المقالات
منوعات
(أهو كان حلم؟!)
(أهو كان حلم؟!)
09-13-2015 04:10 AM


بس قلبي منك ما سلم..
رغم المسافات والظروف.. مشتاقة ليك وإنت المهم..
خليني جواك زي زمان.. بيناتنا ما انقطع العشم..
محتاجة بالك لي يطول.. تهواني لكن بي فهم..
البيني بينك سر نبيل.. وإحساس على القلب اترسم..
وأنا من عرفتك يا جميل.. ودعت أطياف الوهم..
والواقع أصبح بيك نضير.. والدنيا موسيقى ونغم..
بس كنت عارفك طيف خيال.. مرات حلم مرات علم..
وأنا قلبي منك ماااااسلم!
****
قصة هواك والذكريات.. ساقوني لي حد الجنون..
وبقيت مقسم كلو يوم.. بين الهواجس والظنون..
يا البيك ربيع عمري بيطول.. يوم فرقتك شفت المنون..
غرد معاك عصفور هناي.. لكن وراك هجر الغصون..
علمتني الحب والهيام.. ووريتني في الخذلان فنون..
وزي ما ضحكت كتير معاك.. الليلة بكيت العيون..
وزي ما عرفت تسيب هواي.. أنا غير هواك ببقى وبكون..
ولو هانت الأيام عليك.. شخصك على خاطري بيهون..
بس قلبي منك ماااااا سلم..

*****
جرحك بيتاور في حشاي.. لا ارتحت منو ولا شفيت..
وأنا يوم طريت حبي الكبير.. من غير شعور نُحت وبكيت..
خاطري الكسير يوم ما انجبر.. . لاقدرت أطرى ولا نسيت..
حاولت يا ما كتير معاك.. وجريت وراك لامن حفيت..
جنيت بلاك والله عديييل.. .لا عرفت رقت ولاهديت..
شمتَّ كل الناس علي.. وبقيت حكاية في كل بيت..
أنا كنت راضية أعيش معاك.. لكنك إنت الما رضيت..
باريت غرورك والضلال.. وبقيت أناني وافتريت..
وأنا قدر ما أديك حنان.. ألقاك مع الأيام قسيت..
قدامي ما خليت خيار.. لملمت أحزاني ومشيت..
وسبتك وراي للحسرة والخوف والندم..
والظالم الجواك تراجع وانهزم..
وأنا هسه فقت من الوهم..
بس قلبي منك.. ماااااااسلم
تلويح:
نحن لا ننسى.. ولكننا نجتر الذكريات لنصنع من أخطائها واقعاً أفضل

اليوم التالي


تعليقات 7 | إهداء 0 | زيارات 1922

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1340392 [خالد فداسي]
0.00/5 (0 صوت)

09-15-2015 02:41 PM
روعة ، فعلاً المعاناة والهجران والفراق يولد الإبداع .

[خالد فداسي]

#1339454 [علي]
0.00/5 (0 صوت)

09-14-2015 09:01 AM
اصلو البنت دي مابرتاح ليها والله

[علي]

#1339210 [ghazi hassan suliman]
0.00/5 (0 صوت)

09-13-2015 07:45 PM
utterly fabulous دائما رائعة ياداليا

[ghazi hassan suliman]

#1339104 [ام بسمه]
0.00/5 (0 صوت)

09-13-2015 03:34 PM
رووووووووووعه تسلمى يا استاذه داليا

[ام بسمه]

#1339074 [سودانية]
0.00/5 (0 صوت)

09-13-2015 02:59 PM
حلوة ...بكتني والله

[سودانية]

#1338925 [عاطف عبدالغفار]
0.00/5 (0 صوت)

09-13-2015 11:24 AM
رائعة داليا الياس شعر معبر وجميل لك كل التحايا الطيبة

[عاطف عبدالغفار]

#1338913 [عبدالله احمد]
0.00/5 (0 صوت)

09-13-2015 11:12 AM
قصيدة روعة و معبرة جدا في بساطة مفرداتها وشدة معاناتها وجمال التراكيب ..تسلمي يا استاذة ويسلم قلبك منه

[عبدالله احمد]

داليا الياس
داليا الياس

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة