المقالات
السياسة
مطلوب عشرة مليارات دولار..!!
مطلوب عشرة مليارات دولار..!!
10-19-2015 09:58 PM


يا حسرة علينا.. كل الشعوب تعمل ولديها من الأحلام ما يشغل بالها ووقتها، إلا نحن.. غارقون في جدلية الحوار.. وقطار العُمر يمضي.. والدنيا كلها حولنا تتحرك.. ونحن نتكلم.. ونتكلم.. ونتكلم.. في لا شيء..
بالله أنظروا حولنا.. لكل شعب قضيته المركزية التي يجتهد لتحقيقها.. إلا نحن، أملنا كله أن يرضى الساسة عن أنفسهم فيريحونا نحن..
تصوروا.. لو.. (لو التي تفتح عمل الشيطان).. لو كان لنا مشروع قومي عملاق نطمح في تحقيقه.. ونحتاج إلى عشرة مليارات دولار لتمويله على مدى –مثلاً- ثلاث سنوات..
حسناً؛ لدينا خمسة ملايين مغترب سوداني.. سنطلب من كل مغترب أن يحول إلى بلده ألف دولار فقط (خلال ثلاث سنوات).. هذه تعني خمسة مليارات دولار.. نصف المبلغ الذي نحتاجه لمشروعنا القومي العملاق..
حسناً.. لن نطلب من أي سوداني بالداخل دفع أي مبلغ.. فالحال يكفي عن السؤال.. لكننا نقول لكل سوداني خفض استهلاكك من الخبز والسكر والكهرباء بما يعادل 10% فقط لا غير.. من كان يأكل في اليوم عشر أرغفة فليأكل تسع.. أنظروا للفاتورة النهائية.. أكثر من خمسة مليارات خلال ثلاث سنوات..
لنفترض أن المشروع العملاق هو مشروع عظم الظهر Back Bone الذي اقترحته هنا قبل عدة أسابيع.. ولمن فاتهم الاستماع كنت اقترحت إنشاء خط سكك حديدية Back bone يمتد بين غالبية مدن السودان وأقاليمه بأحدث تكنولوجيا.. سكك حديدية تجعل من يسكن شندي كمن هو مقيم في (الجيلي).. ومن يسكن في مدني.. كأنه في سوبا شرق.. بحساب الزمن المطلوب للوصول إلى العاصمة من المدينتين..
ومثل هذا المشروع العملاق قادر على استرجاع تكاليفه في أقل من خمس سنوات.. وفوق ذلك فهو يحقق الأمن الاجتماعي والسياسي بإلغاء (الجهوية).. التي ما أنجبها إلا تباعد المسافات وانقطاع أوصال الوطن عن بعضها جغرافياً.
يستطيع شعب السودان أن يقدم أضعاف هذا المبلغ ليحقق أمانيه وطموحاته.. لكن بكل أسف.. ويا حسرة على لو كان هذا البلد الملكون دائماً.. تعترضنا مشكلتان..!!
المشكلة الأولى.. أننا وطن بلا أحلام Dreamless.. تضرسني كلمة (قفة الملاح) التي يستخدمها بعض زملائي في الإعلام للإشارة إلى حلم الشعب السوداني.
المشكلة الثانية.. يا للهول.. هي الأفدح.. (الثقة).. من يثق في من؟؟ من يثق أن عشرة مليارات دولار لو توفرت فهي ستذهب لإنشاء خط السكك الحديدية؟؟
فداحة الفوادح التي رآها الشعب السوداني في المال العام.. وكثرة (مفوضيات الفساد) التي شكلت ثم ألغيت ثم شكلت.. أنهكت كل قدرة الشعب السوداني على (الثقة).. في إدارة المال العام..
لكي نبدأ.. لنحل معضلتنا الوطنية الكبرى.. نحن في حاجة لحل المشكلتين هاتين..
مشكلة الأحلام.. ومشكلة الثقة..!!
وبكل أسف المشكلتان ليست في أجندة (الحوار الوطني)..!!.. فعلامَ يتحاورون علاما..

التيار


تعليقات 24 | إهداء 0 | زيارات 4760

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1358318 [عنيد..]
0.00/5 (0 صوت)

10-21-2015 08:19 PM
انا مستعد ادفع الالف دولار بكره بس لي شنو والعايد بى النسبه لى شنو وانا زنبى شنو ادفع واتسرق 00
انقلع ياحرامى

[عنيد..]

#1358064 [cool]
0.00/5 (0 صوت)

10-21-2015 11:49 AM
لكى نبدا لحل مشاكلنا الكبرى ياسيد علينا التخلص
من اس البلاء اخوان الشيطان بطل لف ودوران.

[cool]

#1358035 [السماك]
0.00/5 (0 صوت)

10-21-2015 11:15 AM
ويش أخبار الحزب بتاعك ؟؟ لسه ما سجلتو .. كم عضويتو لغاية اليوم ؟؟ لسة ما جاب إيرادات .. النقاطة - أقصد الخمامة- لسه ما بدأت ؟؟؟

[السماك]

#1357588 [المشتهى السخينه]
0.00/5 (0 صوت)

10-20-2015 05:13 PM
ياسيد عثمان سيبنا من الكلام الفارغ ..زي ما بيقول الفاتح جبرا .. انت الناس الجلدوك جوه مكتبك فى قلب عاصمة دولة الخلافة الاسلاميه الخرطوم ..حصل فى موضوعهم شنووووووو ؟
الغريبه انت عارفهم ونحن عارفينهم ..وعارفين الرسلهم ليك وانت عارف ان النظام الحالى هو نظامكم الاسلامى وحلمكم ( your dream ) وتعرف كيف يدار ..والسلطة كلها فى يد زول واحد لا شريك له ..عشان كده انت سكت وقلت خليتو ليوم القيامه ..طيب ما نفضى السجون كلهاونلغى المحاكم ونخليهم ليوم القيامه ..ده منطق ؟ ولا خفت من بيوت الاشباح الاسلاميه ؟

[المشتهى السخينه]

#1357493 [مدحت عروة]
0.00/5 (0 صوت)

10-20-2015 02:04 PM
اقتراحاتك دى تنفع لمن تكون هناك حكومة تحكم بتفويض شعبى وعندها معارضة وصحافة حرة وتكون البلد فى حالة سلام واستقرار سياسى ودستورى وفصل سلطات الخ الخ مش تحت حكومة توظف الاموال للحرب واجهزة الامن البقى ما عندها شغلة غير مراقبة الجرايد والمعارضة الخ الخ وما تجيب خبر للمحتل والمعتدى الاجنبى الخ الخ!!!
يا عثمان يا ميرغنى اولا لتكون لنا احلام وكل سودانى وطنى يدلو بدلوه الخ الخ يجب اولا ان تكون لنا ديمقراطية حقيقية وليس حكومة مثل حكومة الانقاذ يعنى الاولوية للنظام السياسى والمؤسسات الدستورية بتاعة الحكم بالتراضى والوفاق الوطنى الذى عطلته الحركة الاسلاموية السودانية بت الكلب وبت الحرام اللى هم اشرف منها لاكثر من 26 سنة!!!!!!!!

[مدحت عروة]

#1357460 [كبسور]
0.00/5 (0 صوت)

10-20-2015 01:15 PM
شندى ومدنى فقط ؟؟

انه عقلك الباطن يظهر انتمائك لمثل حمدى
لذا لا غرو ان تكون احلامك كالعصافير
وحتى فى الحلم تخطئون

لماذا ليست كادقلى والجنينه
او الابيض وسنار ؟؟
وكل كوز بما فية ينضح

[كبسور]

#1357455 [fithi osman fithi]
0.00/5 (0 صوت)

10-20-2015 12:59 PM
أحلام ظلوط

[fithi osman fithi]

#1357423 [الحكيم]
0.00/5 (0 صوت)

10-20-2015 12:08 PM
الراجل الاسمو ابراهيم عثمان الكاتب ليه 1000 صفحه دا مجنون ولا اهبل ولا عبيط كدي يا جماعه الخير افحصو معاي دا مالو؟ كلامك دا ذي اغنيه ندي القلعه خبر الشوم الاتناقلو الحروم

[الحكيم]

#1357405 [أبوالكجص]
0.00/5 (0 صوت)

10-20-2015 11:44 AM
أصبت الحقيقة بقولك (ونحن نتكلم.. ونتكلم.. ونتكلم.. في لا شيء..) والسبب هو فتح متجر السياسة على مصراعيه وهو في نظر قاصري النظر أقصر الطرق للكسب السريع. علاوة على ذلك، إذا سلمنا جدلا بن مشروع السكك الحديديةوهو بلا شك مشروع حيوي هو حلمنا فقد جانبك الصواب في كيفية تمويله إذ لم تستخدم نظرية النسبية حين قلت هنالك خمسة مليون مغترب ولو كل مغترب حوّل ألف دولار خلال ثلاثة سنوات سنجمع 5 مليارات دولار. فلتعلم ياأستاذ عثمان أن هؤلاء الخمسة مليون مغترب معظمهم، إذا عمل جرد حساب خلال هذه الثلاثة سنوات لن تجد في جيبه هذا المبلغ (الناس في الغربة ساترة حالها). ثم ليس من العلمية أن يكون طرحك للتمويل بهذه الكلفتة.

[أبوالكجص]

#1357377 [الهائم]
0.00/5 (0 صوت)

10-20-2015 10:56 AM
لن ينجح اي مشروع يديره سودانيين (في السودان)حتي لوتوفر المبلغ.المشكلة في الادراةالفاشلة والفساد.كتير من الناس فاكرين المشكلة هي القروش بالعكس اصلا القروش مامشكلة لو في امخاخ تعرف تديرها صاح.

[الهائم]

ردود على الهائم
[السماك] 10-21-2015 11:16 AM
في أمخاخ تعرف تديرها وكمان تأكلها ..


#1357370 [الحوشابى]
1.00/5 (1 صوت)

10-20-2015 10:44 AM
اعتقد بان ملف الجناييئه فى لاهاى ضد رئيس السودان يجب ان يكون اول ملفات الحوار وكيفية التعامل الجاد معه والثمن الغالى الذى دفعه الشعب والبلد وامكانية اصدار قرار بعدم شرعية حكم الرءيس

[الحوشابى]

#1357356 [ميرغنى طه]
3.00/5 (2 صوت)

10-20-2015 10:23 AM
لكي نبدأ.. لنحل معضلتنا الوطنية الكبرى.. نحن في حاجة لحل المشكلتين هاتين..
مشكلة (قفة الملاح).. ومشكلة الفساد..!!
وبكل أسف المشكلتان ليست في أجندة (الحوار الوطني)..!!.. فعلامَ يتحاورون علاما..

[ميرغنى طه]

#1357347 [خالد]
3.00/5 (2 صوت)

10-20-2015 10:16 AM
لو تم استرجاع مانهبه المتعافى يكفى لنهضه مشروع الجزيرة
لو تم استرجاع مانهبعوض الجازيكفى لنهضة السكك حديد
لو تم استرجاع مانهبه عمر وعبدالله البشير واهله حوش بانقا كفيل بربط مدن السودان بالطرق
لو تم استرجاع مانهبه نافع واقربائه كفيل بعمل ترعتى كنانة والرهد
لو تم استرجاع مانهبه قوش كفيل بعمل خط مياه بورتسودان والابيض
لو تم اسارجاع ما نهبه عبد الرحيم كفيل بتاهيل الصحه
لو تم استرجاع مانهبه على عثمان كفيل بالنهوض بالتعليم و مراكز البحوث
لو تم استرجاع مانهبه
لا يمكن استرجاع الزمن ولا الاخلاق التى فسدت

[خالد]

#1357296 [بكري محمد عمر]
1.00/5 (1 صوت)

10-20-2015 09:21 AM
دي عباطة السياسيين الواقعة فوقنا نعمل شنو الاحزاب اصبحت بعدد سكان البلد والحكومة لاماها كلها في قاعة الصداقة وآخر ضيافة وبهرجة عشان تخلق ليها كم منصب دستوري وكم حقبة وزارية يرضوهم واسكتوهم بيها وبعد كدا تعلن الحكومة نجاح الحوار والسنة الجاية تاني يقوم كم حزب كدا ويختلفو مع الحكومة وتناديهم للحوار ومن ضمن الاحزاب دي حايكون حزبك انت يا سعادة المهندس الذي دعيت له العديد من كتاب الراي العام لتأسيه بس لحدي اسي نحنا ما عارفين الحزب اسمه شنو والدخل في عضويته منو

[بكري محمد عمر]

#1357293 [سفرالبن]
0.00/5 (0 صوت)

10-20-2015 09:15 AM
يعني أنا ارسل الاف دولار دي في حساب الحكومة طوالي ولا عن طريق البنك كمصاريف للاهل.
لو كمصاريف يعني 1000*600= 6000 جنيه بالجديد طبعاً
خلاص خلينا نحولها لحساب الحكومة طوالي.
رقم الحساب بس لو سمحت الحوالة خلال دقائق وتصلكم
ما نحن شغالين لاهلكم وبنخم فيها خم
خم وصر

[سفرالبن]

#1357283 [عثمان]
5.00/5 (1 صوت)

10-20-2015 09:02 AM
اين ذهبت عائدات النفظ والذهب ؟10% للخدمات 40% للأمن والدفاع 40% للصوص والمؤلفة قلوبهم يصرف على تنمية الشعب 10% من موارده و40% لتقتيله وإرهابه المحصلة دمار الأنسان وضياع السودان ,وتسالون عن مزيد إنكم لاتستحون الرقعة التى يدرها اليوم 3500دستوري كانت تدار بواسطة 6 حكام اقاليم و18 محافظ بأستثناء الجنوب ومستوى الخدمات والامن افضل مما هو عليه ,أخرجوا من دنيانا يلعنكم الله يامرتزقي السياسة والمترفون علة عرق البسطاء.

[عثمان]

#1357274 [النواهي]
0.00/5 (0 صوت)

10-20-2015 08:48 AM
لو تم استرجاع المال المنهوب من عرق اليتامى والثكالى والارامل والفقراء والمساكين وستات الشاي لقضى على الفقر ولامتدت خطوط السكك الحديدية من حلفا الى قدير ومن الفشقة الى دارحامد ومليط , الكيزان هم سبب الخراب والدمار ,

تحياتي

[النواهي]

#1357227 [صادميم]
5.00/5 (3 صوت)

10-20-2015 07:53 AM
دائماً مثل حكومتك تطلب من المواطن و المغترب بان يدفع ولا تطلب من حكومتك التقشف ترى كم ملياراً تستطيع الحكومة توفيرها لو أنقصت ألكم الهائل من الدستوريين و مخصصاتهم و الصرف على مكاتبهم و على توصيل زوجاتهم و ابنائهم وعلى مصاريف إجازاتهم السنوية وعلى رحلاتهم العلاجية وعلى حوافزهم اليومية

[صادميم]

#1357217 [جنو منو]
5.00/5 (2 صوت)

10-20-2015 07:37 AM
عندما ينضب معين الدولار من خزائن الدوله .. تنظرون على طول فى جيب المغترب المسكين الذى أصبح يكابد فى الخارج وهو يعانى بين مطالب أسرته الصغيره وأسرته
الكبيره .. قول لجماعتك الذين هربوا عوائد البترول الى الخارج أن يعيدوها وهى
قرابة 80 مليار دولار راحت شمار فى مرقه .. وهى تعادل 8 مرات المبلغ الذى طلبته
لتحقيق حلم مشروعك ..وناشداخوتك فى الله أن يتحللوا ويعيدوا هذه الاموال ..!!

[جنو منو]

#1357195 [على على]
5.00/5 (1 صوت)

10-20-2015 06:17 AM
طيب نحنا ما عندنا مشروع حضاري وعندنا دولارات فى ماليزيا ايه رأيك لو ختينا السجم فى الرماد و صدرنا الطرشا

[على على]

#1357147 [أبراهيم عثمان]
3.00/5 (2 صوت)

10-20-2015 12:08 AM
يا أستاذ عثمان ياخي ما تخليك زول Over يعني ما تتنطط علينا بكلام يهزأ من عقولنا.. قال يأكلو 10 عيشات بدل 9 قال!! ولدك الصغير في البيت بيضحك عليك هسع لأنو مافي فيل ولا زرافة بتاكل 10 أو 9 عيشات.. أنا عمري 40 سنة وعمري ما أكلت قدر ده في يوم.. ثم دي شنو 10 مليار دولار دي؟ ومنو قال ليك كل الـ 5 مليون مغترب بيقدر يرسل ألف دولار في 3 سنوات؟ وليه حلمك سكك حديد تحديداً؟ وهل مشكلتنا الحقيقية أنو شندي تبقي قريبة للخرطوم ذي الجيلي أو مدني تبقي قريبة للخرطوم ذي سوبا شرق؟؟ ياخي البصات موجودة وفخمة وحديثة ومتوفرة 24 ساعة والواحد ممكن يمشي شندي ويرجع الخرطوم كذا مرة في اليوم.. وأصلاً في قطر وسكك حديد ولا أنت ما ركبت قطار النيل لسع؟ ياخي ممكن نتطور ونصلح وضعنا ونعمل سكك حديد لأنو فوائدها أحسن لكن لا ده وقتها ولا في إمكانيات ليها الان.. يعني المشكلة الاولي القلتها اننا أمة Dreamless دي حاجة مضحكة وسخيفة منك وهل أنت حتحل مشكلة أحلامنا بأنك تخلق لينا حلم سكة حديد بين الخرطوم وشندي ومدني؟ يعني ده هو الـ Dream بتاعك..؟ وأكثر حاجة تغيظ في كلامك هي المشكلة التانية الانت قلتها وهي إنعدام الثقة.. صح مافي ثقة بين الناس في البلد دي.. وهي مشكلة عويصة وكبيرة جداً.. لكن حلها حيكون كيف لو ما كان في حوار بين الناس.. سميهو حوار وطني أو مائدة مستديرة أو مربعة.. المهم الناس تتكسر وتقعد في الواطة دي وتقعد تتفق مش كل واحد شغال يحلم dreaming براهو كده!! ما ممكن تسخر من الحوار الوطني وتقول ما بيحل مشكلة الثقة.. دي حاجة سخيفة ذي سخافة كلامك في مقال قبل كم يوم لما قلت أنك أنت شخصياً مستعد تكتب مخرجات الحوار في ساعتين وترسلها ليهم بالفاكس عشان توفر عليهم الوقت والجهد.. ياخي أخجل.. طيب في نظرك شنو بيحل مشكلة الثقة دي.. ماهو حل إنعدام الثقة يا أستاذنا؟؟ الواحد لما ينفي الحل المعروض والموجود القدام عينيهو لازم يكون راجل عاقل ويطرح الحل البديل لكن سعادتك نفيت الحل في الحوار وما داير تدينا حل تاني.. أوع يكون حلك انو نستدعي الاحتلال البريطاني يحكمنا ويشكمنا ذي ما ناس كتيرة دايرة كده بدون وعي ولا عقل منهم.. أوعك تكون كنت قاصد نجيب الاحتلال البريطاني بالمقالات العشرة الانت كتبتها عن الاحتلال وايام الاحتلام قبل كم شهر وأنا متذكرها وعلقت ليك عليها واحد واحد.. وبعدين في بداية المقال انت ذكرت انو كل الدول حوالينا عندها احلام وDreams وما ذكرت لينا مثال واحد؟ هل تشاد عندها دريم؟ مصر الكل يوم فيها ثورة وانقلاب وموت ودمار فيها دريم؟ سوريا الما معروف حدودها بقت كيف في الخريطة عندها دريم؟ اليمن الان 10 دول تحارب فيها عشان يسقطوا الحوثيين عندها دريم؟ العراق الاختفي من علي الوجود عندو دريم؟ دريم شنو الجاي تتفلسف بيهو علينا يا عثمان ميرغني ياخي.. مشكلتنا عفنة وقذرة في السودان والله لأنو كل من هب ودب داير ينفي الآخر وينفي كل الحلول بدون يعطي أي تصور لحل بديل.. وكل واحد داير يحكم البلد دي.. وكل واحد داير يكون مسيطر علي حاجة في البلد دي.. هسع 18 حركة مسلحة دخلت الحوار وقاعدين يتشاكلو وكلهم دايرين يكونوا رؤوساء لجان.. 18 حركة و6 لجان دي يقسموها كيف؟ مافي إتفاق ولا توافق بيننا كسودانيين.. نحن للأسف الاخ زعلان من أخوهو والأب مخاصم ولدو والأم شمتانة في جارتها وبقينا مجتمع خبيث جداً.. وهسع يجي واحد ناطي يقول ده بسبب الكيزان الملاعين المطاريد.. والله الكيزان برئين منكم ليوم الدين.. هؤلاء الناس هم أكثر الناس تسامحاً فيما بينهم ومع غيرهم.. أصلاً ما عندهم خبث ولا خباثة.. شغالين عفو وعفو وعفو عن كل الناس.. الترابي الكان بيكره البشير كأنو هو الشيطان الرجيم الان بقوا متصالحين عشان البلد تمشي لقدام.. مش عشان في خطة سرية ولعبة وتمثيلية ذي عقولكم الخربة بتقول ليكم.. غازي صلاح الدين زعل وطلع من الحكومة ومافي زول في الحكومة سألو وسابوهو يمشي يعمل حزب براهو.. حتي خال الرئيس الطيب مصطفي كان ضد سياسات الحكومة بخصوص الحركة الشعبية وطردوهو لأنو دي سياسات عليا مش مزاجات أفراد ومشي عمل حزبه الخاص ومافي زول سألو.. مافي مشاكل.. ناس متسامحة مع بعض.. حتي قوش الكان رأس الأمن في النظام حاول ينقلب عليهم وقبضوهو وبهدلوهو وفي النهاية سامحوهو بكل بساطة.. في أي بلد آخر العقاب هو الاعدام طوالي.. تسامح ما بعده تسامح.. دائماً عندهم خط فاصل بين الخااااص والعاااام.. الواحد لما يكون في السجن لو مرض بيطلعوهو ويمشو يزوروهو في المستشفي والبيت.. هسع الترابي والمهدي والميرغني أكبر زعماء معارضة في البلد بشاهدة الجميع لكنهم غير متفقين لا في الخاص ولا في العام.. كل واحد بيكره الثاني.. المهدي بالذات يكره التراب البيمشي عليهو الترابي وما بيطيق يشوفو خلقتو.. والميرغني قاعد ليهو سنين في لندن وما عندو إستعداد يشتغل في البلد ويعيش حرها وسخانتها.. والحركات كل يوم تنقسم عشان المناصب بتاعتهم وفي النهاية يقولو ليك المؤتمر الوطني هو السبب.. ومحمد النور يقول بكل بجاحة انو ما بيحاور أبداً وحيسقط النظام بس.. هو أنت لو كنت قادر تسقطو ما تسقطو بدل الكلام الكتير.. قوات علي الأرض تسقطو بيها ما عندك لكن فهلوة فارغة وهو مبسوط بكده طالما بيقبض الثمن من ناس برة.. والحكومة برغم كل التشرزم والاختلاف الموجود بين الناس في المعارضة والحركات ده إلأ إنها شغالة تحنيس تحنيس تحنيس.. ذي الام الخائفة علي أولادها.. يا أولادي تعالو نتفق.. يا أولادي تعالو نتكلم.. يا أولادي والله أنا صادقة معاكم.. لكن الاولاد عاقين ومختلفين وما واثقين في أمهم ولا واثقين حتي في أخوانهم المعاهم.. شوفو هنا يا ناس يا شعب السودان الفضل أقول ليكم الكلام النجيض.. الكلام البيحمل ويجيب عيال.. نحن طول عمرنا من 1956 مختلفين ومتنازعين وما قادرين نعمل حاجة فمافي داعي تجدعوا كل مصايب البلد في الكيزان وتسكتوا كده.. والله الكيزان مستعدين يستحملوا كل اللوم ويتحملوا كل التهم وقالوا لينا 100 مرة أنهم أصلاً ما بيهربوا من المسؤولية.. هم ناس إشتغلوا 26 سنة في البلد دي وعملوا فيها خير كتيييييير وغلط شوية.. والما بيشتغل هو الما بيغلط.. لكن خيرهم لامي غلطهم ومغطيهو.. الشغل الاشتغلوهو في البلد دي برغم الضيق والعقوبات الامريكية الخانقة مافي حكومة عملته في البلد.. أبداً أبداً منذ الاحتلال.. ديل لما جو في 89 ضاعفو عدد المدارس مليون ضعف وضاعفو عدد الجامعات عشرات الاضعاف وطوروا في الخدمة المدنية وفرضو الخدمة الوطنية عشان الشباب يعرف يخدم بلدو ووطنو وعملو مائة الف مستشفي وعشرات الجسور والاف الكيلومترات من الاسفلت في كل مكان وربطوا الخرطوم دي لاول مرة في تاريخها ومن ربنا خلقها بالشمال والشرق والغرب والجنوب وعملو 50 جريدة و20 تلفزيون و30 محطة إذاعية وعملو سد مروي وصلحو 10 سدود تانية وعملو لينا ماكينة دبلوماسية ضخمة فروعها منتشرة في كل العالم والأهم من كل ده حافظوا لينا علي الامن لأنهم كحكومة عسكرية من أول أيامها كان شعارهم الاول هو الامن لأنو مافي حياة ولا تنمية ولا أكل ولا شراب ولا تعليم ولا زواج ولا أي شي مالم يكون في أمن وأسألو ناس سوريا الحائمين في السودان عن الأمن في بلدهم.. وبرغم عشرات الحركات المسلحة الكسيحة المشاغبة الا انو الحكومة مسيطرة علي 99% من البلاد بقبضة من حديد.. ده أكبر نجاح للكيزان البتكرهوهم وأنتو بتكرهوهم لأنهم ناجين.. بس شاطرين تتكلمو لينا عن حلايب وشلاتين عشان تولعو الناس بيننا وبين مصر ومافي واحد فيكم عارف قصة حلايب أصلاً.. هي قصة شد وجذب منذ أيام الاحتلال لكن لا السودان يوم حيدخل حرب مع مصر عشان حلايب ولا مصر حتدخل في حرب مع السودان عشان حلايب.. حلايب منطقة مشتركة الان بإتفاق وفيها جيش سوداني جيش مصري ومواطنين سودانيين ومواطنيي مصريين.. والبيتكلو عن الجنوب مفروض يحسبوها بالعقل لو كان عندهم عقل.. ويا القارئ الكريم ما تتحسس وتكون حساس من كلامي فأنا لا أقصدك أنت في زاتك.. المهم بخصوص الجنوب مفروض نعرف حاجتين إثنين: الاولي أنو أزماتنا الاقتصادية والضائقة المعيشية الحاصلة في السودان دي حصلت بسبب إنفصال الجنوب لأنو سلفاكير أكل 80% من البترول، لكن من ناحية تانية فإذا نحن تعبنا فهم قربو يموتو عديل كده بسبب الحروب الولعت في بلدهم وما قدروا يديروا حتي الـ 80% بتاعتهم، والموضوع كلو أنانية وحسد جنوبي لكل ماهو جنوبي منذ 1955.. بلاش فهلوة وتنطيط وتنظير وبلاش تقولو علي عنصري حقود والنظريات بتاعتكم دي.. أنا أصدقائي جنوبيين متواصل معاهم حتي الان في جوبا وكينيا وأديس ولندن وتشاد وفي السودان بعد أن طردهم بلدهم وكشفوا متأخر جداً غباء وحقد الحركة الشعبية.. ثانياً: الكيزان ما كانو دايرين إنفصال ديل كانو دايرين وحدة جاذبة وعمرنا ما حننسي الكلام الطيب والصرف المالي الضخم العملوهو في الجنوب خلال الفترة الانتقالية 6 سنوات عشان يجذبو الجنوبيين للوحدة.. وعمرنا ما حننسي كيف باقان أموم قام بإلغاء الدورة المدرسية بتاعتنا في الجنوب بدون سبب ونحن كنا قاصدين الخير والتداخل بين الشماليين والجنوبيين لا أكثر.. الجنوبيين هم الذين خانوا العهد والاتفاق وصوتوا للإنفصال ونحن إتفاجانا من الغدر والبشير قال قولته الشهيرة: ما كنت متوقع أنو في إنسان يشيل سكينة يذبح بيها نفسو عشان يغيظ غيرو.. والمهم برغم الانفصال نحن وافقنا وقلنا خير وبركة ودعمناهم وكنا أول من نبارك ليهم دولتهم وأول دولة تفتح سفارة في جوبا.. قلنا لو ما قدرنا نعيش مع بعض في أمن وأمان يبقي نعيش جيران في أمن وأمان.. لكن ما شفنا الامن وهجليج تشهد علي الغباء والتخلف بتاع الحركة الشعبية.. ونهاية كلامي في النقطة دي هي: الجركة الشعبية يا الناس النائمة وداقسة حاربت كل الحكومات منذ الزعيم الازهري لغاية الصادق المهدي والبشير فهل كل الؤوساء ديل كانوا حاقدين وحرامية أم أن الحركة الشعبية هي الكانت حاقدة وعندها مؤامرة كبيرة؟؟ أنا دائماً بقول أن الشعبية هي سبب ضياع السودان منذ ما قبل الاستقلال وكانو الإنجليز خرجوا وقالو ليهم إشتغلو دمار أنتو يا ناس جون قرنق.. وجون قرنق أنا شخصياً بحبه رحمة الله عليه لكن هو ليس إله عشان تزعلوا مني لما أنتقدوا فهو في نظري سبب بلاوي كثيرة في البلد.. هسع بعض الناس حيجوا يشتموني ويقول عني كوز وآكل مال الغلابة وبيشتغل بجيبو وجدادة وكتكوت ومافي واحد فيهم حيناقش نقطة واحدة من نقاطي.. لأنو أساساً عندنا مشكلة سودانية عويصة وهي عدم إحترام الاخر وتعمد شتمه من وراء ظهره.. ناقشوا الافكار بدل تدخلوا في الاعراض والشخوص يا مناضلين.. وما ليكم دعوي إذا كنت كوز أو جردل.. أنا كوز أيوة لأني ما شايف حزب واحد فيهو عقول وبيعرف يخدم البلد ذي الكيزان ديل لأني مختلف معاهم في مليون حاجة وأولها إني علماني 100% وأتمني أنو الحوار الوطني يطلع بنظام حكم علماني يفصل الدين عن الدولة نهائياً وتاني مافي زول يقول الله أكبر في البرلمان ولا المواقع الحكومية.. الكلام ده حلم Dream علي قول عثمان ميرغني لكن شكلو بعيد المنال لسبب بسيط وهو أنو كل العلمانيين واقفين ضد الحوار ذي الهبل.. مخ مافي.. لو دخلوا الحوار بيقدروا يفرضو رأئهم بالحوار والتصويت وكل مشارك ليهو صوت.. لكن طالما قاعدين برة الحوار وبرة السودان وما عندهم شغلة غير النقنقة فالمؤتمر الوطني ليهو حق يمشي البلد بمزاجو ومزاج الأغلبية القاعدة معاهو في الحوار..

[أبراهيم عثمان]

ردود على أبراهيم عثمان
[سيف الله عمر فرح] 10-22-2015 08:55 AM
والله العظيم انا عايز أحاورك بصدق وأمانة . بس مش قادر ، لأن كلامك يناقض بعضه بعضآ ، وبيعطى إحساس أنك غير متصالح مع نفسك يا أستاذ إبراهيم عثمان ، وبتحاول تتزاكى وتتشاطر لترمى داءك في اتجاه الآخرين ..

لا ندرى كبف تكون علمانيآ وكوزآ في آن واحد ، وكمان معجب جدآ بالرئيس عمر البشير . مثلك أخى ، مثل الإنسان المعجب بالرئيس نتنباهو ، والرئيس هنية في آن واحد .
في نظرى بدون زعل انت بتحتاج لمراجعة طبيب نفسى .

يا زول أبقى عشرة على المبادئ ! ، ولا تخلط مياه هذا مع مياه ذاك .

[أبراهيم عثمان] 10-20-2015 12:54 PM
نعم يا أستاذ حسن من الخليج: أنا كنت عارف أنهم لن يناقشوا النقاط بتاعتي أبداً ودي هي المشكلة.. ما دايرين يتحاوروا مع الحكومة ولا مع المؤتمر الوطني ولا الجرابيع الصغار أمثالي وأنا جربوع في البلد ماكل نارها وضايق سخانتها زي كل الناس.. أنا بالمناسبة الخلاني أكتب وأنفجر كتير كده هو خبر قريتو أنو الحركات المسلحة الـ 18 التي دخلت في الحوار الوطني شغالة الان شجار وجدال وطلعو بيان انهم لن يواصلوا في الحوار إلأ إذا دخلوهم في رئاسة اللجان بتاعة الحوار.. مصيبة وجعت قلبي وذكرتني بكلام بروف غندور قبل فترة لمن قال أنو مشكلة البلد دي أنو دايرين 33 مليون وظيفة وزير عشان كل الناس تكون راضية.. ياخي هي كلها 6 لجان يقسموها كيف علي الاحزاب والحركات الكتيرة دي؟؟ مفروض ناس الحركات ديل يتفقوا مع بعض ويطلعو ليهم 2-3 ممكن يبقوا رؤوساء لجان لكن 18 رئيس دي كيف؟ ناهيك أنهم جاءوا متأخرين وكل ((وظائف)) الحوار أخذوها الناس الجاءوا بدري.. وهسع الناس الحتجي بكرة والاسبوع الجاي والشهر الجاي ديل يشوفوا ليهم رئاسات ولجان من وين؟ مصيبة ما بعدها مصيبة وعمر البشير زاتو عينو طلعت وقرف خلاص.. الراجل ليهو سنة ونص يكورك بالحوار والناس ما مساعداهو وهم فاكرين أنو هو محتاج ليهم في شخصو عشان يحكم فترة أطول مثلاً!! ياخي والله البشير شخصياً ما كان داير يدخل إنتخابات 2015 الفاتت زاتو وهسع برضو ما داير الحوار ده عشان يحكم زيادة أبداً.. داير الناس تتفق علي حاجة بدل كل القرارات تعملها الحكومة براااااااااااها.. وفعلاً الحكومة ممكن تعمل كل حاجة براها لكن الناس ما بتكون راضية.. في ناس دايرنها علمانية عديل كده وأنا منهم وفي ناس دايرنها ديموقراطية والديموقراطية خشوم أبواب يعني كلامها وتفاصيلها كتيرة جداً.. ليه البني آدمين ديل ما دايرين يحاروا الحكومة؟؟

الحاجة الوحيدة الانا فاهمها كويس ومتأكد منها أنو بعض المعارضين ما دايرين حوار عشان النتائج والمخرجات الايجابية ما دايرنها تتحسب للحكومة.. ما دايرين يحصل دستور دائم لأول مرة في ظل حكومة الكيزان الملاعين تجار الدين علي حسب فهمهم.. ودي أنانية وتخلف واجع قلبي عديل كده.. كده ما حنتقدم ولا حنبني دولة محترمة تنافس العالم.. لكن الحاجة الوحيدة الانا مطمئن ليها أنو الامن ما حينفلت في السودان زي دول تانية طالما البشير ده موجود لأنو ده رجل عسكري متمكن وما بيلعب في أمن البلد.

[حسن - الخليج] 10-20-2015 09:18 AM
صدقت يا استاذ ابراهيم عثمان لم يرد احد علي النقاط التي اثرتها و لكن ترك الامر للحديث عن شخصكم و هذا هو الكارثة التي مكنت الاسلاميين من الاستمرار في الحكم فشل في طريقة المناولة للحديث
و ان كنت اعيب عليك ايضا عدم ردك علي الصحفي الاستاذ عثمان ميرغني باحترافية كما هو نقاطك المذكورة
عموما انا اتفق معك في بعض النقاط و اختلف في البعض و هذا شئ طبيعي
بخصوص الدريم اكيد هنالك شعوب من التي ذكرتها لها احلامها و كانت قناة السويس لمصر حلم و تم تحقيقها بغض النظر عن اتفاقك معه و توجد لتشاد
نحن اصبح حلمنا في السودان ايقاف الحرب اولا و هذا هو الحلم الكبير انقسام الجنوب كان خير و افضل لباقي اقاليم السودان لانه كان من سابع المستحيلات استمرار الوضع كما هو عليه سابقا
و اعتقد ان دارفور في الطريق و يجب ان يتم منحهم حق الاختيار في الاستمرار في السودان بشكله الحالي او يكون لهم وطن خاص بهم لانه اذا استمر الوضع بحروب و انقسامات لا متناهيه سوف نوصل لنقطة اللانفصال لها لان جميعهم يرغبون في السلطة و كل من يوقع اتفاقا مع المؤتمر يطلب نصيب في السلطة و ياتي باهله للخرطوم و يبيع ما كان ينادي به فلن تستطيع دولة في العالم تنصيب 3 مليون في وظائف دستوريه و اسكانهم في الخرطوم
الان اصبح البلد تتكون من الوسط و الشمال و كردفان شمالها و شرق السودان اذا رغب مواطن دارفور و جنوب كردفان في السودان الكبير يواصل او يتم فرز عيشته

[ود الجزيرة] 10-20-2015 08:36 AM
هههههه شارب شنو انت ياشيخ .. ده شنو البتقول فيه ده ... ياخي انت ماعارفين نقول لك شنو ... عمي البصيرة كارثة ومشكلة.... ثقة ثقة بالله الذي خلقك وسواك رجلا في زول عاقل يثق في عمر البشير واخوانوا كم مرة كذب هذا الرجل وخدع وخان .. وكذلك الثعبان الترابي حينما ذهب للسجن طوعا ومخادعا ....هذا البلاء والسرطان الاسمه الحركة الاسلامية سبب كل بلاوي السودان .. خداع -حقد- حسد- عنصرية -تكبر- ضلال- كذب- خيانة- فساد- زنا- سرقة- تحلل ... اللهم ابدلنا حالا افضل من حالنا اللهم عليك بالظالمين ومن والاهم ربي انك قادر مريد تاتي الملك من تشاء وتنزعه من تشاء وتذل من تشاء وتعز من تشاء ربي ذل هؤلاء القوم (حكومة البشير ومن والاهم ) وفرق شملهم ان قدير وقادر .

[nadus] 10-20-2015 08:08 AM
والله يا ابراهيم حرام الزول يرد عليك .... وحتى (ولو) فى رد حيكون قدر مقالك _البائس_ 10 اضعاف ....(شكرا جزيلا يا (بحر) رغم الكساد) ... والضو وليدا ما قرا خرجتو منك باقتصاد... قانون .. فلك ... وهنا المحك ... يا ارزقى ... يااا مستفيد ... من بزة اطفال السواد الما نزل فوقهم ملك .. السكر الموية السماد..والموية اولى من العباد ..؟؟؟ فى ياتو قانون فى يات كتاب دين يا (فاجر) الله بيسألك .................

United States [بت البلد] 10-20-2015 03:58 AM
كدي أول حاجة يا أستاذ فهمني علماني وكوز دي كيف ؟؟! لأنو كل نظام عندو الآيدلوجية بتاعتو ... وبعدين ممكن نعرف نقاط خلافك مع الكيزان بالتحديد؟؟؟ عشان نقدر نقول راينا؟ وصراحة كدا كل ما ذكرته عن انجازات الكيزان في السودان بالنسبة لي صفر طالما هناك أزمة غذاء وأزمة علاج وسكن وتعليم وأمن... يعني فاشلين اقتصاديا واجتماعيا وأخلاقيا وأمنيا وسياسيا ... وانا يا أستاذ كل همي أن يعيش شعب السودان في أمان ينعم بأبسط مقومات الحياة هل هذه متوفرة لانسان السودان في عهد الكيزان ؟؟؟!!

European Union [Atif] 10-20-2015 02:54 AM
عتمان عندو دريم بداوي لكن انت يعملو ليك شنو!!! قالوا ليك علق كتبت مقااااال !متناقض لدرجة تستيف العلمانية في كيس بني كوز.اطلع بس بطيبتك و اتمني انك تحافظ عليها.

[ود الزين] 10-20-2015 02:11 AM
والله غلبني اتم سخفك الانت كاتبو ده .. مذهل في مستوي انحدارك الفكري وسفه نظرتك للأمور .. علي السودان السلام ان كنت من نخبه وصدقني سيستحيل النهوض من كبوتنا الحاليّه كوطن إن كان من هم بضحاله فكرك وقصر نظرك للأمور يتجرأون علي التعليق وكتابه هذا الكم الهائل من العبث والسخف !!! حسبنا الله ونعم الوكيل علي ما وصلنا اليه ....


#1357142 [عليل]
5.00/5 (1 صوت)

10-19-2015 11:31 PM
يا جماعة الراجل دا اهبل و لا بتهابل علينا و الدولارات انت عارف انها وين فالافضل تناشد من اخذوها و هى اكثر من 10 مليار امكن يتعاطفو مع موضوعك ويحنو تجيهم شوية وطنية ما ناسك... و اذا وجد هذا الحلم من هو المنوط بتنفيذه عشان المغترب ييرسل ليك 1000 دولار كل سنة و بعدين قفة الملاح دا حلمك انت ما حلم الشعب السودانى لانو الشعب بعد ال26 سنة لو اكلو ضلع ما حيغير حلمه باذالة النظام..خلى عندك احلام اكبر من قفة ملاح و حزب جديد و ختة بى 10 مليار و احسن تعمل عرس فيهو حنة للبشير و امكن الحرامية يتجوعلوا و ينقطوا 10 مليار اهو كلام على مستوى مواضيعك

[عليل]

#1357133 [Khalid Abdalla Ragab]
5.00/5 (1 صوت)

10-19-2015 10:54 PM
Ustaz Osman
It seems to me now you are the dreamer! Every body in our country except the members of ElMutamar ElGair Watani, had been fired because of ElTamkeen and every one of them is trying his best to get Gofat ElMulah for his family. Only the magicians can do that by todays prices. If a family can get one meal per day this is what they dream about. Your fancy back bone! Are you serious? If this government can do such a project, it should not destroy what Rail Way Roads we used to have before! Who is going to make sure that this project is going to be established and the money is not going to Malaysia, Dubai, China or even their accounts in Sudan? Since Figh ElSutrah and ElTahalol is still being practiced! The only thing I will back you if you write on the first page of your newspaper ElGashir Step Down, Let the People Live and Build What you Destroyed in the Last 26 years!! Can You Do that????

[Khalid Abdalla Ragab]

ردود على Khalid Abdalla Ragab
[nadus] 10-20-2015 08:55 AM
يا خالد لو سمحت ما كل زول بيعرف انجليزى ونحن فى منبر سودانى ... فينا الجاهل والامى وخريج ( الانقاذ) ديل (كووووووووووووووولهم ) ما بعرفو (يقروك) ادينا عربى .الراكوبة دى فيها ناس بكتبو صينى لو ردوا عليك بجهجهوك..
كسرة:
عود(لينا ) ياااااااا ليل الفرح


#1357121 [كاســترو عـبدالحـمـيـد]
4.50/5 (2 صوت)

10-19-2015 10:11 PM
الحل ساهل وبسيط وهو ان يوضع السودان تحت الوصاية الدولية وتكليف احدى الدول الأوروبية كالنرويج أو المانيا أو انجلترا مثلا بأن تتولى ادارة شؤون البلأد لمدة عشرة سنين . عندها سوف نحلم ونحقق احلامنا .

[كاســترو عـبدالحـمـيـد]

عثمان ميرغني
عثمان ميرغني

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة