وكمان زغاريد
09-22-2015 09:27 PM


والبلاد تعاني هذا الشح الواضح في الموارد والنقص البين في كل الخدمات بداية بالعلاج حيث تفتقر مستشفيات الحكومة إلى أبسط الأجهزة التشخيصية والمعدات وإنتشار الأدوية المغشوشة مروراً بالتعليم حيث يجلس معظم التلاميذ في فصول آيلة للسقوط لا يتوفر في بعضها مكان لقضاء الحاجة إنتهاء بهذا الغلاء الفاحش في كافة السلع الضرورية التي أصبح معظمها لا يتناسب وميزانية المواطن المنهكة … في ظل هذه الأوضاع (السيئة) البائسة نتفاجأنا بخبر في الصفحة الأولى أوردته بالأمس (الزميلة أخر لحظة) يقول الخبر أن الصحيفة قد علمت من مصادرها عن شراء البرلمان عدد 27 عربة تايوتا بوكس دبل كابين موديل 2015م بغرض توزيعها على رؤساء اللجان ونوابهم كسيارة ثانية بعد أن تم منحهم السيارة الأولى إبان تنصيبهم وقالت المصادر أن السيارات وصلت نهاية الأسبوع الماضي حيث تم رصها في الساحة الجنوبية بالبرلمان ونوهت مصادر الصحيفة أن السيارات قامت بشرائها الأمانة العامة للمجلس من إحدي الشركات بواقغ 500 ألف جنيه للسيارة الواحدة وأكدت المصادر أن قيمة السيارات مجتمعة تصل حوالى 13 مليون جنيه (يعني 13 مليار بالقديم) …

إنتهي الخبر الموثق بصورة للعربات (مرصوصة داخل البرلمان) ولم تنته دهشتنا … هؤلاء هم
نواب البرلمان الذين تم انتخابهم من قبل الشعب ليمثلوه ويعالجوا مشكلاته الشائكة وأوضاعه المتردية وليقفوا معه في محنته التي فاقت الوصف والخيال ويكونو لسان حاله .. هذا الشعب الذي أنهكته الضرائب والجبايات والرسوم هذا الشعب الذي يموت مواطنيه لعدم وجود (حقنة) أو شريط دواء .. هؤلاء هم نوابه الذين إختارهم ليكونو في صفه فأثروا أن يكونوا في صف (الترطيب) يمتطون عربات سعر الواحدة منها (نصف مليار جنيه) في حين أن مستشفي أم درمان الذي يقوم بخدمة ألاف المواطنين (كمثال) لا يوجد به جهاز أشعة مقطعية بل أن معظم المستشفيات بالعاصمة (خليك من الأقاليم) لا توجد بمعظمها أجهزة قياس الضغط الكافية!!
كيف لهؤلاء النواب ان يمتطوا هذه العربات الفارهات وديون السودان قد قاربت على الخمسين مليار دولار كما أن هنالك عجزا في الموازنة الأخيرة يبلغ عشرات المليارات (بالجديد طبعن) كيف لهؤلاء النواب أن يمتطوا هذه الفواره من العربات نصف المليارية وهنالك الكثير من الأسر تعيش على (طقة) واحدة في اليوم ؟ كيف لهؤلاء النواب أن يمتطوا هذه الفواره من العربات نصف المليارية وهنالك الكثير من الأسر التي خرج أفرادها إلى الشارع يسألون الناس اعطوهم أو منعوهم ؟ كيف لهؤلاء النواب أن يمتطوا هذه الفواره من العربات نصف المليارية وهنالك أكثر من 14 ألف تلميذ بالعاصمة وحدها لا تتوفر له وجبة (الفطور) ،كيف لهؤلاء النواب أن يمتطوا هذه الفواره من العربات نصف المليارية وهنالك العديد من الأسر تجلس في العراء تلتحف السماء بعد أن (ماصت) الأمطار الأخيرة منازلها!!
إن الإنسان والله ليستغرش غاية الإستغراش أن تقوم (حكومة) أعلنت ارتفاع حالة ودرجات التقشف القصوى نسبة للظروف الاقتصادية التي تعيشها البلاد بشراء عربات لهؤلاء النواب بقيم 13 مليار جنيه بينما المواطن الذي دفع بهم إلى قبة البرلمان لا يستطيع شراء (طلب فوول) يسد به رمقه.. ولكن يبدو أن (الحكومة) تعمل بمبدأ المثل القائل (أكرم الفم تستحي العين) وإنها تقوم بتقديم (السبت) عشان تلاقي (الأحد) وأقطع دراعي أن (الأحد) في الطريق وهو (زيادة الكهرباء) وأن الموافقة عليها وتمريرها من قبل أصحاب العربات نصف المليارية سوف تصحبه (صفقة قوية) وهتافات وزغاريد (كمان) !!
كسرة :
لو أن هذه العربة النصف مليارية هي الثانية التي يتم تمليكها للنواب بعد أن تم منحهم عربة من قبل …(كما أوردت الصحيفة) تكون مصيبة والله !!
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و
• كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و


تعليقات 17 | إهداء 0 | زيارات 8700

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1345484 [جنو منو]
0.00/5 (0 صوت)

09-27-2015 07:31 AM
السياره الثانيه فى الشهر ..!!؟

[جنو منو]

#1345110 [الناهه]
5.00/5 (1 صوت)

09-25-2015 10:05 AM
يااستاذ الفاتح ..كل عاموانت واسرتك بخير ..تحيه وسلاممن عندالله ..اما بعد..
كل ماذكرت في مستهل مقالك الجميل والمنطقي .. جوع ..غلاء .. وتردي التعليم والعلاج وغيرهما من الترانيم المحفوظه منذ ما يزيد على ربع قرن .. ما كل هذا حصل الا لان الله مكن بعضنا على المال العام .. المال لهم والقلم بايديهم فلا تسالهم عن شعب لا يعرفون عن شيئا فهم قد فارقوه وفارقوا حياة الفقر هذه الى احيائهم وقصورهم بتمكين من الله جزاءا وفاقا فلماذا تذكرهم بماض لميعدوا يذكرون منه شيئا ابدا ولا يريدون ان يتذكروه ابدا..يااخي هم ولدوا الشعب ده ونسوه ولا شنو مايجوع ولا يروح فطيس .. وهل ينسون للشعب حركات سبتمبر ديك ومن بعدها الانتخابات قاطعوها وقعدوا في بيوتهم عشان الجماعه غضبوا عليهم وبقوا يجوهم مره بالكهرباء ومره بالمويه ومره بالقمح ومره بالدولار الجمركي ومره بتضييق ناس الضرائب واطلاق فرق الجباة والعتاة الى كل هوب وصوب مع ممارسة اقصى واقسى درجات الفظاظه والجلافة ..ومع ذلك تعطون نفسكم الحق لتتكلموا حول عربات اطفال وطلبه الجماعة بالمليارات ونواب البرلمان ومجلس الوزراء وحتى ولوواحد اخد سبيكة سبيكين ذهب بغرض التسوق من الخارج او علاج ضرسه اقمتم الدنيا ولم تقعدوها كأن المقبوض عليه ده مواطن عادي ساكت ما ابن واوزوجه مسئول وما فكرتوا لو ما عاش الجماعه ديل في متوى معين كيف حيكموكم ..وده كله كوم كان الواحد عمل ليهو قرش قرشين للمستقبل قعدتو تعملوا ليهو خط هيثرو وكل يوم واوا زياده يااخي رص وواواتك دي وصلها واو عديل في زول خايف منك ال.....( سلاكتك والله وعذرا بس هي جات كده) والقافله تسير ولن تتوقف ابدا والرد الرد كباري وسد وحاربوا معنا الجقور بكل وطنيه وتجرد وكن وطنيا مخلصا .. اها اورنيك 15 الكتروني تاني بتقدر تخوف ناس النفايات زي المره الفاتت يقبضوك ويلقوا ما في طريقه معاك ويفكوك .. واضيف واو لملف خط هيثرو ..عرفنا الفاسد الاجنبي هل عرفت لينا الفاسد الوطني؟

[الناهه]

#1344873 [مغترب بس]
5.00/5 (1 صوت)

09-24-2015 08:40 AM
لو أن هذه العربة النصف مليارية هي الثانية التي يتم تمليكها للنواب بعد أن تم منحهم عربة من قبل …(كما أوردت الصحيفة) تكون مصيبة والله !!
ووانا اقول ليك ي عمنا جبرة (( لا مصيبه ولا اي شئ وده شئ عادي جدا وممكن تكون دي العربية التالته لان الاولي للسيد النائب والتانيه تجيب طلبات البيت وتودي الاولاد المدارس وتجيب الخضار والاخيره دي النصف ملياريه دي للمأموريات)) انتهي حسبي الله ونعم الوكيل وهم فى غفله من امرهم وانشغلو بالدنيا والمناصب والكراسي وهي والله ليست بدائمه ولا دائم الا وجهه الله .ونسو ان الله يمهل ولا يهمل وسف يسألهم الله ويلاقون عزابهم بكل م عملوهو فى السودان والمواطن.
كسرة: ديل الذين اعمي الله عيونهم وختم علي قلوبهم ولهم عذاب اليم بما كانو يعملون
كسره ثابته:المنصب ده لو بدووووم لي واحد ما كان وصلو ليهو

[مغترب بس]

ردود على مغترب بس
[دخلو الناس المساجد وهم خشو السوق] 09-26-2015 02:26 AM
السلام عليكم وكل سنة وانتم طيبين..
من الذي قال هولاء اعمي اللة عيونهم وختم علي قلوبهم
هولا رجالا يرتادون المساجد ولا يقولن الا حسبنا اللة .. واحسب ان ... وكل الكلمات الطيبات.. واللة قلبنا اتهرد
ولك السلامة


#1344830 [الغلبان]
0.00/5 (0 صوت)

09-24-2015 12:37 AM
لا تعليق دا انا غلبان على قول عادل امام

[الغلبان]

#1344748 [على]
0.00/5 (0 صوت)

09-23-2015 06:05 PM
ياسيد الفاتح النواب فى دولنا تلقاه بيصرف الوراه والقدامة وبالملاين عشان خدمة المواطنين ماطبعا اول حاجة بفكر فيها يرجع قروشوا بالمليارات مالو ومال المواطن ماتطير عيشة المواطن مااصلها طايرة من زمان ولاتنسوا حلايب سودانية

[على]

#1344712 [موخيا]
5.00/5 (1 صوت)

09-23-2015 04:05 PM
لك أن تزغرد لرئيس الاورغواي ( الكافر ) جوزيه موخيا .. و هو يتقاعد مع عربته ( الخاصة ) خنفساء الفلكسواجن موديل 1977 !!! بينما أهل المشروع الحضاري يفاخرون بالفارهات اليابانية آخر موديل بين الخرطوم _ كسلا _ القضارف و نهر النيل ؟ !!

[موخيا]

#1344671 [توفيق عمر]
5.00/5 (2 صوت)

09-23-2015 12:59 PM
يا جبرة
الولا العيد مبارك عليك وربنا يحقق الاماني
وما داير ازيد ليك ارتفاع ضغطك اكثر مما هو مرتفع
لكن المشكلة يا جبرة اانك مسبب مشكلة لي نفسك من غير سبب لانك عارف انك بتازن مش في ملطة بل في خوارزم ذاتها
انت وانا عارفين انو عندنا مشكلة كبيرة خلاص اسمها ليس كما قال الصحفي عثمان ميرغني انو الشعب السوداني ما بعرف يحلم
لا المشكلة ان الشعب السوداني او الغالبية العظمي جدا منو ودي فسرا براك لانك بتاع ماثيماتك وكدا انو الغالبية العظمي فيهو ويمكن اقدر اقول كلو كمان انو ربنا لم يسهل ليهو مسالة انو يمرق يشوف بلاد برا المتقدمة جدا طبعن عشان يقدر يقارن بين حالنا وبين حالهم ولو دي حصلت ليك علي ناس البشير ديل ما كانوا قعدو اسبوع في الاماكن التي هم بعيدين جدا جدا من ان يكونوا جديرين حتي بالاقتراب منها خليك انو يكزنوا 25 سنه قاعدين باطمئنان فيها
المشكلة انو الشعب السوداني الهسع دا او الذي لم تتوفر له اسباب المقارنة وبين الشعوب المتحضرة انو هذا الشعب شايف انو كدا احسن حاجة ولو اسرة او جيران او حتي الحلة كلها الجاي منها هذا المسمي زورا وبهتانا نائب او وزير عرفو انو اؤلاء منحوا عربة كلهم حا يفرحوا والفرحة تشرطهم لانهم ضمنوا ليهم توصيله اذا حصل فرح او ترح في قرية او حلة السفر ليها يستوجب راحة
تحدثني عن السودان وليه الغلب الفيهو دا كلو واقول لك يا جبرة لو القيامة ما قامت يوم 29 في الشهر دا فشيل علي السودان الفاتحة

[توفيق عمر]

#1344625 [سودانى كايس خلاص]
0.00/5 (0 صوت)

09-23-2015 10:12 AM
ومالو دول البترول احسن مننا فى شنو
البيت العادى فيه كم عربيه واهم عربيه حقت المقاضى يعنى الخضار واللحمة والفواكة والذى منو .... ودى لازم تكون دبل كبينه وحوض للسواق والحارس وكبينة الشغاله والطباخ وحوض المقاضى .. ماهو يا ناس يا ما بتفهموا فى حاجات الترطيب دى ... المسافه بعيده من تكيتنا الجنب المستشفى العسكري لحدى بقالات اسف سيوبرماركتات حى الرياض وفى واحد منهم هناك شنو الما فيه ؟! لازم نتقضى منه ماهو تبعنا برضو ... ولازم نتمم فيه وإلا ..... بس
فهمتوا .. فهمتوا !!
ما فهمتوا غطسوا ريسيكم الما ليها لازمه دى فى موية النيل الفى المقرن التحت التكيه

اتفوووووووووووووووو
ببزق السفه والرماد الفى خشمى
بس .. فيها حاجه

( سودانى كايس خلاص)

[سودانى كايس خلاص]

#1344623 [jaaaaah]
0.00/5 (0 صوت)

09-23-2015 10:12 AM
جاتك واو جديده
والله مع ديل الا تربط سارينا
واووو واووو وايووو

[jaaaaah]

#1344617 [QUICKLY]
3.00/5 (1 صوت)

09-23-2015 10:03 AM
يا جبرا الكوز أول ما يمسكوا سلطة يقول ليك (لا لدنيا قد عملنا...وهي لله ) وشغال بي وراك ينهب نهب شديد يمتطون الفارهات من العربات أربعة و الفارهات من النساء أربعة والاربعة عمارات بأربعة طوابق حتى أن يصل مرحلة كوز كا مل الدسم ( كوز دفع رباعي )
يا عزيزي منتظر مين يجي يحاسبهم مثلا؟؟!! ... عمر البشير ؟؟
من أمن العقاب ساء الادب والاسلامويين أمنو العقاب والمساءلة من الشعب فساءو الادب وطفروا وتبجحوا كمان
"جنينة وغفيرها نايم"
عشان كدا الشعب السوداني يلوم نفسوا لسكوته الطويل هذا

أقعدوا الطموا ولولو بس !

[QUICKLY]

#1344593 [بت البلد]
3.00/5 (1 صوت)

09-23-2015 08:48 AM
ان لم تستح فافعل ما شئت !!!

[بت البلد]

#1344570 [النخبة بياعة الوهم]
2.00/5 (1 صوت)

09-23-2015 07:21 AM
هذا المخلوق البشع الذي يمشي على جثث الشعب المغلوب على امره ، هذا المسخ هو الوليد الشرعي لعراب اخوان الشيطان. وهو الوليد الطبيعي بين تزاوج الترابي و السفلي. وبعد وضع هذا الوليد الشائه يتمخض الشيخ الان ليلد "الخالف" بديلا للانقاذ الذي الان في غرفة الانعاش.
الثورة ارادة . والارادة تصنع سلاح الثورة و تصنع المستحيل.

[النخبة بياعة الوهم]

#1344516 [جامد]
0.00/5 (0 صوت)

09-23-2015 12:27 AM
بس دي تعتبر رشوى..

[جامد]

#1344515 [سوداني انا]
0.00/5 (0 صوت)

09-23-2015 12:17 AM
اخالف جميع القراء في الرائ في هذا الموضوع . ما هو دور نواب الشعب الاساسي ؟ وماهو دورنا كقراء وصحف يجب نقدنا يكون مبني علي عمل الشخص وليس الشخص نفسه فمالنا وسيارات النواب اواكلهم وشربهم ووووو الخ في الاشياء الشخصية يهمنا ان ننقد النواب لماذا لم يسألوا المسؤولين في صميم عملهم . بحثنا ونقدنا يجب ان يصب في المصالح التي تهم المواطن .اذا النائب ما عندوا سيارة ولم يعطي سيارة كيف يراقب اعمال الوزراء والولاة خلينا منطقيين شوية وواقعيين اي شخص فينا اذاا ترقي وصار مدير قسم او فرع يعطي وسيلة لتنقله حتي يراقب الاداء المسئول عنه وان لم يتم تهيئة الجو المناسب سوف لن يقدم اي ابداع . وكل عام وانتم بخير

[سوداني انا]

ردود على سوداني انا
[جمة حشا المغبون] 09-27-2015 05:02 PM
ههههههههههههههههههههها يا بت البلد والله انت بت البلد جد الله يعطيك العافية وكل سنة وانت طيبة

[مغترب بس] 09-24-2015 08:50 AM
اخي الكريم كل سنه وانت طيب
يعني انت مقتنع بالكلام القلتو ده انو لازم يكون عندو عربيه عشان يراقب الوزاء والولاه ؟؟؟ بالله ده كلاااااااااام يراقب شنو ؟؟؟؟؟ يعني المده الطويله دى م كانو براقبو عشان م عندهم عربات قيمة العربيه نص مليار ؟؟؟ مالك كيف تحكم
طيب مافي مشاكل بعد العربيات جاتم وعربات جديده وقيمة الواحده نص مليار نشوف انو حيراقبو الوزاء والولاه ولا لا ويحاسبوهم علي اعملاهم ولا لا؟؟؟
وانا بقول ليك لالالالالا والف لا لا بشوفو عملهم ولا بشوفو الوزراء ولا بوقفو اي قرار ضد المواطن.

United States [بت البلد] 09-23-2015 08:59 AM
هو من الأول ما قالوا ليك دي السيارة التانية ؟؟؟ وبعدين هم قدموا شنو للمواطن طيلة هذا الربع قرن من الزمان ؟ ومنو القال ليك دي سياراتهم؟ دي سيارات الشعب ومن دمه وعرقه... ومتى كان مدراء الأقسام يؤدون عملا لمصلحة المواطن انت كوز وللا شنو؟؟؟!!! قال سوداني انا ... أحسن قول: مطبلاتي أنا


#1344500 [الدرب الطويل]
0.00/5 (0 صوت)

09-22-2015 11:29 PM
تعليق على الكسرة.. شنو يعني تكون مصيبة؟؟.. ما هو مصائب الحكومة كتييييييييرة والحمد لله.. هسي يا استاذ كسراتك و واواتك دي ما اكبر مثال؟؟!!..

[الدرب الطويل]

#1344482 [كاسـترو عـبدالحـمـيـد]
5.00/5 (2 صوت)

09-22-2015 10:34 PM
اصلا هؤلاء النواب فازوا بالتزوير فرواتبهم حرام وسحت وكل ما يأتيهم من هذه الوظيفة حرام ينزل فى بطونهم وبطون زوجاتهم واولادهم . وهم سوف يسألون عنه يوم القيامة . اما موضوع العربات فالمسؤول الأول والذى سوف يحاسبه الله يوم القيامة هو رئيسهم البشير . نعم البشير بحكم المسؤلية وبحكم انه يعلم ولم يقوم بأى عمل يوقف هذا الغش والفساد .

[كاسـترو عـبدالحـمـيـد]

#1344475 [العبيد]
4.75/5 (3 صوت)

09-22-2015 10:18 PM
واللة مصيبة كبيرة ونحن السبب

[العبيد]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة