ثنائيات
03-15-2016 01:05 PM

• إثنان لا يشبعان أبداً … (النار/ المحليات)
– والله النار تشبع المحليات ما تشبع !
• إثنان يتزاوغ منهما المواطن (سيد البقالة/ شرطي المرور)

– سيد البقالة مرة في الشهر لكن شرطي المرور يوميا
• إثنان لا يفتأ الدعم يرفع عنهما (الرغيف/مشتقات البترول)
– نطالب برفع الدعم نووهاايئ ..عشان نشوف أها تاني في شنووو؟
• إثنان لا يشبعان (طالب علم/طالب مال)
– طالب العلم إحتمال يشبع ورأسو يتملي لكن الكروش دي البيملاها شنوووو
• إثنان لا تنساهما أبداً (الله/الدار الآخرة)
– الزول البنسى الإتنين ديل بيكون غايتو باالغ … يراجع نفسو فوراً
• إثنان صارا الوجبة الرئيسة لمعظم المواطنين (الطعمية/فول الحاجات)
– ده في أحسن الأحوال .. حليل المحاشي والشواءات أضحت أثراً بعد عين
• إثنان تركتهما الأسر السودانية (صينية الغداء/شاي المغربية)
– والإتنين كانو مهمات لأنهما إجتماعات أسرية يومية – الله يجازي الكان السبب
• إثنان لينا زمن ما سمعناهم (تهليل/تكبير)
– أفيدونا … يكون الحاصل شنو يا ربي ؟؟
• إثنان عودتهما مستحيلة (حديقة الحيوان/خط هيثرو)
• حديقة الحيوان ترجع خط هيثرو ما يرجع .. الأخ الوزير قال شهرين وأهو هسه لينا ستة شهور !
• إثنان لا يهمهما دخول الزون (لاعب الحريق/الحاكم)
– في الحالتين يعني ح يحصل شنووو .. ما بس الزول ح يكون متفرج
• إثنان لا يمكن النظر إليهما بالعين المجردة (الأميبا/الرغيف)
– الرغيف بعد شوية ح يكون حقنة في العضل .. بس اصبروا
• إثنان لا تقربهما (النار/البنوك)
– البنوك خلت شغلا وبقت ذيها وذي الدلالية .. لو عاوز (شبشب) ممكن يدوك مرابحة
• إثنان لا تبدأ بهما يومك (النظر إلى حافظة النقود/النظر إلى عداد الجمرة)
– الإتنين لو لقيت الرصيد شوية ح يحبطوك
• إثنان نبحث عنهما فلا نجدهما (المواصلات/الشريعة)
– هنالك جائزة قيمة لمن يجد الثانية !
• إثنان سبب خسائرنا الكروية خارجياً (التحكيم/ الميدان مبتل)
– ما هو لازم يكون في سبب غير اللاعبين !
• إثنان لن تجدهما في أي مذيعة سودانية (اللون الأسمر/الكشاكيش)
– لازم بيضاء ولابسه ليها عدد من الغوايش يتناسب عكسياً مع معرفتها باللغة العربية
• إثنان تلازمان المطربين في برنامج أغاني وأغاني (التفرشخ في القعدة/الضحك بلا سبب)
– والله حكاية التفرشخ دي محيرة العبدلله ، المرة الجاية دربوهم على القعدة المهذبة .. خاصتن المطرب داك !
• إثنان يأتيان فجأتن (الخريف/الجلطة)
– أها الخريف الجاي إكتملت التجهيزات ذي كل مرة ههههه
• إثنان لا يتعلمان (المستحى/المتكبر)
– والغبى برضو
• إثنان يطرشنا قبل كده ما سمعنا بيهم (التوالي/التحلل)
– الناس دي بتجيب الحاجات دي من وين؟
• إثنان لا تخلو منها شوارعنا (القمامة/الحفر)
– حاجة تسد النفس !
• إثنان لو إختفوا من حياتنا كان الحال إنعدل (الإجتماعات/اللجان)
– كيف لكن يختفو مع الحوافز دي؟
• إثنان من أنواع العيادات عايزة نظرة من السلطات (الأعشاب/الرقية)
– تكاثرت بشكل فظيع دون حسيب أو رقيب
• إثنان إذا فسدا فسدت الأمة وإسا صحلحا صلحت الأمة (العلماء/الأمراء)
– قالو كده !
• إثنتان من الوزارات إذا ألغيتا فلن تتأثر الدولة (السياحة/البنى التحتية)
– لا توجد سياحة ولا توجد بنى تحتية ومع إرتفاع أسعار اللحوم المهول كمان تمشي معاهم الثروة الحيوانية
• إثنان أصبح تناولهما مستحيل (الفواكة/اللحوم)
• الشعب بقى ناقص فايتمينات أقل نزلة (برد) عاوزه ليها شهرين عشان تروح بعلاج يفوق ال300 ألف !!
• إثنان إذا إرتفعا فلن ينخفضا (الدولار/الأسعار)
– لمتين؟
• إثنان أصبحت أعدادهما مخيفة (المطربين/المتسولين)
– شوفو صالات الأفراح .. وشارات المرور !
• إثنان لابد أن تجدهما في منزل أي مسؤول (برادو مظللة/بوكس دبل كاب)
• البرادو لسيادتو والدبل كاب للعيال فيها شنو يني؟
• إثنتان من المهن إندثرتا (الخاطبة/ البصلح العناقريب)
• حليل (الخطبة) وحليل العناقريب !

كسرة :
• إثنان من الألقاب العلمية فقدا بريقهما (دكتور/بروف)
– طالعوا الصحف و(إستغرشو) والله تغيب من الزول أسبوع تلاقيهو خاتي ليهو (دال) قدام إسمو

كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و
عن هذه الإعلانات


تعليقات 11 | إهداء 0 | زيارات 5668

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1429403 [Osama Dai Elnaiem]
3.50/5 (2 صوت)

03-16-2016 07:30 AM
(• إثنان لن تجدهما في أي مذيعة سودانية (اللون الأسمر/الكشاكيش)
– لازم وجهها ابيض ويدها سمراء ولابسه ليها عدد من الغوايش يتناسب عكسياً مع معرفتها باللغة العربية

[Osama Dai Elnaiem]

#1429274 [سوداني حتى النخاع]
5.00/5 (1 صوت)

03-15-2016 10:09 PM
إثنان لابد من وجودهما لأهل الإنقاذ: شيخ اللمين وبله الغائب!!!

[سوداني حتى النخاع]

#1429216 [mustofa ali ahmad]
0.00/5 (0 صوت)

03-15-2016 07:13 PM
الله يديك العافية ياجبرا وىطول عمرك والله لولا عمودك دة نموت كمد

[mustofa ali ahmad]

#1429194 [صالة المغادرة]
4.00/5 (1 صوت)

03-15-2016 06:22 PM
اثنان اصبحا اكثر من الكثرة رتبة فريق ولقب شيخ

[صالة المغادرة]

#1429179 [julgam]
3.75/5 (4 صوت)

03-15-2016 05:49 PM
حليل الخطبه وحليل الرجال البكسرو العناقريب. .الله يختار محنك ياودجبرا

[julgam]

#1429166 [A. Rahman]
4.00/5 (1 صوت)

03-15-2016 05:09 PM
أقترح يا استاذ الفاتح غضافة كسرة جديدة لمن "شغلوا و يشغلون منصب النائب العام" عشان بعدين ما ينكروا إنهم لم يقرأوا الكسرات اللي انت بتحسب فيها دي

[A. Rahman]

#1429109 [جنرال زمان]
3.00/5 (1 صوت)

03-15-2016 03:23 PM
والله حكاية التفرشخ دي محيرة العبدلله ، المرة الجاية دربوهم على القعدة المهذبة .. خاصتن المطرب البفرفر داك///
(حليل (الخطبة) وحليل العناقريب !) قول يا حليل البكسروا العناقريب///

[جنرال زمان]

#1429087 [صادميم]
5.00/5 (1 صوت)

03-15-2016 02:31 PM
• إثنان يطرشنا قبل كده ما سمعنا بيهم (التوالي/التحلل)
– الناس دي بتجيب الحاجات دي من وين؟
ديل بقوا ثلاثة النظام الخالف سمعت بيهو

[صادميم]

ردود على صادميم
United States [عبدالواحد المستغرب اشد الإستغراب!!] 03-15-2016 08:03 PM
عمك تجاوز النظام الخالف مخصوص لان صاحب الفكره قبل ما يلحق يشرح (إطلب الله) ولى ملاحظه يا جبرا انت عايز الفنانين يقعدو زى عمك السر قدور القاعد زى الزانقو بول وبالمناسبه دى احكى ليكم قصتى مع القعده المفرشخه وكنت وقتها مدعوا كضيف على برنامج في إذاعة الشرق الأوسط بمبانى ماسبيرو بالقاهره وكنا انا والضيف السودانى الآخر في قاعة الانتظار لحين دعوتنا لتسجيل البرنامج وعمكم في الوقت داك كان في عمر فنانين اغانى واغانى وعلى اصغر شويه من الفنان الاشار ليهو جبرا، وبصراحه كنت قاعد متفرشخ وماهى لحظات وإذا بفراش اى والله فراش كان ينظف المكان نظر الى شزرا وقال لى (يا بيه ما تقعد كويس !!) وخجلت من نفسى وإستعدلت القعده ومن يومها والعبد لله كما عمكم السر قدور ماسك البول !!.


#1429055 [ود الشريف]
4.50/5 (3 صوت)

03-15-2016 01:45 PM
• إثنان لا تنساهما أبداً (الله/الدار الآخرة)
- ناسنا اياهم نسو الاثنين ديل زمااااان
• إثنتان من المهن إندثرتا (الخاطبة/ البصلح العناقريب)
- الاثنين ديل بالذات عايزات ليهم راااجل , والرجال وييين

[ود الشريف]

#1429056 [زول]
0.00/5 (0 صوت)

03-15-2016 01:45 PM
ظهرت واو جديدة لواوات خط هيثرو النيابة تستمع لاحد الشهود في قضية خط هيثرو هذا العنوان ظهر في الصحف في اليومين الماضيين ارجو اضافته لواوات توجيهات الرئيس

[زول]

#1429039 [ابوشوارب]
2.00/5 (2 صوت)

03-15-2016 01:15 PM
• إثنان لا يفتأ الدعم يرفع عنهما (الرغيف/مشتقات البترول)

الغريبة ما فى راحة بين الرفعة وأختها

[ابوشوارب]

الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة