المقالات
السياسة
سمسار الأبالسة
سمسار الأبالسة
09-06-2015 09:37 PM


سمسار الأبالسه
ه€ ¥ £ € ¥ £ه
مِن قُمتَ يا شيخنا
و القدس مُحْتَلَّه
فهل شلتَ السلاح الجد
و أدّيتها يوم طلَّه؟!

ولّا النِعَم "وايدات"
في "الطُّنجُره" الحَلَّه
و ديل "بَرشا" أحسن من
زلزالة الجُّلَه؟!

باللاي فطورك كيف
شرفان نعيم و بِطَين
كيفنّها الغَدوه
و قيلولة الساعتين
تتعشى تتدشا
في الباسطه تتفشا
و حسب "المثل" بعدين
كم خطوه تتمشا
جُوات وساع البيت
أو بطنها الحِلَّه،

سمسار الحياة و الدِّين
التركي و الشيكل ..
القطري و الدولار
تقبض شمال و يمين
متعوِّد الذِّله،

لوَّعتَ كَم أمَّات
حَزَّنتَ كم أخوان و كم أخوات
ضيَّعتَ كم باكِر
عليهو متَّكلات
يا أغدَر الحَيَّات
لابِد دحين لمتين
للبُرعُم الطلَّ ؟؟!!

تضليلك الأغرار
يتنسْفوا يا شْيطِين
يا أكبر الفُجَّار
قال بيهو كان يات دِين؟؟!!
و وجَب الجهاد كان وين
للبلدو محتلَّه؟؟!!

كل الخلوق عارفين
مع عُصبة الأشرار
مال الحرام قاسمين
عايشين نعيم و نعيم
بى بِدعَة التمكين
ما أوضع المِلَّه.

إمام الكُدَّح الزاهدين
القلتَ ليك "قدوه"
الشهْر و الشهرين
المويه و التمره
لا يوم رقد في سرير
لا يوم سكن فيللا،
الجنبو واسمو حصير
قاد تسعة الغزوات
ما اتضَّارا بى عِلَّه،

فكان أصلو بتحبو
اتبع أتَر دَربو
القلتَ قول رَبُّو
قوم أمشي ياخ يلّا .

مش تمشي تستشهد
سيدي الرسول تشهد
أحسن من ال"كلا"؟؟!!
و اهو نحنا ليك سائلين
راجين بدون مَلَّه،
فمن غير تلِف و تدور
جاوب عليك الله.

…… …… ……
* ملحوظة:
الشاب غير مكتمل الإلتحاء أسفل الصورة إلى يمينك هو إبني عثمان، الذي أخذ إلى ليبيا و رحل في رمضان الفائت، كما تضم الصورة شابين آخرين بسلاح أو لبس عسكري، وثلاثتهم جيران شارعين متتاليين بالحي..
تقبلهم الله حسب نيتهم التي أخرجوا فخرجوا بها.


tilalaziz@gmail.com


تعليقات 0 | إهداء 0 | زيارات 972

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




طلال دفع الله
 طلال دفع الله

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة