العتالي
04-04-2016 08:46 PM


كان عم (أيوب) يعمل (عتالا) بسوق التوابل بالمدينة يقوم بإنزال حمولات الجوالات المليئة بالشطة والكمون والفلفل والتوم والكسبرة وبقية التوابل من اللوارى إلى داخل مخازن التجار ، بعد سنوات قضاها فى هذا العمل الشاق أصيب عم (أيوب) بضيق فى التنفس إثر إلتهاب فى الشعب الهوائية جراء حساسية اصيب بها من تواجده الدائم بين روائح التوابل النفاذة فى تلك المخازن الرطبة ذات التهوئة الرديئة.
فى أول زيارة له لتلك المستشفى الحكومية قبل سنوات طويلة تم تشخيص الحالة بأنها حالة (أزمة شعبية) وبدأ فى التردد على ذلك المستشفى لأخذ العلاج حتى بات معروفا لدى الجميع مما جعل الأطباء بالمستشفى والذين يعملون كأساتذة بكلية الطب بجامعة تلك المدينة يستعينون به (كحالة) عند إمتحان الطلاب حيث يطلب منهم الكشف عليه وتشخيص حالته ومن ثم
وصف العلاج المناسب له .
دخلت (منال) .. الطالبة في السنة النهائية في كلية الطب ومعها استاذها الإختصاصي إلى عنبر الباطنية الذي كان قبل يومين مكتظا بالمرضى وتم تفريغه إستعدادا للإمتحان النهائي .. كلها شهر وينتهي الإمتحان وتظهر النتيجة وتصير (منال) .. دكتورة (منال).
تم تجهيز العنبر بالحالات المرضية المزمنة .. المرضى يتم استدعاؤهم بدعاوى المتابعة الدقيقة وإجراء الفحوصات اللازمة . . وبين المتابعة والفحوصات يمتحن عليهم الطلاب كأجندة خفية لإدارة المستشفى ..
- وقف د. حسين امام (عم أيوب) ثم التفت إلى (منال) قائلا: شوفي المريض دا اخدي الهيستري (History) (التأريخ المرضي) منو واعملي التشخيص المبدئي .. ووريني ح تطلبي ياتو فحوصات .. والعلاجات المناسبة شنو .. ثم خرج د. حسين الإختصاصي والأستاذ بالكلية .. إلتفتت (منال) لعم (أيوب) وهى تضع السماعات على أذنيها :
- إذيك ياعمو ..
- اهلن يابتي ..
- ياعمو اها وريني .. بتشكي من شنو بالضبط كده ؟
- شحتفت روح ووجع أضان ساااكت ..
- كيف يا عمو .. إنت في عنبر الباطنية .. يعني لازم يكون عندك حاجة متعلقة بالبطن .. او السدرية ..
- قلت ليكي .. بس اضاني ..
- عليك الله ياعمو ورينى عندك شنو؟ .. انا والله كدا ح اسقط في الإمتحان .. وبابا وماما ح يزعلو شديد شديد ..
- بابا وماما وين .. ؟
- برة .. مغتربين وكده ..
- وبيقروكى على حسابهم ؟
- ايوة ياعمو..
- بتدفعي كم ..؟
- سبعه الف دولار .. ياعمو ..
- تدفعو ليكم سبعه ألف دولار وتشيلو منى (الهيسترى) بتاعى مجانن ! أنا مما مرضت الأدوية انا بشتريها بقروشي .. والمستشفى لمن برقد .. بدفع .. والكشف .. بدفع .. والفحوصات .. بدفع .. طالع بدفع ونازل بدفع .. ولما ينادونا عشان يمتحنوكم فينا .. يقولو لينا .. تعالوا للمراجعة .. وهم مبيتين النيَة يمتحنوكم فينا .. ملح سـااااااااااكت ..أها أنا هسه غير اضاني ما في شئ بيوجعني ..
لم يفت على ((منال)) بأن عم (أيوب) عاوز ليهو حاجه فقامت بفتح شنطتها الجلديه الأنيقه ثم اخرجت منها ورقة مالية معتبرة ودستها في يد عم (أيوب) . . قائلة: معليش يا عمو تساعدك في شراء الأدوية .. وهنا إستعدل (عمو) :
- الحمد لله .. وجع الأضان راح .. اكتبي .. وبدأ عم (أيوب) يسرد في التأريخ المرضي لحالته .. بصورة سلسة تتخللها كثير من المصطلحات الطبية.. واسماء الأدوية المختلفة التي حفظها عن ظهر قلب من من كثرة تردادها امامه كحالة مرضية يمتحن عليها الطلاب…. ولم ينس أن يخبرها بأن التشخيص هو حالة (ازمة شُعبيًة) ..
- اكتبي .. اكتبي .. يا بتي .. بتلقي ويزنق wheezing لما تختي السماعة هنا في الجيست chest.. واشار إلى اسفل صدره .. وفي العلاجات زمان كان بيدوني اماينوفيللين في 100 سي سي درب جلكوز 5 في المية مع الماء .. لكن بقى ما بنفع معاي .. اسع باخد .. فنتولين .. ولو سألوكي من إسمو العلمي .. قولي سالبوتامول .. اصلو د. حسين بيحب يسأل السؤال دا كتير .. وبعدين في حالات الإيميرجنسي Emergency بيدوني هايدروكورتيزون بالوريد .. وبعدو بستمر في حبوب بريدنيزولون 5 ملغم .. يبدأ بجرعة عالية وبيخفضوهو تدريجيا .. و(منال) تكتب .. وتكتب ..
جاء د. حسين .. وبدأت (منال) تقرأ ما كتبته .. وتقرأ .. ثم بدأ د. حسين فى طرح الأسئلة عليها :
- أها حالة المريض دى شخصتيها شنو؟
- ممتاز .. عظيم .. إكسلنت ..
- والفنتولين إسمو العلمي شنو .. ؟
- ممتاز .. عظيم .. إكسلنت ..
- وفى الإيميرجنسى تديهو شنو؟
- ممتاز .. عظيم .. إكسلنت ..
كسرة :
تخرجت (منال) وأصبح يسبق إسمها حرف (الدال) ! .. هسه لو واحد قالو ليهو عم ايوب (العتال) جاوب ليها سؤال بيصدق؟

كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و +(و)
 كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+(و)
كسرة جديدة لنج :
أخبار التقنية الحديثة التي إستخدمت في غش إمتحانات الشهادة السودانية لسنة 2016 يا وزيرة التربية شنوووووووو؟ : (و) ....

[email protected]


تعليقات 19 | إهداء 0 | زيارات 10083

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1441321 [julgam]
4.13/5 (9 صوت)

04-08-2016 07:03 AM
الله يخت محنك ياود جبرا..ياخي انا عندى ليك سؤال.عم أيوب دا مصرى يسكن الدقى ولا اسم على اسم،لأن بت اختى لما قرت موضوعك دا قالت نفس الشي حصل معاها والتفاصيل اياها ولكن بالقصر العينى. .
مبروك الواو الجديده وانشالله المره الاولى زوجة الرجل الأول فى مايسمى حركة اسلاميه تعبرك حتى ولو من طرف خفى..غايتو يا د جبرا انا حاجز صينية البلديه مقابل حوش الخليفه وما بسمح يشاركني فيها زول علا ساخر سبيل أو الشفت توام الروح العم ع.س.شوقى بدرى لزوم الأنس. .

[julgam]

#1440892 [سامي]
4.16/5 (10 صوت)

04-07-2016 10:34 AM
منال دخلت الطب نسبة 65% لزوم ال 65 مليون يااستاذ جبرا وتاني اولادك او احفادك لو ما بقوا عباقرة من 92% وفوق مابشموا طب المسألة كلها نصب في نصب مايخمونا بتحصيل عالي وغيرو من اساليب التدليس

[سامي]

#1440604 [كمال]
4.16/5 (10 صوت)

04-06-2016 08:47 PM
بقت قديمة شوف غيرها

[كمال]

#1440485 [نبيل علي عبدالرحمن]
4.17/5 (11 صوت)

04-06-2016 03:37 PM
معقولة عتالي و يحفظ أسامي الأدوية و المصطلحات الطبية الأجنبية دي يا أستاذ جبرا .. هو يا أخي خريجي كلية الطب ذاتهم الفي زمن ده .. ما بعرفوها .. إلا من رحم ربي .. تقول لي عتالي بعرفا.. طيب أحسن ليهو يشغلوهو تمرجي في المستشفي دي و يبطل عتالة ما دام عندو حساسية و نزلة شعبية و ما بقدر يتحمل روائح التوابل في عمله السابق .. إقتراح جميل مش كدة ؟

[نبيل علي عبدالرحمن]

#1440211 [د. هشام]
4.17/5 (10 صوت)

04-06-2016 08:06 AM
عم أيوب دا أردني؟!

[د. هشام]

ردود على د. هشام
United States [حاجي تشقند] 04-06-2016 09:32 PM
هههه حلوة


#1440169 [ود الشريف]
4.17/5 (11 صوت)

04-06-2016 06:53 AM
بالواضح كده التسريبات عندنا من زمااااان وفي ايوبات كتار زي ما في د منالات كتار .

[ود الشريف]

#1440036 [الحلومر/خريج الابتدائية]
4.15/5 (12 صوت)

04-05-2016 07:25 PM
كسرة جديدة لنج :
أخبار التقنية الحديثة التي إستخدمت في غش إمتحانات الشهادة السودانية لسنة 2016 يا وزيرة التربية شنوووووووو؟ : (و) ....
السؤال موجه لاية وزارةمن البلادان الثلاثة
1/ وزارة التربية السودانية
2/ وزارة التربية المصرية
3/ وزارة التربية الاردنيه
اذا كانت السؤال موجه لوزيرة التربية
الاجابة معروفة ح تقولك منو دي انا دي؟؟ بري بري بري اعذرني ياجبرا
يطرشني لا سمعت ولا جابو لي وحات امي مافي لاغش ولا تسريب

[الحلومر/خريج الابتدائية]

ردود على الحلومر/خريج الابتدائية
[أبوأسامة المهاجر] 04-06-2016 08:21 AM
ههههههههه ههههههههههههههههههههههههه

حلوة يا حلومر


#1440029 [على]
4.15/5 (8 صوت)

04-05-2016 07:09 PM
اها واخبار حلايب عندك شنووووووووووووووووووووووووووو يالفاتح ولا انت برة الخط دا ؟

[على]

#1439934 [سيف الدين الجميلى]
4.16/5 (10 صوت)

04-05-2016 03:39 PM
احبو واحب واواتو واواتو الفى كتاباتو((مع الاعتذار للاغنية)

[سيف الدين الجميلى]

#1439887 [ود الريف الحريف]
4.15/5 (7 صوت)

04-05-2016 02:05 PM
يا أستاذ جبره إنت ما متابع وللا شنو ’’’’ واواتك الكتيرة والممتدة بخصوص لم تثمر عن شيء ,,, ٌقرأت بالأمس أن السيد وكيل النيابات العامة أو هكذا إن لم يكن إختلط الأمر ,,,و المهم بقول الخبر أن ملف هيثرو قد تم إغلاقه وتم توجيه التهمة للسيد مدير شركة عارف التي كانت تدير أمر الخطوط السودانية الحروقة
وشخص آخر ,,, يعنى بهذا الخبر يا سيد جبرا واواتك راحت شمار في كتالحة
يا أخى إنت عاوز ليك محاكمة حرايمة في نظام يديره حرامية ,,, هذا لايعقل أصلا
الفاتحة في خط هيثرو والجايات مش معروفات

[ود الريف الحريف]

#1439866 [خواجة]
4.17/5 (9 صوت)

04-05-2016 01:22 PM
المدينة الرياضية افتتاحها متين ماتكون شكت تاني
من حاجة.

[خواجة]

#1439854 [زول]
4.16/5 (9 صوت)

04-05-2016 01:04 PM
الامتحانات قالوا انها حالات غش وليس تسريب والمعروف ان الطالب الذي يغش يحرم من الامتحان فقط ولكت دي جابت ليها امن قومي وبوليس واخيرا قالوا ان المتورطين في موضوع الامتحان قد غادروا البلاد اذن الحكاية مش حالات غش بس بل تسريب عدييييييل

[زول]

#1439777 [Abu Mohamed]
4.14/5 (11 صوت)

04-05-2016 10:31 AM
للاسف الشديد دا الحاصل يا جبرا.
معظمهم اطباء بدون كم.
مبروك الواوات الجديده.

[Abu Mohamed]

#1439734 [tyson]
4.17/5 (9 صوت)

04-05-2016 09:24 AM
عزيزى جبرا

بعد التحية و الحبشتكانات

اقترح ان تكون إضافة الواو نصف سنوية عشان لجان التحقيق المنبثقة عن اللجان الفرعية المتفرعة من اللجان فرغ الفرعية تاخد راحتها في التلجين و كده


و شكرن

[tyson]

#1439708 [salah]
4.17/5 (11 صوت)

04-05-2016 08:40 AM
استاذنا الفاتح . يديك العافية ر.. يا عم انسي حكاية خط هيثرو دي . هو ذاتو بقي مطار قديم ما بياكل عيش مع مطارات جديدة . مثلا مطار دبي كل 2 ثانية يا طياره طالعة و لا نازلة. خليك تفتيحة يا عم.

[salah]

#1439666 [صالة المغادرة]
4.17/5 (10 صوت)

04-05-2016 06:45 AM
والله يا جبرة انا خايف عليك انت ذاتك من خمة النفس ومرض عمنا ايوب وعشان كده ياجبرة عشان وواتك ما تكتر بدون عقاد نافع تقوم تجينا فى امريكا وزى ما كتبت ليك وصلتك مطار نيويورك تمشى لعمك بان كى مون ومعاك ملف هيثرو عشان الانجليز اتغاتتوا عليك وفطسوا البلاغ وتقوم بالمرة تقابل اعضاء مجلس الامن خاصة ناس العضوية الدائمة وديل تقوم تديهم ملف حقوق الانسان وتقول ليهم ............ وانا ما بفسر وانت ما بتقصر وانا متاكد المرة دى حتنجح وصراحة كده سبب جهجهة بلاغك بالقسم الاوسط لندن هو الشاويش حسنين وطبعا الجينات المصرية مشكلة خاصة اذا كان الموضوع يتعلق بالمنقة المخلوطة وساقطة والدعوة موجهة ليك ياجبرة والتذاكر مؤمنة من الخرطوم الى نيويورك عبر مطار هيثرو .

[صالة المغادرة]

#1439591 [حكم]
4.17/5 (13 صوت)

04-04-2016 11:24 PM
د. عم ايوب من فضلك

[حكم]

#1439577 [عبدالواحد المستغرب اشد الإستغراب!!]
4.16/5 (12 صوت)

04-04-2016 10:27 PM
يا عم جبرا وآخيرا النظام جاب ليك موضوع جديد وواوات جديده نوفى ولجنة التحقيقات (أغلقت التحقيقات)حسب صحيفة الصيحه وما عارفين (الاغلاق ده حاجه إيجابيه ولا حاجه سلبيه؟!!) المهم إذا كانت إيجابيه فنعما بها و بتكون في حاجه غلط قطع شك في (السيستم) الجمعى داخل عقل جهة ما وخاصة نحن ما تعودنا على حاجه إيجابيه من تلقاء النظام !!وإذا كانت سلبيه وده الأرجح خلى (واواتك صاحيه!!)وضيف لكسراتك كسره جديده كأن تكتب متسائلا ( ملفات التحقيقات الاغلقت .. آخبارا شنوووووووو؟!!).

[عبدالواحد المستغرب اشد الإستغراب!!]

ردود على عبدالواحد المستغرب اشد الإستغراب!!
[عبدالواحد المستغرب اشد الإستغراب!!] 04-05-2016 07:12 AM
وكمان كسره جديده وواوات جديده ( مخرجات الحوار آخبارا شنووووووووو؟!!) وإن كنت أظن بأن تسريبات إمتحان الشهاده السودانيه والغبار الكثيف او بالأحرى أنقاضها ستكون قد غطت على كل القضايا وجبتها وصارت في خبر كان وإذا لا قدر الله وسأل شخص غير مسئول عن نتائج المخرجات (في هذا الوقت بالذات) سيجد من يرد عليه قائلا (نحن في شنو وانتو في شنوووو..نقول ليكم تسريبات ..وآمن قومى ..والبلد مستهدف..والمصالح العليا للبلاد.. والإيرانيون مخترقننا عبر الطرق الصوفيه ..تجى تقول لى (مخرجات حوار؟ هو إنتو لسه فاكرين؟ جاتكم البلاوى!! مش كل واحد شارك اخد حقو ناشف ووقتى وبشهادة مهدى إبراهيم من نيويورك؟!!)..مخرجات قال..صدق القال الفاضى يهمز امو..!! اها ياجبرا جملة (واوات بدل ما تكون معلق في كسرتين ومئات الواوات ونظام لا تنقضى عجائبه بيورينا كل يوم جديد ما بيخطر على بال او كما قال شاعر النظام المايوى !!.


#1439558 [سعيد فقير]
4.17/5 (12 صوت)

04-04-2016 09:27 PM
واوات جديدة يا استاذ الفاتح
يا بختنا ؟؟؟؟؟
بس خلينا نشوف حصل شنو في هيثرو بعد تحويل القضية وفتح بلاغات ضد المشترين والبائعين...ز ونعرف القيمة راحت في اى جيب من الجيوب الكبيرة اياها .....
ولكن هم زاتهم منو؟؟؟

[سعيد فقير]

الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة