المقالات
السياسة
من إسراء إلى الوالي.. قبل زيارة.. حاج الصافي
من إسراء إلى الوالي.. قبل زيارة.. حاج الصافي
03-13-2016 01:24 PM



حرصت على أن أضع على طاولة السيد والي الخرطوم.. قبل أن يتوجه إلى مستشفى حاج الصافي.. (عرضحالا) من طبيبة مكتوية.. وموجوعة من داخل الحقل الصحي.. وهي جزء من صرخة صادقة أطلقتها في حشد من الأطباء.. ونشهد لهذا الوالي أنه ما من (مسألة) عرضت عليه إلا ووجدت عنده الحل الناجز.. وأحسب أن قراءة هذه العرض الصادق أهم من زيارة مشفى يعرف السيد الوالي كل صغيرة وكبيرة فيه.. وأن انحياز الوالي لهموم الأطباء التي هي هموم المرضي أهم من الانحياز لشعار لا يسنده تنفيذ على الأرض.. تقول هذه الطبيبة الشجاعة مخاطبة زملاءها:
"لابد أن نؤمن بإنو نحن عندنا القدرة إنو نوفر لأي عيان جوة البلد دي مستشفيات أحسن من المستشفيات الجايي منها الدكتور دا في إيرلندا، لو ما آمنا بالكلام ده ما حنتحرك من المكان ده ولا خطوة، الزملاء القِدامِى سردوا كيف الآلية بتاعة إنو نحنا نعمل شنو وما نعمل شنو ونخش قروبات الواتس وغيرو وغيرو، الناس تستفيد من الحشد ده بأكبر شكل ممكن، إنو شنو؟، الناس تطلع من هنا بفكرة واحدة، إنو أنا أي اجتماع جايي لو وين ووين حأحضرو، ثانياً إنو أنا أي جمعية عمومية بتاعة أي حاجة ليه ما أكون جزء منها؟، ثالثاً أي جسم ما أخاف مافي حاجة بتخوف، مافي أي حاجة بتخوف، إذا نحنا، أي طبيب عمومي، وأي طبيب امتياز، وأي نائب أخصائي وأي أخصائي، البخوف شنو؟، البخوف شنو تاني؟!!، مافي زول بقدر يعمل ليك حاجة، الناس ما تخاف إنها تكون جزء من أي جسم نقابي حيتكون في المستشفيات حيتكون في الولايات، حيتكون في غيرو وغيرو.!
دايره أتكلم عن حقوقنا، الحقوق ما حقتنا نحنا برانا كأطباء بالمناسبة ولا حقت نواب الأخصائيين ولا مشكلة "روتيشن"، ولا مشكلة غيرو وغيرو، ولا بيئة عمل، ولا استراحة قاعدين كلنا مكدسين في أم درمان دي، في زي يكون عشرين سرير، نحن البنكون بايتين في الاستراحة دي أكتر من 200 طبيبة، نقسمها كيف؟، تطلعي تجي تقعدي في الحوادث تسِدّي، مع إنو ده وقت الراحة بتاعتك، تطلعي تجي تسدي في الحوادث مع زميلاتك بس ده البحصل، لأنو مافي حتة ترقدي فيها، والمشاكل الزي دي كتيرة، "التيكت" أم خمسة جنيه بتاعة اليوم كلو!!، وغيرو وغيرو، والمشاكل البتلاقينا أي يوم نحن فيهو "ديوتي"، دي مشاكل كلها أبسط من بسيطة. بالنسبة لي المشكلة الحقيقية، تفريطي أنا، أنا إسراء أحمد، في حق أي عيان، بفرط في حقوق العيان كيف؟، لما يجيني عيان والـ"سي بي سي"، ما شغال، أكتب ليهو "سي بي سي"، يعملو بره بـ 80 جنيه وانا من واجبي أوفر ليهو "سي بي سي"، في المستشفى، من حقو عليْ أنا. ولما يموت المريض لأنو جهاز الـ "سي بي سي"، ما شغال، لأنو أنا ما عارفة الحاصل عليهو شنو، بشكي لي "تيبكال جستمينت"، لأنو لو ما عملت "سي بي سي"، ما بقدر أأكد، أنا يموت العيان قدامي وما قدرت أعمل ليهو حاجة، الـ "فاسيليتس"، مافي، لكن أنا لو كنت جسم محترم وراء الأطباء ديل ولو كان في جسم بدعمهم وبلمهم وبنَكَوِنوا نحنا ذاتنا الجسم ده ما حتحصل الحاجات دي، أي إدارة مستشفى بتوفر لي أي حاجة أنا عاوزاها، لأنو وراي جسم قوي، بطالبها بيها وبتوفر لي أي حاجة بطلبها منها، بتوفر لي معمل محترم ما بيطلع لي نتيجة بتاعة "راندم" 21، والعيان ياهو قدامي نصيح أنصح مني، بجيك مريض بانو 21 الـ"راندم"، بتاعو والعيان ياهو قااااعد بتكلم معاك بحكي ليك في مشاكلو شنو!!، مشاكلنا أكبر قلت ليكم من مشاكلنا الشخصية بس، مشاكلنا في الحقل الصحي إنو في حق عيان بحصل ليهو أي حاجة بسبب تفريطنا نحن في حقوقنا، في حقو مسؤولين منو، أي عيان نحن مسؤولين منو، أي عيان تحصل ليهو حاجة نحن المسؤولين منو، لأنو نحن المفرطين في حقوقو، لأنو نحن بكل بساطة زي ما قلت ليكم العيان بجي وأي جهاز ما شغال في المستشفى نقول ليهو أمشي أعملو لينا بره، ما صح.. دي ما صاح مني أنا كطبيبة... ما شغالين بس نمشّي الوضع نمشّي في الـ "كداس" نمشي في الشنو.. والحقوق كل يوم بتسقط وتتراكم ورانا، الحقوق كلو يوم بتسقط وبتعمل كوم بهناك في رصيدنا بالسالب، الموضوع المفروض يحصل بس التفاف حول النواة القايمة دي اللي هي لجنة أطباء السودان المركزية وتكوين فروعها والناس ما تخاف.. الخواف ما بجيب حقو، والخايف يمشي يقعد في بيتهم ما دايرين منو أي حاجة.. الخايف ما يجي.. ما دايرين منو أي حاجة.. بالجد بالجد ما دايرين منو أي حاجة ويمشي بيتهم.. الناس ما تخاف.. والناس لو كلها مع بعض مافي شي بيخوف"... دمتم.. ودمتي!

اليوم التالي


تعليقات 8 | إهداء 0 | زيارات 3692

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1429140 [ود شندي]
0.00/5 (0 صوت)

03-15-2016 04:18 PM
يا صادميم يا فيلسوف ممكن تورينا علاقة CBC بتشخيص الجلطة شنو ولا فصاحة بس انا قلت الكاتب غلطان وليست الطبيبة

[ود شندي]

#1428765 [ود شندي]
0.00/5 (0 صوت)

03-15-2016 04:47 AM
لزوم التوضيح chest pain اي الم بالصدر وهو اهم عرض فى امراض الشرايين التاجية ، ECG وهو تخطيط القلب كهربايئا لتشخيص امراض الشرايين وليس CBC كما ذكر الكاتب

[ود شندي]

ردود على ود شندي
[صادميم] 03-15-2016 03:21 PM
فحص الدم الكامل CBC وفيه يفحص الدم لمعرفة عدد كريات الدم الحمراء و البيضاء و الصفائح الدموية و نسبة الهيموقلوبين و غيرها وليس هنالك خطأ Complete Blood Count


#1428667 [الهلباوي]
0.00/5 (0 صوت)

03-14-2016 09:51 PM
كضابة كضب ، اتحداك بكرة امشي ليها غي المستشفي اول حاجة تستفذك وتضردك لانك حتلقاها مافي ولامن تجي بعد ساعتين وتتدخل ليها تسور فيك

[الهلباوي]

ردود على الهلباوي
[مسطول] 03-16-2016 04:21 AM
تسور فيك دي حلوه (يعني تبني حولك سور وتسجنك)


#1428414 [زول]
0.00/5 (0 صوت)

03-14-2016 01:01 PM
عفارم عليك يا دكتوره وربنا يوفقك ويكثر من امثالك . هذا هو الشباب الذي يشرف البلد ويشبه اهل البلد يحمل هموم المواطن يقدمها على مصالحة الشخصية لايؤدي عمل غير مجدي فما معنى ان يشرف على علاج مريض دون نتيجة لعدم توفر معينات العلاج وبيئته .
الاوطان تغيرها ايادي ابنائها فلا بد من وقوف جموع الاطباءوالعاملين في الحقل الصحي وراء هذه المبادرة الشجاعة من طبيبة احسنت اسرتها تربيتها وان تحذو بقية القطاعات هذه الخطوة الشجاعة ابتداء من الاجهزة العدلية التي تعمل في ظروف صعبة وتحت ضغوط وتمليات تؤثر على سير العدالة فما معنى ان تبقى الاف البلاغات مفتوحة ولم يكتمل التحقيق في معظهما رغم مضي اكثر من عشرة سنوات عليها

[زول]

#1428352 [قنوط ميسزوري]
5.00/5 (2 صوت)

03-14-2016 11:47 AM
أشك في نواياك في إفراغ محتوى الصوت كتابة. و خاصة بعد أن شهدت بنفسك و طبلت للصديق الرئاسي - الوالي - و مقدرته على التعامل مع المشاكل !! بصراحة أعتقد بأنك فتّان فهلوي و أنت أدرى بأنو مطلوب المحكمة الجنائية دا زيو زي صهرك الرئيس أجبن ممن إنّو يعملوا أي شي غير مضرة المواطن و 26 سنة تشهد

[قنوط ميسزوري]

#1428323 [naselhalfaya]
0.00/5 (0 صوت)

03-14-2016 11:16 AM
سلمت البطن الجابتك بتنا إسراء - نسأل الله باسمك الذي انزله سورة في القرآن اي يسري بارواح الوصولوكم لهذا الي نار جهنم يا الله

[naselhalfaya]

#1427771 [منصور]
5.00/5 (1 صوت)

03-13-2016 04:25 PM
اول مرة ، منذ زمن بعيد اسمع كلام صاح و تمام و في المليان. كلكم راع و كلكم مسؤول عن رعيته. و ما نامت اعين الحكومة.

[منصور]

#1427704 [وحيد]
5.00/5 (2 صوت)

03-13-2016 02:26 PM
حقيقة اكبر مشكلة تواجه الطبيب هو احساسه بالعجز امام مرضاه .. خاصة من كانت حالته حرجة .. خليناالطب و خلينا السودان حين اصبح وجودنا مثل عدمه ... لا يوجد حتى كونت للكشف به .. لا يوجد قطن و لا شاش و لا حتى حقنة فاضية من حقن كمال حقنة ... المريض الذي بحاجة الى جراحة كنا نكتب له قائمة بالمتطلبات من الشاش للمعقم الموضعي و حتى اللصقة و الخيوط الجراحية و الدربات ليحضرها من الصيدليات الخاصة ثم بعد ذلك عليه ان يدفعن رسوم العملية و حق الملف و حق السرير! و من لم يجد عليه الموت ... شهدنا حالات مرضى يتم اخراجهم من غرف العمليات بعد تخديرهم بسبب عدم دفع الرسوم و في مستشفيات الدولة ... الفحوصات تعمل بالمعامل خارج المستشفى و الاشعة و التصوير الطبي بالخارج ايضا .. احيانا كثيرة لا تجد اكسجين لمريض يعاني مشاكل في التنفس و نقص الاوكسجين!
لا اعتقد ان الحال اختلف الآن ان لم يكن اسوأ بعد تجفيف المستشفيات المركزية كمستشفى الخرطوم تمهيدا لتوزيع ارضه على اصحاب الايدي المتوضئة بالنجاسة و الدماء

[وحيد]

محمد لطيف
محمد لطيف

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة