ح تكون بي جلاجل
04-03-2016 07:23 PM


في مقالنا بعنوان (القصة هايصة) و الذي نشر قبل أيام وهو يناقش الملابسات التي حدثت في مجريات (إمتحانات الشهادة السودانية) ذكرنا حديث الدكتور / محمد ذنيبات نائب رئيس الوزراء ووزير التربية والتعليم الذي صرح بأن سلطات بلده قد رصدت مكاتب في العاصمة الأردنية تغري أولياء الأمور بتسفير أبنائهم إلى السودان للجلوس لإمتحان (الشهادة السودانية) لقاء مبالغ باهظة وأن هنالك في السودان من يقوم بإستقبال هؤلاء الطلاب وإستخراج أرقام جلوس لهم ثم تسريب الإمتحانات لهم لقاء مبالغ طائلة وقد أكد هذا الحديث سعادة سفير المملكة الأردنية بالخرطوم (محمد الفائز ) والذي وقف على ما حدث من (قبض) وتوقيف لطلابهم مؤكداً أن السلطات السودانية أعتقلت قرابة 80 طالباً أردنياً ضمن حملتها الأمنية على خلفية تسريب أسئلة امتحانات (الشهادة السودانية) .

على الرغم من أن ما جري يؤكد تماماً بأن القصة (تسريب) ممنهج وتجارة (رائجة) تحدث منذ سنوات بواسطة عصابة (منظمة) إلا أن وزارة التربية والعليم الإتحادية ممثلة في وزيرتها (د. سعاد عبدالرازق) ووزارة التربية والتعليم الولائية ممثلة في وزيرها (د. فرح مصطفى) يصران أصراراً غريباً لا يتوافق مع الأحداث الدائرة إذ يصرحان بأن المسالة غش وليست تسريب !
أي غش يريد منا الوزيران أن (نهضمه) في مسألة هي غاية في الوضوح (وما عايزة ليها درس عصر) ، فالغش الذي يمارسه الطلاب معروف لا يتعدي حالات (البخرات) أو (الشف) وإن أخذنا بمسألة إستخدام الجوال التي تم ذكرها (والتي من المفترض أن يراها المراقب طبعن) فكل هذه الحالات من حالات الغش أقسى عقوبة لمن يقوم بها هي الحرمان من )أداء الإمتحان) ويطرشنا ويعمينا زول كشفوهو شايل ليهو (بخرة) ودوهو ((القسم) !
فإذا أضفنا قصص (المطاردة) و(المداهمة و(القبض) والحجز !! .. فإن هذا هذا كله يا وزيرة التربية الإتحادية ووزير التربية الولائي يعضد تماما فكرة أن المسألة (تسريب) وليس (غش) ولقد ذكرنا ذلك في مقالنا المشار إليه.
ولأن السترة والفضيحة متباريات كما يقول أهلنا وحتى (تكتمل الصورة) القاتمة النتنه فها هي أخبار صحف الأمس تفيد بان الشقيقة مصر لديها ايضاً (كوتة) من الطلاب تم توقيف 55 طالب منهم كما ذكرت المصادر وقد كلفت الحكومة المصرية وزيرة الهجرة وشئون المصريين بالخارج (نبيلة مكرم) بالسفر إلى الخرطوم لمقابلة السلطات السودانية لمتابعة القضية !!!
شفتو كيف؟ طلبة أردنيين .. وطلبة مصريين .. وإحتمال طلبة سوريين .. ميت تاااني مش عارفين .. وملاحقة ومداهمة وضبط والسيد وزير التربية والتعليم الولائي وهو (وزير للتربية وليس أي وزارة أخرى) لا يتحرى ( الحقيقة) عندما يقطع بعدم كشف أو تسريب أوراق إمتحانات معتبراً ما تم ضبطه من حالات لا يعدو كونه حالات غش عادية تمت عبر الهواتف النقالة (طيب القبض والتحقيقات في شنووو) !!
أجل هذا قول فيه كثير من (السذاجة) التي يفترضها (فينا) السيد الوزير فكيف بالله يتم الغش بالهواتف النقالة في حضور المراقبين أهي شبكة ترسل (حل المسائل) بإشارات Signals يتم إستلامها داخل (رأس الطالب) وللا كيف !
ولماذا أقتصر هذا الغش على هذه الجنسيات التي تأتي للجلوس للإمتحان قبل أشهر قلائل من إنعقاده (ليه أولادنا ما بعرفو الغش بالموبايلات ده) ؟ ولماذا لا يتم تفتيش شخصى عند دخول الطلاب إلى الفصول لمنع هذا إن صح؟ وإذا أقنعتنا (الوزارة) بمثل هذه (النكتة) بإعتبارها (بتمشي فينا .. ما ساذجين وكده) فكيف يمكن لها أن تقوم بتمريرها على اشقائنا قي مصر والأردن وأبنائهم شهود بل مشاركين في (القصة) !
من الواضح أن هنالك شبكة إجرامية (منظمة) تمارس هذا العمل القذر الذي تمت معرفته بالصدفة المحضة ولولا ذلك لكانت هذه الشبكة الإجرامية (ترعى) إلى ما شاء الله والآن وكما أشرنا في مقالنا السابق على وزارة التربية والتعليم أن تقوم بعقد مؤتمراً صحفيا لتضع لنا النقاط فوق الحروف ويا حبذا لو إستضيف في هذا المؤتمر معالي السيد سفير المملكة الأردنية بالسودان وكذلك السيدة وزيرة الهجرة وشئون المصريين بالخارج (نبيلة مكرم) التي أتت خصيصاً من أجل هذا (الغش) حتى توضحوا لهم أمام الرأي العام الداخلي والخارجي أنو هم (اللي مش عارفين يربو أولادهم الغشاشين) وإنو وزارتنا (لا فيها شق لا طق) !!
ولتعلم وزارة التربية والتعليم الإتحادية والولائية أن الصمت لم يعد ممكناً وأن (الزوغان) من أسئلة الصحافة والإعلام (ليهو نهاية) ، وأن كل من (يغتغت) على هذه الجريمة التي ترقى إلى مرحلة (الخيانة العظمى) سوف ينال جزاءه لأن هذا الأمر يصيبنا كشعب في مقتل ويقذف بسمعتنا (التعليمية) إلى الحضيض ..
كسرة :
إذا رجع (الأولاد ديل) إلى بلدانهم وكشفوا الموضوع (وبالأسماء) لا تلومو إلا أنفسكم ويومها ح تكون فضيحة بي جلاجل وأهو قلنا ليكم !!
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و
 كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و ة إلا بالله …


تعليقات 22 | إهداء 0 | زيارات 8785

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1440311 [سامي]
4.17/5 (9 صوت)

04-06-2016 10:12 AM
نحن نحكمكم 27 أيها السودانيين المطيعين وتجوا في الاخر كدا تطلعونا مفسدين وكمان تقولوا نحن بنبيع الامتحانات نتحداكم نحن بعنا مشروع الجزيرة وسودانير والنقل البحري والمدينة الرياضية وشفطنا البترول كلو زمن الجنوب كان عندنا وبعنا الاراضي والميادين وولاتنا باعوا كل حاجة واكلنا مال المغتربين كلو وقروشنا قاعدة صرة وخيط في ماليزيا ودبي واندونيسيا وسنغافورة والان جاينكم اولادنا واحفادنا بوروكم دفن الليل ابو كراعا برة هم مفتحين ونحن وريناهم كل حاجة وفي الاخر كدا مافي حد يقدر يلمس شعرة من ناسنا الذين باعوا الامتحانات فهمتوا ولا ريسينكم ناشفة؟

[سامي]

#1440046 [kamal salih]
4.16/5 (10 صوت)

04-05-2016 07:45 PM
خط هيثرو قالوا التحقيق اتقفل فيه

[kamal salih]

#1439786 [البدوى]
4.16/5 (10 صوت)

04-05-2016 10:51 AM
عاوزين نعرف الأجهزه الحديثة ديه شنو وكيف بيستعملوها للغش
وهل هى تكنلوجيا حكر ..

[البدوى]

#1439694 [د. هشام]
4.17/5 (12 صوت)

04-05-2016 08:08 AM
يا أخوانا الموضوع واااااضح و تعليقي دا قلتو في أكتر من موقع و هو: الطلبة ديل أجانب و ما درسو مقرر الشهادة السودانية...دا معناهو هناك جهة داخل السودان تقوم بتدبير مراكز إمتحانات و أرقام جلوس لهم و هذه الجهة تتعامل معهم بطريقة (هاك -و ليس هات- من الآخر)و ذلك لأن هذه الجهة تستقبل هؤلاء الطلاب و تقوم بإسكانهم و تصرف لهم إجابات الإمتحانات- و كلو بي ثوابو!!!

[د. هشام]

#1439492 [البعير]
4.16/5 (10 صوت)

04-04-2016 06:07 PM
يا استاذ جبرة الجماعة ديل بعد شوية حا يطلعوا ليهم فتوه خلوها مستواره او التحلل ، هو التعليم ادمر منذ مجئ هذه الطغمة الفاسدة الذين دمروا السودان بأكمله ، فامنهم لله ( اللهم احصهم عددا واقتلهم بددا هم ومن ناصرهم وشايعهم وايدهم ولا تغادر منهم احدا انك على كل شىء قدير )

[البعير]

#1439466 [سمبر]
4.16/5 (10 صوت)

04-04-2016 04:54 PM
انت خليك مع الامتحانات و التحقيق في خط هيثرو قفلو

[سمبر]

#1439317 [الناهه]
4.14/5 (9 صوت)

04-04-2016 12:21 PM
اطلقوا سراح الطلبه الاردنيين والمصريين وغيرهم فورا وسفروهم الى بلدانهم
وامسكوا الفاسدين السودانيين الذين استقطبوا الطلبه الاردنيين والمصريين وغيرهم فهم راس الحيه وجوهر الفساد والافساد ولا تكونوا كمن مسك البردعه وخلى الحمار فالحمار موجود عندكم ولا قيمة للبردعه بدون الحمار
جماعتك كانوا على مايبدو شغالين من زمان
مساكين الطلبه الشرفاء الذين سهروا الليالي الطوال يجتهدون ويكدون الكتب ويكون مصيرهم الرسوب جزاء امانتهم ويكون النجاح للغشاشين الفاسدين
بالتالي التربيه والتعليم وسودان لاين سيكونان اخر من شيع السودانيين الى مثواهم الاخير بعد جنوب السودان والبترول وسودانير ومشروع الجزيره والسكه حديد وفي الانتظار لتشييع النيل الازرق بعد اكتمال سد النهضه ون بعده تشييع هيئة الكهرباء حيث ستبقى اسلاك بدون توليد كهربائي ومن بعده قطيع الماشيه بعد اتمام تصدير ما تبقى من اناث ولن يبقى لكم غير جماعتكم الذين سيعيدكم سيرتكم الاولى بمشيئة الله ويافرحتنا وهنانا بيهم

[الناهه]

#1439314 [مواطن سودانى]
4.17/5 (11 صوت)

04-04-2016 12:19 PM
غش تثريب عازين معانى واضحه للكلمتين ياخونانحن العربى اتعلمناه فى المدارس و وزاره التربيه ليها الفضل فى تعليمنا اللغه العربيه. اصلنا نوبا و كده ما تاكلونا حنك
ما عايزين واحد من بتوع الغش و التثريب ديل يجنا فى التلفزين مبروك اول الشهاده السودانيه.
الايه 92 من سوره يوسف ( قال لا تثريب عليكم اليوم يغفر الله لكم و هو ارحم الراحمين)

[مواطن سودانى]

ردود على مواطن سودانى
European Union [قاضي إشبيلية] 04-04-2016 01:30 PM
يا مواطن سوداني .. الكلمة هي تسريب و ليس تثريب.

الفرق : الغش - أن يشيل الطالب بخرة فيها معلومات أو يغش ممن يجاوره في قاعة الامتحانات.
التسريب - إخراج أوارق الأسئلة نفسها و يحصل عليها الطلاب ..


#1439276 [زول]
4.15/5 (9 صوت)

04-04-2016 11:34 AM
واضح جدا ان هذا الموضوع يحدث لعدة سنوات ولذلك وجد هذا الرواج والاقبال الشديد لدرجة ان يصل الطلبة المصريين والاردنيين لقرابة الالفين طالب ولولا ان جاءت الفضيحة واخبارها من الخارج لاستمر هذا الحال الى يوم يبعثون
الموضوع واضح وما داير مكابرة هناك فساد ومفسدين ولكن سياسة الدولة هي حماية الفساد والمفسدين بل وترقية المفسدين كمان لذلك لن تعترف الوزارة بهذا الفساد ولن تكشف عن الاسماء لو انطبقت السماء علي الارض واعلى مافي خيلكم اركبوه

[زول]

#1439272 [جلباق]
4.16/5 (10 صوت)

04-04-2016 11:26 AM
لقد استمعت الي حديث الوزيرة المصرية في مقابلة معها بعد أن حضرت للسودان و رجعت لمصر أن الطلبة المدانين كانوا بيدخلوا سماعات دقيقة في أذانهم و كانوا بيتلقوا الاجابات من جهاز انتركوم لاسلكي . دا عمل منظم بتاع عصابات و لا بد من أن الحكومة تكشف المترطين فيه

[جلباق]

#1439221 [الفطقي]
4.13/5 (8 صوت)

04-04-2016 10:04 AM
هو الموضوع واضح يا جبرا .. غش لكن بسبب الإعلام إتدهور وبقي أمن قومي .. بس .. دي هسي دايرة ليها فهامة أمريكية؟!!!!!؟ كده بالله خلونا مع جقلبة الجزيرة وأحمد منصور

[الفطقي]

#1439204 [يحيي العدل]
4.16/5 (11 صوت)

04-04-2016 09:36 AM
إذا رجع (الأولاد ديل) إلى بلدانهم وكشفوا الموضوع (وبالأسماء) لا تلومو إلا أنفسكم ويومها ح تكون فضيحة بي جلاجل وأهو قلنا ليكم !!

هذا هو المهم في الموضوع

[يحيي العدل]

ردود على يحيي العدل
[ود الشريف] 04-04-2016 12:02 PM
الجرجرة دي كووولها عشان يقولوا للعيال دول لامن ترجعوا لبابا وماما خلوها مستورة . مستورة السواد والرماد المرمطوها الجماعة .


#1439202 [ود الامام]
4.17/5 (10 صوت)

04-04-2016 09:35 AM
وزارة التربية لو قالت تسريب معناها سوف يتم اعادة الامتحانات والحكومة مفلسة ما عندها قروش عشان تعيدها عشان كده قالوا غش ا

[ود الامام]

#1439155 [احمد الخضر]
4.17/5 (11 صوت)

04-04-2016 08:20 AM
يعني يا جبرا عايزم يفضحوا (النافذين) أصحاب الايدي المتوضئة للشعب ويقول فلان وفلان هم وراء بيع شرف الشهادة السودانية وقد اغتنوا منها (لا تحلم بالمستحيل ياجبرا)

[احمد الخضر]

ردود على احمد الخضر
[ود الشريف] 04-04-2016 12:04 PM
كده خلونا من الامتحانات الفيها (نافذين) وكلها غش في غش . ديل من دخلوا يدهم في ( الحج) يمكن الحجو في زمن الناس ديل ذاتو يكون فيهم غش


#1439100 [صالة المغادرة]
4.08/5 (7 صوت)

04-04-2016 06:55 AM
يا جبرة امس فى واحد اتصل من لندن قال لاقى المتحرى حسنين فى القسم الاوسط لندن وعرف منه ان بلاغك تم شطبه لان سفارة السودان بلندن قدمت مستندات بان البلاغ فى طريقه للتسوية عبر التحلل وكمان جابو تقرير من التجانى الماحى ان مقدم البلاغ فاطى سطر وفى رواية صفحة كاملة وقاموا بعرض شريط فيديو لسودانى طالع فى صينية تقاطع شارعى الاربعين والعرضة جنوب مستشفى التجانى الماحى وقالوا لشرطة لندن الزول البنبح ده ياهو صاحب البلاغ ودحين يا جبرة انا عندى ليك مقترح جديد ومفيد وهو ان تذهب الى نيويورك وتقابل بان كى مون وعضوية مجلس الامن خاصة ناس العضوية الدائمة جماعة البغى والطغيان وتوضح انو خط هيثرو رقدوا بيهو كيزان وانجليز كمان وبالمرة كده تغشى معاك سويسرا مقر حقوق الانسان وترفع عريضة بالانابة عن الشعب السودانى والباقى انت تمو خيال بس فى حاجة عايزنك تعرفهايا جبرة ان موضوع الاقامة فى نيويورك والتذاكرمن الخرطوم الى نيويورك عبر هيثرو نحن جاهزين بس حدد تاريخ المغادرة ونحن فى الانتظار والشوق بحر ومطر يا حبيب .

[صالة المغادرة]

#1439039 [خليفة احمد]
4.19/5 (7 صوت)

04-03-2016 11:54 PM
صدقت ياودجبرا ...الجماعة لمن لقوا الموضوع حيجيب هوا لحكومتهم وبشيرها رسمو حنك الغش وعايزين يدغمسو تسريب الامتحانات والذي يتم منذ سنوات تحت رعاية نافذين وبالاخضر ابوصلعة حبيب الكيزان الابدي.... حنك الغش حنك بيش ورواية فطير تم نسجها وحبكها بواسطة الامن ونفذتها الاستاذة التي اكيد رائد او مقدم امن .
.السؤال ماهو الداعي لتكريم استاذة كشفت حالة غش !!!! وان يتم التكريم بواسطة مدير جهاز الامن اللفريق محمد عطا !!!! الامتحانات اسربت للطلبة العرب بالقروش وتم صبط جزء منهم ب،اسطة ذات عو واسع عايزين تقنعوا الشعب الاهبل بانها حالة غش!!! احترمو عقول شعبكم بعد ان مسحتوا بسمعته البلاط ياهبل

[خليفة احمد]

#1439029 [خواجة]
4.16/5 (10 صوت)

04-03-2016 11:04 PM
ارتحنا الملف قفلوهو.وبرشلونا غلبوها.

المهم خط الجزيرة قريبا حيفتحوهو.

[خواجة]

#1439003 [عبدالواحد المستغرب اشد الإستغراب!!]
4.16/5 (12 صوت)

04-03-2016 10:07 PM
حضرة سيادتك هل تعلم بأن سمك جلد وحيد القرن خمسه سنتمتر وعشان كده الأسود بتعانى معاناة شديده إذا حظها كان عاثرا وعتروا في وحيد قرن وحاولوا إفتراسها!!والعلماء يقولون بأن الأسد ينشب مخالبه الطولا بالكتير خمسه سنتمتر قى فريسته وإذا كان سمك جلد الفريسه اقل من الخمسه سنت فالاسد يغرس مخالبه لتصل الى عصب الضحيه ويشل حركتها تماما والمناسبه وبعد اللفه دى كلها عايز أقول لحضرة جنابك إنتو تعبانين ساكت مع نظام ثبت بما لايدع مجالا للشك إنه من فصيلة وحيد القرن فهؤلاء الأوباش جلودهم سميكه واسمك من جلد وحيد القرن بطبقه او طبقتين!! وانت متخيل حتى لو الطلبه الغشاشين رجعوا بلادهم وكشفوا أسماء افراد العصابه ده حيحرك فيهم شعره؟ ده بالميت حيترقوا درجه او درجتين في حال ظلموهم!!.

[عبدالواحد المستغرب اشد الإستغراب!!]

#1438998 [حكم]
4.11/5 (10 صوت)

04-03-2016 09:51 PM
اخونا جبرا
انت عارف المصريين بيجوا السودان ليه؟؟
عشان فى بلدهم الثانوى اربعة سنوات ، لانه نظامهم 4 4 4
فى السنة الثالثة الثانوى هى امتحان توجيهى ، واكماله يديك شهادة اكمال ثانوى
اما السنة الرابعة هى ما يسمى بالثانوية العامة وهو ما يعادل امتحانات لدخول الجامعات.. والنظام دا هو النظام فى معظم الدول الاوربية.. وهو الاساس ثمانية سنوات .. سنتين فى الثانوى وبعدها الدخول لكلية سنتين يتحدد فيها المساق ادبى او علمى او تجارى او صناعى.. ومنها الامتحان للجامعة

يخيل لى الغرض الاساسى للطلب على الشهادة السودانية هو اختصار عام بالنسبة للطالب.. لانه اذا الشرط السودانى هو مرور ثلاث سنوات على اكمال مرحلة الاساس فهو يعتبر توجيهى بالنسبة ليهم.. واذا كان فيها كشف امتحان ومرور بالساهل يبقى خير وبركة.. ويرجع الطالب يقرأ الجامعة هناك بالشهادة السودانية.

مشكلتنا هو سلمنا التعليمى المشاتر.. الدولة الوحيدة فى العالم البتدرس حداشر سنة قبل الجامعة.. وبعد توصيات مؤتمر التعليم باضافة عام فى الثانوى.. طلع القرار انه حيضاف العام فى الاساس..
ليه ؟؟؟؟؟

يمكن يكون عشان خاطر الطلبة البيدفعوا بالدولار؟

[حكم]

#1438997 [توفيق عمر]
4.17/5 (12 صوت)

04-03-2016 09:50 PM
غش غادي يتم عبر هواتف ذكية وكدا
طيب العلي الخط بي هناك بيتصل بي الاولاد ديل ويديهم الاجوبة علي الاسئلة
منو
مش الزول السرق او تسرب اليه الامتحان وحلاهو وبيوصل الاجابات للاولاد ديل
ولا شنو انا ما فاهم حكاية غش دي
وشفتو ليكم غش بيتطور الي امن قومي

[توفيق عمر]

#1438996 [سوداني حتى النخاع]
4.17/5 (14 صوت)

04-03-2016 09:48 PM
أستاذنا الفاضل الفاتح جبرا لك التحية.
إن تسريب أو(كشف) الإمتحانات تعني غش حسب مصطلح أهل الإنقاذ. علينا أن نتعلم مصطلحاتهم لكي نفهم مايقصدون، أو نلغي عقولنا ونصدقهم!!!

[سوداني حتى النخاع]

#1438967 [julgam]
4.14/5 (11 صوت)

04-03-2016 07:49 PM
جيب حبوب الضغط يا ولد. .والحقني على الصينيه. .أنت ياجبرا خط هيثرو خليتو ولا شنو..

[julgam]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة