نفسك في أيه؟
09-15-2015 09:15 AM


• نفسك فى لحمة؟
• اللحمه يا أستاذ ثبت علمياً إنها مضرة بالصحة وبتجيب أمراض كتيره خاصة اللحمة (الكيرى) الأنتا بتاكل منها دى لأنها ما معروفه لحمت شنو؟ والناس بقت ما عندها ذمة ممكن تضبح (أى حاجة) عشان كده خليك فى السليم وأبعد عن الحاجة دى ! وبعدين ياخى الفول ده مالو؟ عيبو ليا ؟ ما برضو فيهو )بروطين(

• نفسك تلاقي وظيفة؟
• والله إنتا بتبااالغ … وظيفة مرة واحدة
• نفسك تتفسح إنتا وخطيبتك ؟
• ما عندك أى مشكلة طوااالى وعلى حدائق (حبيبى مفلس) ما ح تكلفك الشغلانه خمسة جنيه .. كيسين تسالى .. كيسين فول حاجات .. كبايتين شاى .. إتنين حاجة باردة .. بس لو لموا فيك ناس النظام العام إحتمال المسألة تكلفك أكتر شوية !
• نفسك فى قروش كتيرة؟
• ياخى القروش دى فتنة أخير ليكا الفقر الإنتا فيهو ده .. لو هسه عملتا ليكا شوية قريشات وبقيت غنى ح ترتكب آثام وح تدخل النار
• نفسك تتزوج؟
• ما تتزوج ليه؟ مش ما عندك التكتح ؟ تتزوج ونص وخمسة وأهو أخوانا العلماء بارك الله فيهم وأثابهم ثواباً كثيراً سهلوا ليكا المسألة وعندك زواج المصواب وزواج المسيار وزواج المصياف ، وزواج المسفار، وزواج المطيار ، وزواج المصياع وزواج المحجاج ، وزواج المسياق .. المهم ما مطلوب منك فى كل (الأنكحة) المشروعة دى غير (مجهودك الفردى(
• نفسك يكون عندك قطعة سكنية؟
• ياخى والله إنتا متفائل جداً .. هو لمن السودان كان مليون )ميل( مربع ما لقيت ليكا قطعة فى الخطة السكنية عاوز تلاقى ليكا قطعه بعد ما بقى مليون )متر( مربع ؟
• نفسك فى تلفزيون ملون؟
• والله الظاهر إنتا ح تجيبوا لى نفسك براك .. ح تجيك المذيعة أم كشاكيش كتيرة ديك وتقعد كل دقيقة تأشر ليك بى أيدا عشان تشوف نقشة الحنة ويجيك بعدها المذيع القاعد يسبل فى عيونو وكل دقيقتين يقعد يقهى ليكا فى سقف الأستديو .. والمصيبة تقوم تشاهد ليك مباراة (غمة(
• نفسك تتعالج ؟ يا أستاذ الشافى الله .. خليك من مسألة الأطباء والمستوصفات دى عشان ممكن يعالجوا ليكا حاجة ويبوظوا ليكا عشرين حاجه ! المهم لو ما سمعتا كلامى وربنا سهل ليكا ومشيت ودخلتا عملية فنصيحة أخوية أعمل جرد لأعضاءك قبل العملية وأكتبهم (للورثة) عشان يراجعوا (العدد) وهم بيغسلوا فيك !
• نفسك تلبس كويس؟ : طوااالى ييم وجهك شطر (خلف الجامع الكبير) حيث سوق الحرامية وألبس من (المرحوم كان قدرك) .هدوم مستعمله وآخر وجاهة..و رخيصه.. وقدر ميزانيتك (ده لو عندك ميزانية) من أساسو
• نفسك أولادك يتعلموا؟
• ح تجيب ليهم كل يوم قروش طباشير وقروش كهرباء للمدرسة وموية للمدرسة وقروش فطور للأساتذة وقروش طباعة إمتحانات وقروش مش عارف ايه من وين؟ وبعدين أفرض قعدت تصرف كده لحدت ما إتخرجوا ح يشتغلوا وين؟ أسمع كلامى خليك من مسألة التعليم دى خلى الأولاد يكبروا شوية وبعدين يترشحوا للبرلمان !
• نفسك تسافر ؟ ممكن بس لازم تدخل ليكا صندوق وتشيل الصرفة الأولى .. إنتا عارف إستخراج الجنسية والبطاقة والجواز والرقم الوطني بى كم؟ خليك من تذاكر الطيارة .. ياخ قول سافرتا أها الإعاشة كيف؟
• نفسك تغترب ؟ شيل الفكرة دى من راسك بأسرع ما يمكن .. هو مرتبك هناك ده (لو إشتغلتا) ح يكفى ال ح ترسلو للأسرة وللا الح تدفع منو للقسط بتاع الفيزاء الجيت بيها وللا طلبات الأقارب والأهل والجيران وللا تجديد الوثائق والضرائب والمساهمة (الإلزامية) والزكاة وترعة كنانة والرهد وقناة الخرطوم ودمغة الشهيد و الجريح والغريق … والما عرف شنووو؟ يا أسمع كلامي وأقعد في حتتك
• نفسك تكون مسئول؟
• لازم تراجع الطبيب النفسى .. ده هسه كلام يقولوا زول عاقل ؟

• كسرة :

• نفسك تموت وترتاح من الدنيا دى؟
• إستمع لتصريحات بعض المسئولين من نوعية (نحنا مستهدفين عشان مشروعنا الحضاري)!!

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و
• كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و
عن هذه الإعلانات


تعليقات 19 | إهداء 1 | زيارات 7338

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1341628 [sudan]
0.00/5 (0 صوت)

09-17-2015 02:39 PM
الاخ جبره انا نفسى الريس ومؤتمره الوطنى يدونا قفاهم ولن نسالهم عن اللى نهبوه

[sudan]

#1340965 [مدحت عروة]
5.00/5 (1 صوت)

09-16-2015 11:53 AM
امس فى برنامج اقوال الصحف بقناة النيل الازرق الصحفى راشد عبد الرحيم علق على حكاية البند الرابع بتاع حقوق الانسان فى سويسرا وان امريكا ونيجريا ومعاها دولتين تانى ما بتذكرهم بيدعموا ادراج السودان فى البند الرابع قام راشد قال نحن علاقتنا بنيجريا وشعبها ممتازة من زمان وبيجوا الحج عن طريق السودان قبل الطيارات الخ الخ وامريكا ذاتها عندها اعداء كتير لانها ناشرة اساطيلها فى كل العالم بدل ما يقول ان السودان غعلا ينتهك حقوق الانسان فى مصادرة الصحف وسجن المعارضين وايقاف الصحفيين وضرب المدنيين الخ الخ الخ ويجب على حكومة السودان ان تحسن وضعها فى مسالة حقوق الانسان وتعمل حريات وحوار وطنى وتحكم القانون واستقلال القضاء الخ الخ!!!
قصدى من هذا التعليق يا جبرا ان كل ما تكتبه ساخر لكنه قريب جدا جدا من الحقيقة وهذا هو سودان الانقاذ الذى تعملق فيه الاقزام وتقزم فيه العمالقة!!!

[مدحت عروة]

#1340794 [المقتول كمد وبطنه فايره]
5.00/5 (4 صوت)

09-16-2015 08:59 AM
و الله يا أستاذ جبرة
"أسمع كلامى خليك من مسألة التعليم دى خلى الأولاد يكبروا شوية وبعدين يترشحوا للبرلمان "

دي قوية......يا خي ما مسحت بيهم الواطة ههههههههههههههههه.

[المقتول كمد وبطنه فايره]

#1340706 [ود يوسف]
5.00/5 (1 صوت)

09-16-2015 07:04 AM
بالعكس يا أستاذ ... أسهل حاجة تكون مسئول ... دقن صغيرة ، كورس في النفاق وكورسين في الحرامية ... وخلاص .

[ود يوسف]

#1340696 [عاطف الطيب]
0.00/5 (0 صوت)

09-16-2015 06:50 AM
لك التحية أ.جبرا ....نفسك تعرف انا منو ..رسلي بريد الكتروني ..مع العلم اني مبسوط منك

[عاطف الطيب]

ردود على عاطف الطيب
[الطفا النور منو] 09-23-2015 12:20 AM
خلاص يالشريف نيجيريا اشتري ليهو لكزس


#1340527 [على]
0.00/5 (0 صوت)

09-15-2015 07:22 PM
كفلتها خاص اكتر من ماهى مقفلة ولاتنسوا حلايب سودانية

[على]

#1340475 [عمر الحسن]
4.75/5 (3 صوت)

09-15-2015 05:10 PM
نفسك تغترب ؟ شيل الفكرة دى من راسك بأسرع ما يمكن ..
...........
احسن حاجة تعملها انك تزرع حوش بيتكم جرجير وتربي ليك غنمايتين وتسمع كلام حسين ،،، عارف حسين ده منو ؟

[عمر الحسن]

ردود على عمر الحسن
[سيف الله عمر فرح] 09-16-2015 01:21 PM
والله العظيم ، انا اقترحت لوحدة قريبتى ! ، ليه ما تزرعوا جرجير وبعض الخضار فى الحوش أو فى السطوح ! .. قالت لى وين الموية ؟ ، موية عشان نستحمة ما مكفية ! .

[ياسر نورى] 09-15-2015 06:06 PM
ود الحسن / اسعد اللة اوقاتك .انا عرفتو حسين نظرية


#1340423 [algandawi]
5.00/5 (1 صوت)

09-15-2015 03:19 PM
حبيبي أبو قرجة عايز ترجع السودان دي بسيطة جداً ما حسين خوجلي حلاها بسعاية غنمايتين و وزراعة حوض جرجير تعيش ملك ..دا حل عبقري مش كدا ؟؟!!!

[algandawi]

ردود على algandawi
[أبوقرجة] 09-16-2015 09:45 AM
أكيد حل عبقري طالما جاء من حسين خوجلي.......

لكن في مشكلة الغنمايتين ديل والجرجير دا ... لما تدفع حق النفايات وحق الضرائب والزكاة ...وباقي الجبايات ما بتلقى حجه خالص...


#1340419 [algandawi]
5.00/5 (1 صوت)

09-15-2015 03:15 PM
أنت رائع وفنان يا أستاذ جبرا...مقال يعبر عن منتهى الإحباط الذي يعيشه المواطن الغلبان محمد أحمد أخو حاج أحمد

[algandawi]

#1340414 [QUICKLY]
5.00/5 (1 صوت)

09-15-2015 03:10 PM
في دمغة جديدة يا جيرة اسمها دمغة مساهمة انقاذ البشير من الجنائية

[QUICKLY]

#1340411 [لوز القصب]
0.00/5 (0 صوت)

09-15-2015 03:05 PM
نفسك تغتم تابع مواضيع جبرا
ياخ وين خفة الظل والسخرية ولا نفسك انسدت والله لا خلاص الا بتغيير شامل يولى الامر لمن يستحقه وحساب وعقاب
سوءال عبيط
اين مفوضية الفساد و كل شيء فسد حتىالمطر ابى
ويا جبرا الغى الكسرة لانه لا احد يهتم
وقال هبثرو
ياخ العيال كبرو
والناس تطاولوا هبرو
وانت تسأل اخبار هيثرو
ما سمعت الشريف بدر قال بعنا سودان لانقاذ بنك امدرمان الوطني واالعيال دايرين اللبن واللبن عند البقر والبقر داير حشيش والحشيش داير مطر وربنا يا ربنا جيب لمطر


ويا ريت وا بقت سحاب كام نزل المطر

[لوز القصب]

#1340382 [حكم]
5.00/5 (3 صوت)

09-15-2015 02:20 PM
• نفسك تموت وترتاح من الدنيا دى؟

حضر قروش الدفن.انت قايل الدفن مجان زي زمان؟
زمان كنا مليون ميل مربع. اذا ماعندك قروش الا تمشي المانيا ويدفنوك واقف
يبقن عليك وقوف صفوف ومواصلات في السودان حتى الاخرة تنتظرها واقف

[حكم]

#1340348 [منصور]
0.00/5 (0 صوت)

09-15-2015 01:22 PM
كسرة توافقية بمناسبة يوم الخدرات العالمي (مش هو اليوم؟)
مساطيل قاعدين تحت ظل الحيط مقطعين و مفلسين.
الاول: الفقر وللا الغنى احسن؟
الثاني: والله اللي نعرفو احسن من المانعرفوش.

[منصور]

#1340341 [محمد]
5.00/5 (1 صوت)

09-15-2015 01:15 PM
هههها
انا اكثر حجاجة ضحكتنى حكاية خليهم بعدين يمشوا البرلمان دى

[محمد]

#1340276 [الداندورمي.]
5.00/5 (1 صوت)

09-15-2015 11:46 AM
هههههههههههه تعرف نفسي في إيه يا،،،أستاذ جبرا
تجي زياره لينا في هولندا ،وكل يوم أعزمك في الكوفي شوب
عشان تشوف مساطيلنا مبسوطين كيف ،،،ونستمتع بإبداعاتك ،،،تسلم كتير.

[الداندورمي.]

#1340262 [كديس فى السروال]
5.00/5 (2 صوت)

09-15-2015 11:32 AM
والزكاة وترعة كنانة والرهد وقناة الخرطوم ودمغة الشهيد و الجريح والغريق … والما عرف شنووو؟
+*** انت لسع متذكر ترعة كنانة و الرعد
با خى جيراننا المصريين حفروا قناة السويس الجديدة خلال سنة بس
كنانة و الرهد ديل تموا 26 سنة
وين القروش اللى اقتطعوها من الشعب السودانى

[كديس فى السروال]

ردود على كديس فى السروال
[julgam] 09-15-2015 05:07 PM
يا كديس حفر لحفريفرق،أصلآ نحن قاعدين نحفر الترعه بإيدينا،،،،،ياود جبره أنا عايز الزمن يقيف فى يوم 29/6/1989 أو القيامه تقوم،،،،ما فارقهf


#1340225 [ابو سحر]
5.00/5 (1 صوت)

09-15-2015 10:57 AM
والله قتلتنا من الضحك
لكن البند الخاص بالترشيح للبرلمان حيوديك في داهية
انا في السعودية ونفسي احج مرة تانية؟؟؟؟
فيد؟؟؟؟

[ابو سحر]

#1340194 [samer]
5.00/5 (4 صوت)

09-15-2015 10:14 AM
تعرف يا ود جبرا انا عاوز ابقى رئيس للسودان , شقله بسيطه , كلام فى كلام و هبر بالكوم و شعب جاهل و مولد صاحبو غائب , و حبة عواطليه و مزازيك و الشعب بيرقص معاك و يا دار ما دخلك شر, ما دستور البلد بقدر افصلى على و البرلمان حقى و السودان ذاتو ببقى حقى , الجيش و فك التسجيلات , ما حمدتى لابس بدله عسكريه مالو عيبو لى شنو فرقت لو كان حرامى حمير ما كل الضباط بنو عمارات هى بقت على سرقة الحمير, نرجع لى طوريتنا ما اجدادنا كانو بيها عايشين و الشعب ذاتو عاوز كده و بعدين خط هيثرو دا بتاع خواجات كفار و نحن زمان فارقناهم فراق الطريفى لجملو - هسع بقت على خط هيثرو و كسراتك , سوف ارجع سوق النخاسه ما كل شئ اتباع انت ما سمعت الوالى الجديد قال شنو ؟ انو كل شئ باعوه كمان انا ما القى حاجه الا ابيع الفضلوا قاعدين و انا ما عارف هم منتظرين شنو

[samer]

#1340127 [أبوقرجة]
5.00/5 (3 صوت)

09-15-2015 09:24 AM
نفسي أعيش في السودان وأرجع من الغربة الكرهتها دي.... عايز مشروع صغير أعيش بيه .. عايز عربيه .... ما عايز بيت ما مشكله بأجر ..

[أبوقرجة]

ردود على أبوقرجة
[أبوقرجة] 09-16-2015 09:46 AM
لكن نعمل شنو .. العمر مشى شديد والله ... وعايز أموت في السودان... مش عايز أموت في أي مكان تاني

European Union [المقتول كمد وبطنه فايره] 09-16-2015 09:06 AM
يا ود الشريف . هو فاطي سطر واحد بس ؟
واللع دهه عيونه زغللت عدييييييييييييييييييييل.

[يا خبر بفلوس] 09-16-2015 07:49 AM
ابو قرجة اسمع كلام اخوانك ما تنشف راسك

[عبده] 09-15-2015 03:15 PM
ابو قرجة ياحبيب تحية من القلب
زيك وزيي الاف السودانيين الدايرين يقولوا كلامك دة وراجين متين الفرصة الطيبة للرجوع للبلد الطيبة والناس الطيبين

نسال الله العلي القدير ان يفرج هم اهل السودان ويريهم ما يسعدهم ،،،،
اللهم امييييييييين

[ود الشريف] 09-15-2015 12:28 PM
ابو قرجة انت زول قلبك نضيف .. عشان كده بقول ليك خليك بنضافتك دي في غربتك لو رجعت السودان يا بقيت زيهم وشالك التيار او بيقت زي زولنا جبرا الواحد ده فاطي سطر .


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة