مشروع السياحة التعليمية
04-14-2016 12:51 PM


ما حدث مؤخراً من قدوم أرتال وأفواج تعد بالآلاف من طلاب عرب برفقة ذويهم لأداء إمتحانات الشهادة السودانية جعل العبدلله يفكر ملياً في الإستفادة من هذا الحضور السنوي من أجل تفعيل وزارة السياحة السودانية القاعدة (لا شغل لا مشغلة) وذلك عن طريق إبتكار نوع من السياحة الجديدة التي لا يوجد لها نظير في العالم أجمع وهي (السياحة التعليمية) ..
ولتكن البداية لهذا المشروع (الإستثماري) الخطير في مراحله الأولى حصراً على مصر (1447 طالب) و الأردن (500 طالب) – كما هي أعداد هذا العام – على أن تشمل المرحلة الثانية من المشروع كل الدول العربية والبترولية (الله أكبر) والأفريقية الناطقة بالعربية (ولو بالفرنسية) نترجم ليهم الإمتحان أيه يعني؟!

القصة ساااهلة جداً وعائدها مضمون 100% ، البداية هي إنشاء قري سياحية (تعليمية) في أطراف العاصمة القومية على ان تحتوي هذه القري السياحية على (أستديوهات) لسكن الطلاب (غرفة بسريرين) و(حمام) ومكتب (للمذاكرة طبعن) ، وبما أن مجموع الطلاب المصريين والأردنيين لهذا العام هو (1447+500) = 1947 طالب (نقول 2000) فإذا كان كل طالب يرافقه شخص واحد من ذويه على كده يكون العدد 4000 .. إذا نحن نحتاج إلى 2000 وحده سكنية صغيرة ، على أن تضم هذه القري السياحية التعليمية كل متطلبات الترفيه من ملاعب رياضية وأندية مشاهدة وحمامات سباحة ومحلات حلاقة وسونا وسوبرماركت وأنترنت كافيه وخلافه ! (شوفوا الحاجات دي ممكن يشتغل فيها كم شاب عاطل عن العمل) .
الدراسة المبدئية لهذا المشروع تقول أن هذه الأفواج تستهلك يوميا :
3 وجبة في اليوم لعدد 4000 طالب ومرافق يعني المجموع 12000وجبة يوميا وإذا علمنا بأن إقامتهم 4 شهور أي 120 يوم يكون إجمالي ما يستهلكونه من وجبات (إقامة+إمتحان) مليون وأربعمائة وأربعين ألف وجبة !!
وإذا كان كل شخص من الـ4000 ديل بيتناول زجاجة واحدة من (موية الصحة) حجم واحد لتر في اليوم فذلك يعني أنهم خلال الـ120 يوم دي ح يتناولوا عدد 480.000 زجاجة ماء عائلي ، وهكذا (الشاي) و (القهوة) وأكيد السجائرو(الشيشة) وضربوها براكم !
والعجب الإتصالات (العالمية) للإطمئنان على سير (الخطة!) السياحية فلو أن كل شخص من هؤلاء الـ 4000 تحدث مع أهلة لمد 5 دقائق في اليوم لصار زمن المحادثات 20000 دقيقة في اليوم أي 333 ساعة إتصال يوميا أي حواي 40000 (أربعين ألف ساعة إتصال) خلال ال120 يوما التي سوف يقضونها في هذه السياحة التعليمية (الجميلة) !
المشروع ناجح وما عاوز ليهو كلام فقط قرية للإخوة المصريين وقرية أخري للإخوة الأردنيين (يكونوا بعيدات من بعض ما يحصل تنسيق) .
من أجمل مافي هذا المشروع إنو ما عاوز ليهو أي أعلان أو إعلام لأنو الناس (عارفه الدرب) .
ما يوفره هذا المشروع :
• حجوزات الطيران (بالخطوط السودانية) وأهو برضو قرشين حلوين
• حجوزات السكن في القري السياحي- تعليمية
• التمتع بالخدمات الداخلية بالقري
• توفير أساتذة خصوصين للمواد (ما ظنيتهم بيحتاجو للحاجة دي)
• توفير بصات لنقل الطلاب وذويهم من وإلى أماكن السكن ومراكز الإمتحانات
• توفير الأمن والحماية للطلاب وأسرهم داخل القري السياحي- تعليمية
• بعد أداء الإمتحانات وفرحة النجاح (قبل ظهور النتيجة) يتم عمل رحلات سياحية للطلاب وذويهم
بقي أن نعلم أن تكلفة الرحلة الآن للطالب الواحد مع مرافقة هي 10 ألف دولار (شاملة التذاكر) كما صرح أحد ذوي الطلاب (المصريين) في أحدى القنوات الفضائية وبالتالي فإن ما سوف يعود على الخزينة العامة (سنوياً)في ظرف 4 أشهر هو 10000X 2000= عشرين مليون دولار ! كحد أدني ناهيك عندما يزداد هذا العدد أضعافاً خصوصا بعد أن تعم (شهرتنا) الآفاق ، وهو رقم كما تلاحظون كبير يمكنه أن يساهم في ترقية البنى (التحتانية) للتعليم في بلادنا !!
كسرة :
يجب عند إقامة هذا المشروع تفتيش الطلاب منعا لحملهم أجهزة تصنت عالية الدقة (أو كما قالت الست الوزيرة) !!
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و +و+ (و)
 كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+(و)
كسرة جديدة لنج :
أخبار التقنية الحديثة التي إستخدمت في غش إمتحانات الشهادة السودانية لسنة 2016 يا وزيرة التربية شنوووووووو؟ : (و) ….


تعليقات 9 | إهداء 0 | زيارات 5076

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1444973 [samer]
4.18/5 (7 صوت)

04-15-2016 08:04 AM
تعرف يا ود جبره مشروعك دا مضروب ما اصلو الجماعه اياهم بياخذوا من الواحد 7 الف دولار فيها الدعوات و التسجيل و ضمان تسريب الامتحان و عشان ما يكونوا فى عين الناس بيوزعوهم فى شقق مفروشه فى العاصمه حسب المركز الذى يمتحن فيه , و انت فاكر ناس الحكومه ديل عبيطين و بيعملوا دراسات جدوى ما كل شئ تحت التربيزه

[samer]

#1444796 [على]
4.18/5 (8 صوت)

04-14-2016 07:37 PM
وين حلايب ياالفاتح منكسراتك ام انت شايف حلايب ماعيزة كسرة تمشى طوالى بدون رجعةغايتو ربنا معاكم ياناس حلايب

[على]

#1444763 [هميم]
4.15/5 (9 صوت)

04-14-2016 06:38 PM
عشرين مليون دولار وتغمض وتفتح يا جبرا وما حتعرفها مشت وين! ستتبخر ككل خيرات البلد إلى جيوب الكيزان حسب موقع كل كوز في العصابة ... قاتلهم الله!

[هميم]

#1444747 [حاج علي]
4.18/5 (8 صوت)

04-14-2016 05:58 PM
والله يا جبرة دراسة الجدوي دي حيخطفها واحد كوز وتنفذ وما حيوك ولا مليم

[حاج علي]

#1444678 [جوكر]
4.07/5 (5 صوت)

04-14-2016 03:46 PM
يا الفاتح فات عليك قيمة الأوراق المسربة يعنى الطلاب الأردنيون دفعو 1000 دولار لشرائها من المسربين السودانيين وطبعا الشغلانة بقت مصدر سنوي وقريشات حلوة للبعض من بنى جلدتنا تعرفهم الحكومة تمام المعرفة لكنها تسترت عليهم ودغمسوها لغش.

[جوكر]

#1444637 [الحضارة]
4.10/5 (6 صوت)

04-14-2016 02:20 PM
عشان كده ..... يادوب فهمت علاقة بيع جامعة الخرطوم بواسطة الوزير انصار السنة محمد ابوزيد وزير السياحة بذيادة ريع عائدات السياحة جبرة ياخطر ، بس عندي مقترح بسيط ممكن تكون فى دروس عصر خاصة بي كورسات التقنية لانوه اصبح أمر ضروري ... يعني عشان التعامل (end user) مع اجهزة التنصت وكده ...كسرة ثابتة... جديدة...الاستاذة منجدة ح تشتغل شنو ... اكيد دليل سياحي

[الحضارة]

#1444629 [Osama Dai Elnaiem]
4.10/5 (7 صوت)

04-14-2016 02:09 PM
عزيزي الاستاذ/ الفاتح-- لك التحية-- انت عارف انك وزير مالية ( كا مل الدسم) وتنفع تقدم طلب تجنيد للجماعة ( يمكن اصلك معهم) - المهم ده اسلوبه في تمويل التنظيم الذي يرضع من ثدي دولة السودان الكانت وبعد ما شيخ علي بيض الجنوب ودخل فيه قون انفصل البترول ايضا ( عربية الفرملة) وصار القطر ( ام فكو) بتاعة عثمان ميرغني ولتمويل التنظيم والجماعة ولتحقيق قسمة الثروة ( السلطة لا تقسم الا علي البشير) - المهم مالية التنمية ( تنمية وتسمين التنظيم) اصبحت تتم عبر بيع ( الحتات) عشان كده لما جاء الحوار عبد الرحيم حسين وجد الشاطر الخضر باعها كلها ( اي الحتات) وقروشها لحقت خط هيثرو ( يعني طلع احرف منك) وعشان يتحلل جاب الناس البيصلوا معاه الصبح حاضر ليشهدوا ببراءته -- شفت كيف الحرفنه-- المهم انت وعيت اخيرا لقصة تمويل النظام زما دام بديت في السياحة الطلابية العكسية طبعا عكس اتلسياحة العلاجية التي تتم الي الاردن ومصر فاعتقد انك مشروع وزير مالية مكرب وما تتعاور تسوي لي فيها وواوات ( سف سفك) وانت ساكت زي ناس انصار السنة.

[Osama Dai Elnaiem]

#1444626 [ود الشريف]
4.15/5 (9 صوت)

04-14-2016 01:58 PM
الله لا كسبك انت مع معانا ولا مع الخيانة ! اسع الجماعة يعملوا وزير السياحة التعليمية وبي كده يهبروا برا وجوا .

[ود الشريف]

#1444605 [ابوشوارب]
4.07/5 (5 صوت)

04-14-2016 01:37 PM
تحظر العمالة الاجنبية فى هذه القرى ( السياحتعليمية )مع التركيز فى حتة ستات الشاى من البلدان المجاورة عشان الطلبة يركزوا فى حفظ الاجابات وكدا

[ابوشوارب]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة