المقالات
مكتبة كتاب المقالات والأعمدة
الفاتح يوسف جبرا
من الحكومة للمواطن
من الحكومة للمواطن
03-21-2011 11:54 AM

ساخر سبيل

من الحكومة للمواطن

الفاتج جبرا

عزيزي المواطن، السلام عليك ورحمة الله تعالى وبركاته.

وصلنى خطابك المنشور قبل أيام على هذه الزاوية .. طبعا ح تندهش جداً من (سرعة الرد) بتاعي ده لأنك (يا وحش) بتفتكر إني ما جايبة خبرك وما شغالة بيك شغلة، مع إني شغالة ليك شغل (نضيف)، وعاوزاك تجيب شهادة (الأوزو) في (المواطنة).. هو أنا عندي غيرك منو عشان أشتغل بيهو؟ هو أنا بدونك يعني ح (أتحكم) في منو؟؟.

أنا قررت أكتب ليك الجواب ده لأني (مغتاظة) وزعلانة منك شديد وشايفاك (بتنقنق) كتير، ولا عاجبك العجب ولا الصيام في رجب.. ومهما أتعب عشان رضاك ألقاك بادي من (الألف)!! غايتو تبدأ من (الألف) من (الكاف) من (الياء) لازم تعرف إني أنا الحكومة وياني أنا (المسؤولة) منك، وأوعك تسألنى تقول ليا (الخلاك تبقي مسؤولة مني منو؟) عشان زى (جنس السعالات) دي أنا ما بحبها بس إنت أفهم إني مسؤولة منك.. يعني إنتا بس استمتع بالرحلة ودع (القيادة) لنا!!.

أوعك تقول (الرحلة طولت) إنتا ما سمعتا إنو (كل تأخيرة فيها خيرة؟) ، أنا عندى هدف معين أعملو وبعدين أقول ليك مع (السلامة يا مواطن).. بس إنت ما تستعجل ساكت، أنا هدفى أنقذك إنقاذ (نوهائي) يعني الإنقاذ (اللي هو) بس إنتا أصبر علي وما تستعجل عشان العجلة من الشيطان !!.

هسع مرات شايفاك قاعد (تنقنق) تحت تحت وتقول (هسع الحكومة دي عملت ليا شنو؟) طيب وكت المسألة جابت ليها (نقة وكلامات) أحسن أوريك عملتا ليك شنو.. وكت إنت طلعت (أكال ونكار). أولاً بالتبادي أنا وقفت ليك (الحرب) الكانت مشتعلة ليها سنين والكانت بتقضي على الأخضر واليابس وبيموتو فيها خيرة الشباب.. معليش (مصاريف السلام) طلعت أكتر من مصاريف الحرب (زى ما ذكرت فى رسالتك) لكن أستحمل ، مش أي حاجة عندها تمن؟

والحاجة التانية أنا الحكومة القاعد (تنقنق) فيها دي طلعتا ليك البترول من (طقاطيق الأرض)، وكمان صدرتو ليك وبقيت اسمك (مواطن بترولي) .. صحى زدت ليك أسعار الوقود (زى ما ذكرت فى رسالتك) لكن ده شيء طبيعى لأنو (الوقود) أسعارو بره زادت وكده، ولمن تزيد أسعارو (بره) لازم تزيد أسعارو (جوه)، وما تسألنى تقول ليا طيب (بترولنا) ده أسعارو ما مفروض تزيد في الحالة دي؟ لأنو السؤال ده بالذات لو عاوزنى أجاوب ليك عليهو واطاتك أصبحت !

وبعدين أنا وفرت ليك أي حاجة، وبقى أي شيء موجود وما فيهو (صفوف) زي زمان قبل ما أجي.. عاوز تشتري (رغيف) أمشي أي (مخبز)، رايح تلاقي مش نوع خبز واحد ح تلاقي (أنواعاً من الرغيف) صحى هو (مايكروعيش) لكن المهم هو موجود .. عاوز (لحوم) ح تلاقيها أشكال وأنواع.. لحوم (بيضاء) ولحوم (حمرا) وشي سجك وشي بيرقر وشي مارتدلا وشي شنو ما بعرفو داك..

والعجب لو عاوز تاكل (فواكه).. الفواكه مالية السوق والطرقات وبقو (يكوركو) بيها وسط الأحياء زي (النبق واللالوب) زمان.. شي تفاح وشي رمان وشى عنب أحمر وشي عنب أبيض وأي فاكهة عاوزا (الحكومة) وفرتها ليك.. بس إلا تكون (مصدوم) ساكت وما (عندك نفس تاكل)!! أها في الحالة دي نسوى ليك شنو ؟ نجيب ليك فاتح شهية ؟

بعدين تعال هنا… شنو بي مناسبة وبدون مناسبة تقول عني إني حكومة (جبايات) و(رسوم) و(دمغات)؟؟ هو أنا القروش دي قاعدة أعمل بيها شنو؟ ما قاعدة أشيد ليك بيها (المدارس) و(الشوارع) والمستشفيات و(الكباري) وأشتري بيها لي أولادك (الكتب والكراسات)!! هسع في ولد في مدرسة قالوا ليهو جيب (كتب) أو جيب (كراسات).. أو جيب حق (الكهرباء) أو حق الطباشير؟ وللا شفتا ليكا (باص سفري) إنقلب والناس ماتت عشان السواق زاغ ليهو من (حفرة) وللا الخريف لمن يجى (فجأتن) قاعد يجهجه الناس من عدم (المصارف)؟

وما تنسى إنى عملتا ليك العلاج (مجانن) وبدون قروش .. هسه لمن تمشى عشان تتعالج فى المستشفى فى زول بيقول ليك جيب قروش؟ آآي ممكن يقولوا ليك جيب (قطن).. جيب (حقن).. جيب (شاش) أصرف الروشتة دي ، جيب (الدواء الفلانى).. لكن لا يمكن يقولوا ليك جيب قروش وإنتا زول مواطن عيان والمواطن في ذمة الحكومة (اللي هيا أنا) !

أنا ما عاوزة أتكلم ليك عن (إستراتيجيتى الشاملة) وعن الحاجات التانية الأنا (أنجزتها)، أو الأنا (عايزة) أنجزها لأنها كتيرة وح تاخد زمن وإنت عارف إنى مشغولة وما عندى وكت واليوم كلو أدخل فى إجتماع وأطلع من إجتماع وده كلو عشانك وعشان أوفر ليك مزيد من الرفاهية ،،

فى الختام تقبل تحياتى وأشكرك على الرسالة لأنو زى ما قالو (الما دارك ما لامك) !


مخلصتك: الحكومة

ملحوظة:

أنا بعترف ليك إنو فى حاجات كتيرة عاوزة إصلاحات (زى ما جاء فى رسالتك) إنتا بس أدينى عشرين سنة تانى والأمور ح تكون (آخر حلاوة) !.


تعليقات 9 | إهداء 0 | زيارات 5417

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#115474 [سامية سامى]
0.00/5 (0 صوت)

03-22-2011 08:24 PM
والله اخر حلاوة نقدك البتديهو بالبارد ده
والناس ديل لانهم بهايبم وكرور ساكت
حيقرو كلامك ولايهمهم وعاملين مطنشين
ومسردبين لكن سرديبم ده حيتكسر قريب
كسرة قذافى الليشعبو مجافى
آمين


#115463 [ابو امين]
0.00/5 (0 صوت)

03-22-2011 07:27 PM
الترابى الله لا يسامحك غرزت للشعب السودانى غرز غى لا يخرجوا منه الى يوم الغيامه

كما فعل احد الولاه الذى تاخر على الحضور لامير المؤمنيين وعندما وبخه قال له كنت اخذ

البيعه لابنك وخرج من امير المؤمنين وهو يضحك وتركه مبتسم فتعجب القوم من ذلك حيث

توقعوا عزله فقال القوله الشهيرة غرزت له غرز غى لايخرج منه الى يوم القيامه


#115073 [مستاء]
0.00/5 (0 صوت)

03-21-2011 11:07 PM
الكيزان ديل الله يقطعهم ضيعو زمنا فى شعارات فارغة


#115031 [أبورماز]
0.00/5 (0 صوت)

03-21-2011 08:31 PM
وده أنا حتى بيت أبوك يا مواطن الورثك ليهو من أبواتو ومن جدودو ومن جدود جدودو قدرت أقسمو بيناتك إنت وأخوانك عشان أى واحد يكون عندو بيتو براهو وبابو براهو .. ياهو جون بعد تلاته أربعه شهور حا يستلم بيتو وقبل آخر السنه يمكن أبكر برضو يمسك بيتو وحتى أخوانك ناس بريمه وعقار وأوشيك ومهمد ساله وأى واحد عايز يفرز عيشتو ويفتح بيتو أنا بقدر أفرز ليهو حقو ... أنا الحكومه أم جاكومه الزيى منو .. وبتلقى غيرى منو .... يا مواطن يا ود الخوافه المهجومه ....


ردود على أبورماز
Sudan [نائب زهجااان] 03-22-2011 04:46 PM
عشرين سنة بس، فيهم الخير شكلا كدا الناس ديل شغالين بالمثل البيقول حبل المهله يربط ويفضل ( بس الفضل انشاءالله مايربطونا بيهو ).


#114962 [ساجد]
0.00/5 (0 صوت)

03-21-2011 03:31 PM
في عشرين سنة اصبحت ماليزيا ماليزيا!!!(بعرفوا اكتر مننا)!!!
وفي عشرين اصبحت سنغافورة سنغاقورة!!!
وفي عشرين نحنه بقينا.....ماسورة!!!!!!


#114917 [عبدالله السر حمزة]
0.00/5 (0 صوت)

03-21-2011 02:03 PM
عشرين سنة ما شوية يا استاذ الفاتح؟؟؟؟؟؟؟؟؟؟؟؟؟؟؟؟؟


#114915 [salmat]
0.00/5 (0 صوت)

03-21-2011 02:00 PM
ابداع ياجبره الحكومه سوت اي حاجه ونحن ماناقصانه حاجه خيرها كافينا لكن شكلك قرصوك قرصه خفيفيه الايام دي الناس ديل ماقصرو معاك
وياجبره طالما الحاجات الكتيره دي مستورده تفاح وشي عنب وشي كراسي فخمه وحاجات تانيه حامياني انا بقترح نستورد حكومه من الصين لانهم ناس ناجحين وبنجحوا اي شغله بمسكوها1


#114866 [Saif Al Hagg]
0.00/5 (0 صوت)

03-21-2011 01:08 PM
يا امنا : عاوزليك عشرين سنة تانى ------------ ليه كده ياجبرا


#114841 [امين الشريف]
0.00/5 (0 صوت)

03-21-2011 12:21 PM
اخي جبرا ارجو قراءة اهذا الحوار حول الفساد وما ادراك ما الفساد ومفوضية الفساد الت يستزيل الفساد والمفسدين نهائياً ........ يبدو ان البشير قد كان نائما مع (اهل الكهف) لذا لم يسمع عن هذا الفساد او انه كان في كوكب آخر ووصل للتو وحدثوه عن استشراء الفساد فضاق صدره واصدر اوامره لوزرائه الخلص ومستشاريه الامناء بتكوين مفوضية لمكافحة الفساد 000 واليكم نص الحوار الذي دار بينه ومستشاريه((البشير : الفساد ملاء البلد لمن فاض وبقى كلام الناس عنه في كل مكان0000 احد المستشارين :فساد شنو يا ريس هو القال ليك منو البلد فيها فساد منو الغشاك بالكلام ده ؟؟؟؟ الشعب شبعان وعايش في بحبوحة وفي رغد من العيش الكريم 000000 ومافي اي فقير في البلد بطولها وعرضها وحتى اخونا (الفادني) حاول يوزع اموال الزكاة الكتييييييييييرة دي ولفه بيها كل السودان ما لقى ليهو واحد محتاج عشان يديها ليهو عشان كده قام بنا بيها معهد علوم الزكاة !!!!! البشير : طيب ما قالوا تقارير المراجع العام فيها العجب العجاب من اشكال الاختلاسات والمفاسد ؟؟؟؟ مستشار رقم (66) والله يا ريس مافي اي فساد في الدولة والدليل على الكلام القالوه ليك الشباب ديل تقارير المراجع العام السنوية دي وممكن نجيبها ليك لتطلع بنفسك عليها وان وجدت فيها ملاحظة واااااااااااااااااااااااااااااحدة بس اقطع رؤسنا قبل ما تتكون المفوضية بتاعة الفساد دي 0000000000 مستشار رقم (55) يا خي اصلا في ناس حاسدين على الارزاق اللي اتنزلت عليك وعلى اهل بيتك وخالك الطيب مصطفى قال للجماعة ديل الحقيقة انو المسألة دي ارزاق ونزلت عليك واخوانك واهل بيتك لكن الناس بقت حااااااااسدة ساكت 000000البشير : اها لو كلامكم دا صاح املاكم واملاك اخوانكم المسؤولين في الحكومة دي جابوها من وين قصور ورؤوس اموال واستثمارات وشركات والواحد اصبح عندو اكتر من مره وبنا قصور حتى لي اولاده وكلهم كانوا اولاد فقراء يعني ما وارثين من ابهاتم عشان نعزرهم 00000 مستشار رقم (77) والله يا عمر الخيرات العند المسئولين دي ديون عليهم هم اصلا ما عندهم حاجة وعايشين عيشة تقشف عشان المشاريع التنموية تتنفذ لكن استدانوا من البنوك البقت كتتييييييييييييييييييرة دي ووسعوا على رقبتهم شوية و على اولادهم خاصة وهم مشغوليين بقضايا الوطن وما لاقين طريقة لمتابعة اي استثمارات 00000 مستشار رقم (33) لكن طالما اقتنعت يا ريس بتكوين المفوضية نحن معاك للنهاية ولازم نشكلها عشان نرد على العملاء والمأجورين اللي اطلقوا الشائعات دي ونثبت ليهم الكضب حقهم دا وانا بقول نشكل المفوضية من المسشارين رقم (1033.111.100.88.99.22.15.7.3) رغم كثرة مشاغلهم وترؤسهم للجان في المجلس الوطني ووزاراتهم وسفرهم الكتير للخارج وارتباطاتهم بمؤتمرات كتييييييييييرة داخلية وخارجية لكن مافي مشكلة يكونوا اعضاء في المفوضية وانا بقترح انك تكون رئيس للمفوضية دي !!! البشير : انا ما عندي مشكلة طالما في النهاية حنكشف الفساد والمفسدين 00000 المستشار رقم (1200) انا بقترح لازم يكون عندهم حوافز معتبرة عشان الشغل دا فوق طاقتنا وبياخد كتيييير من وقتنا 00000 البشير : مافي مشكلة وكلموا اخونا وزير المالية يشوف الحكاية دي 0000 مستشار (1077) ان بقترح يا ريس تحسبوا لينا الشغل دا بالدقيقة لانو وقتنا بقى بسيط ونحن بنضحي بوقت راحتنا واولادنا وكمان بقول يا ريت تدونا الحوافز بالدولار او اليورو 00000 البشير : ما خلاص قلنا ليكم بتاع المالية دا حيشوف القصة دي 000000


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2016 www.alrakoba.net - All rights reserved

صحيفة الراكوبة