الشعب يريد زيادة المصروف
03-26-2011 11:32 AM

ساخر سبيل

الشعب يريد زيادة المصروف

الفاتح جبرا

يبدو أن ظاهرة الإعتصامات ..والاضرابات .. والمطالبات التى تشهدها الساحة العربية قد ألقت بظلالها على الجميع

فقد إستيقظت صباح اليوم على أصوات مظاهرات صاخبة ، خرجت من غرفتى لإستجلاء الامر لأفاجأ بان أبنائى ناجى ونشوى يطوفان بأرجاء المنزل وهم يحملان (قطعة كرتون) مكتوب عليها بالقلم الأسود الشينى (الشعب يريد زيادة المصروف) وقد حولا المنزل إلى ساحة (تحرير) حيث إمتلأت الجدران بالملصقات التى كتبت عليها بعض الشعارات والمطالب المختلفة من شاكلة :

* أوقفوا الصرف على السجائر
* لا تدخين بعد اليوم
* اللحمة أساس الحكم
* لاب توب لكل مواطن


ما أن شاهداني حتى إزدادت حدة هتافاتهما وتعالت ، إقتربت منهما طالبا منهما أن يتوقفا عن الهتاف وينفضا (ويفرتقوها) قبل أن أقوم بتفريقها مستخدماً القوة ..

- نفرتقا ليه؟

- مظاهرتكم دى غير قانونية

- لكن دى مظاهرة سلمية والدستور بيقول ...

- (مقاطعاً) : القانون بيقول تطلعوا ليها تصريح ! إنتو هسه عندكم ليها تصريح !

- كل ما نكلم ماما نقول ليها عاوزين تصريح تقول لينا ما بديكم عشان خايفة ناس يتدسوا وسطكم وتحصل مشاكل ! والبلطجية يجو ينضموا ليكم !

- وهسه إنتو عاوزين شنو؟

- عاوزنك تحقق لينا الحاجات دى قبل سقف المطالب بتاعنا يعلا !!

- يعلا دى شنو كمان يا أولاد اللذين ؟ أوع كمان يكون فيها (أرحل) دى تبقى مصيبة سوداء !

- إنتا كمان يا بابا بتخاف من (أرحل) دى زى الجماعة !!

- كيفن ما بخاف مكنكش فى أمكم دى ليا عشرين سنة .. أرحل أمشى وين يعنى ؟

- طيب لجنة (التغيير) عاوزه تقعد معاك !

- هلا .. هلا .. هو كمان عملتو ليكم لجنة تغيير ومفاوضات وكده !

- أيوه أنا الرئيس و(نشوى) المقرر !

وجلسنا سوياً .. وقد تفاجأت بأن أول بند تريد أن تناقشه (لجنة التغيير) هو (الفساد) ... نعم الفساد

- يا أولاد إنتو ما عندكم راس؟ فساد شنو كمان ؟ البيت ده لا بيعمل (عطاءآت) ولا (ببنى عمارات) ولا عندو جمعيات خيرية وهمية ولا بشيد طرق وأنفاق ولا عندو شركات وميزانيتو معروووفه وبتتراجع من (أمكم) على داير المليم .. أها الفساد ده يجى من وين؟

- الصرف البذخى ده ما فساد ؟.. لما ميزانية (السجائر) بتاعت حضرتك تكون أكبر من ميزانية (التعليم) ده مش إسمو فساد !

- (ضاحكاً) : فساد شنو يا أولاد إنتو جنيتو ؟ ما الدولة الإسمها دولة ميزانية (الأمن) فيها أكبر من ميزانية (التعليم) والصحة ذاااتا !

- الدولة عاوزة (تأمن روحا) لكن إنتا عاوز (تهلك روحك) ونحنا ما ح نسمح بالعملية دى

- لكن ...

- مافيش لكن .. موافق على إيقاف التدخين وتحويل ميزانيتو (للتعليم) وللا ما موافق؟

بينى وبينكم تحسباً لإرتفاع حدة الإعتصامات والإضرابات داخل المنزل وتخوفاً من رفع سقف المطالب والمسألة تبقى فيها (أرحل) وشنو ما عارف ولأن (التدخين ضار بالصحة) وجدت لزاماً علي ان ارضخ فوراً لهذا الطلب .

- أها المطلب التانى شنو؟

- زيادة المصروف عشان يتماشى مع زيادة الأسعار الكلو يوم دى ! إنتا هسه يا بابا عارف سندوتش الفول المصلح بى كم؟

- ما عارف !

- ما دى هى ذاااتا المشكلة .. لازم تكون ما عارف لأنك ما بتتفقد (شعبك) وما بتعرفوا بياكل شنو وبيشرب شنو والمصروف البتديهو ليهو ده كفاية وللا ما كفاية وبيقعدو كم يوم !!



بدون أى مناقشة تمت الموافقة على زيادة المصروف ليتلائم مع (سياسة التحرير) ! على الرغم من عجز الموازنة المنزلية وقلة الدخل وكثرة الإلتزامات وكمان بصراحة كده خوفا من (إرحل) !

وبعد أن تم إستعراض كافة المطالب وقبولها (طبعاً) طلبت من أعضاء (لجنة المفاوضات) إنزال كافة اللافتات وإزالة كافة الملصقات وإيقاف (المسيرات) غير أن الإجابة كانت حاسمة :

- عاوزين المطالب دى تتحقق فوراً !

- يا جماعة أدونى فرصة يومين تلاته أجتمع مع حكومتى أقصد (أمكم) عشان نتدارس الموضوع

- ما فيش حاجة إسمها تدارسوا الموضوع .. ليكم عشرين سنة ما إتدارستو ليه؟ منتظرين شنو ؟ لازم المطالب دى تتنفذ فوراً وإلا ...

- كمان جابت ليها تهديد ... وإلا شنو؟

وهنا قامت نشوى من مكانها متجهة ناحية (الكاميرا) التى كانت تخفيها فى مواجهتى بعناية وأحضرتها قائلة :

- ما تهديد ولا حاجة بس ح نقوم نرسل الشريط ده (للجزيرة) !!


كسرة :

عشان كل حاجة ولا (تغطية الجزيرة) .. قمت بتنفيذ المطالب على الفور !


تعليقات 18 | إهداء 4 | زيارات 5631

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#117996 [زوووول وبس !]
0.00/5 (0 صوت)

03-27-2011 05:29 PM

أنا شايف تتجرجر عليهم في المطالب وجلسة ورا جلسة لما تزنقهم زنقة زنقة
واشتغل معاهم في خلال هذا الوقت بنظرية فرق تسد

والكلام ليك يا المنطط عينيك


#117902 [الزرقاء]
0.00/5 (0 صوت)

03-27-2011 02:11 PM
تحيا الحكومة بتاعتك قصدي (مرتك) وياريت المقصود يفهم


#117872 [abdu]
0.00/5 (0 صوت)

03-27-2011 01:38 PM
عندى لك وصفة تخرج بها من هذا المازق قول ليهم تعالوا نتفاوض والما بيجى بالرشوة اعتقلوا زى ما بعملوا الجماعة اياهم


#117639 [kamilia agag]
0.00/5 (0 صوت)

03-27-2011 12:39 AM
نحنا دولتنا دولة راقية يالفاتح دولة مافي دولة وصلت لي فسادها شفت ليك زمن امن وطني يكون عنده مصانع وشركات وهو البمول السوق بالطحنية والمواد الغذائية هم البمولوا التجار حتى بالربا شفت ليك طهة امنية تتاجر بقوت الشعب شفت التطور دا والامن الوطني هو البمول الجيش بالمواد الغذائية وبقبض شيكات من الحكومة شفت الناس دي تطورت كيف انا قايلة الامن الوطني بمارس التعذيب والقتل بس اتاري بشغل وقت فراغه بالتجارة وبقولوا التجارة شطارة والان الصادق قال ليهم يا انا فيها يا اخفيها لقي طريق البشير اضمن للسرقة لانه الشعب لو اسقطها تاكد الناس مابتحبه

غابتوا جنس تطور سرقة في دولتنا غايتوا لو عاوز تاكل املادك وتعلمهم انضمن للعصابة واسرق مافي طريق غيره


#117599 [ابراهيم]
0.00/5 (0 صوت)

03-26-2011 09:31 PM
اولا ياجبر يبدو ان اولادك قد تعاطو حبوب الهلوسة لذا فلا تواخذهم فيما يقولون

اما اذا سمعت بذلك قناة الجزيرة فلا تخاف لانك من الاخوان المسلمين

ثم ان 20 سنه غير كافية للتغير

لاتخاف لان جبرة ليس كمصر او تونس وليبيا

لذ عليك عليك بالتعامل الحاسم علي هذه التفلتات



ث


#117550 [ساlv]
0.00/5 (0 صوت)

03-26-2011 07:00 PM
سيتم تحوليك للمحاكمة؟ بحجة الاساءة!! لانك تشير بتعلم الديمقراطية من العيال!!! يعني الماعندو مابيعرف التغيير ولا الديمقراطية!! وهذه اشارات مسيئة!!!! وتذكر ببعض شعارات الانتقاضات في الفترة المايوية!!!! يعني اي حاجة تقوله تدخلفي الساسة!! اها بترقد!!!


#117504 [AlHalfawi]
0.00/5 (0 صوت)

03-26-2011 04:47 PM
والله يا أستاذ جبرة أحي فيك التظاهر بروح الديمو كراسى (حسب الكتاب الأخضر) وكويس ما قلت ليهم ألحسو كوعكم, أو قووا ضراعكم, ولى لاقونى فى الشارع...وإلا لفرض عليك حظر جيب, وتجميد أرصدة... ودخول قوات أجنبية متمثلة فى تحالف من الجارات والخالات بأسلحة سريعة الكلمات... مما يؤدى لهضربة شديدة زى سأبحث عنكم غرفة غرفة, دولاب دولاب...أنا صحفى ثائر من السودانى, من الرأى العام...وبعداك تضطر ذليلاً لتوقيع مذكرة تفاهم للبحث عن مخرج!!!


#117429 [محمود]
0.00/5 (0 صوت)

03-26-2011 02:04 PM
استاذى
زيادة المصاريف تعنى مزيد من الانفاق ، والاصل زيادة الدخل


#117425 [amy safwat]
0.00/5 (0 صوت)

03-26-2011 01:53 PM
السلام عليكم الاستاذ جبرة والله موضوعك فى الوتر الحساس وياريت لو فى السودان واحد بس زيك كان الحال شى تانى ** الدمقرطيه مهمه جدا عشان ما احصل ليك زى ما حصل لى اخوانا ؟؟؟؟؟؟؟؟؟؟؟؟ انشاء الله تكون عرفتهم اااا اما بخصوص البطاقه قالو ح تكون الدخول الى ارتريا بى البطاقه دة كلام البلاد دى مصيرة شنوا والناس ديل عايزين اوصلوا لى شنوا ؟؟؟ وزياده الصاريف دى مهمه شديد السعار كل يوم فى تزايد والمرتبات زى ما هى والله حاوى مااقدر يعيش فى السودان والعايشين ظهرين


#117424 [منعم]
0.00/5 (0 صوت)

03-26-2011 01:53 PM
ما ان تعلم الحكومات\" دي براهه وحكومتنا القاعدة لينا في نفسنا دي الكلام القلتو دا اكان تفادي الناس كل المخاطر والسيناريوهات وتتنحى جانباً وتوفر على دولة قطر الشقيقة كثير من الاموال عشان تساهم بيها في تنمية سلام دارفور وإعمارها


#117391 [اسمر]
0.00/5 (0 صوت)

03-26-2011 01:09 PM
لاكن ياجبرة قدرة على تنفيذ طلبات شعبك باقى الجماعه الطيبيين بس ديل شكلهم ماخايفين من ارحل


#117389 [ابوبكر]
0.00/5 (0 صوت)

03-26-2011 01:07 PM
كان تقول ليهم الحتة بتاعت الكاميرا والجزيرة دي فيها دغمسة وجمغسة وانا زي ده ما بقدر عليهو ... لكن بالجد فيها عبقرية الحتة دي .


#117385 [عبدالماجد عثمان]
0.00/5 (0 صوت)

03-26-2011 01:01 PM
ياخي السلام عليكم ورحمة الله انا بقول انت راجل فيك نوع من الخوف عشرين سنه وخائف من كلمة من ثلاثة حروف عشرين سنة خلاص كلو واحد يطلع جبله وبعدين حكاية واحد مشي زيارة لمنزل اخوه وكانت المفاجاءة زوجة اخيه قالت ليه اخوك طلع من البيت ليه اسبوع لاخبر ولا اتر وكان الرد الحاسم من الشقيق والله اخوي الخروج دا بفتش ليه سبعة سنين ودي فرصة وجات عندك وانت ضيعتها زي ماضيعوها الجماعة بتاعين الثورات اليومين ديل وشكرا عي مقالك الجميل


#117383 [زوول]
0.00/5 (0 صوت)

03-26-2011 01:00 PM
تتجازى ياجبرة هى الكنكشة دى اكبرمصيبة اللهم حلنا من المكنكشين امين يارب ..........................................................


#117378 [طشاش]
0.00/5 (0 صوت)

03-26-2011 12:55 PM
ما اجمل ان يتحلي لالانسان بروح الدعابة والسخرية وسط المعاناة والهموم...ويتسامي فوق الجراحات والاحزان.فهذا المقال بمثابة حبة كلوركين مغلفة بطبقة من السكرتحمل في ظاهرها المذاق الحلو.... وفي باطنها الطعم المر الذي هو علاج للداء;) ;) ;) حفظك الله استاذ.جبرة


#117372 [أبورماز]
0.00/5 (0 صوت)

03-26-2011 12:46 PM
وحكومة الهنا دى يا جبرا الشكله دى كلها وهى ساده دى بيطينه ودى بيعجينه .. واللا عارفه إنو النمله نشوى والجرذ ناجى وحتى الفيل ذاتو اللهو إنت ماهامنها من بعيد واللا من قريب ,, والله عفيت منها دى الحكومه واللا بلاش ..................


#117352 [sam]
0.00/5 (0 صوت)

03-26-2011 12:11 PM
من القائل : النهب المسلح أقصد النهب المصلح بقوانين في حكومة ، اختار اجابة الصحيحة من الخيارات التالية :-
1/ الصادق المهدي
2/ حسن الترابي
3/ محمد ابراهيم نقد
4/ المشير / عمر حسن احمد البشير / القوي الأمين



#117350 [سيداحمد وقيع الله]
0.00/5 (0 صوت)

03-26-2011 12:06 PM
انت عارف الجزيرة اي حاجة قدامة صــــفـــــر عشان كدة في ناس قاعدين يدفعو اتوات شهرية و سنوية وكمان بيدو شهادات جامعية و فوق الحامعية عندنا صور من الشيكات بدل مفاوضات مع الامم المتحدة احسن مع الجزيرة انت حعفر عباس دة ما قال شغال بتاع الجود و المواصفات في الكذبطلعت اي كلام يا حعفر.


ردود على سيداحمد وقيع الله
Saudi Arabia [خالد محمود] 03-26-2011 05:21 PM
قوية دي يا جبرا بيني بينك خفف من الدخان شويه بس اقلع الفلتر وعلي الحكومه ان تخفف من صرفها علي الامن وتزيد الصرف علي التنمية /حقق ليهم نص المطالب وماطل في النص التاني


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة