إلى ... سيدنا ...المُطاع ..
10-28-2015 03:46 PM

image

إلى ... سيدنا ...المُطاع ..
****
محمد عبد الله برقاوي..
***
شعبك .. و.. بيدو ..كونك سيدو ..
وسوي فيهو .. الشي البتريدو ..
منو البنازع سّيد في عبيدو..
البسرق سخل ..أقطع إيدو ..
والبلهف جمل .. أرفعو .. زيدو ..
***
وشيوخ الفتوى دوام جاهزين ..
ترزية يفصلو .. بإسم الدين ..
مادام للفارهات هم راكبين ..
شن خصاهم في المطحونين ..
****
حرامي الأزيار وعطشان .. يتبهدل ..
وزول المليار . طغيان .. يتدلل ..
ولو حادب جاكم .. شان بس يسال ..
تقولو .. بسيطة.. بيتحلل ..
***
البختف وجيعان بالشرع يُدان ..
وبالوضعي كرامة النسوة تُهان ..
ولص الكيزان في العز بطران ..
الناس تفقر ..وزولكم غنيان ..
***

هوس النسوان .. سويتوهو عباده ..
كل واحد عندو اتنين وزياده ..
وما ملكت طبعاً في البيعه هواده ..
الناس أغراب وانتو الساده ..
في البلد الجد فقدت مشهاده ..
***
بعتو مشاريعنا المروية ..
ودمرتو بناها التحيه ..
والسكة حديد باتت مطويه ..
لحاكم باقيالنا آذيه ..
وشالات الخيبة الملويه ..
***
قايلين التنمية كبري وسد ..
وتهليل وهتاف أجوف بالرد ..
إنجاز البنيان كيفن ينعد ..
وذل الإنسان.. جد.. فات .. الحد ..
***
كرامة البلد أضحت مُعتله ..
تعدي الجيران في عيونها مسله ..
جيشنا المحنان في اليمن إتدلى ..
وذات الحاكم عن عرضو .. اتخلى ..
ونسى أرضو .. الراحت مُحتله ..
***
العنوسة أنتشرت واتفشت ..
وفرص العشمان في العمل إنقشت ..
عقول الشباب ياما طشت ..
خلف الأوهام .. وإتغشت ..
***

.. الكان شهيد و في الجنة عريس
رجعتو .. وسميتوهو فطيس ..
والصدّق باراكم لى عند الميس ..
أصبح ندمان .. بالخدعة تعيس ..
***
بالتمكين كم مخلص طاح..
والفاسد قلدتوه .. وشاح ..
صوت المحروم من وجعته صاح ..
الكسرة بقت عدمانه ملاح ..
وشليل وين راح أكلو التمساح ..
***
فسادكم .. عافتو ..حتى الريحه ..
وسمعتكم في الدنيا فضيحه ..
كلمناكم .. ما سمعتو .. نصيحه ..
لكن اليوم بنقولها صريحه ..
باكر خاتمتكم ما بتبقى مريحه ..


****
حواركم عاملنو..وسيله ..
جمعتو .. الواهمين ..بس توصيله ..
تخلي نظاكم طويل التيله ..
تتوحدو ..و تعوسو اللعبة رذيله..
أها.. نحن الساكتين وروحنا طويله ..
ما تقولو خلاص ..فقدنا الحيله ..
****
يا سيدنا الحاكم .. وبالتيله مُطاع ..
ما لينا معاك في الوطن الضاع ..
غير نتجرع كاس الأوجاع ..
يا نتشتت كدا في الأصقاع ..
يا نقوم نعدل عوج الأوضاع ..
***

[email protected]


تعليقات 2 | إهداء 0 | زيارات 1742

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1362148 [سيزر]
0.00/5 (0 صوت)

10-29-2015 02:41 AM
حواركم عاملنو..وسيله ..
جمعتو .. الواهمين ..بس توصيله ..
تخلي نظاكم طويل التيله ..


أبومدين وجمعه بشاره أرو كبروا بيكم الكوم وصدقتوا ..
قايلين الحكاية جد وفي التلفزيون إتفلسفتوا..


فيها تراجي وعلي مهدي فاكرين شنبه حقيقة بس إتدقستوا ..
إتلميتوا يا خايب الرجا وعواجيز البلد الكانوا دكاتره وبروفسيرات قعدتوا وصنقرتوا ..


خموا وصروا .. وحواركم بلوا وموصوا مخرجاته بعد ما إتبجحتوا ..

[سيزر]

#1362049 [البعير]
5.00/5 (1 صوت)

10-28-2015 07:01 PM
بارك الله فيك الاستاذ محمد عبدالله برقاوي ،لازم نقوم نعدل عوج الاوضاع بكنس هذه الزبالة التي قسمت ارض المليون ميل مربع .
هيا يا شباب هيا للامام
سوداننا قد مل المنام
حريه كاااااااااااااامله هي المرام
تؤخذ و لايجدي الكلام
فحذاري ان وطنك يضام
و حذاري ان يصبح حطام
جهل و فقر وانقسام
فلنتحد و يجب نعيد
لوطننا امجاد الكرام

[البعير]

محمد عبد الله برقاوي
محمد عبد الله برقاوي

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة