هذه الــ (تاني مافيشات)
09-22-2015 05:43 PM


(ما هو تعليقك على مسمى (حكومة مافي) الذي يطلق على المناطق الطرفية بالعاصمة)، كان هذا أو نحوه أحد الأسئلة التي طرحتها الغراء (التيار) على مدير دائرة الجنايات بشرطة ولاية الخرطوم في حوارها معه المنشور أمس، وجاءت إجابته على هذا النحو (سيطرنا على أطراف العاصمة الملتهبة وتاني مافي حاجة اسمها حكومة مافي).. هذه الإجابة ذكرتني بطرفة للدكتور منصور خالد كان قد أشار اليها في أحد منشوراته، كما ذكرتني أيضاً بكمية مهولة من التصريحات الرسمية التي وردت فيها عبارة (تاني مافي)، ومؤدى طرفة د. منصور أن أحد المواطنين بعد أن ضاقت عليه سبل العيش وكان يرى أن الحكومة هي السبب في كل معاناته وضيقه ولهذا كان عقب كل صلاة عشاء يدعو يا رب بكرة الواطة تصبح ما نلقى الحكومة دي... يا رب بكرة الواطة تصبح ما نلقى الحكومة دي، واستمر على هذا الحال والمنوال زمناً وعندما لم يستجب لدعائه لم ييأس، فقط غيّر الدعاء ليصبح يا رب بكرة الواطة تصبح الحكومة دي ما تلقانا.. يا رب بكرة الواطة تصبح الحكومة دي ما تلقانا.. واليكم أدناه التصريحات التي حملت عبارة (تاني مافي) مما أسعفتني به الذاكرة.
تاني مافي عضة..
تاني مافي تعيين..
تاني مافي جهة حكومية حتشتري عربية إلا من جياد..
تاني مافي برتكولات ولا اتفاقات ولا خواجات..
تاني مافي سبب لحمل السلاح إلا اذا زول داير يخرب ودافعو الشيطان..
تاني كراع برة وكراع جوة مافي..
تاني تمرد مافي..
تاني منصب بالبندقية مافي..
تاني جبهة ثورية مافي..
تاني نص نص مافي الداير يمشي عديل كلامو مع الحكومة والما عايز داك الجبل ولو ما عندو بندقية بنديهو..
تاني شلليات داخل المؤتمر الوطني مافي..
تاني تفاوض مع قطاع الشمال مافي
تاني مافي مؤتمر تحضيري..
تاني مافي جنوبي بنزل مطار الخرطوم بدون فيزا..
تاني فصل تعسفي وللصالح العام مافي..
هذه هي بعض الــ(تاني مافيشات) التي زعمتها الحكومة وحزبها وفي انتظار (الفيشات) على رأي ذاك الشافع الذي خرج ليرى من هذا الذي يطرق بعنف وتوالي على باب منزلهم، فوجد رجلاً عاجله بالسؤال (ناس البيت ديل مافيشين) رد الشافع بسرعة لا (فيشين).


[email protected]



تعليقات 4 | إهداء 0 | زيارات 1640

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1345495 [جنو منو]
0.00/5 (0 صوت)

09-27-2015 08:11 AM
نسيت اهم حاجه ياود المكاشفى .. تانى مافى وطن اسمو السودان ..!!

[جنو منو]

#1344895 [الفكي (الفقيه ) / اوهاج احمد اوانق دينق]
0.00/5 (0 صوت)

09-24-2015 11:12 AM
تاني النهب المصلح مافي ، تاني حج بقروش حكومة مافي ،تاني الحريات الأربعة مافي الا مع يوغندا ، تاني الحوار مع دولة جنوب السودان المارقة العميلة مافي ، الا بعد تغيير اسم الحركة الشعبية و الجيش الشعبي لتحرير .

[الفكي (الفقيه ) / اوهاج احمد اوانق دينق]

#1344528 [ابوانوار]
0.00/5 (0 صوت)

09-23-2015 01:24 AM
نسيت تاني ما في تمكين . وبالمناسبة وين كمال حقنة أهو أخوانا الجنوبيين رجعوا لينا تاني . آخ يابلد بدون وجيع .

[ابوانوار]

#1344443 [حاج علي]
0.00/5 (0 صوت)

09-22-2015 08:14 PM
لخصتهم تب يا ود المكاشفي لك الشكر

[حاج علي]

حيدر المكاشفى
حيدر المكاشفى

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة