إسعاف وأغراض جودة
02-08-2016 11:57 PM


ما من شك أن كل الخدمات لدينا رديئة بصورة غير مسبوقة دون أي إستثناء لكن ده كووولو كوم.. ولكن أن تكون خدمة إنقاذ حياة المواطنين حين تعرضهم إلى وعكات مفاجئة (الإسعاف) خدمة رديئة فهذا كوم تاااني يوضح بما لا يدع مجالاً للشك بأن أرواح المواطنين لم تعد ذات أهمية مطلقاً عند ذوي الأمر.. وهاكم الدليل:
بالأمس وعند الساعة الثالثة والربع تماماً بعد الظهر سمعت طرقاً عنيفاً على باب الشارع فذهبت استطلع الأمر فوجدتها جارتنا ويبدو عليها علامات الخوف والهلع وما إن رأتني حتى صاحت تخبرني بأن زوجها قد وقع على الأرض وهو غائب عن الوعي..
على الفور هرعت حيث وجدته مستلقياً على الأرض دون حراك.. ماذا أفعل وأنا وحدي حيث كل (الجيران) لم يعودوا من العمل.. أخذت هاتفي واتصلت على خدمة الإسعاف فجاءت الإجابة سريعة بغير ما توقعت:
- مرحباً بكم إلى خدمة الإسعاف المركزي من زين مهلا فسوف يقوم أحد موظفينا بالرد عليكم بعد قليل.. نود أن نلفت انتباهكم بأن هذه المحدثة مسجلة من أجل أغراض الجودة.. (موسيقى) ثم بعد دقيقتين (جميع الموظفين مشغولون الآن نرجو منكم الإنتظار قليلا) ثم موسيقى.. ثم (بعد كم دقيقة) أطل على مسامعي صوت (أنثوي)
- مرحبا.. معاك الإسعاف
- بالله لو سمحتي عندنا مريض وقع وعاوزين نوديهو المستشفى بي سرعة؟
- (إتخيلوا): وقع كيف؟
- (قربتا أقول ليها كان عاوز يشوت كورنر): يا بتي مافي داغي للأسئلة دي رسلي لينا الإسعاف !
- طيب ح أرسلو ليكم وصف ليا المحل..
وبعد أن قمت بوصف المكان.. إنتظرت زهاء الربع ساعة ولما لم يصل الإسعاف قمت بالإتصال مرة أخرى:
- مرحباً بكم إلى خدمة الإسعاف المركزي من (زين) مهلا فسوف يقوم أحد موظفينا بالرد عليكم بعد قليل.. نود أن نلفت إنتباهكم بأن هذه المحدثة مسجلة من أجل الجودة.. (موسيقى) ثم بعد دقيقتين (جميع الموظفين مشغولون الآن نرجو منكم الإنتظار قليلا) ثم موسيقى.. ثم أطل على مسامعي صوت (أنثوي) !
- مرحبا.. الإسعاف
- يا بتي إسعافكم ده ما جاء لي هسه..
- معليش ح يتأخر عشان هو ح يجيكم من بحري (مستشفى أحمد قاسم)
- ليه أم درمان ما عندكم ليها إسعاف !
- تيت.. تيت.. تيت.. تيت
قلت في نفسي (وكت الحكاية جابت ليها تأخير وأحمد قاسم) أحسن أرجع وأحاول أشيل جاري ده في عربيتي وقد كان إذ حملناه وذهبنا به إلى أقرب مستشفى به طوارئ !
بعد ساعة إلا تلت.. إتصل على سائق الإسعاف
- أنا بتاع الإسعاف إنتو وين
- هي لكن تجي بعد ساعة إلا تلت؟ هسه الزول ده لو عندو (ملاريا) ما بكون لحدت هسه لحق أمات طه.. خليك عندو قلب.. شكراً خلاص ما محتاجين ليكم
- معليش بس أنا جاييكم من بحري !
- بحري ليه؟ أم درمان ما فيها إسعاف؟
- تيت.. تيت.. تيت.. تيت
ما يستفاد من القصة:
- تحولت المحادثة لطلب الإسعاف إلى (إعلان) لمقدم الخدمة.. وأغراض الجودة والشنو ما بعرف.. على الرغم من أي (ثانية) مش (دقيقة) يكون المريض في حاجه لها من أجل إنقاذ حياته.. وهذا شىء (مقرف) للغاية يدل دلالة قطعية بعدم (إنسانية) وآدمية من قام بوضع هذا (السخف)
- لا يوجد عدد كاف من الموظفين لتغطية حالات الإتصالات على الإسعاف.. حيث تستمر الموسيقى لدقائق قبل أن يتم الرد..
(لاحظ إنو الموضوع يتعلق بأرواح مواطنين والثانية تفرق) فماذا يكلف الجهات المعنية إستيعاب عدد يغطي من الموظفين..

لاحظ إنو:
- خدمة الإسعاف غير مجانية وتحسب (بالكيلو متر) على الرغم من كل الرسوم والجبايات التي يقوم بدفعها المواطن !
- الإسعاف لا يحتوي على أي فريق طبي أو أجهزة منقذة للحياة (نقالة وبس) !

اقتراح:
طالما إنو (بتنا) سألتني (وقع كيف)؟ وطالما أن (راعي الخدمة) عاوز يعمل (إعلان) و(جرجرة وكلام) فالعبد لله يقترح بعد (الترحيب المسجل) والإعلان.. وأغراض الجودة والشنو ما بعرف داك (والتي تستغرق دقائق).. يعملوا الرسالة المسجلة التالية :
- إن كان المريض به كسور أضغط الرقم 1
- إن كان المريض كاضم وما بتكلم أضغط الرقم 2
- إن كان المريض ينزف أضغط الرقم 3
- إن كان المريض يهلوس أضغط الرقم 4
- إن كان المريض واللا واحد من ديل أضغط الرقم 5.

كسرة:
طبعا لحدت ما توصل الرقم 5 ح ترجع تلقى المريض لحق أمات طه !..

كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و.
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و.



تعليقات 11 | إهداء 0 | زيارات 9376

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1413548 [هدهد]
4.00/5 (1 صوت)

02-11-2016 09:14 PM
مرحب الاستاذ جبرا والله الوجع راققققققد زي مابقولوا ن تتكلم عن شنو ونخلي شنو أي مرفق بالدولة تلقاهو مدمر ومنتهي وكمان خدمة الاسعاف دي بالقروش وبرضوا يتأخروا فيها !!!!! ويل لك ايها السودان والماعندو حق الاسعاف دا يموت بي مغسو !!!! وين الضرايب وين الجبايات الكتيرة وين بتروح اذا كان كل شيء بقروش حتى اسعاف المرضى ؟؟؟؟؟ حسبنا الله حسبنا الله يالبشير الله ينتقم منك ويعجل بزوالك دمرت كل شيىء حتى الاخلاق والمروءة دمرتها اشعلت نار الغلاء في البلاد وجاوزت الحد في الفساد والغش وبيع الوطن باسم الاستثمار وبعد دا كلوا المواطن تاخدو منه حق الاسعاف ؟؟؟؟؟ رحم لله اين الخطاب الذي كان يبكي الما وحسرة خوفا على بغلة تقع على الارض ويسأله الله لم لم يسوي لها الارض !!وويل لك ياعمر قتلت وعذبت البشر ولا تخاف من هلاك الله وغضبه .

[هدهد]

#1412553 [ود يوسف]
2.00/5 (1 صوت)

02-09-2016 09:07 PM
قال التسجيل من أجل جودة الخدمة !!!!!!!!!

[ود يوسف]

#1412552 [عبدالواحد المستغرب اشد الإستغراب!!]
3.50/5 (2 صوت)

02-09-2016 09:05 PM
يا جبرا وده حالتنا مصنفنك مع اللماحيين والازكياء !! الا تعلم يا فرده كم جنيه إنسحب من رصيدك في المحاولتين وبالمناسبه ردك الاوشكت ترد بيه على الانثى كان جميل والاجمل لو كان في واحد رباطابى مجاور ليكم وتلقى المكالمه انا متأكد الانثى الردت عليك كان زميلاتا طلبو ليها الإسعاف ،،حكاية الرد الآلى ابتدعوها في الأصل الانظمه الكافره التي لا تصلى ولا تصوم ولا تزكى ولا تحج لبيت الله الحرام ولا توحد الخالق بهدف تقديم خدمات أفضل لمواطنيها علها تعوضهم الجنه التي تعج بالحور العين اما التقاة الانقياء المتبتلون في دولة السودان الشمالى فلم تكفيهم الجبايات التي يجبوها قسرا وحمارة عين فتشكل لهم هذه الاتصالات قيمه مضافه لايمكن ان يتركوها لتتسرب من بين اصابعهم !! ولعلمك بتاع الإسعاف مش حيسيبك وخصوصا بعد ما عرف البيت وقطع شك حيطاردك وغالبا ما يسجل ليك زياره سريعه بعد ساعات العمل (فكن مستعدا)وجهز الكنجالات وحمدا لله على سلامة جارك واقترح عليكم كل حاره يجمعوا تبرعات ويسعو ليهم سيارة إسعاف والعمر يا جبرا ما هو بعزقه نضيعو كده عشان شركات الاتصالات تستفيد وتروحو (مورتو!!) وياريت طبيب امتياز وممرض بجانب سيارة الإسعاف احسن الأطباء سابو البلد وهجو والكلام ده ما من عندى ده كلام مسئول جهاز المغتربين (بالخارج) هو في مغتربين بالداخل ؟!!.

[عبدالواحد المستغرب اشد الإستغراب!!]

#1412414 [صادميم]
5.00/5 (1 صوت)

02-09-2016 03:52 PM
يا جبرة اتأكد من رصيد تلفونك فالانتظار و الموسيقي وغيرها هذه المدة مسحوبة من رصيدك و العجب لو اتصلت بطوارئ الكهرباء فلن يتبق من رصيدك شئ بالرغم من هذه الاتصالات يجب ان تكون مجاناً

[صادميم]

#1412387 [gasim]
2.00/5 (1 صوت)

02-09-2016 02:35 PM
احتمال الناس ديل ناس فاتحات ساكت ي استاذوبعد ما يرسلوا ليك الاسعاف يجوا يلقوا المريض لحق امات طه, وبعد داك سواق الاسعاف يقوم بالواجب نيابة عن شركة زين بعد دفع العدادات, وما تنسى ان تحريك الاسعاف من بحرى وانت فى امدرمان لزيادة الكيلو مترات وبتاع بحرى يرسلوا ليه اسعاف من جبل اولياء وهكذا الفااااااااااااااتحة اللهم ارحمه واغفر له هات ي استاذالفاتورة واكتب لى الشيك باسم زين واخير اقول زين عالم شييييييييييييييييييييييييييييييييييييييييييييييييييييييييييييييين

[gasim]

#1412238 [yassom]
0.00/5 (0 صوت)

02-09-2016 09:59 AM
هه ههههههههههههه

والله فعلا شر البلية ما يضحك(رحم الله ابو الدرداء)

[yassom]

#1412200 [ابوبكرنك]
4.00/5 (1 صوت)

02-09-2016 08:53 AM
موضوع جميل بس يا استاذ جبره اريد اعرف هل المحدثة ولا اود أن نلفت انتباهكم بأن هذه المحدثة مسجلة لمحتدثة

[ابوبكرنك]

#1412191 [محمدوردي محمدالامين]
3.50/5 (2 صوت)

02-09-2016 08:42 AM
يا استاذنا الفاضل جبره الله يجبر خاطرك وخاطر اللي خلفوك؛كلما نتعب ونحبط من اخبار الحيكومه وفساد كيزانها متعدد الاشكال والالوان يظهر لينا لون جديد الان ظهر فساد حريم السلطان اقصد حريم الرئيس ، هل سمعت باحقية وداد بابكر في ملكية ارض نادي بري ؟؟!!
ارجع واطيب خاطرك الغالي شكرا علي كتاباتك التي تطيب كثير من الخواطر بعد الاذي النفسي الذي نعانيه من الحيكومه وحريمها ( الطلعوا لينا جديد ديل !!)

[محمدوردي محمدالامين]

ردود على محمدوردي محمدالامين
[ثـوار البرارى] 02-10-2016 01:45 AM
كمان وصل الأمر والسرقة الى نادى برى ؟ الا تعلمى يا امراة ماذا حصل للمسؤول الذى حاول التعدى على ارض نادى برى ولمواد البناء التى وضعها فى ارض النادى ؟ نصيحة لزوجك أولا بأن يعرف بأن نهايته ونهاية نظامه سوف تأتى من برى وما ادراك ما برى ؟ اما انت فنكتفى فقط لحرمتك ووضعك كامرأة يجب على الرجل احترامها لكونها امراة الا تغلطى واكرر الا تغلطى واراضى الله واسعة فامرحى فيها ما شئت وان غدا لناظره قريب .


#1412155 [مريود]
4.00/5 (3 صوت)

02-09-2016 07:40 AM
كنا في دورة مجتمعية وتشمل برنامج إسعافات أولية في دولة تحترم مواطنيها أكثر من عشرمية جدا جدا.

قال المدرب : زمن وصول الإسعاف بحد أقصى 7 دقائق ( لم يضع أي استثناءات ).

مثلا لو كانت الطرق ( مزدحمة ) برسلو مروحية.

ونحنا المريض بعدما يدخل النعبر بجيب معاهو مروحة من البيت.

وممكن الكهرباء تقطع.


أنا شخصيا عايشت لحظات انقطاع الكهرباء خلال عملية جراحية ( بنج نصفي ).

سمعت أحدهم يقول ياعم عم فلان أدينا يدك.

رجع النور وبعد شوية بنجوني كامل تاني لقيت روحي في العنبر.

قطوعات كهرباء يعقبها بعوض وحر . ألم أشد من المرض.

الحمد على كل حال.

صباح اليوم طاف في خاطري طيف مفاده .أتم البيت وأشتري لي عربي ( جديدة) تقطع لي ما بقي من العمر بدون مشاكل وأعطال.

صحوت من هذا الطيف على حديث النفس قائلة : لكن السودان دا بلد والواحد يستقر فيهو؟؟

غاز مافي . شوراع كعبة .كهربا تقطع . أمن مافي . مستشفى يمرض بدل ما يعالج . غبار . كتاحة.

فكرت أعمل لي مشروع في المدينة المنورة وأعيش بها والسلام.

تقول لي عودة طوعية!!!!

[مريود]

#1412137 [ابو الطماير]
4.00/5 (1 صوت)

02-09-2016 07:09 AM
يادووب تعرف يا استاذ انو الانسان ما عندو فيمه في عهد الانقاذ؟؟؟؟؟؟؟؟؟

[ابو الطماير]

#1412081 [حكم]
3.50/5 (6 صوت)

02-09-2016 01:01 AM
موضوع الجودة فى السودان عموما هو عبارة عن موضة
كلهم بيتكلموا عن حاجة ما عارفنها شنو
واقرب مثال ليك هو ان المجلس الاعلى للجودة الشاملة يتبع لوزارة الموارد البشرية بالرغم من ان مفهوم الجودة الشاملة اشمل من الموارد البشرية
بمعنى ان الموارد البشرية جزء من مفهوم الجودة الشاملة

[حكم]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة