعى الحيوان والصناعة وكده!!!
كسرة:اخبار الحوار الوطنى شنووووووووووووووووووووووووووووووووووووو؟؟؟؟؟؟

[مدحت عروة]

#1330115 [عودة ديجانقو]
5.00/5 (1 صوت)

08-29-2015 10:14 AM
نسيت حاجه ياجبره الصابونه لما تتسهك ما ترميها قم بألصاقها مع الجديده حتى تكتمل الصوره وواصل حمامك او غسيل عدتك...ويا حبذا لو إستحميت مره فى الاسبوع

[عودة ديجانقو]

#1330112 [صبرنا وهرمنا]
3.00/5 (1 صوت)

08-29-2015 10:08 AM
وزير دولة بوزارة الثروة الحيوانية بيستغرش كيف العجورة توصل7الف جنيه في رمضان وناسي انو اللحمة وصلت 80الف جنيه يكون نباتي واللا شنو

[صبرنا وهرمنا]

#1329761 [ابوعديلة المندهش]
2.00/5 (1 صوت)

08-28-2015 03:26 PM
اقتراحاتك بخصوص حلة الملاح مهببة وتودى الميزانية فى ستين داهية . الأقتراح الأوجه ياأستاذ جبرا إنك تشمم كل فرد من أفراد الأسرة فردا البصل والتوم من داخل العلبة أكرر شمومة بس وبرضو لزيادة البحبحة ممكن يعاينو ليها بدون لمس او هبيش وبعد داك تقفل العلبة وترجعا الدولاب وبالهنا والشفا .
ممكن المدام تاخد شمتين (ماعايزين مشاكل).

[ابوعديلة المندهش]

#1329660 [راجل البركل]
5.00/5 (1 صوت)

08-28-2015 10:05 AM
جبرة والله وحكاية

[راجل البركل]

#1329539 [Mohammed Ghalib]
5.00/5 (1 صوت)

08-28-2015 01:25 AM
بجيني احساس انك كوز يا جبرة ،
القصة يا استاذ ما سخرية ولا ضحك اعتقد ان البلد في منعطف تحتاج فيه الي قمة الموضوعية والجدية علي كل المستويات ومن كل السلطات تشريعية وتنفيذية ورقابية حتي المواطن يفترض ان يحمل هم الوطن لانه لا يمكن ان ياتينا النجاح والتقدم من الخارج

[Mohammed Ghalib]

ردود على Mohammed Ghalib
[abushihab] 08-28-2015 07:05 PM
يا راجل انت الظاهر عليك عاوز تودي اخونا جبرا قي ستين داهية, يا جبرة ركز لينا علي كتاب ابلة نظيرة وسيبك منهم خاصة وانت عيان ما بتقدر علي البهدلة والتلتلة بناعة الما يتسموش, خليك مع التدبير المنزلي .


#1329502 [قحيف]
0.00/5 (0 صوت)

08-27-2015 11:10 PM
امواس الحلاقه .الاطفال يتم حلاقة طفلين بموس واحده كل شهرين مع وضع الاعتبار للترقيم الموجود بالموس..

[قحيف]

#1329433 [الداندورمي.]
0.00/5 (0 صوت)

08-27-2015 08:50 PM
ههههههههههههههه الفجيخ يولد الإبداااااااااع تسلم كتير
الحسنه الوحيده للزرد ه،،،خلقت لنا مبدعين التخمه والرفاهيه
تصيبنا بالخمول والكسل.

[الداندورمي.]

#1329376 [عبدالواحد المستغرب اشد الإستغراب!!]
5.00/5 (4 صوت)

08-27-2015 07:10 PM
عزيزى جبرا احد الأصدقاء المغتربين ارسل لى الطرفه الآتيه عندما سمع أن الأسعار في البلد واقصد السودان (ولعت) كمساهمة منه لتخفيف أعباء المعيشه وفك الضائقة التي حلقت في كل بيت وفي ظل الظروف التي جعلت النظام يولى علينا (عبدو رياله) واليا وقيما علينا والله المستعان ،،تقول الطرفه :واحد سأل شوايقه عزابه إنتو عايشين كيف في الظروف الصعبه دى؟
قالو:بنشترى جداده ب30جنيه،بنسلقا نص سلقه ونعمل بالشوربه فته وده بيكون الغدا والعشا،
تانى يوم بنسلقا سلقه كامله ونعمل من الشوربه فته!!والعشا موية فول !!.
ثالث يوم بنحمرا ونبيعا للمطعم الجنب البيت ب40جنيه!! ال30 جنيه بنشترى بيها جداده تانيه وال 10 جنيه بنشترى بيها عيش وموية فول وهكذا !!
اها رأيك شنو يا جبرا مش بالله عليك فكره عبقريه وعملية أكتر من الوصفه بتاعتك ؟!!

[عبدالواحد المستغرب اشد الإستغراب!!]

ردود على عبدالواحد المستغرب اشد الإستغراب!!
[ليدو] 08-29-2015 09:41 AM
باااااااايخة !!
الشوايقة أكبر من نكاتكم الفجة وسخافتكم الهبيلة دي !!!
القمم دوماً مستهدفة بحجارة الصبية

[zool] 08-28-2015 03:57 PM
شر البليه ما يضحك


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة