المقالات
منوعات
خربشات مسرحية (6)-تحديث كشف الظالمين
خربشات مسرحية (6)-تحديث كشف الظالمين
09-21-2015 09:47 AM

بسم الله الرحمن الرحيم
خربشات مسرحية (6)
تحديث كشف الظالمين

( يفتح الستار علي نفس المشهد السابق . الشيخ ومن وراءه تلاميذه يدخلون حاملين السواطير والعصي ويرهبون به المجموعة الصامتة ، التي تتراجع وتلزم راكوبتها).
فللي للشيخ : المسرحية ماشة تمام يا شيخنا. إستولينا علي السلطة
وسلمناها للعسكري حقنا.
الشيخ : ( لتلاميذه ) ذاع البيان ؟
قرضمة : ذاعو بضبانتو ياشيخنا ؟
الشيخ : ( لتلاميذه ) تعالو أوريكم تعملو شنو
( التلاميذ يتحلقون من حوله ويشرح لهم ما لا نسمعه. صوت المعلق يصدر من الخلفية )
الصوت : ( معلقا من الخارج) الليلة ..!!... الفصل التالت ظهر .... فتحوه للطيش... والدراويش...والمهابيش ... واللألفا شيخا ضعيفون.... يناكف نسيبه ، ويكاوي ف حسيبه . مندوب للدين معتبر ... دس الكتاب والسنة ورا ضهرو وإخترع لينا دينا براه.....رفع رايات : هي لله ....هي لله .. لينا السلطة ومعاها الجاه .... يهو دا الشغل واللا بلاش: خمخمو كل القروش....ربو اللحي والكروش.... عملو فيها امنجية... ...الناس تخافهم...وزعو التعليمات بيناتم : أي زول يعارضكم ...فسحوه...جيهو... مشروعنا الحضاري لازم يصل للبوادي والحضر...الدعوة لله ملحوقة..... إدعو لينا نحنا ساكت...إمكن إبليس ياخد بخاطرنا...والخيرات تنزل عليكم مطر.
كهل 1: ( من تحت الراكوبة) ياشيخنا .. يامولانا... يا أمامنا ... يا
جنابو.... أقيفو..كفاكم..مشيين بينا لوين تاني؟!!. .ياهو دا الصراط
المستقيم!!.
كهل2 : ( من تحت الراكوبة) ...قبل ما نشوف وشوكو وتنخرو في
عضمنا... زي السرطان ... كنا عارفين طريقنا تمام ..بنطلع دايما
البريمو.... البرنجي .... زي الحصان. والليلة خارت عزيمتنا ...
رجعنا طيش الطيش.
رجل 1 : والسبب ، حكومات تجي وتفوت...دا يلطش ... وداك يكوش دا
يعسر وداك يكسر.
الصوت : ( يتنهد معلقا من الخارج) ....عموما كتر خيرك ياخواجة ....
خليت لينا تذكارا لمقومات دولة ... عيونا فتحت علي بلدا قوية ،
فتية ، تتصدر قارتا ومعاها الجيران من العربان.
رجل2: ( من تحت الراكوبة)...الفصلين براهم ما قصرو.... خشو في
مناكفات ونزاعات ليوم الليلة ... تقول شنو؟!.. ورث حر.
رجل1 : ورث الأرض للعباد الصالحين.
إمرأة 2: وفساد الأرض ...شغل المترفين ...وينم الصالحين؟.
كهل2: ( لرجل2 من تحت الراكوبة) هووي.. أسكت ياود..... ما تهبش
بيوت الطوائف بعدين يسخطوك.
رجل2 : أصنام العجوة دي يفرحو بيها الغفلانين.
رجل1 : إنما يتقربون بها إلي الله زلفا.
إمرأة 1: البلد دي " قادة" دين واللا شنو؟
رجل3 : أي زول يعمل فيها شيخ وفكي وولي يبارو...ومنهم شغالين
سفلي عديل.
كهل2 : ( يستعذ) أعوذ بالله. قالو إنو الولي ما بعرف إنو ولي!!.والهبل
ديل بعرفوه كيف؟
كهل1 : ( يحزن)...الجهل بالعلم وقلوبنا الضعيفة يهي دي إضيعتنا.
رجل 1: ياللا يا أولياء السوء ... وعلماء الغفلة... صلحو لينا البلد!!.
إمرأة2 : عليك الله... ياود التلات خمسات...إكشح لينا فاتحة كاربة تزيح
لينا " الغمة" وبعدين ...أمسكها براك.
إمرأة1 : بري بري بري.... يا عين يا عنية ... ياكافرة ياعدوانية..بإذن
الواحد الأحد...أخرجي.
رجل3 : عجيب!! ...لا كتاب مطبق ولا سنة شغالة ولا دستور شيفنو.
كهل2 : اتناشر دستور " مطرشق" مرو علينا...عديتهم بعمري.
رجل1 : دستور يا خوانا...دستور. شبكتونا...دائم .، مؤقت ، دائم ، معدل
إنتقالي وفي النهاية طلع " إنتقائي" مع وقف التفيذ.
كشحة ( للشيخ ) وحنحكم بشنو ياشيخنا ؟
الشيخ : كدا إنتو" إتمكنو" في الأول وبعدين نشوف طريقة...
ملقاط : ( للشيخ ) ما الكتاب والسنة حاضرين وبيسعو الجميع؟.
الشيخ : ( بزهق) بعدين ...بعدين ...الكتاب والسنة دايرين " تنقيح" كدا
خليني أول أعمل لي حبة " فُوكس " ومعاهم كم " راو"
أستعرض بيهم عشان يخافو ويعرفو أنو نحنا جادين في تجديد
الدين... وبعدين " أنزل" عليكم قراراتي " تنزيلا".
الهمباتي : والدين دا حيجددوه كيف ياشيخنا؟.
الشيخ : ( مزهوا) دا شغل علما ومفكرين.. السلف رجال ونحنا رجال.
قرضمة : ( معترضا) آي .!! لكين السلف ديل كانو شديدين ما بيخرمجو.
الشيخ : ( لا يكترث ويواصل) نحنا .. مشروعنا الحضاري...اللي لسه
قاعدين نألف فيهو دا ... فوقو نقد لاذع للخرافات وفتاوي تبيح
المحظورات عشان الناس تاخد راحتا وتمشي لقدام.
فللي : ( بزهق) يعني ننتظر لمن تخلصو شغلكم دا ؟
الشيخ : ( معترضا) لا... مسيرة "الإعجاز" لازم تستمر...كان غلبكم
الحكم...إصرفو.
هبشة : ( لزملاءه فرحا ) ... هيه ... أدونا رخصة ياكيزان ....أحكم ياود
علي كيفيك ومن راسك...لغاية ما يخلصو من تأليف المشروع
وبعدين حلك ...لمن يطبق.
الشيخ : ( وهو يهم بالخروج) ... ياللا... خليناكم بعافية.
كشحة : ( للشيخ ) علي وين ياشيخنا ؟.
الشيخ : ( قبل أن يغادر ويختفي ) عقابل ليكم... ماشي كوبر.. ما تنسو
العيش والحلاوة.
فللي : ( يهز كتفيه مستغربا ) الحكاية شنو يا خوانا ؟.
الهمباتي : ( لزملاءه) نطبس ؟.
زملاءه : ( معا ) نطبس.
( التلاميذ يلبسون أقنعة اللصوص ويتوزعون في كل إتجاه حتي يختفوا.
من تحت الراكوبة رجل1 يراجع كشف اللصوص من ورقة طويلة تمتد
الي الأرض).
كهل 2: ( لرجل 1 ) أهه... وحترفعهو لمنو؟
رجل1 : ( يرد ) ننتظر لمن يجي القضاء النزيه.
إمرأة 1: (من تحت الراكوبة)...وينو القضاء النزيه المستقل ؟...اللي ما
بخادو في الحق لومة لائم؟!.
رجل2 : ربنا سبحانه أمر بالعدل وديل أمروا بالظلم.
إمرأة 2: القضاة في زمنا بقو ظل الحكام في الأرض..وإخترعتو قانون
حماية اللصوص؟!.
رجل3 : أوعاك يكونو حلفوكم علي مجلة " الصبيان". جاتكم بلا ... دا
إنتو طلعتو في كشف الظالمين ...بعد الحكام طوالي .
رجل2: وينكم يا جند الله ... يا جند الوطن ؟!. آخرتا بقي العدو ...المواطن
المسكين دا؟!.
كهل1 : دا إنتو طلعتم " أظرت" من ناس "بني أمية". وبرضو مسجلين
في كشف الظالمين.
رجل3 : الشغلانة قلبت..حكامنا بقو شغالين بالأجرة عند أعداءنا.
كهل2 : ( يتأوه) آهه .. وآهه يابلد المآسي ...ضيعتو سنين عمرنا
ساكت..لا بلدا نفعنا ولا حتي نفعناه...( للرجل الذي بجانبه) قبلني
ياولدي علي القبلة).
كهل1 : تسعة وخمسين سنة ضاعت من عمرنا ونحنا بنتفرج
علي لعبة الزعامة والكراسي....روحو يا "ساسة" يا ناس
"العواسة" ...الله لا يكسبكم دنيا وآخرة .
الصوت : ( معلقا من الخارج) آهه .. وآهه يابلد الغافل والناسي... ربك
وهبك من كل النعم....وبطمعنا...وحسدنا.. بقت نقم!!.
إسمع ياخوي منك له... سيبكم من ناس الهوس ديل وإتخارجو
براكم !! يهم... علي يدكم...مستغفلنا ومستعبدنا.. ومضيعنا...كان
كان ماعارفين آخرتا ماشين لوين ...تبقي كارثة!!.
كهل2: وين القبر ومتين الحفر؟
كهل1: الله أعلم ...راجع حسابك بسرعة وإنسي الكلام الخارم بارم دا كلو.
رجل3 : ( يغطي كهل2) ركز معانا يا جدي ...إستغفر وسبح كتير... ديل
هما اللي بينطقوك الشهادتين صح وهما برضو اللي بيجيبو ليك
حقك م الظالمين.
كهل 2: اللهم حللنا ضيوفا بأرض الظلم والظالمين...ونأتيك ، شاكرين و
حامدين ...لجلال وجهك وعظيم سلطانك.
( كهل2 ينطق بالشهادتين ويسلم الروح وسط حزن المجموعة
الصامتة).
(يتبع) 7
الدمازين في : 21/09/2015م.
محمد عبد المجيد أمين (براق)
[email protected]


تعليقات 0 | إهداء 0 | زيارات 522

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




محمد عبد المجيد أمين
مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2016 www.alrakoba.net - All rights reserved

صحيفة الراكوبة