المقالات
السياسة
من عندي.. توصيات (دليفري)!!
من عندي.. توصيات (دليفري)!!
10-13-2015 11:43 PM



بمنتهى العقل.. بالله أحسبوها معي.. مؤتمر الحوار الوطني انبثقت عنه (6) لجان لتبحث المحاور الرئيسية التي يقوم عليها عماد المؤتمر..
قول واحد: لجنة (الحريات والحقوق الأساسية).. بالله عليكم مهما فعلت هذه اللجنة.. ولو اجتمعت لعشرين سنة هل بإمكانها أن تأتي بأفضل مما هو مكتوب في الباب الثاني من دستور السودان الحالي.. الحقوق المنصوص عليها لا تتوفر حتى في الدستور الأمريكي.. لماذا نعيد اكتشاف العجلة!
قول اثنين: لجنة الهوية.. وهذه أمرها أكثر عجباً.. يا جماعة (الهوية) ليست منتجاً يمكن تصنيعه أو التقرير فيه عبر مؤتمر.. مثلما (النفط) يتخلق في باطن الأرض عبر أزمان طويلة كذلك (الهوية).. هل سمعتم بدولة صنعت النفط أو أقامت حقولاً لزراعة النفط.. كذلك (الهوية) تتشكل في جينات تربة الأمة عبر آلاف السنوات لتمنح الشعوب مِزَّاجها الإنساني.. ماذا ستفعل الحكومة لو توصلت لجنة الهوية إلى أن هويتنا عربية.. أو أفريقية أو حتى توصلت إلى أن هويتنا:
(الأم سليلة أمهرا والوالد من قلب أثينا.. ترك الأهلين ذات مساء وترنح برا وسفينا..).. هل سيعاد كتابة ديباجة الدستور لينص على منبع سلالتنا الطاهرة؟ ماهي المخرجات المتاحة لهذه اللجنة؟؟ بالتأكيد لا أكثر من أن تقول جملة واحدة فقط (هويتنا سودانية)..
قول ثلاثة: لجنة العلاقات الخارجية.. بالله هل مشكلة الفرقاء السودانيين هي في اختلافهم على العلاقات الخارجية؟؟ هل هي لجنة لتكون بديلاً لوزارة الخارجية في رسم السياسات الخارجية مثلا؟؟
قول أربعة: لجنة السلام.. رئيس هذه اللجنة قال إن اللجنة ستنطلق نحو الولايات لتحقيق السلامّ!!.. هل هي لجنة لصياغة توصيات تستهدف صناعة السلام.. أم لجنة لمفاوضات السلام ؟؟
وحدها اللجنة السادسة هي صلب الموضوع وأساس الخلاف والاختلاف.. (لجنة الحكم).. قضية الحكم.. هنا كل شيء.. ولو كسبنا الوقت وفُتح الحوار المباشر الشفاف حول قضية (الحكم) لكان ذلك أحفظ لجهدنا ومالنا ووقتنا الثمين..
هذا المؤتمر ليس لوضع دراسة (أكاديمية) أو إستراتيجية بعيدة المدى.. هو مؤتمر محدود بايجاد مخرج للأزمة السودانية.. فقط لا غير.. وبكل أسف يبدو من التصريحات التي تخرج كل يوم من قاعة الصداقة أن الغالبية العظمى من المشاركين في اللجان جاءوا مدججين بأطنان من الكلمات والآراء في تفاصيل لا علاقة لها بالأزمة السياسية الراهنة..
والله العظيم.. ثلاثاً استطيع في جلسة لمدة ساعتين فقط كتابة كل التوصيات التي يمكن أن تصل إليها هذه اللجان.. ليس من باب (الشطارة) لكن لأنها توصيات مكررة سبق تضمينها في مئات المؤتمرات وورش العمل بل حتى الاتفاقيات السابقة التي وقعت بين الفرقاء السودانيين.. لماذا نهدر الوقت يا جماعة في (المعلوم بالضرورة).
لماذا.. لا نختصر الأمر كله في (قضية الحُكم) فهنا ترقد كل أفاعي الأزمة السودانية المزمنة..!!

التيار


تعليقات 18 | إهداء 0 | زيارات 3007

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1355257 [على حمدابراهيم]
0.00/5 (0 صوت)

10-16-2015 07:52 AM
صباح الخير ياستاذ عثمان

لقدجبتها من الآخر فى هذا العمود الذى اوجز فى ما قل ّ ودل كل الحكاية ولكن لا حياة لمن تنادى

يعطيك ويعطينا العافية ومعنا البلاد المكلومة

[على حمدابراهيم]

#1355125 [كمال الدين ضوالبيت حامد]
0.00/5 (0 صوت)

10-15-2015 06:54 PM
كلام مضبوط وعملى لكن مين من المؤتمرين مستعد يتنازل عن السلطة

[كمال الدين ضوالبيت حامد]

#1354736 [ابوعمه]
0.00/5 (0 صوت)

10-15-2015 02:12 AM
من العجيب أيها الزنديق وانت تقدم النصائح قلت في حديثك المبهم وَيَا عديم الفهم وانت تقول يا جماعة (الجماعة ديل منن من الله يعلم) الهويه ليست منتجا يمكن تصنيعه وشبهتها بالبترول تتكون عبر آلاف السنين عجبا والله يا صاحب العقل العظيم ولن أخوض معك حتى تحاول ان تفهم ما هي الهوية ولكني أحيلك لامر واحد عندما قال سيدك المدعو علي عثمان محمد طه نحن نريد اعادة صياغة الانسان السوداني وإعادة الصياغة يا سيد الصياعة هي تشكيل جديد للهوية السودانية وأقول لك تلعب القوانين دورا مهما في تشكيل الهوية وهو امر ليس بالشائك ولكنك يا ابو العريف فاهم كل شي هلا احتفظت بنصائحك لنفسك

[ابوعمه]

#1354671 [الواعظ]
0.00/5 (0 صوت)

10-14-2015 09:34 PM
الفيهم اتعرفت انت عاايز تصل لشنو هريتنا تنظير وفلسفة فارغة مشكلتنا في امثاالك ودوركم المرسوم ببراعة ياهندسه كفااننا اكتب لينا نكاتت احسن وضحكنا

[الواعظ]

#1354660 [fatmon]
0.00/5 (0 صوت)

10-14-2015 08:59 PM
ما تخجل أمشي أقعد معاهم هم جماعتك وإنت زولهم مافي داعي للمعاينة من الشباك أدخل بخشم الباب خايف من منو؟؟ كلنا عارفين إنت كان هناك ولا بره عامل معارض وصاحب حزب كله سيان أمشي كمل معاهم اقله ما رقبتك توجعك وتبقى عينك ورقبتك !!! ولا ها ما عندك مشكلة زي شريفه شرف الدين ما ممكن تسافر المانيا إنت ممكن تسافر محل ما عايز وتعزم في كرامة علقتك الجماعة كلهم ناس الخصر مثلا كان ما حرامي زمان ايام ما كان والي وبعد أبو ريالة حل محله بعد حذفه طلع حرامي مع إننا من الاول كنا عارفنه زي ما عارفنك حسه لله درك يا وطني الذي كان يمهل ولا يهمل يمهل ولا يهمل الهندي قال (الله في إنتظار لكن يسوي ترتيب.)

[fatmon]

#1354585 [قساس فادي]
0.00/5 (0 صوت)

10-14-2015 05:23 PM
صدقت يا عثمان تبدو كتاباتك احيانا وكأنك لم تنتمي للاتجاه الاسلامي يوما ما . ولكن هذا مقال تشكر عليه وكما قلت أن مشكلتنا لا تحتاج هذا الكم من اللجان والاوراق .. نحن شعب نجيد اضاعة الزمن اكثر من المغرب الططواني ذاتو

[قساس فادي]

#1354579 [كمال الأمين]
0.00/5 (0 صوت)

10-14-2015 04:48 PM
ياباشمهندس ..نحن فى هذا البلد ..لانحتاج كما قلت لكل هذه اللجان والمؤتمرات..نحتاج فقط إرادة سياسية وأن يتم الإلتزام بالدستور والقانون ونظام الحكم ..طبعا كل هذا بعد الإتفاق عليه وطبعا يجب أن يكون إتفاقا مع المختلفين وليس المتفقين .وأن نقيم العدل والعدل المطلق ولو على انفسنا وان نبعد عن شح انفسنا ونطبق القانون بصرامة ..لانريد حصانات شبه مطلقة لحماية كائن من كان..يجب علينا قبول وإحترام الآخر ..وان نقيم بعد ذلك مجتمعا متكافلا متراحما يحترم الإنسان من حيث هو إنسان دون النظر الا عرقه او جهته..وينبغى كذلك أن ترد المظالم حتى يزول الغبن ..فبغير عزيمة صادقة ونية مخلصة فلن ينصلح الحال ونظل نحرث فى البحر وفى هذه الحالة فإننا حتما سنكون فى إنتظار المجهول الذى هو بلاشك لن يكون كما نرجو ونريد.نسأل الله أن يهدينا سواء السبيل..

[كمال الأمين]

#1354487 [السماك]
0.00/5 (0 صوت)

10-14-2015 01:26 PM
كدى خلينا من الدلفري .. كونت حزبك ولا لسه ؟؟ يمكن بعد شوية نسمع بيك زي ما سامعين بحركة غازي صلاح الدين .. آخر مناكفة ومسكان العصا من النص!!!

إنت من بلادتك تبعت الترابي الذي ركب على السودان بإسم المشروع الحضاري الذي هو شعار أجوف بلا مضمون أقنعكم بيهو من بلادتكم .. ودحين جاي عشان تعيد زراعة نفس البذرة بحزب جديد ..

بالمناسبة كم واحد قدرت تستقطب بجد؟؟

[السماك]

#1354471 [المشروع]
5.00/5 (2 صوت)

10-14-2015 01:11 PM
كلامك عين العقل تماما عشان كده الحوار خدعة
والمشكلة ان المؤتمر الوطني يريد ان يفرق بالحوار اكثر مما يجمع

لجان وذهاب واياب وجرجرة ولولوة في الفاضي
مشكلة السودان معروفة
الحل معروف
اثيوبيا تتقدم
والدول الافريقية والعربية تتقدم
الا الدول الموبوءة بالاصولية والبرجوازية
يشغلون الناس في الدين والدين هو السماحة
والحقوق والطمأنينة
الجماعة حولوا الدين الى قتل
الى هرج ومرج وشعارات


في النهاية بعد ثلاثة شهور سترفع اللجان تقررها للمؤتمر الوطني - الحكومة - ستأخذ ستة شهور لدراسة التقرير وتعيده للجان لأضافة كلمة او ازالة اخرى.
وتاني الرئيس يقول خطاب
وتاني مسار يقول نفس كلامه
والرئيس يرد نفس الرد
ومسار يقول غير غاضب من كلام الرئيس

بعد سنة سوف يشكل المؤتمر الوطني لجنة لدراسة تقرير الحوار
بعد سنتين تخرج اللجنة برأيها عن تقرير لجنة الحوار
ويكون كل الناس ماسكين البقرة من قرونها
والحزب الحاكم يحلب ويشرب

[المشروع]

#1354441 [الحكيم]
0.00/5 (0 صوت)

10-14-2015 12:30 PM
يا استاذ عثمان ياخ والله ولدي احمد العمرو سنه ونص عارف وبأدق التفاصيل علل السودان كلها شنو وبالحته كمان ياخ الموضوع بسيييييييط جدا جدا الجماعه ديل اتخارجو مننا بس خلو التنظير وسبعه زايد سبعه وميه زايد ميه والمؤتر التحضيري والكلام الكتير دا ياخ تعبنا وانتهينا وروحنا طلعت والله حسبي الله ونعمل الوكيل ف حكومه المؤتمر الوطني

[الحكيم]

#1354332 [مدحت عروة]
0.00/5 (0 صوت)

10-14-2015 10:23 AM
انا اتفق معك فى ان كل الحاجات التانية مافى داعى لنقاشها وموضوع الحكم فقط هو المهم لكن زى ما قال احد المعلقين ناس الحركة الاسلاموية ما بيحترموا اى فكر او جماعة غير جماعتهم وما بيتصوروا ان يحكم السودان بغير فكرهم وجماعتهم مع انه فى رايى الشسخصى ان ست انداية افضل من اى واحد اسلاموى والله على ما اقول شهيد الاسلامويون احقر واقذر خلق الله فى السودان والعالم!!!!!!!

[مدحت عروة]

#1354298 [أسامة عبدالرحيم]
5.00/5 (1 صوت)

10-14-2015 09:49 AM
أنا شخصياً مستعد أكتب لهم كل توصيات الحوار الوطني في نصف ساعة فقط.. مجاناً.. صدقة من عندي علي روح والدي العزيز.. خدمة لوطني الكريم.. وأنا أكثر سوداني في البلد يعرف الحلول.. أنا عندي دكتوراة في إدارة الدول من جامعة مدغشقر.. أنا أشطر واحد في البلد دي.. أنا أنا أنا..!!

ياخي إتقي الله ولا تسفه من عمل مئات وآلاف الناس يا أستاذ ميرغني!

الهدف من الحوار هو (المشاركة) في صياغة مستقبل السودان.. المشاركة وليس عمل فردي يقوم به عثمان في مكتب صحيفة التيار ويرسله "دليفري" للحوار!

أساساً هذه أم مشكلاتنا في السودان: كل واحد في هذا البلد يقول "أنا وبس".

ما هذا الـ...!

[أسامة عبدالرحيم]

#1354282 [Tag.]
0.00/5 (0 صوت)

10-14-2015 09:28 AM
يا عثمان كثرة اللجان لتمديد الوقت وضياع الموضوع - الحكومة بيدها الحل ولكن لاتريد . هذا الحوار كلمة حق اريد بها باطل. مهما كانت من مخرجات لاتتفق مع اهداف الحزب الحاكم لايتم النظر فيها. هذا الحوار فقط لزوم شوفوناياعالم نحن السودانيين بنتحاور فى الداخل . المواطن لايهمه من يحكم ولكن كيف يحكم. هذه مسرحية بايخة وضياع للوقت والعباد واهدار للموارد فيما لاينفع. طبعا كل اعضاء هذا الحوار همهم الاول والاخير البدلات والنثريات الخاصة بالاجتماعات عدا ذلك لايهمهم وطن ولامواطن.

[Tag.]

#1354227 [كبسور]
5.00/5 (1 صوت)

10-14-2015 08:28 AM
وهل تظن أن اخوانك فى الله هؤلاء سيقبلون بمشاركة اخوانهم فى الانسانية من شعب السودان ؟؟
أنت تعرف لامكان لغير الكيزان فى حكم السودان
جواب نهائى
انتوا ما زارعكم الله يا عثمان
لكن كنبت شيطانى

[كبسور]

#1354221 [kurbaj]
5.00/5 (1 صوت)

10-14-2015 08:20 AM
المؤتمرين (عينهم في الفيل ويطعنو في الضل)... وقد سمعوا ورأوا هرشة (مسار )عنما حاول مجرد النظر او الاشارة الى الفيل..؟؟!! لذلك فلا جديد يذكر ولا قديم يعاد..!!

[kurbaj]

#1354176 [Ehab]
5.00/5 (1 صوت)

10-14-2015 07:04 AM
يا عثمان... البشير والمعاه عايزين كدا ... تجي أنت تقول ليهم البغله في الأبريق !!! ... يا راجل دا كلو كذب في كذب عشان يستمروا في السلطه ... نادي أقرب زول من الشارع واسالوا حايقولو ليك ديل دجالين ... يعني أنت الناس دي اشتغلته معاهم مفروض تكون عارف أساليبهم

[Ehab]

#1354167 [عبد المولي]
0.00/5 (0 صوت)

10-14-2015 06:58 AM
و القال ليك منو هم ماعارفين.والحكومة عارفة و الشعب عارف و و المعارضة عارفة و المجتمع الدولي و الاقليمي عارف.يبدو انك الوحيد الما عارف.عشان كدة كلم الانقاذ وقول ليهم رجعونا محل ما لقيتونا او امشو خلونا.اللهم لا اعتراض في حكمك يارب.

[عبد المولي]

#1354162 [جنو منو]
5.00/5 (1 صوت)

10-14-2015 06:53 AM
كل أفاعى الازمه السودانيه ترقد فى جحر الانقاذ ..اذا دفن هذا الجحر .. حلت المشكله.. اليس كذلك يا مستر عثمان ..!!؟

[جنو منو]

عثمان ميرغني
عثمان ميرغني

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2016 www.alrakoba.net - All rights reserved

صحيفة الراكوبة